¿Saʼ (wach) ri Qʼatbʼal Tzij re ri Dios?

1. ¿Saʼ (wach) ri Qʼatbʼal Tzij re ri Dios?

Are jun gobierno re chilaʼ chikaj. Xa naqaj chik kusachisaj kiwach ronoje ri taq qʼatbʼal tzij re ri winaq y kukoj na ri Uqʼatbʼal Tzij. Ruma laʼ wara chwach ri Ulew y chilaʼ chikaj kuʼan ri karaj ri Dios. Ri utzilaj taq tzij re ri Qʼatbʼal Tzij re ri Dios are lik utz. Ri Qʼatbʼal Tzij re ri Dios kukʼam loq utzilal chi rajawaxik chike ri winaq. Kuʼan chike kekʼojiʼ junam chwach ri juyubʼ taqʼaj. Chawilaʼ Lucas 1:33; Mateo 6:9, 10, y 24:14.

Pa ronoje qʼatbʼal tzij kʼo jun taqanel. Jehová ukojom ri Ukʼajol, Jesucristo re Ajtaqanel pa ri Uqʼatbʼal Tzij. Chawilaʼ Apocalipsis 11:15.

Wila’ ri video ¿Saʼ (wach) ri Reino re ri Dios?

2. ¿Bʼuchak chi are Jesús ri más utzilaj Taqanel?

Ri Ukʼajol ri Dios are ri más utzilaj Ajtaqanel ruma lik kʼo unimal rutzil ukʼuʼx y kuʼan ri jusukʼ (Mateo 11:28-30). Kʼo nim uchuqʼabʼ re kebʼutoʼo ri winaq y kuchapebʼeej na ri Uqʼatbʼal Tzij puwiʼ ri Uwachulew kʼa chilaʼ chikaj. Ri Jesús xkʼastaj loq, xeʼek chilaʼ chikaj, xetzʼuloq (xkubʼi) pa utzal ri utat, y xuroyeʼej ri Dios kuʼan Ajtaqanel che (Hebreos 10:12, 13). Tekʼuriʼ, ri Dios xuʼan Ajtaqanel che. Chawilaʼ Lucas 1:32, 33.

3. ¿Chinaʼ (je pachinoq) ketaqan ruukʼ ri Jesús?

Jehová ebʼuchaʼom jupuq winaq re ketaqan chilaʼ chikaj ruukʼ ri Jesús (Apocalipsis 5:10). Are xkʼun ri Jesús chwach ri Ulew xebʼuchaʼo jupuq winaq re utijoxelabʼ, rike e apóstoles. Rike e jusukʼ y nabʼe xechaʼik re ketaqan chilaʼ chikaj. Jehová kʼa katajin che uchaʼik ixoqibʼ y achijabʼ re ri jupuq riʼ pa ri qʼij ojkʼo wi. Pachaʼ ri Jesús rike kekʼastaj loq ruukʼ kitijil (kichʼakul) re uxlabʼal (tewal). Chawilaʼ Juan 14:1-3 y 1 Corintios 15:42-44.

¿Niʼpa winaq kebʼek chilaʼ chikaj? Ri Biblia kubʼij xa e jupuq (Lucas 12:32). Konoje ri kebʼek chilaʼ chikaj re ketaqanik ruukʼ ri Jesús are 144.000. Chawilaʼ Apocalipsis 14:1.

4. ¿Saʼ (wach) xʼanatajik chi are Jesús xujeq ri Uqʼatbʼal Tzij?

Jesús xuʼan Ajtaqanel pa ri junabʼ 1914a. ¿Saʼ xuʼano are xujeq ri Uqʼatbʼal Tzij? Chilaʼ chikaj xebʼukʼaq loq ri Satanás y ri demonios wara chwach Ulew. Satanás lik xpe royowal, xujeq uʼanik kʼaxkʼoliil pa ronoje ri juyubʼ taqʼaj (Apocalipsis 12:7-10, 12). Ruma laʼ lik kʼi ri kʼaxkʼoliil kojtajin chi rilik. Chʼaʼoj, numik, yabʼiil, y kabʼraqan are ri «retalil» xa naqaj chik ri Qʼatbʼal Tzij re ri Dios kataqanik puwiʼ ri Uwachulew. Chawilaʼ Lucas 21:7, 10, 11, 31.

5. ¿Saʼ (wach) ri kuʼan na ri Qʼatbʼal Tzij re ri Dios?

Ruukʼ jun nimalaj chak re tzijonik che ronoje Uwachulew, ri Qʼatbʼal Tzij re ri Dios katajin chi umolik kʼiyal winaq re ronoje tinamit. Kʼiyal winaq utz kikʼuʼx e kʼo pa ri utinamit y kikojom tzij che ri Jesús. Ri Uqʼatbʼal Tzij re ri Dios kebʼuchajij na pa ri qʼij kusachisaj kiwach ri winaq itzel kikʼuʼx. Konoje ri kakaj kakiriq utzilal re ri Uqʼatbʼal Tzij ri Dios, rajawaxik kakikoj tzij che ri Jesús. Chawilaʼ Apocalipsis 7:9, 14, 16, 17.

Ri Jesús kataqan na 1.000 junabʼ. Ri Uqʼatbʼal Tzij kuʼan na ri urayibʼal re ri Dios ri xraj che ri jeqebʼal loq re ri winaq. Kuʼan chom che ronoje ri juyubʼ taqʼaj. Kʼa tekʼuriʼ, Jesús kuyaʼo ri Qʼatbʼal Tzij che ri Utat (1 Corintios 15:24-26). ¿Kawaj kabʼij che jun chik puwiʼ ri Qʼatbʼal Tzij re ri Dios? Chawilaʼ 2 Pedro 3:13.