¿Saʼ, o wach, kachʼobʼ puwiʼ ri Biblia?

RI KUBʼIJ RI BIBLIA

«Ronojel niʼpa i tzʼibʼtal kan chupam uwuuj i Dios [...] ruukʼ i Dios petnaq wi.» (2 Timoteo 3:16, I ʼUtz laj Tzij re i Dios, Wycliffe Bible Translators, kʼaakʼ tzʼiibʼ.)

SAʼ UʼANIK KOJUTOʼO KAQETAMAJ

Kaqariq kʼulubʼal uwach che ri nimaq taq tzʼonobʼenik re ri kʼaslemaal (Proverbios 2:1-5).

Kaqetamaj saʼ o wach kaqaʼan pa ri qakʼaslemaal jujuun taq qʼiij (Salmo 119:105).

Kojutoʼo re kaqoyʼej ri kubʼij ri Dios (Romanos 15:4).

¿UTZ KAQAKOJO RI KUBʼIJ RI BIBLIA?

Utz. Qilaʼ oxibʼ kʼutubʼal:

• Na kajalkʼatij taj ri kubʼij. 40 achijaabʼ xkitzʼibʼaj ri Biblia pa 1.600 junaabʼ. Ri ke naxketamaj ta kiwach, pero ronoje ri xkitzʼibʼaj na xkijalkʼatij taj. Ronoje ri kubʼij ri Biblia kuʼan nim che ri Ubʼiʼ y ri Utaqaneel o Qʼatbʼal Tziij re ri Dios.

• Qatziij ri kakibʼij ri aj tzʼibʼanelaabʼ. Ri tzijoneel re kʼiyaal taq wuuj na kakitzʼibʼaj ta ri maak re ri kitinamit. Pero ri tzʼibʼanelaabʼ re ri Biblia xkitzʼibʼaj ri kimaak ri ke y ri xkiʼan ri kitinamit (2 Crónicas 36:15, 16; Salmo 51:1-4).

• Ronoje ri kubʼij ke kʼowik qatziij kuʼano. Ri Biblia xubʼij ke ri nimalaj tinamit Babilonia kasachisax uwach. Xekʼowik 200 junaabʼ y xʼantajik (Isaías 13:17-22). Na xew ta xubʼij saʼ, o wach, uʼanik kasach uwach ri tinamit, xubʼij ri ubʼiʼ ri achi xʼanow re (Isaías 45:1-3).

  Kʼiyaal taq chik sach, o bʼiroxik, xkitzʼibʼaj ri aj chaak re ri Dios y xʼantajik. Xew jun wuuj petinaq ruukʼ ri Dios kuya retaʼmaxik ronoje ri kaqakʼulumaj na. ¿Qatziij? (2 Pedro 1:21.)