¿Saʼ, o wach uʼanik, kaqariq kiʼkotemal pa ri qafamilia?

RI KUBʼIJ RI BIBLIA

«Kekiʼkotik ri kakita ri upixabʼ ri Dios y kakikojo.» (Lucas 11:28, Traducción del Nuevo Mundo.)

SAʼ UʼANIK KOJUTOʼO KAQETAMAJ

Kaqariq qatziij kʼaxnabʼalkʼux (Efesios 5:28, 29).

Kaqata na ri kakichʼobʼ jujuun taq chik (Efesios 5:33).

Na kaqaxiʼij ta chi qiibʼ (Marcos 10:6-9).

¿UTZ KAQAKOJO RI KUBʼIJ RI BIBLIA?

Utz. Qilaʼ kebʼ kʼutubʼal:

• Dios xʼanow re ri familia. Ri Biblia kubʼij: «Che ri Qaqaw e petinaq wi konoje taq ri familia» (Efesios 3:14, 15, Nuevo Testamento en Rabinal Achí). Wa karaj kubʼij konoje ri familia e kʼolik ruma ri Jehová. ¿Suʼchak lik rajawaxik kaqetamaj wa?

  Chʼobʼo puwiʼ jun waʼim lik quus y kawaj kawetamaj saʼ o wach taq ukunubʼaliil kojoom, ¿na —o pachin— che katzʼonoj wi? Che ri winaq xʼanow re, ¿qatziij?

  Junaam we kawaj kawetamaj saʼ uʼanik kariq kiʼkotemal pa ri afamilia, utz katzukuj ri Jehová, ruma ri re xʼanow ri familia (Génesis 2:18-24).

• Ri Dios kojuchajij. Ri familia utz kakitzukuj pixibʼanik chupa ri Biblia ruma ri re utz qachajixik kuʼano (1 Pedro 5:6, 7). Jehová karaj ri utz chaqe y ri upixibʼanik lik kojutoʼo (Proverbios 3:5, 6; Isaías 48:17, 18).