¿Na, o pachin, puqʼaabʼ kʼo wi ri Uwachulew?

RI KUBʼIJ RI BIBLIA

«Ronojel i juyubʼ taqʼaj [o Uwachulew] kʼo puqʼaabʼ itzel.» (1 Juan 5:19, I ʼUtz laj Tzij re i Dios, Wycliffe Bible Translators, kʼaakʼ tzʼiibʼ.)

«U Kʼojol i Dios xkʼun chwach i juyubʼ taqʼaj, xolusacha uwach niʼpa uʼanom itzel.» (1 Juan 3:8.)

SAʼ UʼANIK KOJUTOʼO KAQETAMAJ

Kaqakʼam usuukʼ suʼchak kʼo kʼax wara chwach Uleew (Apocalipsis [Revelación] 12:12).

Qoyʼem jun Uwachulew lik choom (1 Juan 2:17).

¿UTZ KAQAKOJO RI KUBʼIJ RI BIBLIA?

Utz. Qilaʼ oxibʼ kʼutubʼal:

• Ri utaqaneel o qʼatbʼal tziij ri Itzel kakʼis uwach. Ri Itzel kataqan puwiʼ ri Uwachulew, pero Jehová karaj kusachisaj uwach ruukʼ ronoje ranimaʼ ri utaqaneel. Ri Dios «kukʼis na uwach ri Itzel» y kuyijbʼa ronoje ri kʼax uʼanoom (Hebreos 2:14, Traducción del Nuevo Mundo).

• Jesús are Taqaneel uchaʼoom ri Dios. Jesús na junaam taj ruukʼ ri taqaneel re ri Itzel ruma ri re katijin che uʼanik kʼax che ri Uwachulew. Dios kubʼij ke Jesús, ri Utaqaneel, kʼaxkebʼunaʼ ri kakiʼan chʼutin che kiibʼ y ri nibʼaʼ y kuresaj na ronoje ri kʼax (Salmo 72:13, 14).

• Ri Dios xew kubʼij ri qatziij. Are ri kubʼij ri Biblia (Hebreos 6:18). Ronoje ri ubʼital, Jehová kuʼano (Isaías 55:10, 11). Y ri re kubʼij: «Kesax na kʼu bʼi ritzel winaq, ri jun kataqan che ruwachulew» (Juan 12:31, Nuevo Testamento en Rabinal Achí).