1 Kronika

14 Tiro Matsɛ Hiram tsɔ tsɔli kɛ ya David ngɔ, nɛ e ha nɛ a ngɔ seda tsohi, tɛ gbogbo fiali, kɛ tso he ní tsuli kɛ ya konɛ a ya ma we* ha lɛ. 2 Nɛ David yɔse kaa Yehowa to lɛ si wawɛɛ nitsɛ kaa matsɛ konɛ e ye Israel nɔ, ejakaa e ma Israel he je ɔ, e wó David matsɛ yemi ɔ nɔ gojoo.

3 David ngɔ yihi fuu ngɛ Yerusalem, nɛ David fɔ binyumuhi kɛ biyihi fuu. 4 Bimɛ nɛ a fɔ kɛ ha lɛ ngɛ Yerusalem ɔ a biɛhi ji nɛ ɔmɛ nɛ: Shamua, Shobab, Natan, Salomo, 5 Ibhar, Elishua, Elpelet, 6 Noga, Nefeg, Yafia, 7 Elishama, Beeliada, kɛ Elifelet.

8 Benɛ Filistibi ɔmɛ nu kaa a pɔ David nu kaa matsɛ konɛ e ye Israel tsuo nɔ ɔ, Filistibi ɔmɛ tsuo ba hla David. Benɛ David nu he ɔ, e je kpo kɛ ya tua mɛ. 9 Kɛkɛ nɛ Filistibi ɔmɛ ba, nɛ a ya nɔ nɛ a tua nihi ngɛ Refaim Dɔgba a mi. 10 David bi Mawu ke: “Ma ya tua Filistibi ɔmɛ lo? O maa ngɔ mɛ kɛ wo ye dɛ mi lo?” Nɛ Yehowa de lɛ ke: “Yaa, ejakaa bɔ fɛɛ bɔ nɛ ji ɔ, ma ngɔ mɛ kɛ wo o dɛ mi.” 11 Lɔ ɔ he ɔ, David ya Baal Perazim, nɛ e ya gbe mɛ kɛ pue si ngɛ lejɛ ɔ. Kɛkɛ nɛ David de ke: “Anɔkuale Mawu ɔ gu ye nine nɔ kɛ gblee ye he nyɛli ɔmɛ a kpɛti kaa nyu nɛ hia lalaala kɛ bee.” Enɛ ɔ he je nɛ a wo lejɛ ɔ biɛ ke Baal Perazim* ɔ nɛ. 12 Filistibi ɔmɛ je a mawu ɔmɛ a he ngɛ lejɛ ɔ, nɛ a sã ní nɛ ɔmɛ ngɛ David fami nya.

13 Pee se ɔ, Filistibi ɔmɛ ya tua nihi ngɛ dɔgba a mi ekohu. 14 David kpale ya bi Mawu juɛmi, se anɔkuale Mawu ɔ de lɛ ke: “Koo kuɔ kɛ ya ná mɛ tɛɛ. Mohu ɔ, yaa lɔgɔ kɛ gu a se je, nɛ́ o ba tua mɛ ngɛ baka tso ɔmɛ a hɛ mi. 15 Nɛ ke o nu pɛmi ko ngɛ baka tso ɔmɛ a yi mi kaa tabuli a nyɛɛmi ɔ, yaa nɛ o ya tua mɛ, ejakaa anɔkuale Mawu ɔ je kpo kɛ sɛ o hlami konɛ e ya gbe Filistibi ɔmɛ a tabuli ɔmɛ kɛ pue si.” 16 Lɔ ɔ he ɔ, David pee kaa bɔ nɛ anɔkuale Mawu ɔ fã lɛ ɔ pɛpɛɛpɛ, nɛ a gbe Filistibi ɔmɛ a tabuli ɔmɛ kɛ pue si kɛ je Gibeon kɛ ya su Gezer. 17 Nɛ David he biɛ ngɛ zugba amɛ tsuo a nɔ, nɛ Yehowa ha nɛ je ma amɛ tsuo ye lɛ gbeye.