Yesaya
15 Munyu nɛ a tu kɛ si Moab ji nɛ ɔ nɛ:
Akɛnɛ a kpata e hɛ mi ngɛ nyɔ kake mi he je ɔ,
Ar nɛ ngɛ Moab ɔ pee dii.
Akɛnɛ a kpata e hɛ mi ngɛ nyɔ kake mi he je ɔ,
Kir nɛ ngɛ Moab ɔ pee dii.
2 E kuɔ kɛ ho We* ɔ kɛ Dibon ya,
Kɛ ho hehi nɛ ya hiɔwe ɔ ya konɛ e ya fo ya.
Moab ngɛ Nebo kɛ Medeba he ya foe boboobo.
A sɛ yi fɛɛ yi kpalokpalo, a kpa kpɛni fɛɛ kpɛni.
3 A ha kpekpe ngɛ e gbɛjegbɛ ɔmɛ a nɔ.
Mɛ tsuo a foɔ ya boboobo ngɛ a tsu ɔmɛ a yi mi kɛ a ma a he nya buami he ɔmɛ;
A kɛ ya fomi kpleɔ si.
4 Heshbon kɛ Eleale kpaa ngmlaa wawɛɛ;
A nuɔ a gbi ngɛ Yahaz tɔɔ.
Enɛ ɔ he je nɛ Moab tabuli ɔmɛ yaa nɔ nɛ a kpaa ngmlaa a nɛ.
E* he ngɛ doe blibliibli.
5 Ye tsui ngɛ ya foe boboobo ngɛ Moab he je.
E nihi nɛ a tu fo ɔ ho tsitsaa Zoar kɛ Eglat Shelishiya ya.
Benɛ a ngɛ Luhit yoku ɔ kuɔe ɔ, a ngɛ ya foe;
Benɛ a ngɛ blɔ nɔ kɛ yaa Horonaim ɔ, a ngɛ ngmlaa kpae ngɛ amanehlu nɛ ba a he je.
6 Ejakaa Nimrim nyu ɔ tsuo mii ta;
Nga mumu ɔmɛ gbli,
Nga amɛ gbo, nɛ nɔ́ mumu ko po píɛ.
7 Enɛ ɔ he je nɛ a ngɛ níhi nɛ piɛ ngɛ a nito he ɔmɛ kɛ a ní babauu nɛ a ná a muɔe kɛ yaa a nɛ;
8 Ejakaa ngmlaa a ngɛ jijee ngɛ Moab zugba a nɔ tsuo.
Ya boboobo ɔ su Eglaim;
Ya boboobo ɔ su Beerelim.
9 Dimon nyu ɔ tsuo hyi kɛ muɔ,
Nɛ i ngɛ níhi fuu nɛ ma pee Dimon po pe jã:
Jata ma ba tua Moabbi nɛ a maa tu fo
Kɛ ni nɛmɛ nɛ a maa piɛ ngɛ zugba a nɔ ɔ.