Yesaya
21 Munyu nɛ a tu kɛ si wo nya nga kplanaa a ji nɛ ɔ nɛ:*
E ma kaa ahumi nɛ ngɛ fiae kɛ je woyi je,
Kɛ je nga kplanaa a nɔ, kɛ je zugba nɛ e nɔ ngɛ gbeye ɔ nɔ.
2 A je nina ko nɛ ngɛ gbeye kpo kɛ tsɔɔ mi:
Nɔ sisilɔ ɔ ngɛ nɔ sisie,
Nɛ nɔ́ puɛlɔ ɔ ngɛ ní puɛe.
Oo Elam, moo kuɔ kɛ ya, Oo Media, mo ya wo ka!
Ma ha nɛ haomi nɛ e kɛ ba a tsuo se maa po.
3 Lɔ ɔ he je nɛ i ngɛ he hiami mi ɔ nɛ.*
I nu kɔɔmi,
Kaa yo nɛ e ngɛ fɔe.
Haomi tsi ye tue;
I pee basaa, lɔ ɔ he ɔ, i hyɛ we nɔ́ hu.
4 Ye tsui ngɛ fiae kpla kpla; gbeye ha nɛ ye he ngɛ doe blibliibli.
Jinɛ ye bua jɔɔ ke pu nɔ si, se amlɔ nɛ ɔ, e haa nɛ ye he doɔ blibliibli.
5 Nyɛɛ to okplɔɔ, nɛ nyɛɛ to sɛ ɔmɛ!
Nyɛɛ ye ní, nɛ nyɛɛ nu ní!
Nyɛ ma nikɔtɔmahi, nyɛɛ te si nɛ nyɛɛ pɔ tsɛ̃i ɔ nu!
6 Ejakaa nɔ́ nɛ Yehowa de mi ji nɛ ɔ nɛ:
“Yaa, ha nɛ nɔ ko nɛ e hwɔɔ, nɛ e de nɔ́ nɛ e na a.”
7 Kɛkɛ nɛ e na ta zugba lɛ nɛ okpɔngɔhi ngɛ gblae,
Ta zugba lɛ nɛ tejihi ngɛ gblae,
Ta zugba lɛ nɛ afukpɔngɔhi ngɛ gblae.
E pa e hɛ mi, nɛ e hyɛ nɔ́ nɛ ngɛ nɔ yae ɔ totooto.
8 Kɛkɛ nɛ e kpa ngmlaa kaa jata nɛ ngɛ huae:
“Oo Yehowa, daa ligbi ɔ, i daa si ngɛ hwɔɔmi mɔ ɔ nɔ,
Nɛ i daa ye blɔ he kɛ hwɔɔ daa nyɔ mi.
9 Hyɛ nɔ́ nɛ ma a:
Nyumuhi nɛ a hi ta zugba lɛ nɛ okpɔngɔhi ngɛ gblae mi!”
Kɛkɛ nɛ e tu munyu nɛ e de ke:
E nɔ si, Babilon nɔ si!
A ku e we amaga amɛ tsuo ngɔ pue si!
10 Oo ye we bi nɛ a sa nyɛ mi kaa ngma,
Nɔ́* nɛ i ná kɛ je ngma fiaami he ɔ,
I de nyɛ nɔ́ nɛ i nu kɛ je Yehowa tabohiatsɛ Israel Mawu ɔ ngɔ ɔ.
11 Munyu nɛ a tu kɛ si Duma* ji nɛ ɔ nɛ:
Nɔ ko ngɛ Seir ngɛ ngmlaa kpae kɛ ngɛ bie ke:
Bulɔ, be enyɛmɛ e piɛ nɛ je maa na?
Bulɔ, be enyɛmɛ e piɛ nɛ je maa na?
12 Bulɔ ɔ de ke:
“Je ma nami, nɛ je hu ma ba jɔ.
Ke nyɛ ma bi ɔ, nyɛ bi.
Nyɛɛ kpale ba ekohu!”
13 Munyu nɛ a tu kɛ si nga kplanaa a ji nɛ ɔ nɛ:
O maa hwɔ hue tso mi ngɛ nga kplanaa nɔ nyɔ mi,
Oo Dedan blɔ hiali.
14 Nyɛɛ ngɔ nyu kɛ ba ha nɔ nɛ kuma ngɛ lɛ yee ɔ,
Nyɛ nihi nɛ nyɛ ngɛ Tema zugba a nɔ,
Nɛ́ nyɛɛ ngɔ abolo kɛ ba ha nɔ nɛ ngɛ fo tue ɔ.
15 Ejakaa a tu fo kɛ je klaate nya, kɛ je klaate nɛ a hia ngɔ wo a he ɔ nya,
A tu fo kɛ je kɛ̃ɛ̃ nɛ a gbla mi ɔ nya, nɛ a tu fo kɛ je ta nɛ e mi wa a nya.
16 Ejakaa nɔ́ nɛ Yehowa de mi ji nɛ ɔ nɛ: “Ngɛ jeha kake mi, kaa bɔ nɛ apaatsɛ buɔ jeha a,* Kedar hɛ mi nyami ɔ tsuo se maa po. 17 Kɛ̃ɛ̃ tsɛ̃li nɛ a maa piɛ ngɛ Kedar tabuli ɔmɛ a kpɛti ɔ a he be hiɛe hu, ejakaa Yehowa Israel Mawu ɔ lɛ de.”