Ezekiel
32 Nɛ ngɛ jeha 12 ɔ we nyɔhiɔ 12 ɔ we kekleekle ligbi ɔ nɔ ɔ, Yehowa kɛ mi tu munyu ekohu nɛ e de mi ke: 2 “Nɔmlɔ bi, mo la aywilɛho yemi la kɛ kɔ Egipt matsɛ Farao he, nɛ o de lɛ ke,
‘O ngɛ kaa jata* ngɛ je ma amɛ a kpɛti,
Se a ha nɛ o pee dii.
O ngɛ kaa wo mi lohwe awi yelɔ ngua nɛ́ o ngɛ silee gidigidi ngɛ o pa amɛ* a mi,
O kɛ o nane gbidiɔ pa amɛ nɛ o haa nɛ a mi sɛɔ mu.’
3 Nɔ́ nɛ Nyɔmtsɛ Matsɛ Yehowa de ji nɛ ɔ nɛ:
‘Ma gu je mahi babauu a nɔ kɛ fɔ ye ya a kɛ bu o nɔ,
Nɛ a maa gbla mo kɛ wo ye adlai ɔ* mi.
4 Ma kua mo ngɛ zugba a nɔ;
Ma sake mo kɛ fɔ nga a nɔ.
Ma ha nɛ hiɔwe lohwe pɛlitsɛmɛ tsuo ma ba ma o nɔ,
Nɛ ma ha nɛ lohwe awi yeli nɛ a ngɛ je ɔ mi tsuo maa ye mo nɛ a maa tɔ.
5 Ma sake o he lo ɔ kɛ fɔ yoku ɔmɛ a nɔ
Nɛ ma ha nɛ o gbogboe ɔ ma hyi dɔgba amɛ a mi tɔ.
6 Ma ha nɛ o muɔ nɛ ngɛ bee babaaba a maa be ngɛ zugba a nɔ kɛ ho yoku ɔmɛ a nɔ ya,
Nɛ e ma hyi pa amɛ a mi tɔ.’*
7 ‘Nɛ ke i kpata o hɛ mi ɔ, ma ha hiɔwe ɔ hɛ mi, nɛ ma ha nɛ e dodoe ɔmɛ ma yu tuu.
I kɛ bɔkuhi maa ha pu ɔ hɛ mi,
Nɛ nyɔhiɔ ɔ hu be kpɛe.
8 Ma ha nɛ kanehi tsuo nɛ a kpɛɔ ngɛ hiɔwe ɔ maa wo diblii ngɛ o he je,
Nɛ ma ha nɛ diblii maa wo ngɛ o zugba a nɔ,’ Nyɔmtsɛ Matsɛ Yehowa lɛ de.
9 ‘Ma ha nɛ nihi babauu a tsui maa ye mɛ, ke i ngɔ o we bi ɔmɛ kaa nyɔguɛhi kɛ ho je ma amɛ a mi ya,
Kɛ ya zugbahi nɛ o li lejɛ ɔ a nɔ ɔ.
10 Ma ha nɛ nihi babauu a he mi maa po,
Nɛ gbeye ma ha nɛ a matsɛmɛ ɔmɛ a he maa do blibliibli ngɛ o he je, ke i wo ye klaate nɔ ngɛ a nɔ ɔ.
A he ma kpokpo hluu, nɛ nɔ fɛɛ nɔ maa ye gbeye ngɛ e wami he je,
Ngɛ ligbi nɛ o maa nɔ si ɔ nɔ.’
11 Ejakaa nɔ́ nɛ Nyɔmtsɛ Matsɛ Yehowa de ji nɛ ɔ nɛ:
‘Babilon matsɛ ɔ maa hia e klaate ɔ ngɛ o nɔ.
12 Ma ha nɛ o we asafo kuu babauu ɔ ma gbo ngɛ tabuli nɛ a he wa wawɛɛ ɔ a klaate nya,
Mɛ tsuo a ji nihi nɛ a yi mi wa pe kulaa nɛ a ngɛ je ma amɛ a mi.
A maa ba Egipt he nɔ womi ɔ si, nɛ a ma kpata e we asafo kuu babauu ɔ hɛ mi.
13 Ma kpata e lohwe ɔmɛ tsuo a hɛ mi kɛ piɛɛ e nyu babauu ɔ he,
Nɛ adesa nane si loo lohwe ko nane kokloto ko be nyu ɔ mi gbidie hu.’
14 ‘Jamɛ a be ɔ mi ɔ, ma ha nɛ a nyu ɔmɛ a mi ma tsɔ,
Nɛ ma ha nɛ a pa amɛ maa be kaa nu,’ Nyɔmtsɛ Matsɛ Yehowa lɛ de.
15 ‘Ke i bɛɛ nɔ́ fɛɛ nɔ́ nɛ ha nɛ Egipt zugba a nɔ hyi tɔ ɔ kɛ pue he,
Nɛ i kpata nihi tsuo nɛ a ngɛ mi ɔ a hɛ mi ɔ,
A maa na kaa imi ji Yehowa.
16 Aywilɛho yemi la ji nɛ ɔ nɛ, nɛ bɔ fɛɛ bɔ nɛ ji ɔ, nihi ma la;
Je ma amɛ a biyi ɔmɛ ma la.
A ma la ngɛ Egipt kɛ e we asafo kuu babauu ɔ he je,’ Nyɔmtsɛ Matsɛ Yehowa lɛ de.”
17 Ngɛ jeha 12 ɔ we ligbi 15 ngɛ nyɔhiɔ ɔ mi ɔ, Yehowa kɛ mi tu munyu nɛ e de mi ke: 18 “Nɔmlɔ bi, mo fo ya ngɛ Egipt asafo kuu babauu ɔ he je, nɛ o ba lɛ si kɛ ya zugba a sisi tɔɔ, lɛ kɛ je mahi nɛ a he wa a, a biyi ɔmɛ, kɛ nihi nɛ a yaa muɔ* ɔ mi ɔ.
19 “‘O he ngɛ fɛu pe mɛnɔ? Kple si, nɛ́ o ya hwɔ nihi nɛ́ a pui mɛ ɔ a kasa nya!’
20 “‘A ma gbo kɛ piɛɛ nihi nɛ klaate gbe mɛ ɔ a he. A kɛ lɛ ha klaate; nyɛɛ gbla lɛ kɛ e we asafo kuu babauu ɔ tsuo kɛ ho.
21 “‘Tatsɛmɛ nɛ a he wa a maa tu munyu kɛ tsɔɔ lɛ, kɛ nihi nɛ a yeɔ kɛ buaa lɛ ɔ kɛ je Yɔkɔ* ɔ sisi tɔɔ. Bɔ fɛɛ bɔ nɛ ji ɔ, a kɛ klaate maa gbe mɛ, nɛ a ma gbo pue si kaa nihi nɛ a pui mɛ ɔ nɔuu. 22 Asiria kɛ e we asafo ɔ tsuo ngɛ lejɛ ɔ. A yɔkɔ ɔmɛ bɔle lɛ kɛ kpe, mɛ tsuo a gbo ngɛ klaate nya. 23 E yɔkɔ ɔmɛ ngɛ muɔ* mi tɔɔ, nɛ e we asafo ɔ bɔle e yɔkɔ ɔ, mɛ tsuo a gbo ngɛ klaate nya, ejakaa a ha nɛ gbeye nu nihi ngɛ hɛ kali a zugba a nɔ.
24 “‘Elam kɛ e we asafo kuu babauu ɔ tsuo nɛ́ a gbo ngɛ klaate nya a bɔle e yɔkɔ ɔ ngɛ lejɛ ɔ. Nihi nɛ a pui mɛ nɛ a ha nɛ gbeye nu nihi ngɛ hɛ kali a zugba a nɔ ɔ kple si kɛ ho zugba a sisi ya tɔɔ. Jehanɛ ɔ, zo maa gbe a kɛ nihi nɛ a kple kɛ ho muɔ* mi ya a. 25 A ngmɛ sa ha lɛ ngɛ ni gbogboe ɔmɛ a kpɛti, nɛ e we asafo kuu babauu ɔ bɔle e yɔkɔ ɔmɛ kɛ kpe. A pui a kpɛti nɔ ko nɔ ko, a kɛ klaate gbe mɛ, ejakaa a ha nɛ gbeye nu nihi ngɛ hɛ kali a zugba a nɔ; nɛ zo maa gbe a kɛ nihi nɛ a kple kɛ ho muɔ* ɔ mi ya a. A kɛ lɛ fɔ nihi nɛ a gbe mɛ ɔ a kpɛti.
26 “‘Lejɛ ɔ lɛ Meshek kɛ Tubal, kɛ a we* asafo kuu babauu ɔ ngɛ. A yɔkɔ* ɔmɛ bɔle lɛ kɛ kpe. A pui a kpɛti nɔ ko nɔ ko, a kɛ klaate gbɔ mɛ, ejakaa a ha nɛ gbeye nu nihi ngɛ hɛ kali a zugba a nɔ. 27 Tatsɛmɛ nɛ a he wa nɛ a pui mɛ nɛ a gbo, nɛ a kɛ a ta hwumi ní ɔmɛ tsuo kple kɛ ho Yɔkɔ* ɔ mi ya a, anɛ pi a kasa nya nɛ a ma ya hwɔ lo? Nɛ a kɛ a yi maa fɔ a klaate ɔmɛ a nɔ,* nɛ a tɔmi ɔmɛ a he tue gblami ɔ maa ba a wu ɔmɛ a nɔ, ejakaa tatsɛmɛ nɛ a he wa nɛ ɔmɛ ha nɛ gbeye nu nihi ngɛ hɛ kali a zugba a nɔ. 28 Se moo lɛɛ, a ma kpata o hɛ mi kɛ piɛɛ nihi nɛ a pui mɛ ɔ a he, nɛ o ma ya hwɔ nihi nɛ a kɛ klaate gbe mɛ ɔ a kasa nya.
29 Lejɛ ɔ nɛ Edom kɛ e matsɛmɛ ɔmɛ kɛ e ganɔ ɔmɛ tsuo ngɛ. Ngɛ a he wami ɔ tsuo se ɔ, a kɛ mɛ piɛɛ nihi nɛ a kɛ klaate gbe mɛ ɔ a he; mɛ hu a maa hwɔ nihi nɛ a pui mɛ kɛ nihi nɛ a ngɛ kplee kɛ yaa muɔ* mi ɔ a kasa nya.
30 “‘Lejɛ ɔ nɛ yiti je nɔ yeli ɔmɛ* kɛ Sidonbi ɔmɛ tsuo ngɛ. Mɛ lɛ ngɛ́ a he wami nɛ haa nɛ nihi yeɔ gbeye tsuo se ɔ, a kɛ hɛ mi si puemi kple si kɛ ho, kɛ piɛɛ ni gbogboe ɔmɛ a he ɔ nɛ. A kɛ a mɔmlɔtɔ ɔ maa hwɔ nihi nɛ a kɛ klaate gbe mɛ ɔ a kasa nya, nɛ a kɛ nihi nɛ ngɛ si kplee kɛ yaa muɔ* mi ɔ tsuo maa tloo a hɛ mi si puemi ɔ.
31 “‘Farao maa na ní nɛ ɔmɛ tsuo, nɛ níhi tsuo nɛ ba e we asafo kuu babauu ɔ nɔ ɔ ma ha nɛ e tsui nɛ nɔ e mi; A kɛ klaate maa gbe Farao kɛ e tabo ɔ tsuo,’ Nyɔmtsɛ Matsɛ Yehowa lɛ de.
32 “‘Akɛnɛ Farao kɛ e we asafo kuu babauu ɔ ha nɛ gbeye nu nihi ngɛ hɛ kali a zugba a nɔ he je ɔ, a maa pu mɛ kɛ piɛɛ nihi nɛ a pui mɛ, nihi nɛ a kɛ klaate gbe mɛ ɔ a he,’ Nyɔmtsɛ Matsɛ Yehowa lɛ de.”