1 Kronika

18 Be komɛ a se ɔ, David ye Filistibi ɔmɛ a nɔ kunimi nɛ a ba je e sisi, nɛ e ngɔ Gat kɛ mahi nɛ bɔle lɛ* ɔ ngɛ Filistibi ɔmɛ a dɛ. 2 Lɔ ɔ se ɔ, e ye Moab nɔ kunimi, nɛ Moabbi ɔmɛ ba pee David sɔmɔli, nɛ a woɔ tó kɛ haa lɛ.

3 David ye Zoba Matsɛ Hadadezer nɔ kunimi ngɛ Hamat kasa nya benɛ Hadadezer ngɛ blɔ nɔ nɛ e yaa ngɔ zugba nɛ ngɛ Yufrate Pa a he kaa e nɔ yemi he ɔ. 4 David kpɔ̃ ta zugba lɛhi 1,000, okpɔngɔ nɔ hili 7,000, kɛ tabuli nɛ a nyɛɛɔ nane 20,000 ngɛ e dɛ. Kɛkɛ nɛ David poo okpɔngɔhi nɛ a gblaa ta zugba lɛ ɔ tsuo a nane se panihi nɛ e piɛ 100 pɛ. 5 Benɛ Siriabi nɛ a je Damasko ɔ ba konɛ a ba ye bua Zoba Matsɛ Hadadezer a, David gbe Siriabi ɔmɛ a kpɛti nihi 22,000. 6 Kɛkɛ nɛ David to tabohi ngɛ Siria nɛ ngɛ Damasko ɔ, nɛ Siriabi ɔmɛ ba pee David sɔmɔli, nɛ a ba woɔ tó kɛ haa lɛ. He fɛɛ he nɛ David maa ya a, Yehowa haa nɛ e yeɔ kunimi.* 7 Jehanɛ hu ɔ, David ngɔ sika tsu tsɛ̃i lokotoo ɔmɛ ngɛ Hadadezer sɔmɔli ɔmɛ a dɛ kɛ ba Yerusalem. 8 David ngɔ akɔblee babauu kɛ je Hadadezer mahi nɛ ji Tibhat kɛ Kun a mi. Lɔ ɔ nɛ Salomo kɛ pee akɔblee kã agbo ko nɛ a tsɛɔ ke Wo ɔ, titima amɛ, kɛ akɔblee ní ɔmɛ ɔ nɛ.

9 Benɛ Hamat Matsɛ Tou* nu kaa David ye Zoba Matsɛ Hadadezer tabo ɔ tsuo nɔ kunimi ɔ, 10 oya nɔuu nɛ e tsɔ e binyumu Hadoram* kɛ ya Matsɛ David ngɔ konɛ e ya bi lɛ bɔ nɛ e he mi ngɛ ha, nɛ́ e ha lɛ ayekoo kaa e kɛ Hadadezer hwu ta nɛ e ye e nɔ kunimi (ejakaa Hadadezer kɛ Tou pɔɔ ta hwumi), nɛ e ngɔ ní slɔɔtohi tsuo nɛ a kɛ sika tsu, sika hiɔ, kɛ akɔblee pee kɛ ba. 11 Matsɛ David jɔɔ ní nɛ ɔmɛ a nɔ kɛ ha Yehowa kɛ piɛɛ sika hiɔ kɛ sika tsu nɛ e kpɔ̃ ngɛ je ma amɛ tsuo a dɛ ɔ he; e kpɔ̃ ngɛ Edom kɛ Moab a dɛ, ngɛ Ammonbi ɔmɛ, Filistibi ɔmɛ, kɛ Amalekbi ɔmɛ a dɛ.

12 Abishai, Zeruya binyumu ɔ gbe Edombi 18,000 ngɛ Ngo Dɔgba a mi. 13 E to tabohi ngɛ Edom, nɛ Edom bi ɔmɛ tsuo ba pee David sɔmɔli. He fɛɛ he nɛ David maa ya a, Yehowa haa nɛ e yeɔ kunimi.* 14 David ya nɔ nɛ e ye Israel tsuo nɔ, nɛ e yeɔ dami sane nɛ e peeɔ nɔ́ nɛ da ha e we bi ɔmɛ tsuo. 15 Yoab, Zeruya binyumu ɔ lɛ da tabo ɔ nya, Yehoshafat, Ahilud binyumu ɔ ji sane ngmalɔ, 16 Zadok, Ahitub binyumu ɔ kɛ Ahimelek, Abiatar binyumu ɔ ji osɔfohi, nɛ Shavsha ji womi ngmalɔ. 17 Benaya, Yehoyada binyumu ɔ lɛ e da Keretbi ɔmɛ kɛ Peletbi ɔmɛ a nya. Nɛ David binyumu ɔmɛ ji nihi nɛ a hɛɛ blɔ nya ngua ngɛ matsɛ ɔ se.