1 Kronika
19 Pee se ɔ, Nahash nɛ ji Ammonbi ɔmɛ a matsɛ ɔ ba gbo, nɛ e binyumu ɔ ba ye matsɛ ngɛ e se. 2 Kɛkɛ nɛ David de ke: “Ma je suɔmi nɛ se pui kpo kɛ tsɔɔ Hanun, Nahash binyumu ɔ, ejakaa e tsɛ ɔ je suɔmi nɛ se pui kpo kɛ tsɔɔ mi.” Enɛ ɔ he ɔ, David tsɔ tsɔli kɛ ya e ngɔ konɛ a ya wo e bua ngɛ e tsɛ ɔ gbenɔ ɔ he. Se benɛ David sɔmɔli ɔmɛ ba su Ammonbi ɔmɛ a zugba a nɔ konɛ a wo Hanun bua a, 3 Ammonbi ɔmɛ a ma nikɔtɔma amɛ de Hanun ke: “Anɛ o susu kaa David ngɛ o tsɛ ɔ hɛ mi nyami woe kɛ gu tsɔmi nɛ e tsɔ nihi ke a ba wo o bua a nɔ lo? Anɛ pi nɛ é ba hla níhi a mi fitsofitso, nɛ e kpa zugba a si, nɛ e ye o nɔ kunimi he je nɛ e tsɔ e sɔmɔli ɔmɛ kɛ ba o ngɔ ɔ lo?” 4 Enɛ ɔ he ɔ, Hanun nuu David sɔmɔli ɔmɛ, nɛ e sɛ a kpɛni, nɛ e poo a tade ɔmɛ a nɔ ngɛ kpɛti ngɛ a supa nya, nɛ e wo mɛ blɔ kɛ ho. 5 Benɛ a de David nɔ́ nɛ a pee nyumu ɔmɛ ɔ, oya nɔuu nɛ e tsɔ nihi konɛ a kɛ mɛ nɛ ya kpe, ejakaa a pue nyumu ɔmɛ a hɛ mi si wawɛɛ nitsɛ; nɛ matsɛ ɔ de mɛ ke: “Nyɛɛ hi Yeriko kɛ ya si be nɛ nyɛ kpɛni ɔmɛ maa hɛ, konɛ lɔ ɔ se ɔ, nyɛɛ kpale kɛ ba.”
6 Pee se ɔ, Ammonbi ɔmɛ na kaa David ná a he ninyɛ, lɔ ɔ he ɔ, Hanun kɛ Ammonbi ɔmɛ tsɔ konɛ a ngɔ sika hiɔ talɛnt* 1,000 kɛ ya bɔ ta zugba lɛhi kɛ okpɔngɔ nɔ hili apaa kɛ je Mesopotamia,* Aram Maaka, kɛ Zoba. 7 Lɔ ɔ he ɔ, a ya bɔ ta zugba lɛhi 32,000 kɛ Maaka matsɛ ɔ kɛ e we bi ɔmɛ apaa. Lɔ ɔ se ɔ, a ba nɛ a ba to si ngɛ Medeba hɛ mi. Ammonbi ɔmɛ je a ma amɛ a mi, nɛ a ba bua a he nya konɛ a hwu ta.
8 Benɛ David nu he ɔ, e tsɔ Yoab kɛ tabo ɔ tsuo kɛ e tatsɛmɛ nɛ a he wa pe kulaa a. 9 Nɛ Ammonbi ɔmɛ je kpo nɛ a ya gba ta ngɛ ma a agbo ɔ nya be mi nɛ matsɛmɛ ɔmɛ nɛ a ba a tsɔ a he banee ngɛ nga a nɔ ɔ.
10 Benɛ Yoab na kaa a gba ta kɛ ma lɛ tuami ngɛ e hɛ mi kɛ e se ɔ, e hla tabuli nɛ a he be wawɛɛ ngɛ Israel ɔ a ti ni komɛ, nɛ e ha nɛ a gba ta konɛ a kɛ Siriabi ɔmɛ nɛ ya kpe. 11 E ngɔ nyumuhi nɛ a piɛ ɔ kɛ wo e nyɛminyumu Abishai dɛ konɛ e ha nɛ a gba ta nɛ a kɛ Ammonbi ɔmɛ nɛ ya kpe. 12 Kɛkɛ nɛ e de ke: “Ke i ya nyɛ we Siriabi ɔmɛ ɔ, lɛɛ o ba nɛ o ba ye bua mi; se ke o ya nyɛ we Ammonbi ɔmɛ ɔ, lɛɛ ma ba ye bua mo. 13 E sa nɛ wa he nɛ wa, nɛ́ waa pee kã kɛ ha wa we bi ɔmɛ kɛ wa Mawu ɔ ma amɛ, nɛ Yehowa maa pee nɔ́ nɛ hi ngɛ e hɛ mi.”
14 Kɛkɛ nɛ Yoab kɛ e nyumu ɔmɛ ya a hɛ mi, nɛ a kɛ Siriabi ɔmɛ ya hwu ta, nɛ Siriabi ɔmɛ tu fo ngɛ e nya. 15 Benɛ Ammonbi ɔmɛ na kaa Siriabi ɔmɛ tu fo ɔ, mɛ hu a tu fo ngɛ e nyɛminyumu Abishai nya kɛ ho ma a mi ya. Lɔ ɔ se ɔ, Yoab ba Yerusalem.
16 Benɛ Siriabi ɔmɛ na kaa Israel ye a nɔ kunimi ɔ, a tsɔ tsɔli nɛ a ya tsɛ Siriabi ɔmɛ nɛ a ngɛ Pa* a he ɔ kɛ ba, nɛ Shofak nɛ ji Hadadezer tabo ɔ nya dalɔ ɔ nyɛɛ a hɛ mi kɛ ba.
17 Benɛ a bɔ David amaniɛ ɔ, oya nɔuu nɛ e bua Israel tsuo nya, nɛ a po Yordan Pa a kɛ ba a ngɔ, nɛ e ba gba ta kɛ wo mɛ. David gba ta, nɛ e kɛ Siriabi ɔmɛ ya kpe, nɛ a kɛ lɛ hwu. 18 Se Siriabi ɔmɛ tu fo ngɛ Israel hɛ mi; nɛ David gbe Siria tabuli nɛ a hiɔ ta zugba lɛ mi 7,000, kɛ Siria tabuli nɛ a nyɛɛɔ nane 40,000, nɛ e gbe Shofak, nɛ ji tabo ɔ nya dalɔ ɔ. 19 Benɛ Hadadezer sɔmɔli ɔmɛ na kaa Israel ye a nɔ kunimi ɔ, amlɔ nɔuu nɛ a kɛ David ya kpata, nɛ a ba je e sisi; nɛ Siria bi ɔmɛ sume kaa a maa ye bua Ammonbi ɔmɛ hu.