1 Kronika

20 Jeha a sisije* be mi nɛ matsɛmɛ gbaa ta a, Yoab nyɛɛ tabuli a hɛ mi, nɛ a ya kpata Ammonbi ɔmɛ a zugba a hɛ mi; e ba nɛ e ba sa Raba yi be mi nɛ David ngɛ Yerusalem ɔ. Yoab tua Raba, nɛ e kpata ma a hɛ mi. 2 Kɛkɛ nɛ David je jlasi nɛ ngɛ Malkam yi ɔ, nɛ e na kaa jlasi ɔ jiɔmi ji sika tsu talɛnt* kake, nɛ tɛhi nɛ a he jua wa ngɛ mi; nɛ a kɛ wo David yi. Jehanɛ se hu ɔ, David muɔɔ ta yibu ní babauu nitsɛ ngɛ ma a mi. 3 E ngɔ nihi nɛ a ngɛ ma a mi ɔ kɛ ba, nɛ e ha nɛ a kɛ sau gbaa tɛ, nɛ a kɛ dadehi nɛ a nya ba kɛ gbiɛhi tsuɔ ní. Jã ji bɔ nɛ David pee Ammonbi ɔmɛ a ma amɛ tsuo. Nyagbe ɔ, David kɛ tabuli ɔmɛ tsuo kpale kɛ ho Yerusalem ya.

4 Enɛ ɔ se ɔ, ta fɛ ngɛ a kɛ Filistibi ɔmɛ a kpɛti ngɛ Gezer. Jamɛ a be ɔ, Sibekai, Hushano ɔ gbe Refaim nina ko nɛ a tsɛɔ lɛ ke Sipai, nɛ Israelbi ɔmɛ ye Filistibi ɔmɛ a nɔ kunimi.

5 Nɛ ta kpale fɛ ngɛ a kɛ Filisti bi ɔmɛ a kpɛti, nɛ Elhanan, Yair binyumu ɔ gbe Lami, nɛ ji Gatno Goliat nyɛminyumu ɔ, nɔ nɛ e we akplɔ tso ɔ ngɛ kaa bo lolɔ klama mi tso ngua a.

6 Ta kpale fɛ ngɛ Gat, he nɛ nyumu oblai kpanaa ko kɛ e nine nguɛ ekpaakpa kɛ e nane nguɛ ekpaakpa nɛ kulaa peeɔ 24 ɔ ngɛ ɔ; lɛ hu Refaim nina ji lɛ. 7 E ya nɔ nɛ e bɔ Israel ahlua. Enɛ ɔ he ɔ, Yonatan, David nyɛminyumu Shimea binyumu ɔ gbe lɛ.

8 Ni nɛ ɔmɛ ji Refaim sisi bimɛ ngɛ Gat, nɛ a gbo ngɛ David kɛ e sɔmɔli ɔmɛ a nine nɔ.