1 Kronika

13 David kɛ nimli akpehi kɛ nimli lafahi a nya dali ɔmɛ, kɛ hɛ mi nyɛɛli ɔmɛ tsuo ya tu munyu. 2 Kɛkɛ nɛ David de Israel asafo ɔ tsuo ke: “Ke e da ngɛ nyɛ hɛ mi, nɛ Yehowa wa Mawu ɔ hu kplɛɛ nɔ ɔ, lɛɛ nyɛ ha nɛ waa tsɔ nɛ a kɛ sɛ gbi ya ha wa nyɛminyumu ɔmɛ nɛ a piɛ ngɛ Israel kpokpa amɛ tsuo a nɔ, kɛ jehanɛ se hu osɔfo ɔmɛ kɛ Levibi ɔmɛ ngɛ a ma amɛ kɛ a he lohwehi a ní yemi he ɔmɛ a mi, konɛ a ba piɛɛ wa he. 3 Nɛ nyɛ ha nɛ wa ya ngɔ wa Mawu ɔ Daka a kɛ ba.” Ejakaa ngɛ Saul ligbi ɔmɛ a mi ɔ, a hyɛ we nɔ. 4 Nimli asafo ɔ tsuo kplɛɛ nɔ kaa a maa pee jã, ejakaa e da ngɛ ni ɔmɛ tsuo a hɛ mi. 5 Lɔ ɔ he ɔ, David bua Israel tsuo nya, kɛ je pa a* nɛ ngɛ Egipt ɔ nya hluu kɛ ya si Lebo Hamat* tɔɔ, konɛ a ya ngɔ anɔkuale Mawu ɔ Daka a ngɛ Kiriat Yearim kɛ ba.

6 David kɛ Israel tsuo kuɔ kɛ ho Yudabi ɔmɛ a ma Baala, nɛ ji Kiriat Yearim ɔ ya, konɛ a ya ngɔ Yehowa, anɔkuale Mawu ɔ nɛ hii si ngɛ matsɛ sɛ nɔ ngɛ Kerub ɔmɛ a yi nɔ* ɔ Daka a kɛ ba. Daka a hɛ mi lɛ a tsɛɔ e biɛ ngɛ. 7 Se a ngɔ anɔkuale Mawu ɔ Daka a kɛ ma zugba lɛ ehe ko mi, nɛ a ngɔ kɛ je Abinadab we ɔ mi, nɛ Uzah kɛ Ahio nyɛɛ zugba lɛ ɔ hɛ mi. 8 David kɛ Israel tsuo ngɛ nyae kɛ a he wami tsuo ngɛ anɔkuale Mawu ɔ hɛ mi, a kɛ lahi, sakuhi, kpa saku kpahi, akasawahi, ayawahi, kɛ titimatihi. 9 Se benɛ a ba su Kidon ngma fiaami he ɔ, Uzah je e nine, nɛ e nu Daka a, ejakaa e piɛ nguɛ nya nɛ na amɛ ha nɛ Daka a nɔ si. 10 Kɛkɛ nɛ Yehowa mi mi fu Uzah, nɛ e fia lɛ nɔ́ nɛ e nɔ si ngɛ e nine nɛ e je nɛ e nu Daka a he je, nɛ e gbo ngɛ lejɛ ɔ, ngɛ Mawu hɛ mi. 11 Se David mi mi fu akɛnɛ Yehowa we abofu ɔ gba kɛ wo Uzah a he je; nɛ a tsɛɔ lejɛ ɔ ke Perez Uzah* kɛ ba si mwɔnɛ ligbi nɛ ɔ.

12 Lɔ ɔ he ɔ, David ye anɔkuale Mawu ɔ gbeye jamɛ a ligbi ɔ, nɛ e de ke: “Kɛ ma plɛ kɛ ngɔ anɔkuale Mawu ɔ Daka a kɛ ba ye ngɔ ha kɛɛ?” 13 David ngɔɛ Daka a kɛ bɛ he nɛ e ngɛ ɔ ngɛ David Ma a mi, se e ha nɛ a ngɔ kɛ ho Obed Edom, Gatno ɔ we ɔ mi ya. 14 Anɔkuale Mawu ɔ Daka a hi Obed Edom we ɔ mi nyɔhiɔ etɛ, nɛ Yehowa ya nɔ nɛ e jɔɔ Obed Edom we ɔ, kɛ níhi tsuo nɛ e ngɛ ɔ.