Yesaya
4 Jamɛ a ligbi ɔ, yihi kpaago ma ya nu nyumu kake nɛ a ma de lɛ ke:
“Wa maa ye wɔ nitsɛmɛ wa niye ní*
Nɛ wa ma hla wɔ nitsɛmɛ wa tadehi;
Ha nɛ a ngɔ o biɛ kɛ tsɛ wɔ kɛkɛ
Konɛ e je wa hɛ mi si puemi ɔ kɛ je.”*
2 Jamɛ a ligbi ɔ, nɔ́ nɛ Yehowa ma ha nɛ e ma tsɛ̃ ɔ maa pee fɛu nɛ e hɛ mi maa ba nyami, nɛ Israelbi nɛ a yi ma ná wami ɔ maa ngɔ zugba a nɔ yiblii ɔ kɛ fĩa, nɛ e maa pee a we afɛu nɔ́. 3 A ma tsɛ nɔ fɛɛ nɔ nɛ maa piɛ ngɛ Zion kɛ nɔ fɛɛ nɔ nɛ a ma si lɛ ngɛ Yerusalem ɔ ke klɔuklɔu, nɛ ji nihi tsuo nɛ a ngɛ Yerusalem nɛ a ngma a biɛ kɛ ha wami ɔ.
4 Ke Yehowa fɔ Zion biyi ɔmɛ a he mu* ɔ, nɛ e ngɔ kojomi mumi kɛ he tsumi* mumi kɛ fɔ Yerusalem muɔ si puemi ɔ ngɛ e mi ɔ, 5 Yehowa maa ngɔ bɔku kɛ lasuku kɛ ha he nɛ Zion Yoku ɔ ngɛ ɔ kɛ hehi nɛ e peeɔ kpehi ngɛ ɔ tsuo piani, nɛ nyɔ mi ɔ, e ma ha nɛ la lilɛ ma kpɛ ngɛ lejɛ ɔ; ejakaa he piɛ pomi maa hi e hɛ mi nyami ɔ tsuo nɔ. 6 Nɛ piani ɔ, gba ko maa hi lejɛ ɔ, nɛ e maa pee hɔ kɛ tsi pu la nya, nɛ gba a maa pee wesa he kɛ he piɛ pomi he ngɛ ahumi kɛ hiɔmi nɛmi be mi.