O tsui tsuo nɛ o kɛ maa wo gba si himi ɔ mi ɔ ngɛ kaa osɛkɛ nɛ maa nu nyɛ gba si himi ɔ kɛ da si ngɛ behi nɛ a mi wa mi
KƐ HA NIHI NƐ A SƐ GBA SI HIMI MI
1 Ngɔɔ O Tsui Tsuo Kɛ Wo O Gba Si Himi ɔ Mi
NƆ́ NƐ E TSƆƆ
Hunomɛ kɛ yigbayihi nɛ a kɛ a tsui tsuo wo a gba si himi ɔ mi ɔ naa lɛ kaa e maa hi si kɛ ya daa, nɛ enɛ ɔ haa nɛ a nuɔ he kaa a ngɛ slɔkee. A ngɛ nɔ mi mami kaa mɛ ni enyɔ ɔmɛ tsuo a maa wo gba si himi ɔ hɛ mi nyami ngɛ behi nɛ a mi wa mi po.
Ni komɛ nɛ a sɛ gba si himi mi ɔ miaa a hɛ mi nɛ a hiɔ si akɛnɛ nihi loo a weku li ngɛ a nɔ nyɛe kaa a ko je gba a he je. Se nɔ́ nɛ hi pe kulaa ji kaa nɛ a maa hi gba si himi ɔ mi ngɛ suɔmi kɛ bu nɛ a ngɛ kɛ ha a sibi ɔ he je.
BAIBLO SISI TOMI MLAA: ‘E sɛ nɛ huno nɛ e je e yo he.’—1 Korinto Bi 7:11.
“Ke o ngɔ o tsui tsuo kɛ wo o gba si himi ɔ mi ɔ, o mi mi be fue mlamlaamla. O kɛ tɔmi keɔ oya nɔuu, nɛ o he sɔɔ kɛ kpaa pɛɛ. O naa nyagbahi kaa blɔ tsimi níhi, se pi níhi nɛ ma puɛ nyɛ kpɛti.”—Micah.
NƆ́ HE JE NƐ E HE HIA
Ke nihi nɛ a sɛ gba si himi mi nɛ a kɛ a tsui tsuo wui mi ɔ kɛ nyagbahi kpe ɔ, nɔ́ nɛ a pɔɔ demi ji ‘Tsa pi lɛ nɛ a bɔ ha mi’ nɛ a hlaa ní komɛ nɛ a maa da nɔ kɛ je gba.
“Nihi fuu ngɛ nɛ loko a maa sɛ gba si himi mi ɔ, a pee a juɛmi momo kaa ke níhi ya hi ha mɛ ɔ, a maa po gba a mi. Ke nihi hɛɛ susumi nɛ ɔ nɛ a kɛ ya sɛ gba si himi mi ɔ, e haa nɛ a kɛ a tsui tsuo wui gba si himi ɔ mi.”—Jean.
NƆ́ NƐ O MA NYƐ MAA PEE
MOO KA O HE
Ke pɛ ba o kɛ o huno ɔ loo o yo ɔ nyɛ kpɛti ɔ. . .
Anɛ o piaa o he kaa o kɛ lɛ sɛ gba si himi mi lo?
Anɛ o ná nɛ o kɛ nɔ kpa sɛ gba si himi mi lo?
Anɛ o deɔ ní komɛ kaa “Ma je o he” aloo “I yaa hla nɔ kpa nɛ e bua maa jɔ ye he” lo?
Ke o ha sane bimi nɛ ɔ kake loo nɔ́ nɛ hiɛ pe jã heto ke ee ɔ, lɛɛ amlɔ nɛ ɔ ji be nɛ e sa kaa o kɛ o tsui tsuo nɛ wo o gba si himi ɔ mi.
O KƐ O YO Ɔ LOO O HUNO Ɔ NƐ SUSU SANE BIMI NƐ ƆMƐ A HE
Anɛ o na kaa suɔmi nɛ ngɛ wa kpɛti ɔ ba si lo? Ke jã a, o susu kaa mɛni ha nɛ e ba lɛ jã?
Mɛni wa ma nyɛ maa pee konɛ suɔmi nɛ ngɛ i kɛ mo wa kpɛti ɔ mi nɛ wa?
GA WOMI
Ke e ngɛ mi hluu ɔ, moo ngma sɛ womi kɛ ha o yo ɔ loo o huno ɔ nɛ o kɛ tsɔɔ lɛ bɔ nɛ o suɔ lɛ ha
Moo ngɔ o huno ɔ loo o yo ɔ foni kɛ mɛtɛ o ní tsumi he ɔ kɛ tsɔɔ bɔ nɛ o tsui ngɛ nyɛ gba si himi ɔ mi ha
Ke o be o yo ɔ loo o huno ɔ kasa nya loo o je kɛ ho ní tsumi ya a, mo tsɛ lɛ nɛ o bi e si.
BAIBLO SISI TOMI MLAA: “Nɔ́ nɛ Mawu ngɔ kɛ tsa a, ko ha nɛ adesa ko nɛ e gba mi.”—Mateo 19:6.