8 Nyɛɛ Pee Nɔ Hyɛmi Nɔ́ Kpakpa Kɛ Ha Nyɛ Bimɛ

NƆ́ NƐ E TSƆƆ

Fɔli nɛ a peeɔ nɔ hyɛmi nɔ́ kpakpa a bɔɔ mɔde kaa a maa hi si ngɛ níhi nɛ a tsɔɔ a bimɛ ɔ nya. Kaa nɔ hyɛmi nɔ́ ɔ, o bi ɔ maa kase lakpa yemi ke e nu nɛ o de ke, “De lɛ ke i be we ɔ mi” akɛnɛ o sume nɛ o kɛ nɔ ko nɛ ngɛ mo hlae maa sɛɛ ní ɔ he je.

“Nɔ́ ko nɛ a pɔɔ demi ji ‘Pee kaa bɔ nɛ i de ɔ, se koo kase nɔ́ nɛ i ngɛ pee ɔ.’ Se jokuɛwi lɛɛ a yɛ lɛ jã. A kaseɔ nɔ́ fɛɛ nɔ́ nɛ wa deɔ loo wa peeɔ ɔ, nɛ ke a na kaa waa kɛ nɔ́ nɛ wa de mɛ ɔ tsu we ní ɔ, a ma de wɔ.”​—David.

BAIBLO SISI TOMI MLAA: “Mo nɛ o ngɛ fiɛɛe ke, ‘Koo ju’ ɔ, anɛ o juɔ lo?”​—Roma Bi 2:​21.

NƆ́ HE JE NƐ E HE HIA

Fɔli náa jokuɛwi kɛ nihewi kɛ yihewi a nɔ he wami wawɛɛ pe a juami bi, kɛ ni kpahi. Enɛ ɔ tsɔɔ kaa o ngɛ he blɔ nɛ se be nɛ o kɛ maa ye bua o bimɛ ngɛ blɔ nɛ da nɔ, ke ji kaa o kɛ níhi nɛ o tsɔɔ mɛ ɔ tsuɔ ní.

“Wa ma nyɛ maa ti nɔ́ ko mi si lafahi abɔ kɛ ha wa bimɛ, se e maa pee wɔ kaa a nui nɔ́ nɛ wa ngɛ dee ɔ. Se ke o de nɔ́ ko nɛ mo nitsɛ o tsu we nya ní si kake pɛ po ɔ, o bimɛ ɔmɛ maa na, nɛ a ma de. Jokuɛwi hyɛɛ níhi nɛ wa peeɔ ɔ totooto, ke wa susu kaa a nɛ́ po.”​—Nicole.

BAIBLO SISI TOMI MLAA: “Juɛmi ɔ nɛ je hiɔwe ɔ, . . . e pee we osato.”​—Yakobo 3:17.

NƆ́ NƐ O MA NYƐ MAA PEE

Moo hyɛ níhi nɛ o peeɔ ɔ kaa a hi lo. Mɛni níhi o hyɛɛ kɛ jeɔ o hɛja? Kɛ o kɛ o yo ɔ loo o huno ɔ kɛ o bimɛ ɔmɛ hii si ha kɛɛ? Mɛnɔmɛ ji o huɛmɛ? Anɛ o susuɔ ni kpahi a he lo? Ngɛ e kpiti pomi mi ɔ, anɛ o suɔ nɛ o bimɛ nɛ a kase mo lo?

“I kɛ ye huno ɔ wa ha we nɛ wa bimɛ ɔmɛ nɛ a pee níhi nɛ wɔ nitsɛmɛ wa pee we.”​—Christine.

Mo kpa pɛɛ ke o tɔ̃. O bimɛ ɔmɛ le kaa o yi mluku. Enɛ ɔ he ɔ, ke e he ba hia nɛ o kpa o yo ɔ loo o huno ɔ loo o bimɛ ɔmɛ pɛɛ nɛ o pee jã a, o bimɛ ɔmɛ maa kase he si bami, nɛ a maa ye anɔkuale hulɔ.

“Ke wa tɔ̃ ɔ, e sa nɛ waa kplɛɛ nɔ nɛ wa kpa he pɛɛ. Ke wa peeɔ jã a, wa bimɛ ɔmɛ a bua jɔɔ. Se ke wa pee we jã a, wa bimɛ ɔmɛ be lee kaa ke a tɔ̃ ɔ, e sa nɛ a kpa pɛɛ.”​—Robin.