Nya Blimi Munyu

Ngmamihi Nɛ Yeɔ Buaa Kristofohi womi ɔ maa ha nɛ o na ngmamihi kɛ níhi nɛ ya nɔ ngɛ Baiblo ɔ mi nɛ maa ye bua mo konɛ o nyɛ nɛ o da nyagbahi nɛ o kɛ ngɛ kpee ɔmɛ a nya. E maa ye bua mo hulɔ konɛ o na Baiblo mi sɛ gbihi nɛ o kɛ maa wo ni kpahi he wami nɛ jehanɛ se hu, o kɛ maa ye bua mɛ konɛ a nyɛ nɛ a mwɔ yi mi kpɔhi nɛ maa sa Yehowa hɛ mi. Mo hla munyuyi nɛ o suɔ. Ngɛ munyuyi ɔ eko fɛɛ eko sisi ɔ, o maa na sane bimihi kɛ níhi nɛ ya nɔ ngɛ Baiblo ɔ mi nɛ a tu a he munyu kpiti ɔ ngɛ lejɛ ɔ. (Hyɛ daka nɛ ji “Bɔ Nɛ O Kɛ Womi Nɛ ɔ Ma Tsu Ní Ha.”) O maa na ga womihi nɛ a he ngɛ se nami, yemi kɛ buami kɛ bua womi nɛ o hia a kɛ je Mawu Munyu ɔ mi. Jehanɛ se hu, o maa na Baiblo sisi tomi mlaahi nɛ o kɛ maa ye bua ni kpahi nɛ o wo mɛ he wami konɛ a hemi kɛ yemi ɔ mi nɛ wa.

Bɔ Nɛ O Kɛ Womi Nɛ ɔ Ma Tsu Ní Ha

O kɛ hla blɔ he ɔ ma nyɛ ma hla munyuyihi nɛ o bua jɔ he. A gba Ngmamihi Nɛ Yeɔ Buaa Kristofohi womi ɔ mi kɛ wo fã kpaago nɛ ɔmɛ a sisi: Nyagbahi, Je Mi Bami, Asafo, Daa Ligbi Si Himi, Weku, Huɛ Bɔmi Nɛ Ngɛ Waa Kɛ Yehowa Wa Kpɛti, kɛ Suhi. O maa na munyuyi nɛ o ngɛ hlae ɔ ngɛ fã nɛ ɔmɛ eko sisi. Moo hla fã a eko nɛ o ya hla munyuyi nɛ o ngɛ hlae ɔ ngɛ e sisi. Se ke o li fã pɔtɛɛ nɛ tu munyuyi nɛ o ngɛ hlae ɔ he munyu ɔ, lɛɛ mo hla fã amɛ tsuo a mi kɛ ya si o maa na nɔ́ nɛ o ngɛ hlae ɔ. O maa na munyuyi nɛ a pee mɛ agboagbo ngɛ fã amɛ eko fɛɛ eko sisi. A pee ekomɛ munyuhi nɛ ekomɛ hu sane bimihi. Ke o ngɛ ngmamihi nɛ a pee mɛ agbo ngɛ munyuyi ɔmɛ a sisi ɔ kanee ɔ, mo susu bɔ nɛ e kɔ munyu ɔ he ha loo bɔ nɛ e ha sane bimi ɔ heto ha a he. Ngɛ hehi komɛ ɔ, a gba munyu ɔmɛ a mi kɛ wo fã slɔɔtohi a mi konɛ e ye bua mo nɛ o na munyuyi nɛ o ngɛ hlae ɔ. Ngɛ hehi komɛ hu ɔ, a kɛ ngmami komɛ piɛɛɔ he, nɛ a kɛ munyu nɛ ji “Hyɛ hulɔ” kadi ɔ lɛ. Ngmami nɛ ɔmɛ hu haa nɛ o naa ní kpahi nɛ kɔ munyuyi ɔ he. Behi fuu ɔ, o maa na nɛ a ngma ke “Baiblo Mi Nɔ Hyɛmi Níhi Nɛ Maa Ye Bua Wɔ”. Ngɛ enɛ ɔ se ɔ, o maa na munyu kpiti ko nɛ blɛke ɔ oti ɔ aloo ní kasemi nɛ ngɛ ngmami nɛ a tsɛ se ɔ mi. Munyu nɛ ɔ maa ye bua mo nɛ o na munyu tutuutu nɛ o ngɛ hlae ngɛ ngmami ɔ mi.

O be ngmamihi tsuo nɛ kɔ munyuyihi nɛ a ngɛ womi nɛ ɔ mi ɔ nae. Se a to womi nɛ ɔ he blɔ nya saminya konɛ e ye bua mo kɛ pee níhi a mi hlami ngɛ Baiblo ɔ mi. (Abɛ 2:1-6) Research Guide for Jehovah’s Witnesses womi ɔ maa ye bua mo nɛ o nu ngmami ko sisi saminya aloo konɛ o le bɔ nɛ o kɛ ngmami ko ma tsu ní ha. Ga dade nɛ ɔ maa ye bua mo konɛ o na sisi numi ehehi nɛ wa ná ngɛ wa womi ɔmɛ a mi ɔ, nɛ lɔ ɔ ma ha nɛ o nu ngmami ɔmɛ a sisi saminya.

Ngmamihi Nɛ Yeɔ Buaa Kristofohi womi ɔ nɛ ye bua mo nɛ o nu Ngmami Klɔuklɔu ɔ sisi saminya konɛ o ná nile, juɛmi kɛ nɔ́ sisi numi. Ke o kɛ womi nɛ ɔ ngɛ ní tsue ɔ, o ma ba na kaa “Mawu munyu ɔ hɛ ngɛ, nɛ e ngɛ he wami.”—Heb 4:12.