BƆ NƐ O MAA PEE NIHI KASELI HA
NÍ KASEMI 10
Fiaa O Pɛɛ Si Kaa O Maa Ye Bua Nihi
Sisi Tomi Mlaa: “Wa fia wa pɛɛ si kaa pi Mawu he sane kpakpa a pɛ nɛ waa kɛ ma ha nyɛ, se mohu wɔ nitsɛmɛ wa he hulɔ, ejakaa nyɛ ba pee nihi nɛ wa suɔ mɛ saminya.”—1 Tɛs. 2:8.
Nɔ́ Nɛ Yesu Pee
1. Moo hyɛ VIDEO ɔ, aloo moo kane Yohane 3:1, 2. Lɔ ɔ se ɔ, mo susu sane bimihi nɛ nyɛɛ se ɔmɛ a he:
O susu kaa mɛni he je nɛ Nikodemo ya Yesu ngɔ nyɔ mi ɔ?—Hyɛ Yohane 12:42, 43.
Benɛ Nikodemo ya Yesu ngɔ nyɔ mi ɔ, mɛni Yesu pee kɛ tsɔɔ kaa e suɔ kaa e maa pee nihi kaseli?
Mɛni Wa Kaseɔ Ngɛ Yesu Nɔ Hyɛmi Nɔ́ Nɛ ɔ Mi?
2. Ke wa fia wa pɛɛ si kaa wa maa pee nihi kaseli ɔ, lɔ ɔ tsɔɔ kaa wa suɔ mɛ.
Moo Kase Yesu
3. O kɛ o Baiblo kaselɔ ɔ nɛ kase ní ɔ ngɛ be kɛ he nɛ maa hi ha lɛ. Eko ɔ, e maa suɔ ligbi pɔtɛɛ ko ngɛ otsi ɔ mi loo be pɔtɛɛ ko ngɛ ligbi ɔ mi konɛ nyɛɛ kase ní ɔ. Anɛ ke nyɛ maa kase ní ɔ ngɛ e ní tsumi he, e we mi aloo he ko nɛ nihi maa na nyɛ ngɛ ɔ, e maa da lɛ lo? Ke e maa hi ɔ, be fɛɛ be ɔ, moo to o níhi a he blɔ nya saminya konɛ o nyɛ nɛ o kɛ lɛ nɛ kase ní ɔ ngɛ be kɛ he nɛ maa da lɛ.
4. Nyɛ ko po ní kasemi ɔ mi. Ke o maa hia blɔ ɔ, koo po ní kasemi ɔ mi, mohu ɔ, mo susu níhi nɛ nyɛɛ se nɛ ɔmɛ a he:
Anɛ nyɛ ma nyɛ maa kase ní ɔ ngɛ ligbi kpa mi ngɛ jamɛ a otsi ɔ mi lo?
Anɛ nyɛ ma nyɛ maa kase ní ɔ ngɛ fon nɔ aloo ngɛ videoconference nɔ lo?
Anɛ o ma nyɛ ma ha nɛ fiɛɛlɔ kpa kɛ lɛ nɛ ya kase ní ɔ lo?
5. Moo sɔle ha Yehowa konɛ o ná juɛmi nɛ da. Mo bi Yehowa nɛ e ye bua mo konɛ o kɔni ko gbo ngɛ o Baiblo kaselɔ ɔ he, ke e nyɛ we nɛ e kase ní ɔ be fɛɛ be po, aloo ke e he waa ha lɛ kaa e kɛ Baiblo ɔ blɔ tsɔɔmi ko ma tsu ní. (Filip. 2:13) Ngɛ anɔkuale mi ɔ, o Baiblo kaselɔ ɔ ngɛ su kpakpahi fuu, lɔ ɔ he ɔ, moo sɔle ha Yehowa nɛ e ye bua mo konɛ o kɛ o juɛmi nɛ ma e su kpakpa amɛ a nɔ.