Bɔ Nɛ O Kɛ Womi Wayoo Nɛ ɔ Ma Tsu Ní Ha

Ngɛ bafahi nɛ nyɛɛ se ɔ mi ɔ, o maa na Baiblo ngmamihi kɛ ha ligbi fɛɛ ligbi, kɛ a mi tsɔɔmihi. E ngɛ mi kaa wa ma nyɛ maa kane ngmami ɔ kɛ e mi tsɔɔmi ɔ be saisaa mohu lɛɛ, se nihi fuu na kaa ke a pee jã mɔtu ɔ, e yeɔ buaa mɛ wawɛɛ. Lɔ ɔ haa nɛ a nyɛɔ susuɔ ngmami ɔ mi munyu ɔmɛ a he ligbi ɔ tsuo. Ke weku mi bimɛ tsuo blaa kɛ susuɔ ngmami ɔ he ɔ, e yeɔ buaa mɛ wawɛɛ nitsɛ. Betel weku ɔ mi bimɛ nɛ a ngɛ je kɛ wɛ ɔ peeɔ jã ke a ngɛ mɔtu ní yee.

Hwɔɔmi Mɔ nɛ a tsɛ se ngɛ mi tsɔɔmi ɔ eko fɛɛ eko nyagbe ɔ tsɔɔ he nɛ a je kɛ je. Kaa nɔ hyɛmi nɔ́ ɔ, “w24.04 2 ¶1, 3” tsɔɔ he nɛ a je mi tsɔɔmi ɔ kɛ je kaa bɔ nɛ daka nɛ ngɛ sisi ɔ tsɔɔ ɔ. Ke o ngɛ hlae nɛ o le níhi fuu ngɛ munyu nɛ a ngɛ he susue ɔ he ɔ, o maa na ngɛ Hwɔɔmi Mɔ nɛ a tsɛ se ɔ mi.