January

Níhi fuu haa nɛ huno kɛ yo náa bua jɔmi. Ní nɛ ɔmɛ a kpɛti kake ji ke a fɔ bi nɛ e ngɛ nɔmlɔ tso mi he wami kpakpa. E ngɛ mi kaa fɔli suɔ a bi ɔ mohu lɛɛ, se a be suɔe nɛ e hi bimwɔyo mi daa. Ngɛ anɔkuale mi ɔ, ke jokuɛ ɔ tlɔ jã nɛ e wɛ gblee ɔ, a maa hao wawɛɛ. Jã nɔuu kɛ̃ nɛ ke wa bɔni Yehowa he ní kasemi pɛ ɔ, e bua jɔɔ, se e sume nɛ waa tlɔ he kake. (1 Kor. 3:1) Mohu ɔ, e suɔ nɛ waa pee Kristofohi “nɛ a wa saminya. Ngɛ Baiblo ɔ mi ɔ, Hela munyu nɛ a tsɔɔ sisi ke “wa saminya” a hu ma nyɛ maa tsɔɔ “nɔkɔtɔma.” (1 Kor. 2:6) Enɛ ɔ he ɔ, kaa bɔ nɛ bimwɔyo waa bɔɔbɔɔbɔɔ nɛ e ba peeɔ nɔkɔtɔma a, jã nɔuu kɛ̃ nɛ e sa nɛ wɔ hu waa ya nɔ nɛ waa wa ngɛ mumi mi. Ke wa su oti nɛ ɔ he po ɔ, e sɛ nɛ wa susu kaa wa gbe nya, mohu ɔ, e sa nɛ waa hi wa he mɔde bɔe.—1 Tim. 4:15. w24.04 2 ¶1, 3

Ke nɔ ko bi mo bɔ nɛ o kɛ Yehowa nyɛ kpɛti ngɛ ha a, kɛ o ma ha heto kɛɛ? Eko ɔ, o ma ha heto ke, ‘Yehowa ji ye Tsɛ, ye Mawu kɛ ye Huɛ.’ Jehanɛ hu ɔ, o ma nyɛ maa kale lɛ ngɛ blɔ kpahi a nɔ. Se anɛ o naa Yehowa kaa e ji nɔ ko nɛ e peeɔ nɔ nubwɔ nɛ e ngɛ mo nine fɔe kɛ ba e bo tsu ɔ mi lo? Matsɛ David ngɔ Yehowa kɛ to nɔ ko nɛ e peeɔ nɔ nubwɔ ɔ he, nɛ e ngɔ e sɔmɔli anɔkualetsɛmɛ ɔmɛ kɛ to nibwɔhi nɛ a ngɛ Yehowa bo tsu ɔ mi ɔ a he. David bi ke: “Oo Yehowa, mɛnɔ ma ba to o bo tsu ɔ mi? Mɛnɔ maa hi o yoku klɔuklɔu ɔ nɔ?” (La 15:1) Munyu nɛ ɔ ha nɛ wa na kaa wa ma nyɛ maa hi Yehowa bo tsu ɔ mi, nɛ tsɔɔ kaa wa ma nyɛ maa pee e huɛmɛ. Loko Yehowa maa bɔ níhi tsuo ɔ, lɛ nɔ kake pɛ lɛ e ngɛ. Se Yehowa ha nɛ e Bitɛte ɔ ba piɛɛ e he ngɛ e we okadi peemi bo tsu ɔ mi. Yesu ji nɔ kekleekle nɛ Yehowa fɔ lɛ nine kaa e ba hi e bo tsu ɔ mi, nɛ Yehowa bua jɔ kaa e pee jã. Baiblo ɔ ha nɛ wa na kaa Yehowa ‘suɔ e Bi ɔ sane wawɛɛ,’ nɛ Bi ɔ hu “nyaa ngɛ [Yehowa] hɛ mi be fɛɛ be.”—Abɛ 8:30. w24.06 2 ¶1-3

Moo po he foni nɛ o hyɛ. Nyumuhi nɛ a he hiɛ pe 340,000 ɔ bua a he nya konɛ a wo David matsɛ nɛ e ye Israelbi ɔmɛ tsuo a nɔ. Nyumu nɛ ɔmɛ hi yokuhi nɛ a kɛ Hebron ma a he kɛ we ɔ a nɔ maa pee ligbi etɛ. Benɛ a ngɛ lejɛ ɔ, a sɛɛ ní nɛ a la la ngɔngɔɛhi kɛ je Yehowa yi. (1 Kron. 12:39) Niheyo ko nɛ a tsɛɛ lɛ ke Zadok ɔ ngɛ nimli babauu nɛ a ngɛ lejɛ ɔ a kpɛti. Eko ɔ, nihi nɛ a ngɛ lejɛ ɔ to we e he hɛ. Se Yehowa lɛɛ e to e he hɛ, nɛ e suɔ nɛ nihi nɛ a le kaa Zadok ngɛ lejɛ ɔ. (1 Kron. 12:​22, 26-28) Zadok ji osɔfo nɛ e kɛ Osɔfo Nɔkɔtɔma Abiatar tsu ní wawɛɛ. Zadok ji ní nalɔ ko nɛ Mawu ha lɛ juɛmi kɛ nyɛmi nɛ́ e kɛ yɔse Mawu suɔmi nya ní. (2 Sam. 15:27) Zadok ji nyumu nɛ e ngɛ kã. Ngɛ nyagbe ligbi nɛ ɔmɛ a mi ɔ, Satan ngɛ Yehowa we bi tuae wawɛɛ. (1 Pet. 5:8) E sa nɛ waa pee kã nɛ waa mlɛ Yehowa be mi nɛ wa ngɛ blɔ hyɛe kaa e ma kpata Satan kɛ e je yaya nɛ ɔ hɛ mi ɔ. (La 31:24) Ke wa pee jã a, wa ma nyɛ maa kase Zadok kã peemi ɔ. w24.07 2 ¶1-3

Benɛ Yehowa bɔ Adam kɛ Hawa a, e suɔ nɛ a bua nɛ jɔ. Enɛ ɔ he ɔ, e ha mɛ he ko nɛ ngɛ fɛu kaa a hi, e ha mɛ nike ní nɛ ji gba si himi, nɛ e ha mɛ ní tsumi nɛ ngɛ bua jɔmi. E de mɛ kaa a fɔ nɛ a hyi zugba a nɔ tɔ, nɛ́ a ha nɛ zugba a nɔ tsuo nɛ pee paradeiso kaa Eden abɔɔ ɔ. Se mlaa kake ko pɛ lɛ Yehowa wo mɛ. E bɔ mɛ kɔkɔ kaa ke a je blɔ nɛ a gbo e mlaa a nɔ tue ɔ, a ma gbo. Wa le nɔ́ nɛ ya nɔ pee se. Bɔfo yiwutsotsɛ ko nɛ e sume Mawu kɛ adesahi ɔ ya ka Adam kɛ Hawa konɛ a gbo Mawu mlaa a nɔ tue. Adam kɛ Hawa bu bɔfo yiwutsotsɛ nɛ ɔ tue. A ná we hemi kɛ yemi ngɛ a Tsɛ nɛ e suɔ mɛ wawɛɛ ɔ mi, nɛ a ya pee yayami. Kaa bɔ nɛ wa le ɔ, nɔ́ nɛ Yehowa de ɔ ba mi pɛpɛɛpɛ. Kɛ je jamɛ a ligbi ɔ kɛ yaa a, Adam kɛ Hawa kɛ nyagbahi fuu kpe, a bwɔ, nɛ nyagbenyagbe ɔ, a gbo.—1 Mose 1:​28, 29; 2:​8, 9, 16-18; 3:​1-6, 17-19, 24. w24.08 3 ¶3

Yehowa kɛ e Bi nɛ e suɔ lɛ ɔ suɔ kaa wa bua nɛ jɔ. La 119:2 ɔ de ke: “Nihi nɛ a yeɔ e kaimi ɔmɛ a nɔ, nɛ́ a hlaa e se blɔ kɛ a tsui tsuo ɔ ngɛ bua jɔmi.” Yesu hu de ke: “Nihi nɛ a nuɔ Mawu munyu ɔ nɛ a yeɔ nɔ ɔ, mɛ lɛ a ngɛ bua jɔmi” ɔ nɛ. (Luka 11:28) Yehowa sɔmɔli tsuo ngɛ bua jɔmi ejakaa wa kaneɔ Mawu Munyu ɔ be fɛɛ be, nɛ wa bɔɔ mɔde kaa waa kɛ nɔ́ nɛ wa kase ɔ ma tsu ní. (Yak. 1:​22-25) Ngɛ anɔkuale mi ɔ, wa le kaa ke wa pee jã a, wa maa sa Yehowa hɛ mi. (Fiɛɛ. 12:13) Ke wa ya nɔ nɛ waa kɛ nɔ́ nɛ wa kase ngɛ Mawu Munyu ɔ mi ɔ tsu ní ɔ, lɔ ɔ ma ha nɛ huɛ bɔmi kpakpa maa hi waa kɛ wa wekuli kɛ nihi nɛ a ngɛ asafo ɔ mi ɔ wa kpɛti. Jehanɛ hu ɔ, ke waa kɛ nɔ́ nɛ wa kaseɔ ɔ tsuɔ ní ɔ, e yeɔ buaa wɔ nɛ wa yuɔ wa he ngɛ nyagbahi nɛ nihi nɛ a bui Mawu tue ɔ kɛ kpeɔ ɔ a he. Niinɛ, nɔ́ nɛ Matsɛ David de ɔ ji anɔkuale. Benɛ David tu Yehowa Mlaa amɛ, e fami ɔmɛ, kɛ e kojomi ɔmɛ a he munyu ngɛ e la ko mi se ɔ, e de ke: “Nɔ nɛ e kɛ tsuɔ ní ɔ náa he se babauu.”—La 19:​7-11. w24.09 2 ¶1-3

Ke Yehowa hyɛ e sɔmɔli nɛ a ngɛ zugba a nɔ ɔ, mɛni ji nɔ́ nɛ e naa? Ke wa bua jɔ loo wa ngɛ aywilɛho yee ɔ, e naa lɛ tsuo. (La 37:18) Yehowa bua jɔɔ wawɛɛ ke e na kaa wa ngɛ mɔde bɔe kaa wa ma sɔmɔ lɛ ngɛ haomihi nɛ waa kɛ ngɛ kpee ɔ tsuo se. Nɔ́ nɛ pe kulaa a, e pee klaalo kaa e maa ye bua wɔ nɛ e wo wa bua. La 147:3 ɔ tsɔɔ kaa Yehowa ‘fiɔ nihi nɛ a tsui ku ɔ a pa amɛ a nɔ’ kɛ haa mɛ. Ngmami nɛ ɔ tsɔɔ bɔ nɛ Yehowa jeɔ mi mi jɔmi mi nɛ e yeɔ buaa nihi nɛ a ngɛ tsui yee loo a ngɛ haoe ɔ ha. Mɛni e sa nɛ waa pee konɛ Yehowa nɛ hyɛ wa nɔ? Mo susu nɔ́ he tomi nɔ́ nɛ ɔ he nɛ o hyɛ. Dɔkita ko nɛ e he be ɔ ma nyɛ maa pee níhi fuu kɛ ye bua nɔ ko nɛ e plaa konɛ e pa a nɛ gbo. Se loko nɔ nɛ e plaa a pa a ma gbo ɔ, e sa nɛ e ngɔ dɔkita a blɔ tsɔɔmihi kɛ tsu ní pɛpɛɛpɛ. Yehowa guɔ e Munyu ɔ nɔ nɛ e kɛ nihi nɛ a ngɛ tsui yee ɔ tuɔ munyu, nɛ e jeɔ suɔmi mi kɛ woɔ mɛ ga. w24.10 6 ¶1-2

Be ko nɛ be ɔ, a tu nɔ́ nɛ maa ba nihi nɛ Yehowa kojo mɛ kaa a ji nihi nɛ a dɛ ɔ a nɔ ɔ he munyu ngɛ wa womi ɔmɛ a mi. Wa tsɔɔ kaa nihi kaa jã a, a be mɛ si tlee. Baiblo mi sanehi fuu ngɛ nɛ ha nɛ wa le bɔ nɛ Yehowa kojo nihi nɛ a dɛ ɔ ha. Kaa nɔ hyɛmi nɔ́ ɔ, ngɛ Nyu Kpekpemi ɔ mi ɔ, Yehowa kpata nɔ fɛɛ nɔ hɛ mi, se e baa Noa kɛ e weku ɔ yi. Jehanɛ hu ɔ, e gu Israel bi ɔmɛ a nɔ kɛ kpata nihi fuu nɛ a hi mahi kpaago nɛ ngɛ Si Womi Zugba a nɔ ɔ hɛ mi. Ngɛ nyɔ kake pɛ mi ɔ, Yehowa gu bɔfo ko nɔ kɛ kpata Asiria ta buli 185,000 hɛ mi. (5 Mose 7:​1-3; Yes. 37:​36, 37) Ngɛ si fɔfɔɛ nɛ ɔmɛ tsuo a mi ɔ, anɛ Baiblo ɔ ha nɛ e pee heii kaa Yehowa kpata nimli nɛ ɔmɛ a hɛ mi kɛ ya neneene, nɛ e be mɛ si tlee kulaa hwɔɔ se lo? Dɛbi. Wa li bɔ nɛ Yehowa kojo nimli nɛ ɔmɛ a kpɛti nɔ fɛɛ nɔ ha, nɛ wa li ke ji nimli nɛ ɔmɛ ná he blɔ kaa a maa kase Yehowa he ní konɛ a tsake a tsui. w24.05 3 ¶5-7

Yesu ngɔ nɔ́ he tomi nɔ́ ko nɛ kɔɔ yalɔyo ko nɛ e ya nɔ nɛ e kpa kojolɔ ko pɛɛ kaa e ye dami sane ha lɛ ɔ kɛ tsu ní. Atsinyɛ jemi ko be he kaa Yesu kaseli ɔmɛ a kpɛti nihi fuu nyɛ nɛ a nu bɔ nɛ yo ɔ nu he ha a sisi saminya, ejakaa jamɛ a be ɔ mi ɔ, a kɛ nihi fuu hí si saminya. (Luka 18:​1-5) Yo ɔ sane ɔ ma nyɛ maa ye bua wɔ wawɛɛ ejakaa be komɛ ɔ, wɔ hu nihi yeɔ wɔ sane yaya. Mwɔnɛ ɔ, nihi fuu hyɛɛ nɔ hɛ mi, a je we mi mi jɔmi kpo kɛ tsɔɔ nihi, nɛ a hɛ kɔ̃ɔ ni kpahi a nɔ wawɛɛ. Enɛ ɔ he ɔ, wa le kaa nihi ma nyɛ maa ye wɔ sane yaya. (Fiɛɛ. 5:8) Se ke wa nyɛmi ko je we mi mi jɔmi kpo kɛ tsɔɔ wɔ ɔ, e ma nyɛ maa dɔ wɔ wawɛɛ. Ngɛ anɔkuale mi ɔ, wa nyɛmimɛ ɔmɛ be blɔ jee kaa a maa ye wɔ sane yaya. Se akɛnɛ wɔ tsuo wa yi mluku he je ɔ, be komɛ ɔ, a peeɔ níhi nɛ dɔɔ wɔ. Ke nihi ye wɔ sane yaya a, wa ma nyɛ maa kase níhi fuu ngɛ bɔ nɛ Yesu pee e ní ha a mi. Ke wa ma nyɛ maa to wa tsui si kɛ ha nihi nɛ a yeɔ wɔ sane yaya loo nihi nɛ a waa wɔ yi mi ɔ, lɛɛ e sa nɛ waa pee jã nɔuu kɛ ha wa nyɛmimɛ ɔmɛ hulɔ. w24.11 2 ¶1-2

Abolo ji niye ní titli nɛ nihi nɛ a hi si blema a pɔɔ yemi. (1 Mose 14:18; Luka 4:4) Ngɛ anɔkuale mi ɔ, akɛnɛ abolo pɔ he wawɛɛ he je ɔ, be komɛ ɔ, Baiblo ɔ ngɔɔ “abolo” kɛ daa si ha niye ní kpahi. (1 Ma. 17:​11, 12) Jehanɛ hu ɔ, Yesu ngɔ abolo kɛ tsu ní ngɛ nyakpɛ ní enyɔ komɛ nɛ e pee ɔ mi, nɛ nihi le nyakpɛ ní nɛ ɔmɛ wawɛɛ. (Mat. 16:​9, 10) Wa maa na nyakpɛ ní nɛ ɔmɛ a kpɛti kake ngɛ Yohane yi 6. Benɛ Yesu kɛ e bɔfo ɔmɛ ya fiɛɛ nɛ pɔ tɔ a he wawɛɛ ɔ, a to kaa a ma ya hla he ko konɛ a ya jɔɔ a he ngɛ. Enɛ ɔ he ɔ, a kɛ Yesu tsuo ya sɛ lɛ mi nɛ a po Galilea Wo ɔ. (Maak. 6:​7, 30-32; Luka 9:10) A ya hi he ko banee ngɛ Betsaida kpɔ ɔ mi. E kɛ we kulaa nɛ nihi akpehi abɔ ba su lejɛ ɔ nɛ a ngɛ hlae nɛ a na Yesu. Se Yesu kua we mɛ. E je mi mi jɔmi mi nɛ e tsɔɔ mɛ Matsɛ Yemi ɔ he ní, nɛ e tsa hiɔtsɛmɛ. Benɛ je ngɛ jɔe ɔ, kaseli ɔmɛ bɔni a yi mi susumi ngɛ bɔ nɛ a ma plɛ kɛ ha ni ɔmɛ tsuo niye ní ha a he. Eko ɔ, a kpɛti ni komɛ hɛɛ niye ní bɔɔ ngɛ a he, se a kpɛti nihi hiɛhiɛɛ lɛɛ e ma bi nɛ a ya kɔpe ɔmɛ a mi nɛ a ya he niye ní.—Mat. 14:15. w24.12 2 ¶1-2

Wa fɔli nɛ ji Adam kɛ Hawa a ye mluku, nɛ a hi paradeiso ko nɛ ngɛ fɛu ɔ mi. (1 Mose 1:27; 2:​7-9) A ná he blɔ kaa a maa hi si ngɛ bua jɔmi mi kɛ ya neneene. Se tlukaa a, nɔ́ fɛɛ nɔ́ tsake. He blɔ nɛ a ná kaa a maa hi si kɛ ya neneene ngɛ Paradeiso ɔ mi ɔ bɔ mɛ. Mɛni gbosi ní nɛ a si kɛ ha a bimɛ ɔmɛ? Baiblo ɔ de wɔ ke: “Kɛ gu adesa kake [Adam] nɔ ɔ, yayami ba je ɔ mi, nɛ gbenɔ gu yayami nɔ kɛ ba, nɛ lɔ ɔ he ɔ, gbenɔ sã adesahi tsuo, ejakaa mɛ tsuo a pee yayami.” (Rom. 5:12) Gbosi ní nɛ Adam si ha wɔ ji yayami kɛ gbenɔ. Enɛ ɔ ngɛ kaa hiɔ ngua ko nɛ wa ti nɔ ko nɔ ko be nyɛe maa wo. (La 49:8) Yesu ngɔ yayami kɛ to “hiɔ” he. (Mat. 6:12; Luka 11:4) Ke wa tɔ̃ ɔ, e ngɛ kaa nɔ́ nɛ wa ye Yehowa hiɔ. E sa nɛ waa wo wa yayami ɔ he hiɔ. Ke wa nyɛ we nɛ waa wo hiɔ nɛ ɔ, lɛɛ wa ma gbo kɛ tsɔ, nɛ ke wa gbo hu ɔ, hɛnɔkami ko be kɛ ha wɔ.—Rom. 6:7. w25.02 2-3 ¶2-3

E ji he blɔ ngua nɛ wa ná kaa wa maa fiɛɛ anɔkuale nɛ kɔɔ Mawu Matsɛ Yemi ɔ he ɔ kɛ ha ni kpahi! Pi nɔ fɛɛ nɔ nɛ ma ná he blɔ nɛ ɔ. Kaa nɔ hyɛmi nɔ́ ɔ, benɛ Yesu ngɛ zugba a nɔ ɔ, e ngmɛ́ blɔ konɛ mumi yayamihi nɛ a ye e he odase. (Luka 4:41) Mwɔnɛ ɔ hu ɔ, loko nɔ ko he maa su nɛ e ma ba piɛɛ Yehowa we bi a he kɛ tsu fiɛɛmi ní tsumi ɔ, e sa nɛ e ba e je mi ngɛ Yehowa mlaahi a nya. Ke wa bɔ mɔde nɛ wa fiɛɛ sane kpakpa a ngɛ he fɛɛ he nɛ wa ngɛ ɔ, lɔ ɔ tsɔɔ kaa wa bua jɔ he blɔ nɛ wa ngɛ ɔ he. Kaa bɔ nɛ Yesu pee ɔ, wa suɔ nɛ waa pee nɔ́ fɛɛ nɔ́ nɛ wa ma nyɛ konɛ waa fiɛɛ ha ni kpahi nɛ waa tsɔɔ mɛ Matsɛ Yemi ɔ he anɔkuale ɔ. (Mat. 13:​3, 23; 1 Kor. 3:6) Kaa bɔ nɛ Yesu pee ɔ, Yehowa asafo ɔ hu peeɔ nɔ́ fɛɛ nɔ́ nɛ e ma nyɛ konɛ e ye bua nihi nɛ a le Mawu biɛ ɔ. Blɔ kake nɛ asafo ɔ gu nɔ kɛ pee enɛ ɔ ji Ngmami Klɔuklɔu ɔ—Je Ehe Sisi Tsɔɔmi ɔ nɛ a pee ɔ. Baiblo nɛ ɔ ngɔ Mawu biɛ ɔ kɛ wo he fɛɛ he nɛ e sa kaa e je kpo ngɛ ɔ. Amlɔ nɛ ɔ, a tsɔɔ Je Ehe Sisi Tsɔɔmi ɔ tsuo loo e fã ko sisi kɛ ya gbihi nɛ hiɛ pe 270 ɔ mi. w24.04 9 ¶8-9

Nyɛmimɛ nyumuhi komɛ nɛ́ a gba a ngɛ ngɔe ɔ bɔɔ mɔde kaa be fɛɛ be ɔ, a maa pee ní komɛ kɛ tsɔɔ kaa a suɔ a yi ɔmɛ wawɛɛ. (1 Yoh. 3:18) Huno ko ma nyɛ ma je suɔmi kpo kɛ tsɔɔ e yo ngɛ ní nyafinyafi komɛ a mi. Ní nɛ ɔmɛ ekomɛ ji, e yo ɔ nine he nɛ e maa pɛtɛ, aloo nɛ e maa fua lɛ atuu. E ma nyɛ maa mane lɛ sɛ gbi nɛ e de lɛ ke, “Ye hɛ ngɛ jae ngɛ o he” aloo e ma bi lɛ ke, “Kɛ o ligbi ɔ ngɛ nɔ yae ha kɛɛ?” Ke e ngɛ mi hluu ɔ, e ma nyɛ maa ngma munyu komɛ ngɛ kaadi nɔ kɛ ha e yo ɔ nɛ́ e de lɛ bɔ nɛ e suɔ lɛ ha. Ke huno ko peeɔ ní nɛ ɔmɛ ɔ, lɔ ɔ tsɔɔ kaa e buɔ e yo ɔ, nɛ e suɔ lɛ, nɛ lɔ ɔ fiaa a gba a kɛ maa si. Nyumu nɛ e suɔ e yo ɔ peeɔ níhi nɛ ma ha nɛ e yo ɔ nɔ gbagba nɛ te, nɛ e haa nɛ e nuɔ he kaa e he jua wa. Blɔ kake nɛ e ma nyɛ maa gu nɔ kɛ pee jã ji nɛ e ma je hɛsa kpo ngɛ níhi nɛ e yo ɔ peeɔ kɛ fĩɔ e se ɔ he. (Kol. 3:15) Ke huno ko je e tsui mi nɛ e je e yo yi ɔ, lɔ ɔ haa nɛ e yo ɔ bua jɔɔ wawɛɛ. Jehanɛ hu ɔ, e nuɔ he kaa e ngɛ slɔkee, nɛ e huno ɔ suɔ lɛ nɛ e buɔ lɛ. w25.01 11 ¶15; 13 ¶16

La 15 ɔ mwɔ nya kɛ si womi nɛ ji: “Nɔ fɛɛ nɔ nɛ peeɔ ní nɛ ɔmɛ ɔ be mimiɛɛe gblegbleegble.” La polɔ ɔ tsɔɔ nɔ́ he je nɛ Yehowa suɔ nɛ waa pee níhi tsuo nɛ ngɛ La nɛ ɔ mi ɔ. Yehowa suɔ nɛ wa bua nɛ jɔ. Enɛ ɔ he ɔ, ke wa pee níhi tsuo nɛ Mawu tsɔɔ kaa waa pee ɔ, e maa jɔɔ wɔ, nɛ e maa po wa he piɛ. Nihi nɛ Yehowa kplɛɛ a nɔ kaa a hi e bo tsu ɔ mi ɔ ma nyɛ ma ná bua jɔmi hwɔɔ se. Nihi nɛ a pɔ mɛ nu ɔ maa ya hiɔwe, he nɛ Yesu dla kɛ to mɛ ɔ. (Yoh. 14:2) Nihi nɛ a ngɛ hɛnɔkami kaa a maa hi zugba a nɔ ɔ hu hyɛɔ blɔ kaa si womihi nɛ ngɛ Kpo Jemi 21:3 ɔ maa ba mi. Ngɛ anɔkuale mi ɔ, wɔ tsuo wa bua jɔ wawɛɛ kaa Yehowa wo wa hɛ mi nyami nɛ e fɔ wɔ nine kaa wa ba hi e bo tsu ɔ mi kɛ ya neneene!—La 15:​1-5. w24.06 13 ¶19-20

Mɛni ji hɛ mi nyami? Ngɛ Baiblo ɔ mi ɔ, munyu nɛ ji “hɛ mi nyami” ɔ ma nyɛ maa tsɔɔ nɔ́ fɛɛ nɔ́ nɛ haa nɛ a naa nɔ ko kaa e je agbo. Benɛ Yehowa kpɔ̃ Israelbi ɔmɛ kɛ je nyɔguɛ tso mi ngɛ Egipt be bɔɔ se ɔ, e je e hɛ mi nyami ɔ kpo ngɛ blɔ nɛ se be nɔ. Moo po he foni nɛ o hyɛ: Israelbi ayɔhi abɔ bua a he nya ngɛ Sinai Yoku ɔ kasa nya konɛ a bu nɔ́ nɛ a Mawu ɔ ma de mɛ ɔ tue. Kɛkɛ nɛ bɔku kpii ko ba ha yoku ɔ nɔ. Tlukaa a, yoku ɔ tsuo bɔni lasuku jemi, nɛ he nɛ a daa si ngɛ ɔ mimiɛɛ, nɛ oslabai gba, nɛ hiɔwe si, nɛ titimati ko pɛ wawɛɛ. (2 Mose 19:​16-18; 24:17; La 68:8) Benɛ Yehowa je e hɛ mi nyami ɔ kpo kɛ gu nyakpɛ ní nɛ ɔmɛ nɛ e pee ɔ nɔ ɔ, atsinyɛ jemi ko be he kaa Israelbi ɔmɛ a nya kpɛ a he wawɛɛ. Mwɔnɛ ɔ, wa woɔ Yehowa hɛ mi nyami ke wa tuɔ he wami kɛ su kpakpahi nɛ e ngɛ ɔ he munyu kɛ tsɔɔ nihi, nɛ wa je e yi ngɛ níhi nɛ e kɛ e he wami ɔ pee ɔmɛ a he.—Yes. 26:12. w25.01 2 ¶2-3

Benɛ Israelbi ɔmɛ ngɛ blɔ nɔ kɛ yaa Si Womi Zugba a nɔ ɔ, nyumu komɛ nɛ a buɔ mɛ saminya a te si kɛ wo Mose ngɛ he blɔ nɛ Yehowa kɛ ha lɛ ɔ he je. A de ke: “Ma nɛ ɔ tsuo ngɛ klɔuklɔu [pi Mose pɛ,] ni ɔmɛ tsuo ngɛ klɔuklɔu, nɛ Yehowa ngɛ a kpɛti.” (4 Mose 16:​1-3) E ji anɔkuale kaa ngɛ Yehowa hɛ mi ɔ, ‘ma a tsuo ngɛ klɔuklɔu.’ Se Yehowa hla Mose hu kaa e nyɛɛ e we bi a hɛ mi. Akɛnɛ a te si kɛ wo Mose he je ɔ, lɔ ɔ tsɔɔ kaa a te si kɛ wo Yehowa. A ngɔɛ a juɛmi kɛ ma nɔ́ nɛ Yehowa suɔ kaa a pee ɔ nɔ. Mohu ɔ, a ngɔ a juɛmi kɛ ma he blɔ kɛ hɛ mi nyami nɛ a ma ná a nɔ. Mawu ha nɛ nihi nɛ a nyɛɛ atuã tsɔmi ɔ hɛ mi kɛ nimli lafahi abɔ nɛ a fĩ a se ɔ tsuo a hɛ mi kpata. (4 Mose 16:​30-35, 41, 49) Mwɔnɛ ɔ hu ɔ, wa ma nyɛ ma ná nɔ mi mami kaa ke nɔ ko kɛ blɔ tsɔɔmi nɛ Yehowa asafo ɔ kɛ haa a tsu we ní ɔ, Yehowa bua be e he jɔe. w24.07 11 ¶11

Nihi fuu he we yi kaa wa ngɛ nyagbe ligbi ɔmɛ a mi, nɛ akɛnɛ wa he ye kaa wa ngɛ nyagbe ligbi ɔmɛ a mi he je ɔ, a yeɔ wa he fɛu. (2 Petro 3:​3, 4) E ngɛ mi kaa wa li níhi fuu mohu lɛɛ, se e sa nɛ wa ná hemi kɛ yemi nɛ mi wa kaa je nɛ ɔ maa ba nyagbe ngɛ be nɛ Yehowa to ɔ nya pɛpɛɛpɛ, nɛ Yehowa maa hyɛ wa nɔ ngɛ jamɛ a be ɔ mi hulɔ. E sa nɛ wa ná hemi kɛ yemi nɛ mi wa kaa Yehowa guɔ “tsɔlɔ anɔkualetsɛ kɛ ní lelɔ ɔ” nɔ kɛ tsɔɔ e we asafo ɔ blɔ. (Mat. 24:45) Ke amanehlu ngua a je sisi ɔ, eko ɔ, a ma ha wɔ blɔ tsɔɔmi pɔtɛɛ komɛ nɛ ma he wa yi wami. Mwɔnɛ ɔ, e he hia wawɛɛ nɛ wa ná hemi kɛ yemi nɛ mi wa ngɛ nihi nɛ a ngɛ Yehowa asafo ɔ hɛ mi nyɛɛe ɔ a mi. Ke wa ná we nɔ mi mami ngɛ a mi, nɛ waa kɛ a blɔ tsɔɔmi ɔmɛ tsu we ní amlɔ nɛ ɔ, e he maa wa ha wɔ kaa waa kɛ blɔ tsɔɔmihi nɛ wa nine maa su nɔ ngɛ amanehlu ngua a mi ɔ ma tsu ní. w24.09 11 ¶11-12

Ke fɔlɔ ji mo, nɛ o ngɛ hemi kɛ yemi ngɛ Mawu mi ɔ, lɔ ɔ tsɔɔ we kaa doo ɔ, o bimɛ ɔmɛ hu ma ná hemi kɛ yemi ngɛ Mawu mi. Enɛ ɔ he ɔ, o bi ɔ ma nyɛ ma bi mo sane komɛ kaa, ‘Kɛ ma plɛ kɛ ná nɔ mi mami kaa Mawu ko ngɛ ha kɛɛ? Anɛ ma nyɛ ma he nɔ́ fɛɛ nɔ́ nɛ Baiblo ɔ de ɔ ma ye niinɛ lo?’ Ngɛ anɔkuale mi ɔ, Baiblo ɔ woɔ wɔ he wami kaa ‘waa ngɔ wa juɛmi kɛ to níhi a he,’ nɛ wa “ná níhi tsuo a nɔ mi mami.” (Rom. 12:1; 1 Tɛs. 5:21) Se kɛ o ma plɛ kɛ ye bua o bi ɔ ha kɛɛ konɛ e hemi kɛ yemi ɔ mi nɛ wa? Moo wo o bi ɔ he wami konɛ e ná nɔ mi mami kaa nɔ́ nɛ Baiblo ɔ tsɔɔ ɔ ji anɔkuale. Ke o bi ɔ bi mo sane ko ɔ, ngɔɔ jamɛ a he blɔ ɔ kɛ tsɔɔ lɛ bɔ nɛ a hlaa níhi a mi ha ngɛ womi komɛ kaa Watch Tower Publications Index kɛ Research Guide for Jehovah’s Witnesses ɔ mi, konɛ e nyɛ nɛ e na heto ɔ. Jehanɛ hu ɔ, o ma nyɛ maa wo lɛ he wami nɛ e hla munyuhi kɛ videohi nɛ maa ye bua lɛ konɛ e ná nɔ mi mami kaa Baiblo ɔ pi womi ko kɛkɛ nɛ adesahi ngma, mohu ɔ, e ji “Mawu munyu.”—1 Tɛs. 2:13. w24.12 14-15 ¶4-5

Mɛni blɔ nɔ nɛ asafo mi nikɔtɔmahi ma nyɛ maa kase Yesu? E sa nɛ asafo mi nikɔtɔmahi nɛ a tsɔse nyumuhi tsuo, a wa jio, a wɛ jio, nɛ a ye bua mɛ konɛ a tsu babauu ngɛ asafo ɔ mi. Asafo mi nikɔtɔmahi hyɛ we blɔ kaa nihi nɛ a ngɛ mɛ tsɔsee ɔ maa pee a ní kaa nihi nɛ a ye mluku. E sa nɛ a je suɔmi mi kɛ wo nihewi nɛ a ngɛ mɛ tsɔsee ɔ ga konɛ a ba a he si, a pee nihi nɛ a ma nyɛ maa fĩa kɛ fɔ a nɔ, nɛ a pee klaalo hu kaa a ma sɔmɔ ni kpahi. (1 Tim. 3:1; 1 Pet. 5:5) Yesu ngɔ he blɔ kɛ ha e kaseli ɔmɛ kaa a fiɛɛ sane kpakpa a kɛ tsɔɔ nihi, nɛ a tsɔɔ mɛ Ngmami ɔ mi. Eko ɔ, kaseli ɔmɛ nu he kaa a he sui kɛ ha ní tsumi nɛ ɔ, se kɛ̃ ɔ, Yesu ngɛ nɔ mi mami kaa a ma nyɛ ma tsu. Enɛ ɔ he ɔ, e kɛ nɔ mi mami de mɛ ke: “Kaa bɔ nɛ ye Tsɛ ɔ tsɔ mi ɔ, jã kɛ̃ nɛ imi hu i ngɛ nyɛ tsɔe.”—Yoh. 20:21. w24.10 16 ¶15; 17 ¶17

David ji matsɛ nɛ e ye Mawu we bi a nɔ, nɛ e ye Mawu anɔkuale. Jehanɛ hu ɔ, e ji la polɔ, asilɛ ngmalɔ, tatsɛ kɛ gbalɔ. E kɛ kahi fuu kpe ngɛ e si himi mi. Akɛnɛ Matsɛ Saul ngɛ hlae nɛ e gbe David he je ɔ, e ya laa e he jehahi babauu ngɛ ma kpahi a nɔ. Benɛ e ba pee matsɛ ɔ se po ɔ, e he ba hia nɛ e ya laa e he ekohu, ejakaa lɛ nitsɛ e binyumu Absalom ngɛ hlae nɛ e gbe lɛ konɛ e ba ye matsɛ. E ngɛ mi kaa David kɛ nyagba nɛ ɔmɛ tsuo kpe, nɛ e pee yayami komɛ nɛ hɛdɔ ngɛ a he mohu lɛɛ, se e ya nɔ nɛ e ye Mawu anɔkuale kɛ ya si gbenɔ mi. Yehowa de ngɛ David he ke e ji ‘nyumu nɛ e tsui kplɛɛ e nɔ!’ Enɛ ɔ he ɔ, e sa nɛ waa bu David ga womihi nɛ nile ngɛ mi ɔ tue. (1 Ma. 15:5) Mo susu ga womi nɛ David kɛ ha e binyumu Salomo nɛ e ma ba ye e se ɔ he nɛ o hyɛ. Yehowa hla Salomo konɛ e ye Israel ma a nɔ matsɛ, nɛ e ye bua Israelbi ɔmɛ nɛ a sɔmɔ Yehowa ngɛ anɔkuale mi, nɛ e ma sɔlemi we kɛ wo Mawu biɛ ɔ hɛ mi nyami hulɔ. (1 Kron. 22:5) Se Salomo be lɛ nae gbɔjɔɔ, e kɛ haomi fuu nɛ a nya wa maa kpe. Mɛni David ma de lɛ? David de e binyumu Salomo kaa ke e bu Yehowa tue ɔ, e maa ye manye ngɛ si himi mi.—1 Ma. 2:​2, 3. w24.11 10 ¶9-11

Huno nɛ e kongoɔ e yo loo e jɛɔ lɛ ɔ puɛɔ huɛ bɔmi nɛ ngɛ e kɛ Yehowa kɛ e yo ɔ a kpɛti ɔ. Ke e ba jã a, e sa nɛ e pee ní komɛ nɛ a he hia kɛ dla e kɛ e yo ɔ kɛ Yehowa a kpɛti. Kekleekle ɔ, e he hia nɛ huno ɔ nɛ yɔse kaa nɔ́ nɛ e pee ɔ ji nɔ́ ko nɛ hɛdɔ ngɛ he. Nɔ́ ko nɔ́ ko be nɛ adesa kɛ ma nyɛ maa laa Yehowa. (La 44:21; Fiɛɛ. 12:14; Heb. 4:13) Enyɔne, e sa nɛ e kpa e yo ɔ yiwutso ní peemi, nɛ e tsake e subai. (Abɛ 28:13) Etɛne, e sa nɛ e kpa e yo ɔ kɛ Yehowa tsuo pɛɛ, nɛ e bi mɛ nɛ a ngɔ e tɔmi ɔ kɛ ke lɛ. (Níts. 3:19) Jehanɛ hu ɔ, e sa nɛ e kpa Yehowa pɛɛ nɛ e ye bua lɛ konɛ e ná suɔmi ɔ kaa e maa pee tsakemi, nɛ e nyɛ nɛ e kudɔ e susumi, e munyu tutui, kɛ e ní peepee. (La 51:​10-12; 2 Kor. 10:5; Filip. 2:13) Eywiɛne, e sa nɛ e tsu e sɔlemi ɔ nya ní, nɛ e pee nɔ́ fɛɛ nɔ́ nɛ e ma nyɛ konɛ e hiɔ yiwutso ní peepeehi kɛ munyuhi nɛ sɛ tsuo. (La 97:10) Enuɔne, e sa nɛ e ya bi yemi kɛ buami oya nɔuu kɛ je asafo mi nikɔtɔma amɛ a ngɔ. (Yak. 5:​14-16) Ekpane, e sa nɛ e to blɔ nya nɛ maa ye bua lɛ konɛ hwɔɔ se ɔ, e nyɛ nɛ e yu e he kulaa kɛ je ní peepeehi nɛ sɛ nɛ ɔmɛ a he. w25.01 11 ¶14

Anɛ o suɔ Yehowa Mawu, nɔ nɛ ha mo nike ní kpakpahi fuu nɛ wami hu piɛɛ he ɔ lo? Anɛ o suɔ nɛ o pee nɔ́ ko kɛ tsɔɔ kaa o suɔ lɛ lo? Blɔ nɛ hi pe kulaa nɛ o ma nyɛ maa gu nɔ kɛ pee jã ji nɛ o maa jɔɔ o he nɔ kɛ ha lɛ, nɛ a baptisi mo. Ke o pee jã a, o ma ba piɛɛ Yehowa weku ɔ he. Enɛ ɔ ma ha nɛ Yehowa nɛ ji o Tsɛ kɛ o Huɛ ɔ maa po o he piɛ, nɛ e maa hyɛ o nɔ ejakaa o ji e weto ní. (La 73:24; Yes. 43:​1, 2) Jehanɛ hu ɔ, ke o jɔɔ o he nɔ nɛ o ha nɛ a baptisi mo ɔ, o ma ná hɛnɔkami kaa o maa hi si kɛ ya neneene. (1 Pet. 3:21) Anɛ nɔ́ ko ngɛ o baptisimi blɔ tsie lo? Ke jã a, lɛɛ pi mo pɛ. E he ba hia nɛ nimli ayɔhi abɔ nɛ a pee tsakemihi ngɛ a je mi bami mi kɛ bɔ nɛ a susuɔ níhi a he ha a he konɛ a he nɛ su nɛ a baptisi mɛ. Nɛ akɛnɛ a pee jã he je ɔ, a kɛ bua jɔmi kɛ kã ngɛ Yehowa sɔmɔe amlɔ nɛ ɔ. w25.03 2 ¶1-2

Be komɛ ɔ, Baiblo ɔ ngɔɔ yayami kɛ toɔ tlomi nɛ jiɔ he. Matsɛ David kale lɛ nitsɛ e yayami ɔmɛ ngɛ blɔ nɛ ɔ nɔ. E de ke: “Ye tɔmi ɔmɛ laa ye yi; a ngɛ kaa tlomi nɛ jiɔ, a jiɔ tsɔ pe bɔ nɛ ma nyɛ ma tloo.” (La 38:4) Yehowa kɛ yayami peeli nɛ a tsake a tsui ɔ a he yayami ɔmɛ keɔ mɛ. (La 25:18; 32:5) Hebri munyu nɛ a tsɔɔ sisi ke “keɔ” ngɛ ngmami nɛ ɔ mi ɔ sisi ji nɛ a ma “wo nɔ́ ko nɔ,” loo nɛ a maa “tloo.” Enɛ ɔ he ɔ, ke Yehowa ngɔ wa yayami ɔmɛ kɛ ke wɔ ɔ, e ngɛ kaa nɔ́ nɛ e wo tlomi ko nɛ mi jiɔ ngɛ wa kuɛ nɔ. Baiblo ɔ ngɔ nɔ́ he tomi nɔ́ kpa ko kɛ tsu ní kɛ tsɔɔ bɔ nɛ Yehowa jeɔ wa yayami ɔmɛ kɛ yaa se tsitsaa ha. La 103:12 ɔ de ke: “Kaa bɔ nɛ puje he kɛ pusinɔ he a kpɛti kɛ ɔ, jã kɛ̃ nɛ e ha nɛ waa kɛ wa tɔmi ɔmɛ a kpɛti kɛ.” Puje he kɛ pusinɔ he a kpɛti kɛ nɛ a be nyɛe maa kpe gblee. Enɛ ɔ tsɔɔ kaa Yehowa jeɔ wa yayami ɔmɛ kɛ yaa tsitsaa pe bɔ nɛ wa juɛmi ma nyɛ maa kpe he. Enɛ ɔ haa nɛ wa náa nɔ mi mami kaa Yehowa kɛ wa yayami ɔmɛ keɔ wɔ kulaa. w25.02 9 ¶5-6

Benɛ Yesu kpale kɛ ho hiɔwe ya a, bɔfo Petro pee nyakpɛ nɔ́ ko. E tsa nyumu ko nɛ a fɔ lɛ libɔɔ ɔ. (Níts. 1:​8, 9; 3:​2, 6-8) Enɛ ɔ ha nɛ nihi babauu ba Petro ngɔ. (Níts. 3:11) E ngɛ mi kaa he nɛ Petro je ɔ, nihi suɔ nɛ a je a yi loo a wo a hɛ mi nyami wawɛɛ mohu lɛɛ, se Petro sume nɛ ni ɔmɛ nɛ a wo e hɛ mi nyami. Petro ba e he si nɛ e ngɔ yi jemi ɔ kɛ ha Yehowa kɛ Yesu. E de ke: “Kɛ gu [Yesu] biɛ ɔ nɔ, kɛ jehanɛ se hu kɛ gu hemi kɛ yemi nɛ wa ngɛ ngɛ e biɛ ɔ mi ɔ nɔ nɛ nyumu nɛ ɔ nɛ nyɛ ngɛ lɛ hyɛe nɛ nyɛ le lɛ ɔ ba ná he wami ɔ nɛ.” (Níts. 3:​12-16) Wa ma nyɛ maa kase Petro nɔ hyɛmi nɔ́ ɔ konɛ waa ya nɔ nɛ waa ba wa he si. Pi nɛ wa suɔ kaa a je wa yi he je nɛ wa peeɔ nihi kpakpa, mohu ɔ, wa peeɔ jã ejakaa wa suɔ Yehowa kɛ adesahi. Ke waa kɛ bua jɔmi sɔmɔɔ Yehowa kɛ wa nyɛmimɛ ɔmɛ ɔ, lɔ ɔ tsɔɔ kaa wa baa wa he si ke ni kpahi nɛ nɔ́ nɛ wa ngɛ pee ɔ po.—Mat. 6:​1-4. w25.03 10-11 ¶11-12

Ke wa ngɔ wa juɛmi kɛ ma suɔmi nɛ wa ngɛ kɛ ha Yehowa kɛ ni kpahi ɔ nɔ ɔ, lɔ ɔ ma ha nɛ waa kɛ bua jɔmi ma tsu fiɛɛmi ní tsumi ɔ. (Mat. 22:​37-39) Hyɛ bɔ nɛ Yehowa bua maa jɔ ha ke e na kaa wa ngɛ ní tsumi nɛ e kɛ wo wa dɛ ɔ tsue. Jehanɛ hu ɔ, ke waa kɛ nihi bɔni Baiblo ɔ kasemi ɔ, a bua maa jɔ wawɛɛ! Mo kai nihi nɛ a buɔ wa sɛ gbi ɔ tue, nɛ a suɔ kaa a ma sɔmɔ Yehowa a ma nyɛ ma ná neneene wami. (Yoh. 6:40) Anɛ o tlɔ we mi ngɛ yi mi tomi komɛ a he je nɛ o nyɛ we kpo jemi lo? Ke jã a, moo ngɔ o juɛmi kɛ ma níhi nɛ o ma nyɛ maa pee kɛ tsɔɔ kaa o suɔ Yehowa kɛ ni kpahi ɔ nɔ. Ngɛ COVID-19 be ɔ mi ɔ, Samuel kɛ Dania tlɔ we mi nɛ a nyɛ we kpo jemi. Ngɛ behi nɛ a mi wa kaa jã a mi ɔ, a ya nɔ nɛ a ye odase kɛ gu tɛlifoo kɛ sɛ womi ngmami nɔ, nɛ a kɛ nihi kase Baiblo ɔ ngɛ Zoom nɔ. Samuel kɛ Dania si fɔfɔɛ ɔ he je ɔ, a nyɛ we nɛ a pee babauu ngɛ Yehowa sɔmɔmi mi, se a pee nɔ́ fɛɛ nɔ́ nɛ a ma nyɛ, nɛ lɔ ɔ ha nɛ a bua jɔ wawɛɛ. w24.04 18 ¶15-16

E ngɛ mi kaa pi gba si himi ji nɔ́ titli nɛ haa nɔ bua jɔmi mohu lɛɛ, se Kristofohi nɛ a ji nihewi kɛ yihewi kɛ nikɔtɔmahi tsuo ngɛ blɔ hyɛe kaa a ma ná nɔ ko nɛ sa nɛ a kɛ lɛ nɛ sɛ gba si himi mi. Niinɛ, loko o kɛ nɔ ko ma bɔni nyɛɛmi kɛ ha gba si himi mi sɛmi ɔ, e sa nɛ huɛ bɔmi kpakpa nɛ hi o kɛ Yehowa nyɛ kpɛti, e sa nɛ o le mo nitsɛ o he saminya, nɛ o hyɛ kaa o ngɛ sika nɛ o kɛ ma tsu o weku ɔ he lo nya hiami níhi a he ní lo. (1 Kor. 7:36) Jehanɛ hu ɔ, e sa nɛ o le suhi nɛ o ngɛ hlae ngɛ nɔ ɔ he loko o kɛ lɛ nɛ bɔni nyɛɛmi. Ke pi jã a, nɔ ko nɛ jinɛ e ko pee huno loo yo kpakpa kɛ ha mo ɔ ma nyɛ maa je o dɛ aloo o kɛ nɔ nɛ sɛ kɛ ha mo ɔ ma bɔni nyɛɛmi. Ngɛ anɔkuale mi ɔ, e sa nɛ nɔ nɛ waa kɛ lɛ maa sɛ gba si himi mi ɔ nɛ pee Kristofo no nɛ a baptisi lɛ. (1 Kor. 7:39) Se lɔ ɔ hu tsɔɔ we kaa ke a baptisi nɔ ko ɔ, doo ɔ, e maa pee huno loo yo kpakpa kɛ ha mo. Enɛ ɔ he ɔ, mo bi o he ke: ‘Mɛni otihi lɛ i kɛ ma ye hɛ mi? Mɛni suhi nɛ i ngɛ blɔ hyɛe kaa nɔ nɛ i suɔ nɛ i kɛ lɛ nɛ sɛ gba si himi mi ɔ nɛ je kpo? Anɛ i ngɛ níhi fuu blɔ hyɛe tsɔ ngɛ nɔ ɔ he lo?’ w24.05 20 ¶1; 21 ¶3

Ke nyɛ ngɛ nyɛɛe kɛ ha gba si himi mi sɛmi ɔ, eko ɔ, nyɛ be gbi kpae ngɛ ní komɛ a he be komɛ. Ke e ba jã a, mɛni nyɛ ma nyɛ maa pee? Anɛ lɔ ɔ tsɔɔ kaa nyɛ nine nyɛ si lo? Pi doo. Mɛni he je? Ejakaa tsa pi be fɛɛ be nɛ nyumu kɛ yo kpãa gbi. Loko bua jɔmi ma nyɛ maa hi gba si himi ko mi ɔ, ja ni enyɔ ɔmɛ pee kake kɛ tsu nyagbahi a he ní. Enɛ ɔ he ɔ, bɔ nɛ nyɛ tsuɔ nyagbahi a he ní ha amlɔ nɛ ɔ, lɛ maa tsɔɔ kaa nyɛ gba si himi ɔ maa ye manye loo e be manye yee. Nyɛ ma nyɛ ma bi nyɛ he ke: ‘Anɛ wa ma nyɛ maa je bumi kɛ he si bami mi kɛ susu níhi a he lo? Anɛ wɔ ni enyɔ ɔmɛ tsuo wa kplɛɛɔ wa tɔmi ɔmɛ a nɔ, nɛ wa bɔɔ mɔde kaa wa maa pee tsakemihi lo? Anɛ wa nuɔ he kɛ haa wa sibi, nɛ ke wa tɔ̃ wa sibi a nɔ ɔ, wa kpaa he pɛɛ amlɔ nɔuu nɛ waa kɛ keɔ wa sibi lo?’ (Efe. 4:31) Ke nyɛ ngɛ nyɛɛe kɛ ha gba si himi mi sɛmi, nɛ nyɛ pɔɔ nya sami ɔ, jã nɔuu kɛ̃ nɛ ke nyɛ sɛ mi ɔ nyɛ maa pee. Ke o yɔse kaa nɔ nɛ o kɛ lɛ ngɛ nyɛɛe ɔ be nyɛe maa pee yo loo huno kpakpa kɛ ha mo ɔ, nile ngɛ mi wawɛɛ kaa nyɛ maa po nyɛ nyɛɛmi ɔ mi. w24.05 29 ¶12

Ke wa peeɔ nɔ́ nɛ da be fɛɛ be, nɛ wa daa Baiblo sisi tomi mlaahi a nɔ kɛ mwɔɔ yi mi kpɔ ɔ, wa maa pee nɔ hyɛmi nɔ́ kpakpa kɛ ha ni kpahi. Ke wa kase Mawu Munyu ɔ, nɛ wa ná hemi kɛ yemi nɛ mi wa ngɛ Yehowa mi ɔ, wa maa ye lɛ anɔkuale be fɛɛ be. Ke e ba jã a, wa ma nyɛ ma yɔse lakpa tsɔɔmihi, kɛ je ɔ susumihi nɛ a kɛ Yehowa nɔ ɔ kɔ we ɔ. (Efe. 4:14; Yak. 1:​6-8) Jehanɛ hu ɔ, wa nyɛɔ nɛ wa yeɔ buaa nihi nɛ a kɛ nyagbahi ngɛ kpee ɔ. (1 Tɛs. 3:​2, 3) E sa kaa asafo mi nikɔtɔmahi nɛ a ba a je mi saminya, a pee a he nihi nɛ a juɛmi mi tsɔ, nɛ a toɔ níhi a he blɔ nya saminya, nɛ a nuɔ nɔ́ sisi hulɔ. Asafo mi nikɔtɔmahi a ní peepee náa ni kpahi ngɛ asafo ɔ mi ɔ nɔ he wami wawɛɛ. A yeɔ buaa ni kpahi konɛ a he nɛ wa ngɛ asafo ɔ mi kɛ guɔ ‘anɔkuale munyu ɔ nɛ a hɛɛɔ mi wawɛɛ ɔ nɔ.’ (Tito 1:9; 1 Tim. 3:​1-3) Ke asafo mi nikɔtɔmahi peeɔ nɔ hyɛmi nɔ́ kpakpa, nɛ a slaa nyɛmimɛ ɔmɛ konɛ a wo mɛ he wami ɔ, lɔ ɔ maa wo nyɛmimɛ ɔmɛ he wami konɛ a ba asafo mi kpe, a ya fiɛɛmi, nɛ a pee dɛ he ní kasemi be fɛɛ be hulɔ. Ke nyɛmimɛ ɔmɛ ngɛ asafo ɔ mi ɔ kɛ nyagbahi nɛ a mi wa ngɛ kpee ɔ, asafo mi nikɔtɔma amɛ bɔɔ mɔde nɛ a woɔ mɛ he wami bɔ nɛ pee nɛ a ya nɔ nɛ a ngɔ a hɛ kɛ fɔ Yehowa kɛ e si womi ɔmɛ a nɔ. w24.06 31 ¶16-18

Benɛ Yesu ngɛ zugba a nɔ ɔ, e tsɔɔ e tue buli ɔmɛ kaa e Tsɛ ɔ pee klaalo kaa e maa ngɔ nihi a yayamihi kɛ ke mɛ. Mo susu niheyo ɔ nɛ a tu e he munyu ngɛ nɔ́ he tomi nɔ́ nɛ kɔɔ bi nɛ laa a he nɛ o hyɛ. Niheyo ɔ hla kaa e maa je we mi konɛ e ya pee nɔ́ nɛ e suɔ. Se pee se “benɛ e hɛ mi ba tsɔ lɛ ɔ,” e kpale e se kɛ ho we mi ya. Kɛ e tsɛ ɔ pee e ní ha kɛɛ? Yesu tsɔɔ kaa “benɛ e ngɛ blɔ nɔ tsitsaa kɛ ma a, e tsɛ ɔ hɛngmɛ gba e nɔ . . . , nɛ e kɛ fo ya fua lɛ, nɛ e fĩɔ e nya he.” Niheyo ɔ bi e tsɛ ɔ ke ji e ma nyɛ maa ngɔ lɛ kɛ piɛɛ e we apaatsɛmɛ ɔmɛ a he lo. Se akɛnɛ e tsɛ ɔ suɔ kaa e maa ngɔ e yayami ɔ kɛ ke lɛ he je ɔ, e tsɛ lɛ ke “ye binyumu,” nɛ e kpale ngɔ lɛ kɛ ba e we ɔ mi ekohu. Tsɛ ɔ de ngɛ e bi ɔ he ke: “E laa, nɛ a na lɛ.” (Luka 15:​11-32) Benɛ Yesu ngɛ hiɔwe ɔ, e ngɛ heii kaa e na kaa e Tsɛ ɔ mi mi sã lɛ ngɛ yayami peeli a he si abɔ, nɛ e kɛ a kpɛti nihi nɛ a tsake a tsui ɔ a yayami ɔmɛ ke mɛ. Nɔ́ he tomi nɔ́ nɛ ɔ nɛ Yesu kɛ tsu ní ɔ ye bua wɔ nɛ wa na kaa Yehowa ji Tsɛ nɛ e naa nɔ mɔbɔ. w24.08 11 ¶11-12

Ke a ke nɔ ko ‘juɛmi mi tsɔ’ ɔ, mɛni e tsɔɔ? Kristofono nɛ e juɛmi mi tsɔ ɔ mwɔɔ yi mi kpɔhi nɛ tsɔɔ kaa e susuɔ níhi a he kaa bɔ nɛ Yehowa peeɔ ɔ. Kristofono kaa jã a le kaa nɔ́ ko be nɛ e he hia pe huɛ bɔmi nɛ ngɛ e kɛ Yehowa a kpɛti ɔ. Jehanɛ hu ɔ, e susuu we kaa e nɔ kuɔ pe ni kpahi, nɛ e le hu kaa tsa pi nɔ́ fɛɛ nɔ́ nɛ e le. E jeɔ he si bami mi nɛ e sɔleɔ be fɛɛ be kɛ tsɔɔ kaa e ngɔɔ e hɛ kɛ fɔɔ Yehowa nɔ. Ke wa nyɛɔ nɛ wa peeɔ ní komɛ ngɛ wa dɛ he po ɔ, e he hia nɛ waa ya nɔ nɛ waa sɔle ha Yehowa konɛ e ye bua wɔ. Enɛ ɔ he ɔ, ke wa maa mwɔ yi mi kpɔ ko nɛ he hia a, wa sɔleɔ ha Yehowa konɛ e tsɔɔ wɔ blɔ, ejakaa wa le kaa e le nɔ́ nɛ hi kɛ ha wɔ. Wa bua jɔ kaa Yehowa bɔ wɔ konɛ wa nyɛ nɛ wa je e su ɔmɛ kpo. (1 Mose 1:26) Ngɛ anɔkuale mi ɔ, wa be nyɛe maa kase Yehowa kɛ pi si.—Yes. 55:9. w25.03 11 ¶13; 13 ¶17-18

Ko susu kaa nihi li sina. Ke wa ke nihi ní nɛ a nɛ wɔ si ɔ, wa ma nyɛ ma bi wa he ke: ‘Anɛ a li sina niinɛ lo, aloo a hɛ lɛ je nɔ kaa a maa na wɔ si?’ Eko ɔ, yi mi tomi kpa komɛ a he je nɛ a nɛ wɔ si kaa bɔ nɛ wa ngɛ blɔ hyɛe ɔ nɛ. Eko ɔ, ni komɛ suɔ kaa a maa na wɔ si, se e yeɔ ha mɛ kaa a maa pee jã. Aloo eko ɔ, e maa pee mɛ zo kaa wa ke mɛ ní, ejakaa be ko nɛ be ɔ, mɛ hu a nyɛɔ keɔ nihi ní. Bɔ fɛɛ bɔ nɛ ji ɔ, ke wa suɔ wa nyɛmimɛ ɔmɛ niinɛ ɔ, wa be susumi nɛ dɛ náe ngɛ a he ke wa ke mɛ ní nɛ a nɛ wɔ si. Mohu ɔ, wa maa ya nɔ maa ke mɛ ní kɛ bua jɔmi. (Efe. 4:2) Moo to o tsui si. Matsɛ Salomo ngma ke: “Mo sake o abolo ɔ kɛ fɔ nyu hɛ, ejakaa ligbihi babauu se ɔ, o maa na ekohu.” (Fiɛɛ. 11:1) Munyu nɛ ɔ ha nɛ wa na kaa ke wa ke nihi ní ɔ, eko ɔ, “ligbihi babauu” maa be loko a kpɛti ni komɛ ma ba na wɔ si ngɛ he. w24.09 30 ¶18-19

Be komɛ ɔ, a maa fia adafi ngɛ asafo ɔ mi kaa a kã nɔ ko hɛ mi. Ke e ba jã a, loloolo ɔ, waa kɛ lɛ maa ya nɔ maa bɔ, ejakaa wa le kaa e tsake e tsui nɛ e kpa jamɛ a yayami ɔ peemi. Loloolo ɔ, e piɛɛ asafo ɔ he, nɛ e he hia nɛ nyɛmimɛ ɔmɛ nɛ a wo lɛ he wami konɛ e ya nɔ nɛ e pee nɔ́ nɛ da. (Heb. 10:​24, 25) Se ke a je nɔ ko ngɛ asafo ɔ mi ɔ, e si fɔfɔɛ ɔ ngɛ ekpa kulaa. Ke e ba jã a, waa kɛ lɛ ‘kpaa bɔmi, nɛ waa kɛ lɛ yi ní tete po.’ (1 Kor. 5:11) Anɛ enɛ ɔ tsɔɔ kaa e sa nɛ waa yu wa he kulaa ngɛ nɔ ɔ he lo? Pi doo. Ngɛ anɔkuale mi ɔ, waa kɛ lɛ be bɔe. Se ke e ji wa wekuno loo nɔ ko nɛ jinɛ nyu bi ngɛ waa kɛ lɛ wa kpɛti ɔ, wa ma nyɛ maa da wa he nile nɛ waa kɛ Baiblo ɔ tsɔse lɛ ɔ nɔ kɛ hla kaa wa maa fɔ lɛ nine kɛ ba asafo mi kpe loo wa be jã pee. w24.08 30 ¶13-14