E Be Kɛe Nɛ Mawu Maa Po Nɔ́ Nami Tsuo Se

‘Yehowa lee, kɛ yaa su mɛni be ma fa kue kɛ tsɛ mo loko o maa bu mi tue, nɛ o ma kpɔ wɔ kɛ je yi wu tso níhi nɛ a ngɛ wɔ pee ɔ mi?’ (Habakuk 1:2, 3) Habakuk nɛ e ji nɔmlɔ kpakpa nɛ Mawu bua jɔ e he ɔ nɛ e tu munyu nɛ ɔmɛ ɔ nɛ. Anɛ sane nɛ Habakuk bi ɔ tsɔɔ kaa e be hemi kɛ yemi lo? Dɛbi kulaa! Mawu ma nɔ mi kɛ ha Habakuk kaa e be kɛe nɛ e maa po nɔ́ nami tsuo se.​—Habakuk 2:2, 3.

Ke mo nitsɛ aloo o weku no ko ngɛ nɔ́ nae ɔ, eko ɔ, e he be wae kaa o ma de ke Mawu ngɛ e nane si gblae, e sa nɛ e ko tsu sane ɔ he ni oya nɔuu. Se kɛ̃ ɔ, Baiblo ɔ ma nɔ́ mi ha wɔ kaa: “Pi nɛ Yehowa ngɛ e nane si gblae ngɛ e si womi ɔ he kaa bɔ nɛ ni komɛ susuɔ ngɛ nane si gblami he ɔ, se e ngɛ e tsui si toe ha nyɛ, ejakaa e sume nɛ a kpata nɔ ko nɔ ko hɛ mi, mohu ɔ, e suɔ kaa nihi tsuo nɛ a tsake a tsui.”​—2 Petro 3:9.

MƐNI BE MAWU MA TSU NƆ́ NƐ Ɔ?

E be kɛe kulaa! Yesu tsɔɔ kaa yi nɔ pɔtɛɛ ko maa na níhi nɛ ma kadi “níhi a blɔ nya tomi ɔ nyagbe be ɔ.” (Mateo 24:3-42) Yesu gbami nɛ ngɛ mi bae ngɛ wa be nɛ ɔ mi ɔ tsɔɔ kaa be nɛ Mawu maa po adesa nɔ́ nami se ɔ su ta.a

Se mɛni blɔ nɔ Mawu maa gu kɛ po nɔ́ nami tsuo se? Be nɛ Yesu ngɛ zugba a nɔ ɔ, e pee nyakpɛ níhi kɛ tsɔɔ kaa Mawu ha lɛ he wami konɛ e kɛ je adasahi a nɔ́ nami kɛ je. Mo susu nɔ hyɛmi ní komɛ nɛ kɔɔ sane nɛ ɔ he nɛ o hyɛ.

Adebɔ Mi Oslaahi: Benɛ Yesu kɛ e bɔfo ɔmɛ ngɛ Galilea Wo ɔ nɔ ɔ, kɔɔhiɔ kɛ ahumi nɛ nya wa ko fia nɛ lɛ ɔ miɔ nɛ e ma mu. Se Yesu tsɔɔ kaa e kɛ e Tsɛ ɔ a ngɛ he wami ngɛ adebɔ níhi a nɔ. (Kolose Bi 1:15, 16) Nɔ́ nɛ Yesu de kɛkɛ ji: “Hɛ! Pee dii!” Lɔ ɔ se ɔ, mɛni ba? “Kɔɔhiɔ jɔɔ fiami, nɛ lejɛ ɔ jɔ dii nitsɛnitsɛ.”​—Maako 4:35-39.

Hiɔ: A le Yesu kaa e ngɛ he wami nɛ e kɛ ma nyɛ ma tsa hɛ yuyuili kɛ glɔtsɛmɛ, kɔkɔtsɛmɛ, kpititsɛmɛ, loo hiɔ slɔɔtohi tsuo nɛ ngɛ nihi a he ɔ. “E tsa nihi tsuo nɛ a ngɛ nɔ́ nae ɔ.”​— Mateo 4:23, 24; 8:16; 11:2-5.

Hwɔ Nɛ Nya Wa: Yesu ngɔ he wami nɛ e Tsɛ ɔ ha lɛ ɔ kɛ tsu ní nɛ e ha nɛ niye ní bɔbɔyoo ba hiɛ babauu. Baiblo ɔ tsɔɔ kaa ngɛ e sɔmɔmi ní tsumi ɔ mi ɔ, e lɛ nihi akpehi abɔ si enyɔ sɔuu.​—Mateo 14:14-21; 15:32-38.

Gbenɔ: Yesu tle nihi etɛ nɛ a gbo ɔ si kɛ tsɔɔ heii kaa Yehowa ngɛ he wami nɛ e kɛ ma je gbenɔ kɛ je kulaa. Nihi nɛ Yesu tle mɛ si ɔ a kpɛti nɔ kake gbo ligbi eywiɛ sɔuu loko e tle lɛ si kɛ ba wami mi ekohu.​—Maako 5:35-42; Luka 7:11-16; Yohane 11:3-44.