Mi Ní

Mwɔnɛ ɔ, nihi babauu hlaa hɛ mi nyami ngɛ je yaya nɛ ɔ mi. Se ke Yehowa wo nɔ ko hɛ mi nyami ɔ, lɔ ɔ ji nɔ́ nɛ hi pe kulaa. Munyu nɛ ɔ maa tsɔɔ wɔ nɔ́ he je nɛ e sa nɛ wa ha nɛ Yehowa mohu nɛ wo wa hɛ mi nyami. Be komɛ ɔ, Yehowa woɔ e sɔmɔli a hɛ mi nyami be mi nɛ a hyɛ we blɔ. Wa ma susu bɔ nɛ Yehowa peeɔ jã ha a he.

Ngɛ munyu nɛ ɔ mi ɔ, wa maa na nɔ́ he je nɛ anɔkualetsɛ Mose nyɛ we nɛ e ya su Si Womi Zugba a nɔ. Jehanɛ hu ɔ, wa maa na nɔ́ nɛ e sa nɛ waa pee konɛ nɔ́ nɛ ba Mose nɔ ɔ nɛ ko ba wa nɔ.

Yehowa níhi ji adesahi tsuo. Enɛ ɔ he ɔ, e sa nɛ wa ja lɛ pɛ. Se ni komɛ peeɔ a ní kaa a ngɛ Mawu jae ngɛ anɔkuale mi be mi nɛ a peeɔ níhi nɛ Mawu sume. Ngɛ kekleekle munyu ɔ mi ɔ, wa maa na ní komɛ nɛ Kain, Solomon, Mose kɛ Aaron pee, kɛ ní kasemi nɛ ngɛ mi kɛ ha wɔ. Ngɛ munyu enyɔne ɔ mi ɔ, wa maa na níhi nɛ wa ma nyɛ maa pee kɛ tsɔɔ kaa wa bua jɔ he kaa Yehowa we bi ji wɔ.