Ke Hiɔ Ko Nɛ Mi Wa Fia Mo

“Benɛ a de mi ke i ná kansa ngɛ ye fakafaka a he ɔ, i pee mi kaa nɔ́ nɛ a bu mi gbenɔ fɔ. Se benɛ i je dɔkita a ngɔ kɛ ho we mi ya a, i de ye he ke, ‘pi nɔ́ nɛ i ngɛ blɔ hyɛe ɔ ji nɛ ɔ, se e sa nɛ ma hla blɔ nɔ nɛ ma gu kɛ da nyagba nɛ ɔ nya.’”—Linda, e ye jeha 71.

“I nu hiɔ ko nɛ ha nɛ panihi nɛ a ngɛ ye hɛ mi ɔ ekomɛ gbɔjɔ. Hiɔ nɛ ɔ yeɔ nɔ wawɛɛ. Be komɛ ɔ, yeyee ɔ haa nɛ i haoɔ wawɛɛ nitsɛ. Behi fuu ɔ, ye hɛ ja a nɛ e peeɔ mi kaa ma gbe ye he po.”—Elise, e ye jeha 49.

Nyumu ko nɛ e be he wami ɔ kɛ e suɔli ngɛ si slaae

KE MO nitsɛ aloo o suɔlɔ ko nu gbenɔ hiɔ ko hyɛ ɔ, lɛɛ atsinyɛ jemi ko be he kaa o le bɔ nɛ e haoɔ nɔ ha. Kɛ piɛ hiɔ ɔ he ɔ, e sa nɛ o da nyagba komɛ nɛ a mi wa a nya. Dengme nɛ o ngɛ gboe kɛ ngɛ dɔkita yae, kɛ hiɔ ɔ he tsaba nɛ o nɛ́ ɔ ma nyɛ ma ha nɛ gbeye nɛ o ngɛ yee kɛ yeyeeye nɛ o ngɛ pee ɔ mi maa wa wawɛɛ. Ke nɔ ko nu hiɔ nɛ mi wa a, e haa nɛ nɔ ɔ peeɔ basaa, e haoɔ nɛ e yeɔ aywilɛho.

Jije wa ma nyɛ ma ná yemi kɛ buami kɛ je? Nihi babauu na kaa ke a sɔle kɛ ha Mawu nɛ a kane ngmamihi nɛ woɔ nɔ bua ngɛ Baiblo ɔ mi ɔ, lɔ ɔ woɔ a bua wawɛɛ. Jehanɛ se ɔ, wa weku li kɛ wa huɛmɛ hu ma nyɛ maa ye bua wɔ nɛ a je suɔmi kpo kɛ tsɔɔ wɔ.

NƆ́ NƐ YE BUA NI KOMƐ

Robert nɛ e ye jeha 58 ɔ kɛ ga womi ha ke: “Ke hiɔ ko fia mo ɔ, mo ná hemi kɛ yemi ngɛ Mawu mi nɛ e maa ye bua mo kɛ da nya. Moo sɔle kɛ ha Yehowa. Mo de lɛ bɔ nɛ o ngɛ he nue ha. Mo bi lɛ nɛ e ha mo e mumi klɔuklɔu ɔ. Mo bi lɛ konɛ e ye bua mo nɛ o ná juɛmi nɛ da kɛ da hiɔ ɔ nya.”

“Ke o weku ɔ ngɛ o kasa nya be fɛɛ be nɛ a yeɔ bua mo ɔ, e haa nɛ o tsui nɔɔ o mi. Nihi tsɛɔ mi ngɛ fon nɔ daa ligbi nɛ a biɔ mi bɔ nɛ i ngɛ ha. I náa he wami womi kɛ jeɔ huɛmɛ nɛ a ngɛ hehi slɔɔtohi ɔ a ngɔ. A haa nɛ ye bua jɔɔ nɛ jehanɛ se hu ɔ, ye kɔni mi jɔ̃ we.”

Linda de ke: “Ke o yaa slaa nɔ ko nɛ e be he wami ɔ, nɔ ɔ suɔ nɛ e ná bua jɔmi, lɔ ɔ e be suɔe kaa e maa tu e hiɔ ɔ he munyu. Enɛ ɔ he ɔ, o kɛ lɛ nɛ sɛɛ níhi nɛ nyɛ pɔɔ a he ní sɛɛmi ɔ a he ní.”

He wami nɛ wa náa kɛ jeɔ Mawu ngɔ, bua womi nɛ wa náa kɛ jeɔ Baiblo ɔ mi, kɛ jehanɛ se hu yemi kɛ buami nɛ wa náa kɛ jeɔ weku li kɛ wa huɛmɛ nɛ a ngɛ suɔmi ɔ a ngɔ ɔ haa nɛ wa náa nɔ mi mami kaa ke waa kɛ hiɔ nɛ mi wa ngɛ kpee po ɔ, e sɛ nɛ si himi ɔ nɛ gbe wa nya.

Ngmami Nɛ Ɔmɛ Ma Nyɛ Maa Ye Bua

Ngɔɔ o hɛ kɛ fɔ Mawu nɔ.

‘I fa kue ha Yehowa, nɛ e bu mi tue; e ha nɛ i jɔɔ gbeye yemi. Nɔ́ nalɔ nɛ ɔ fa kue ha Yehowa; Yehowa bu lɛ tue.’—La 34:4, 6.

Linda nɛ a tu e he munyu kɛ sɛ hlami ɔ de ke: “Ke i ngɛ sɔlee ɔ, e de we ke ‘Mawu mo tsa mi.’ Mohu ɔ, nɔ́ nɛ i biɔ Mawu daa ligbi ji, ‘Moo ye bua mi nɛ ma ná he wami, nɛ o ye bua mi nɛ ma fĩ si kɛ da hiɔ nɛ ɔ nya.’”

Kane Mawu Munyu ɔ nɛ e wo mo he wami.

“Nihi nɛ ngɛ zugba a nɔ ɔ, a ti nɔ kɔ nɔ ko be dee hu ke, ‘I be he wami.’”—Yesaya 33:24.

Pue o yi mi tɛ ngɛ níhi nɛ Mawu maa pee hwɔɔ se ɔmɛ a he. Jã nɛ o maa pee ɔ ma ha nɛ o ná hɛ nɔ kami, nɛ e maa wo mo he wami konɛ o fĩ si.

Mo bi o huɛmɛ kɛ o weku li konɛ a ye bua mo.

“Huɛmɛ suɔ a he be tsuaa be, se nyɛmimɛ lɛɛ haomi be mi tete po a si we a sibi.”—Abɛ 17:17.

Elise nɛ a tu e he munyu kɛ sɛ hlami ɔ kɛ ga womi ha ke, “E sɛ nɛ o tsɔ o he banee. Moo ngmɛ o huɛmɛ blɔ nɛ a ye bua mo. E suu be nɛ o nuɔ he kaa o be yemi kɛ bualɔ ko, nɛ Mawu hu bui mo tue. Se ke e ba jã a, ko tsɔ o he banee.”