‘Nyɛɛ Pee Níhi Tsuo Ngɛ Sane Kpakpa a Heje’
1. Mɛni ji nɔ́ nɛ Matsɛ Yemi fiɛɛlɔ suɔ kaa e pee ha nihi, nɛ mɛni heje?
1 Bɔfo Paulo na kaa e ji e blɔ nya nítsumi kaa e fiɛɛ sane kpakpa a kɛ tsɔɔ nihi. (1 Kor. 9:16, 19, 23) Jã kɛ̃ wɔ hu, akɛnɛ wa suɔ kaa e hi ha nihi kɛ ya neneene heje ɔ, wa bɔɔ mɔde kaa wa maa fiɛɛ sane kpakpa a kɛ tsɔɔ mɛ.
2. Mɛni tsakemi wa suɔ kaa waa pee ngɛ wa fiɛɛmi mi, nɛ mɛni heje?
2 Moo Fiɛɛ Ngɛ He Nɛ O Maa Na Nihi Ngɛ Kɛ Be Nɛ O Maa Na Mɛ: Hɛlɔ kpakpa ya fɔɔ e ya ngɛ he nɛ e maa na lo ngɛ kɛ be nɛ e maa na lo, se pi ngɛ he nɛ lɛ nitsɛ e suɔ kɛ be nɛ maa hi ha lɛ. Wɔ hu akɛnɛ wa ngɛ ‘nimli hɛe kaa a hɛɛ lo’ heje ɔ, e maa hi kaa waa pee tsakemi komɛ ngɛ wa blɔ nya tomihi a mi bɔnɛ pee nɛ waa na nihi ngɛ wa zugba kpɔ ɔ mi, kɛkɛ ɔ, wa maa gbe “lo slɔɔtoslɔɔtohi” nɛ wa bua jɔmi ɔ maa pi si. (Mat. 4:19; 13:47) Anɛ wa ma nyɛ maa ya nihi a ngɔ ngɛ a wehi a mi gbɔkuɛ gbɔkuɛ loo waa ngɔ mɔtu mla kɛ ye nihi odase ngɛ gbɛjegbɛhi a he lo? Paulo yi mi tomi ji kaa é ‘ye sane kpakpa a he odase kɛ pi si,’ nɛ e ngɔ he blɔhi tsuo nɛ e ná a kɛ pee jã.—Níts. 17:17; 20:20, 24.
3, 4. Ke wa ngɛ fiɛɛe ɔ, mɛni blɔhi a nɔ wa ma nyɛ ma tsake wa munyu ɔ mi, nɛ mɛni maa je mi kɛ ba?
3 Mo Tsake O Munyu ɔ Mi Nɛ E Kɔ Ni Ɔmɛ A Hiami Níhi A He: Hɛli pɔɔ blɔ nɛ a guu nɔ kɛ gbee lo ɔ hɛ mi tsakemi bɔnɛ pee nɛ a nyɛ nɛ a gbe lo pɔtɛɛ ko. Mɛni blɔ nɔ wa maa gu kɛ ngɔ Matsɛ Yemi sane kpakpa a kɛ ha nihi ngɛ wa zugba kpɔ ɔ mi nɛ a bua maa jɔ he? E sa nɛ waa gu ga blɔ nɔ kɛ tle munyu ko nɛ kɔɔ ni ɔmɛ a he si, konɛ waa bu nɔ́ nɛ a ma de ɔ tue saminya. (Yak. 1:19) Wa ma nyɛ ma bi mɛ sane nɛ haa nɔ jeɔ e juɛmi kpo, konɛ a de wɔ bɔnɛ a susuɔ ha. (Abɛ 20:5) Ke wa pee jã a, wa ma nyɛ ma tsake wa sane kpakpa a mi bɔnɛ maa sɛ ni ɔmɛ a tsui mi kakaaka. Paulo ‘plɛ e he nɔ́ tsuaa nɔ́ kɛ ha nihi kulaa.’ (1 Kor. 9:22) Loko wa munyu ɔ ma nyɛ maa sɛ nihi a tsui mi ɔ, ja wa tsake wa munyu ɔ mi.
4 Wa bua jɔɔ kaa wa maa ngɔ “manye munyu ɔ nɛ kɔɔ tue mi jɔmi he” ɔ kɛ ha nihi! (Yes. 52:7) Nyɛ ha nɛ waa ‘pee níhi tsuo ngɛ sane kpakpa a heje,’ bɔnɛ pee nɛ wa nine nɛ su nihi babauu a nɔ.—1 Kor. 9:23.