Nihewi Kɛ Yihewi Náa Kpehi A He Se

¹ Yiheyo ko de ke: “Be komɛ ɔ, i susuɔ kaa nihewi kɛ yihewi kɛ si himi nɛ mi wa kpeɔ wawɛɛ. Ajuama bɔli, nihi nɛ a kɛ tsopa yaya tsuɔ ní, kɛ nihi nɛ a nuɔ da bɔle wɔ.” Anɛ o nuɔ he jã lo? Ke jã a, lɛɛ mɛni o susu kaa e maa ye bua mo konɛ ní yayahi nɛ ngɛ nɔ yae ɔ nɛ ko ná o nɔ he wami? O hia hemi kɛ yemi nɛ mi wa ngɛ Yehowa blɔ nɛ da amɛ a mi, ke pi jã a, o “be nyɛe maa sa Mawu hɛ mi.” (Heb. 11:6) Ke o yaa asafo mi kpehi ɔ, e maa ye bua mo nɛ o hemi kɛ yemi kaa Kristofo no ɔ mi maa wa, nɛ o maa fia o pɛɛ si kaa o be yayami pee.

² O Ma Nyɛ Ma Ná Kpehi A He Se Babauu: Mɛni lɛ haa nɛ niye ní nɛ ngɔɔ nɛ a kɛ huɛmɛ yeɔ peeɔ bua jɔmi? Anɛ pi niye ní kpakpa kɛ huɛ bɔmi nɛ yaa nɔ ɔ nɛ haa nɛ e peeɔ bua jɔmi ɔ lo? Wa kpe ɔmɛ haa nɛ wa náa bua jɔmi jã a nɔuu, se ngɛ Mawu jami blɔ fa mi.

³ Ke wa kpe ngɛ Matsɛ Yemi Asa a nɔ ɔ, wa kaseɔ níhi nɛ woɔ nɔ he wami. Wa kaseɔ bɔ nɛ wa ma tsu haomihi nɛ waa kɛ kpeɔ daa ligbi ɔ a he ní ha, kɛ Baiblo mi gbamihi nɛ a ngɛ bua jɔmi. A haa wɔ blɔ tsɔɔmi kpakpa nɛ ma ha nɛ waa ba wa je mi saminya konɛ ke waa kɛ nyagba ko kpe ɔ, wa nyɛ nɛ waa da nya. Huɛ bɔmi nɛ yaa nɔ ngɛ kpehi a sisi ɔ se be kulaa, nɛ Mawu jami mi ní peemihi nɛ yaa nɔ ɔ haa wɔ bua jɔmi nɛ wa nuɔ he kaa wa ngɛ slɔkee. (La 133:1) E be nyakpɛ kaa yiheyo ko de ke: “I yaa sukuu ligbi ɔ tsuo, nɛ pɔ tɔɔ mi. Se kpe ɔmɛ ngɛ kaa he jɔmi he ngɛ nga kplanaa nɔ, nɛ e woɔ mi he wami nɛ i yaa sukuu e nɔ jena.” Yiheyo ko hu de ke: “I naa kaa nihi nɛ a suɔ Yehowa nɛ i kɛ bɔɔ gbagbanii ɔ yeɔ bua mi nɛ i hɛɛ mi kɛ suɔ Yehowa he.”

⁴ Ke o ngma o biɛ ngɛ Teokrase Sɔmɔmi Sukuu ɔ mi ɔ, o maa kase bɔ nɛ o maa pee ha kɛ bua Baiblo mi sanehi a nya kɛ pee munyu, nɛ o maa tu kɛ tsɔɔ tue buli ngɛ sane gbami blɔ nɔ ngɛ Matsɛ yemi asa a nɔ. Mo susu se nami nɛ ngɛ tsɔsemi nɛ o ma ná, be mi nɛ o kɛ he bemi maa tsɔɔ nihi anɔkualehi nɛ ngɛ Mawu Munyu ɔ mi ɔ he nɛ o hyɛ! Jije po nɛ nihewi kɛ yihewi ma ná tsɔsemi kpakpa nɛ ngɛ kaa kikɛ ɔ ngɛ?

⁵ Bɔ Nɛ O Maa Pee Kɛ Ná Kpehi A He Se Saminya: Loko o ma ná kpehi a he se saminya a, níhi etɛ nɛ a he hia ngɛ nɛ e sa kaa o pee. Ní nɛ ɔmɛ ji he dlami, o he nɛ o kɛ maa wo ní kasemi ɔ mi, kɛ nɔ́ nɛ o kase ɔ nɛ o kɛ ma tsu ní.

⁶ Dla O He Kɛ Ha Ní Kasemi ɔ: Moo to be nɛ o kɛ dla o he kɛ ha kpehi daa. Ko ha nɛ sukuu ní tsumi, be fã ní tsumi, loo hɛja jemi nɛ ngɔ be nɛ o kɛ maa nylɔ ní nɛ nyɛ maa kase ngɛ asafo mi kpehi a sisi ɔ mi. E hi wawɛɛ kaa o maa pee daa nɛ o be mi poe. Kekleekle ɔ, moo kane otsi Baiblo kanemi nɛ ngɛ Teokrase Sɔmɔmi Sukuu ɔ mi ɔ. E ma he mo hɛngmɛfia bɔɔ pɛ daa ligbi nɛ o kɛ maa kane yihi nɛ a tsɔɔ ɔ nɛ o susu he. Moo to be nɛ o kɛ dla o he kɛ ha Asafo Baiblo Mi Ní Kasemi kɛ Hwɔɔmi Mɔ ɔ Kasemi. Ni komɛ peeɔ jã ke e piɛ ligbi kake loo enyɔ nɛ a maa ya kpe ɔ. Moo bɔ mɔde nɛ o kase ní peemihi nɛ maa ya nɔ daa otsi ngɛ Sɔmɔmi Sukuu ɔ mi ɔ hulɔ.

⁷ O Kɛ O He Nɛ Wo Ní Kasemi ɔ Mi: Baiblo ɔ de kaa benɛ Yesu ye jeha 12 ɔ, a na lɛ ngɛ sɔlemi we ɔ nɛ e ngɛ nihi tue bue, e ngɛ nihi sane bie, nɛ e ngɛ sanehi a heto hae. (Luka 2:46, 47) Ngɛ blɔ ko nɔ ɔ, e kɛ e he wo mi kulaa. Ke o bɔ mɔde nɛ o kɛ o he wo ní kasemi ɔ mi ɔ, o ma ná kpe ɔ he se saminya.​—Abɛ 15:23.

⁸ E sa nɛ o ngɔ o juɛmi kɛ fɔ níhi nɛ a tsɔɔ ngɛ kpehi a sisi ɔ nɔ. Be komɛ ɔ, munyu tue bumi he wa pe munyu tumi. Mɛni he je? Ke nɔ ko ngɛ munyu tue ɔ, o juɛmi ma nyɛ maa hi si kpae. Mɛni o ma nyɛ maa pee konɛ o juɛmi ko je ní kasemi ɔ nɔ? Moo ngma ní. Ngmaa otihi nɛ a he hia nɛ pee se ɔ, o maa suɔ kaa o maa nylɔ mi ɔ. Ní nɛ o maa ngma a ma ha nɛ o juɛmi maa hi ní peemi ɔ nɔ. Jehanɛ hu ɔ, o bli ngmamihi nɛ a tsɛ se ɔmɛ, nɛ ke munyu tulɔ ɔ ngɛ kanee ɔ, o nyɛɛ se.

⁹ Jehanɛ, kɛ pee oti ngɛ o hɛ mi kaa o kɛ o he maa wo sane bimi kɛ heto hami ní peemi tsuo nɛ maa ya nɔ ngɛ kpehi a sisi ɔ mi. Ke o susu nɔ́ nɛ o ma de ɔ he saminya a, o ma ná he se. Abɛ 15:28 de ke: “Ke dalɔ ma ha munyu heto ɔ, e susuɔ he saminya.”

¹⁰ O Kɛ Nɔ́ Nɛ O Kase ɔ Nɛ Tsu Ní: Nyagbe ɔ, e sa nɛ o kɛ nɔ́ nɛ o kase ɔ nɛ ‘tsu ní.’ (1 Tes. 2:13) Ke o kɛ nɔ́ nɛ o kase ngɛ kpe tsuaa kpe sisi tsuɔ ní ɔ, e ma ha nɛ o maa hɛ kɛ su Yehowa Mawu he. O maa na kaa e ngɛ nitsɛnitsɛ, nɛ ke o ‘nyɛɛ ngɛ anɔkuale ɔ nya’ nɛ o kɛ anɔkuale ɔ pee o nɔ ɔ, o ma ná bua jɔmi babauu nɛ o tsui maa nɔ o mi.​—3 Yoh. 4.

¹¹ Nihewi kɛ yihewi, ke nyɛ dlaa nyɛ he daa kɛ haa kpehi, nɛ nyɛɛ kɛ nyɛ he woɔ ní kasemi ɔ mi, nɛ nyɛɛ kɛ nɔ́ nɛ nyɛ kaseɔ ɔ tsuɔ ní ɔ, nyɛ bua maa jɔ kpehi a he saminya, nɛ nyɛ ma ná he se kɛ pi si. Enɛ ɔ ma ha nyɛ hemi kɛ yemi, kɛ nyɛ juɛmi nya si nɛ nyɛ ma kaa nyɛ ma ja Yehowa, nyɛ hiɔwe Tsɛ ɔ ngɛ anɔkuale mi ɔ mi maa wa.​—La 145:18.