Sane Bimi He

Ee, e sa nɛ a ngɔ zugba kpɔ he foni kɛ wo ahuhuɛ mi nɛ a kɛ mɛtɛ gbogbo ɔ he ngɛ Matsɛ Yemi Asa a nɔ. E sɛ nɛ a ngɔ zugba kpɔ he foni ɔ kɛ mɛtɛ he nɛ a ngɔɔ adafi fiami womihi kɛ mɛtɛɛ ɔ. E sa nɛ e kadi asafo ɔ zugba kpɔ ɔ klemi kɛ zugba kpɔ kakaakahi nɛ ngɛ mi, kɛ yibɔ kadimi níhi nɛ a kɛ kadi mɛ ɔ. Ke asafo slɔɔtohi kpeɔ ngɛ Matsɛ Yemi Asa kake nɔ ɔ, e sa nɛ a kadi asafo slɔɔto ɔmɛ tsuo a zugba kpɔ. Enɛ ɔ maa ye bua fiɛɛli kɛ nihi nɛ a ngɛ munyu ɔ he bua jɔmi konɛ a le asafo nɛ e zugba kpɔ ji he nɛ a ngɛ ɔ. Ke a kadi hehi nɛ fiɛɛmi yami kuu ɔmɛ kpeɔ ngɛ hu ngɛ nɔ ɔ, nɔ tsuaa nɔ maa le fiɛɛmi yami kuu mi nɛ e ngɛ. Ke tsakemi ko ba a, e sa nɛ a hyɛ nɛ a pee jamɛ a tsakemi ɔ ngɛ zugba kpɔ he foni ɔ nɔ.

Zugba kpɔ he foni nɛ a kɛ maa mɛtɛ si ɔ ma kai fiɛɛli kaa ke e maa hi ɔ, a ná mɛ nitsɛmɛ a zugba kpɔ. Zugba kpɔ he foni ɔ maa ye bua nihi nɛ a suɔ kaa a ha mɛ zugba kpɔ nɛ e kɛ a we he kɛ we ɔ. E ma nyɛ ma gbɔ be nɛ a puɛɔ ke wa ya fiɛɛmi yami kpe ɔ nɔ, ejakaa e maa ye bua fiɛɛmi nɔ hyɛlɔ ɔ konɛ e gba fiɛɛli mla kɛ ya he nɛ a ma tsu ní ɔ ngɛ ɔ.

Zugba he foni ɔ hu yeɔ odase kaa a to Matsɛ Yemi he sane kpakpa a fiɛɛmi he blɔ nya saminya ngɛ asafo ɔ mi.​—Luka 9:6.