Anɛ O Gbe Womi Enyɔne ɔ Kasemi Nya Lo?
1. Mɛni ji yi mi tomi he je nɛ a pee “Mawu Suɔmi” womi ɔ?
1 Ngɛ 2008 “Mawu Mumi ɔ Tsɔɔ Wɔ Blɔ” Kpokpa Nɔ Kpe ɔ sisi ɔ, Yehowa we bi ngɛ je ɔ mi tsuo bua jɔ kaa a nine su womi ehe nɛ ji “Nyɛɛ To Nyɛ He ngɛ Mawu Suɔmi ɔ Mi”! ɔ nɔ. Kaa bɔ nɛ a fia he adafi ɔ, a pee womi nɛ ɔ konɛ e ye bua wɔ nɛ waa le je mi bami he tɛhi nɛ Yehowa po fɔ si ɔ konɛ wa kɛ tsu ní, se pi nɛ wa kɛ tsɔɔ Baiblo sisije tsɔɔmi ɔmɛ. Enɛ ɔ he ɔ, waa kɛ womi nɛ ɔ ha we ngɛ wehi a mi fiɛɛmi mi. Ke jã a, lɛɛ mɛni blɔ nɔ waa kɛ womi nɛ ɔ ma tsu ní ngɛ mɔ?
2. Mɛni blɔ nɔ a kɛ “Mawu Suɔmi” womi nɛ ɔ ma tsu ní, nɛ mɛnɔmɛ nɛ a kɛ mɛ maa kase?
2 “Nyɛɛ To Nyɛ He ngɛ Mawu Suɔmi ɔ Mi” ɔ ji womi enyɔne nɛ e sa kaa waa kɛ Baiblo kaseli nɛ kase ke a gbe Baiblo Tsɔɔmi womi ɔ nya. Ke a baptisi Baiblo kaselɔ ko be mi nɛ e gbi Baiblo Tsɔɔmi womi ɔ loo “Mawu Suɔmi” womi ɔ nya lolo ɔ, nyɛ tsa ní kasemi ɔ nɔ kɛ ya si nyɛ maa gbe “Mawu Suɔmi” womi ɔ kasemi nya. E ngɛ mi kaa a baptisi ní kaselɔ ɔ mohu lɛɛ, se nɔ nɛ kɛ lɛ ngɛ ní kasee ɔ ma nyɛ maa bu ní kasemi ɔ he akɔtaa. Ke fiɛɛlɔ ko piɛɛ ní kasemi nɔ hyɛlɔ ɔ he kɛ ya pee ní kasemi ɔ, nɛ e kɛ e he wo mi ɔ, lɛ hu e ma nyɛ maa bu be ɔ he akɔtaa.
3. Mɛni he je nɛ e he hia nɛ ni hehi nɛ a gbe womi enyɔ ɔmɛ a kasemi nya a?
3 Ni komɛ ma susu kaa nɛ a gbe Baiblo Tsɔɔmi womi ɔ nya a, a le anɔkuale ɔ saminya, lɔ ɔ mɛni he je nɛ tsɔlɔ anɔkualetsɛ ɔ kɛ blɔ tsɔɔmi ha kaa wa kase womi enyɔne ɔ? Nɔ́ he je ji kaa e he hia nɛ ni hehi a nane nɛ pi si ngɛ anɔkuale ɔ mi saminya loko a kɛ mɛ nɛ jɔɔ ní kasemi. E he hia nɛ ‘a ngɔ a he ngɔ mɛtɛ’ Kristo he nɛ a “hemi kɛ yemi mi nɛ wa” konɛ a nyɛ nɛ a da kahi nɛ a kɛ maa kpe ɔmɛ a nya. (Kol. 2:6, 7; 2 Tim. 3:12; 1 Pet. 5:8, 9) Jehanɛ se hu ɔ, loko a ma nyɛ maa tsɔɔ nihi ní nɛ e maa nu tso ɔ, ja a “le anɔkuale ɔ” saminya. (1 Tim. 2:4) Ke waa kɛ wa Baiblo kaseli ɔmɛ kase womi enyɔ ɔmɛ tsuo ɔ, wa ngɛ mɛ ye buae konɛ a nyɛ nɛ a nyɛɛ blɔ “nɛ kɛ nɔ yaa wami mi” ɔ nɔ. (Mat. 7:14) Ngɛ yi mi tomi nɛ ɔmɛ a he je ɔ, nɔ tsuaa nɔ nɛ e kɛ nɔ ko kaseɔ Baiblo ɔ maa ngɔ blɔ tsɔɔmi nɛ a kɛ ha kaa a kɛ Baiblo kaseli nɛ a maa baptisi mɛ ɔ nɛ a kase womi enyɔ ɔ tsuo kɛ gbe nya a nɛ tsu ní.
4. Mɛni nɛ asafo nikɔtɔmahi ma nyɛ maa pee kɛ ye bua ni hehi konɛ a gbe womi enyɔne ɔ kasemi nya?
4 E sa nɛ asafo mi nikɔtɔmahi hu nɛ a hyɛ konɛ nihi nɛ a baptisi mɛ ehe ɔ a gbe womi enyɔne ɔ kasemi nya. (Abɛ 27:23) Ngɛ be komɛ a mi ɔ, Asafo Sɔmɔmi Ajla Toli ma nyɛ maa ngɔ nɔ ko nɛ e kpa fiɛɛmi yami kɛ wo fiɛɛlɔ ko dɛ, nɛ e kɛ lɛ ya kase yi pɔtɛɛ komɛ ngɛ “Mawu Suɔmi” womi ɔ mi ɔ. Ke a kɛ ní tsumi kaa jã wo o dɛ ɔ, mo kai kaa e he hia we nɛ o kɛ nɔ ɔ nɛ kase ní ɔ be kɛkɛɛ, se hu ɔ, mo tsu ní tsumi nɛ a kɛ wo o dɛ ɔ saminya ngɛ anɔkuale yemi mi.
5. Mɛni nɛ e sa kaa ni hehi nɛ a kase we “Mawu Suɔmi” womi ɔ kɛ gbe nya a nɛ a pee?
5 Yehowa, kɛ tsɔlɔ anɔkualetsɛ ɔ a le nɔ́ nɛ nɔ tsuaa nɔ hia nɛ ma ha nɛ e maa “mɛtɛ” Kristo he nɛ e ‘hemi kɛ yemi mi maa wa.’ Lɔ ɔ sane bimi ɔ ji, anɛ o gbe womi enyɔne ɔ kasemi nya lo? Ke a baptisi mo ngɛ lingmi nɛ ɔ mi, nɛ o kase we womi enyɔne ɔ lolo ɔ, wa kpa mo pɛɛ nɛ o to blɔ nya nɛ o je sisi amlɔ nɔuu! Níhi nɛ wa maa kase ngɛ womi nɛ ɔ mi ɔ maa ye bua wɔ konɛ waa ‘hi Mawu Suɔmi ɔ mi’!—Yuda 21.