KRISTOFOHI A SI HIMI
Yesu Gbo Kɛ Ha O Nyɛmi ɔ Hulɔ
Yesu ngɔ e wami kɛ sã afɔle kɛ ha adesahi nɛ a yi mluku ɔ. (Ro 5:8) Atsinyɛ jemi ko be he kaa wɔ nitsɛmɛ wa bua jɔɔ kaa Yesu je suɔmi kpo kɛ tsɔɔ wɔ kɛ gu e wami nɛ e kɛ ha ngɛ wa he ɔ nɔ. Se kɛ̃ ɔ, e ma bi nɛ wa kai wa he si abɔ kaa Kristo gbo kɛ ha wa nyɛmi ɔ hulɔ. Mɛni blɔ nɔ wa maa gu konɛ wa je suɔmi kpo kɛ tsɔɔ wa nyɛmimɛ nyumuhi kɛ yihi nɛ waa kɛ mɛ tsuo wa yi mluku ɔ? Susu blɔ etɛ komɛ a he nɛ o hyɛ. Kekleekle ɔ, wa ma nyɛ ma bli wa tsui mi gbajaa konɛ waa kɛ nihi nɛ e slo he nɛ a je, kɛ he nɛ a tsɔse mɛ ngɛ ɔ nɛ bɔ huɛ. (Ro 15:7; 2Ko 6:12, 13) Enyɔne, wa ma nyɛ maa hyɛ wa he saminya konɛ wa ko de nɔ́ ko loo wa maa pee nɔ́ ko nɛ e ma gba ni kpahi a nya. (Ro 14:13-15) Nyagbe ɔ, ke nɔ ko tɔ̃ wa nɔ ɔ, wa ma nyɛ maa pee klaalo kaa waa kɛ maa pa lɛ. (Luk 17:3, 4; 23:34) Ke wa bɔ mɔde nɛ wa kase Yesu ngɛ blɔ nɛ ɔmɛ a nɔ ɔ, Yehowa maa ya nɔ nɛ e maa jɔɔ asafo ɔ kɛ tue mi jɔmi kɛ kake peemi.
NYƐƐ HYƐ VIDEO NƐ JI O HE NƐ PEE FƐU NGƐ YEHOWA HƐ MI! LƆ Ɔ SE Ɔ, NYƐ HA SANE BIMI NƐ ƆMƐ A HE TO: