Womihi Nɛ A Tsɛ Se Ngɛ Si Himi Kɛ Sɔmɔmi Ní Kasemi Womi ɔ Mi
JANUARY 7-13
JUETLI NƐ NGƐ MAWU MUNYU Ɔ MI | NÍ TSUMI 21-22
“Ha Nɔ́ Nɛ Yehowa Suɔ ɔ Nɛ E Ba Mi”
Hla Ngmami ɔ Mi Junehi Fitsofitso
nwtsty ní kasemi munyu Nít 22:16
fɔ o he yayami ɔmɛ kɛ pue he kɛ gu e biɛ ɔ nɛ o ma tsɛ ɔ nɔ: Aloo “fɔ o he yayami ɔmɛ kɛ pue he nɛ o tsɛ e biɛ ɔ.” A ma fɔ nɔ ko he yayamihi kɛ pue he kɛ gu Yesu biɛ ɔ nɛ e ma tsɛ ɔ nɔ, se pi nyu nɛ a kɛ maa baptisi lɛ ɔ nɔ. Enɛ ɔ peemi biɔ nɛ wa ná hemi kɛ yemi ngɛ Yesu mi, nɛ wa je hemi kɛ yemi nɛ ɔ kpo kɛ maa gu níhi nɛ wa tsuɔ ngɛ Mawu sɔmɔmi mi ɔ nɔ.—Nít 10:43; Yak 2:14, 18.
JANUARY 14-20
JUETLI NƐ NGƐ MAWU MUNYU Ɔ MI | NÍ TSUMI 23-24
“A Po E Nya Kaa E Ji Lohwe Nɔ́ Puɛlɔ Nɛ E Ngɛ Atuã Tsɔmi Si Tlee”
Hla Ngmami ɔ Mi Junehi Fitsofitso
nwtsty ní kasemi munyu Nít 23:6
Farisi no ji mi: Nihi nɛ a ngɛ Paulo tue bue ɔ a kpɛti ni komɛ le lɛ. (Nít 22:5) Akɛnɛ e de ke Farisi bi a binyumu ji lɛ he je ɔ, eko ɔ, a ma susu kaa e ngɛ hlae nɛ a le kaa e kɛ mɛ tsuo a se je he kake. A le kaa pi nɛ Paulo ngɛ tsɔɔe kaa pi Kristofo no ji lɛ, ejakaa Farisi bi ɔmɛ nɛ a ngɛ Sanhedri ɔ le kaa e ba pee Kristofo no nɛ e ngɛ kã. Se ngɛ sane nɛ ɔ mi ɔ, munyu nɛ Paulo tu kaa Farisi no ji lɛ ɔ tsɔɔ we kaa e ba plɛ Farisi no. Paulo je e he si kaa Farisi no se pi Saduki no ejakaa e kɛ Farisi bi ɔmɛ hɛɛ hemi kɛ yemi kake ngɛ gbogboehi a si tlemi ɔ he. Jã nɛ e pee ɔ ha nɛ Farisi bi nɛ a ngɛ lejɛ ɔ kɛ lɛ kpa gbi nɛ a bu lɛ tue. Paulo le heii kaa ke e tu munyu nɛ ɔ, e maa ngɔ mi gbami kɛ ba kpe ngua a mi bi ɔmɛ a kpɛti, nɛ a kpɛti ni komɛ maa je ngmlaa kɛ ha lɛ, nɛ e ye manye hulɔ. (Nít 23:7-9) Munyu nɛ Paulo tu ngɛ Nít 23:6 kɛ bɔ nɛ e kale lɛ nitsɛ e he be mi nɛ e ngɛ e he fãe ngɛ Matsɛ Agripa hɛ mi ɔ kɔ. (Nít 26:5) Nɛ be mi nɛ Paulo ngɛ sɛ womi ngmae ngɛ Roma kɛ ya ha nyɛmimɛ Kristofohi nɛ a ngɛ Filipi ɔ, e kpale tsɔɔ ekohu kaa Farisi no ji lɛ. (Flp 3:5) Jehanɛ se hu ɔ, bɔ nɛ a tsɔɔ Farisi bi komɛ nɛ a ba pee Kristofohi ngɛ Nít 15:5 ɔ hu sa kadimi wawɛɛ.
nwtsty ní kasemi munyu Nít 24:24
Drusila: Hɛrode nɛ a wo e tã ngɛ Nít 12:1 ɔ, nɛ ji Hɛrode Agripa I bi ji Drusila. Lɛ ji biyo etɛne kɛ nɔ nɛ wɛ ngɛ e nyɛmiyi ɔmɛ a kpɛti. A fɔ lɛ ngɛ jeha 38 ngɛ kaseli ɔmɛ a be ɔ mi, nɛ e nyɛmimɛ ji Agripa II kɛ Bɛnis. (Nít 25:13; Hyɛ Baiblo Mi Munyu Komɛ A Sisi Tsɔɔmi, “Hɛrode.”) Amlaalo Fɛlis ji e huno enyɔne. Nɔ nɛ e kɛ lɛ sɛ gba si himi mi kekle ji Siria Matsɛ Azizus nɛ e je Emesa, se e kɛ lɛ po gba a mi nɛ e kɛ Fɛlis sɛ gba si himi mi ngɛ jeha 54 ngɛ kaseli ɔmɛ a be ɔ mi, aloo benɛ e ye maa pee jeha 16. E ma nyɛ ma ba kaa Drusila ngɛ lejɛ ɔ benɛ Paulo tu “dami kɛ he nɔ yemi kɛ kojomi nɛ ma a” he munyu kɛ tsɔɔ Fɛlis ɔ. (Nít 24:25) Benɛ Fɛlis ngmɛɛ nɔ yemi ɔ he kɛ ha Fɛsto ɔ, e si Paulo ngɛ tsu ɔ mi ejakaa e “suɔ kaa e maa sa Yuda bi ɔmɛ a hɛ mi.” Ni komɛ susu kaa e pee jã konɛ e ha nɛ e yo ɔ, nɛ e ji Yuda no ɔ bua nɛ jɔ.—Nít 24:27.
JANUARY 21-27
JUETLI NƐ NGƐ MAWU MUNYU Ɔ MI | NÍ TSUMI 25-26
“Paulo Ngɔ E Sane ɔ Kɛ Ha Kaisare Nɛ E Ye Matsɛ Hɛrode Agripa Odase”
Hla Ngmami ɔ Mi Junehi Fitsofitso
nwtsty ní kasemi munyu Nít 26:14
ngɛ lohwehi a tsɔ̃mi tso ɔmɛ atia sie: Lohwe tsɔ̃mi tso ji tso nɛ e nya ngɛ piɔpiɔɔpiɔ nɛ a kɛ tsɔ̃ɔ lohwehi. (Many 3:31) Munyu nɛ ji ‘lohwehi a tsɔ̃mi tso ɔmɛ atia simi’ ɔ ji abɛ ko nɛ a kɛ tsuɔ ní ngɛ Hela ningmahi a mi. A kɛ munyu nɛ ɔ tsuɔ ní ngɛ foni peemi blɔ nɔ kɛ tsɔɔ bɔ nɛ na ku nɛ e tue mi ti nɛ e sume kaa a kpaka lɛ ɔ peeɔ e ní ha, nɛ lɔ ɔ haa nɛ lohwe tsomi tso ɔ plaa lɛ. Jã nɔuu nɛ Saulo pee loko e ba plɛ Kristofo no. Paulo hwu kɛ si Yesu se nyɛɛli nɛ Yehowa Mawu fĩ a se ɔ, enɛ ɔ nɛ e peeɔ ha e ngɔ e he kɛ wo oslaa mi. (Kɛ to Nít 5:38, 39; 1Ti 1:13, 14 he.) Ngɛ Fiɛlɔ 12:11 ɔ, a kɛ “tso kɛ e nya piɔpiɔ nɛ lohwe hyɛli kɛ tsɔ̃ɔ a lohwehi” ɔ tsu ní ngɛ foni peemi blɔ nɔ kɛ to munyuhi nɛ juɛmitsɛ tuɔ nɛ e haa nɛ tue bulɔ ɔ kɛ ga womi kpakpa tsuɔ ní ɔ he.
nwt Baiblo Mi Munyu Komɛ A Sisi Tsɔɔmi
Lohwehi a tsɔ̃mi tso. E ji tso gagaaga ko nɛ dade piɔpiɔɔpiɔ ko ngɛ nya nɛ ngmɔ huli kɛ kpakaa lohwe. A ngɔ lohwehi a tsɔ̃mi tso ɔ kɛ to munyu nɛ juɛmitsɛ tuɔ nɛ e haa nɛ tue bulɔ ɔ kɛ ga womi kpakpa tsuɔ ní ɔ he. ‘Lohwehi a tsɔ̃mi tso ɔmɛ atia simi ɔ’ tsɔɔ bɔ nɛ na ku nɛ e tue mi ti nɛ e sume kaa a kpaka lɛ ɔ peeɔ e ní ha, nɛ lɔ ɔ haa nɛ e plaa e he.—Nít 26:14; Many 3:31.
JANUARY 28–FEBRUARY 3
JUETLI NƐ NGƐ MAWU MUNYU Ɔ MI | NÍ TSUMI 27-28
“Paulo Sɛ Mele Mi Kɛ Ya Roma”
Hla Ngmami ɔ Mi Junehi Fitsofitso
nwtsty ní kasemi munyu Nít 27:9
Kpatami Ligbi ɔ nɔ hwɔ hami ɔ: E sisi tsɔɔmi tɛɛ ji, “hwɔ hami ɔ.” Hela munyu nɛ ji “hwɔ hami ɔ” tsɔɔ hwɔ hami nɛ a fã Israel bi kaa a pee ngɛ Mose Mlaa a sisi. Hwɔ hami nɛ ɔ kɛ daa jeha Kpatami Ligbi ɔ ngɛ tsakpa, nɛ a tsɛɛ lɛ hu ke Yom Kippur (a je kɛ je Hebri munyu nɛ ji yohm hak·kip·pu·rimʹ ɔ mi, “níhi a nɔ hami ligbi”). (3Mo 16:29-31; 23:26-32; 4Mo 29:7; hyɛ Baiblo Mi Munyu Komɛ A Sisi Tsɔɔmi, “Kpatami Ligbi.”) Munyu nɛ ji “nɔ nitsɛ e he piimi,” nɛ a kɛ tsu ní kaa a pee ngɛ Kpatami Ligbi ɔ nɔ ɔ, ma nyɛ maa tsɔɔ o he nɛ o ma kua, nɛ hwɔ hami hu piɛɛ he ɔ. (3Mo 16:29;NW) Munyu nɛ ji, “hwɔ hami ɔ,” nɛ a kɛ tsu ní ngɛ Nít 27:9 maa nɔ mi kaa ngɛ Kpatami Ligbi ɔ nɔ ɔ, hwɔ hami ji nɔ́ titli nɛ a peeɔ kɛ kuaa a he. Kpatami Ligbi ɔ nɔ hwɔ hami ɔ jeɔ sisi September nyagbe aloo October sisije.
nwtsty ní kasemi munyu Nít 28:11
Zeo Binyumu Ɔmɛ: Hela bi kɛ Roma bi he ye kaa “Zeo Binyumu Ɔmɛ” (Hela, Di·oʹskou·roi) ji Castor kɛ Pollux, nɛ a ji hawi. A tsɔɔ kaa mawu Zeo (Jupiter) kɛ Spartan Manye Leda a bimɛ ji mɛ. Jehanɛ se hu ɔ, a he ye kaa mɛ lɛ a poɔ wo hɛli a he piɛ, nɛ a he ɔ nihi nɛ a kɛ wo nɔ oslaahi kpee ɔ a yi wami. Bɔ nɛ a tsɔɔ sane nɛ ɔ mi kɛ kɔɔ lɛ ɔ he so nɛ a to ɔ ji odase kpa ko nɛ maa nɔ mi kaa nɔ nɛ ngma sane nɛ ɔ na nɔ́ nɛ ya nɔ ɔ.