Anɛ O Ngɛ Mo Susu Ngmami ɔ He Daa Ligbi Womi ɔ He Se Náe Lo?

Anɛ ngmami ɔmɛ kɛ a mi tsɔɔmihi nɛ ngɛ Mo Susu Ngmami ɔ He Daa Ligbi womi ɔ mi ɔ kanemi piɛɛ níhi nɛ o peeɔ daa ligbi, konɛ o hɛ mo kɛ su Yehowa he ɔ he lo? Ke o pee we jã a, lɛɛ anɛ o ma nyɛ maa ngɔ kɛ piɛɛ níhi nɛ o peeɔ daa ligbi ɔmɛ a he lo? Nihi fuu susuɔ he mɔtu. Lɔ ɔ haa nɛ a nyɛɔ susuɔ ngmami ɔ mi munyu ɔmɛ a he ngɛ ligbi ɔ mi tsuo. (Yosh 1:8; La 119:97) Kɛ o ma plɛ kɛ ná Ngmami ɔmɛ a he se kɛ pi si ha kɛɛ? Moo kane ngmami ɔ ngɛ Baiblo ɔ mi konɛ o na bɔ nɛ níhi ya nɔ ha. Bɔɔ mɔde nɛ o susu Baiblo ɔ mi sane ko nɛ e kɔɔ sisi tomi mlaa nɛ ngɛ ngmami nɛ a tsɛ se ɔ mi ɔ he. Lɔ ɔ se ɔ, o kɛ sisi tomi mlaa nɛ ngɛ nɔ́ nɛ o kane ɔ mi ɔ nɛ tsu ní ngɛ o si himi mi. Ke o daa Mawu Munyu ɔ nɔ kɛ mwɔɔ yi mi kpɔhi ɔ, e ma kudɔ mo ngɛ o si himi mi nɛ o ma ná he se wawɛɛ.​—La 119:105.

Betel wekuhi ngɛ je kɛ wɛ ɔ kaseɔ Mo Susu Ngmami ɔ He Daa Ligbi ɔ ke a ngɛ mɔtu ní yee. A ngɔ Mɔtu Mawu Jami nɛ a pee jehahi bɔɔ ji nɛ ɔ ekomɛ kɛ fɔ JW Brɔɔdkastin ɔ nɔ ngɛ NÍ PEEMI SLƆƆTOHI blɔ he ɔ. Be enyɛmɛ ji nɛ ɔ nɛ o hyɛ eko? Eko ɔ, níhi nɛ a susu he ɔmɛ eko maa ye bua mo ngɛ o si himi mi. Kaa nɔ hyɛmi nɔ́ ɔ, kɛ Lot sane ɔ maa ye bua mo ha kɛɛ ke o maa mwɔ yi mi kpɔ ko?

NYƐƐ HYƐ VIDEO NƐ JI, NYƐ KO SUƆ JE Ɔ (1YO 2:15), LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni Baiblo sisi tomi mlaa nɔ lɛ a da nɛ a kɛ susu Mɔtu Mawu Jami nɛ ɔ he?

• Mɛni oslaa nɛ Lot sane ɔ ha nɛ wa na ngɛ je ɔ loo níhi nɛ ngɛ je ɔ mi nɛ wa maa suɔ ɔ he?​—1Mo 13:12; 14:12; 19:3, 12, 13, 24-26

• Mɛni wa maa pee kɛ tsɔɔ kaa wa suɔ Yehowa se pi je ɔ aloo níhi nɛ ngɛ je ɔ mi ɔ?