Womihi Nɛ A Tsɛ Se Ngɛ Si Himi Kɛ Sɔmɔmi Ní Tsumi Kpe ɔ He Ní Kasemi Womi ɔ Mi
© 2023 Watch Tower Bible and Tract Society of Pennsylvania
JANUARY 1-7
JUETLI NƐ NGƐ MAWU MUNYU Ɔ MI | HIOB 32-33
Moo Wo Nihi Nɛ A Ngɛ Yeyeeye Pee ɔ A Bua
it-1 710
Elihu
Elihu hlɛ nɔ mi, nɛ e kɛ sablai nɛ a kɛ gbeɔ nɔ yi mi hu tsɛ we nɔ ko. E le kaa e kɛ Hiob tsuo zu nɛ a kɛ bɔ mɛ, nɛ Ope ɔ ji e Bɔlɔ. Elihu pee we e juɛmi kaa e maa wo Hiob he gbeye nɛ e tsui nɛ po, mohu ɔ, e kɛ lɛ tu munyu kaa e huɛ, nɛ e kɛ e biɛ tsɛ lɛ, se Elifaz, Bildad, kɛ Zofar lɛɛ a pee we jã.—Hiob 32:21, 22; 33:1, 6.
w14 6/1 19 ¶8-10
Anɛ O Naa Adesa Gbɔjɔmi Kaa Bɔ Nɛ Yehowa Naa Lɛ ɔ Lo?
8 Ke wa kaiɔ kaa haomihi nɛ wa nyɛmimɛ ɔmɛ ekomɛ kɛ ngɛ kpee ɔ lɛ ha nɛ a gbɔjɔ ɔ, e ngɛ heii kaa lɔ ɔ ma ha nɛ wa mi mi maa sã wɔ ngɛ a he. Haomihi nɛ a kɛ kpeɔ ɔ ekomɛ ji, hiɔ, aloo a kɛ a weku mi bimɛ be jami kake mi, aloo nɔ́ kpa ko. Ligbi ko ɔ, wɔ hu wa ma nyɛ ma ya je si himi ko kaa jã mi. Israel bi ɔmɛ na nɔ́ wawɛɛ ngɛ Egipt. Se loko a maa su Si Womi Zugba a nɔ ɔ, Yehowa kai mɛ kaa ke a nyɛmi ko dɛ mi ba ta a, a ‘ko pee lɛ kpɛle.’ Yehowa ngɛ blɔ hyɛe kaa Israel bi ɔmɛ maa bu ohiatsɛmɛ ɔmɛ kaa a he hia konɛ a ye bua mɛ.—5 Mose 15:7, 11; 3 Mose 25:35-38.
9 Ke wa nyɛmimɛ kɛ haomihi ngɛ kpee ɔ, e sɛ nɛ waa kɛ oya yemi nɛ pia mɛ, aloo wa susu kaa a pee tɔmi ko. (Hiob 33:6, 7; Mat. 7:1) Kaa nɔ hyɛmi nɔ́ ɔ: Ke nɔ ko kɛ moto ya nɔ si nɛ e plaa wawɛɛ nɛ a ngɔ lɛ kɛ ho hiɔ tsami he ya a, anɛ dɔkita amɛ kɛ nɛɛsi ɔmɛ bɔɔ mɔde kaa a maa le nɔ́ nɛ ha nɛ e kɛ moto ɔ ya nɔ si ɔ loko a tsa lɛ lo? Dɛbi, mohu ɔ, a kɛ oya yemi yeɔ bua lɛ. Jã kɛ̃ nɛ ke wa nyɛmi Odasefo no ko hu kɛ haomihi ngɛ kpee nɛ e gbɔjɔ ɔ, e sɛ nɛ waa kojo lɛ, mohu ɔ, e sa nɛ waa bɔ mɔde nɛ waa ye bua lɛ konɛ e he nɛ wa ekohu.—Kane 1 Tesalonika Bi 5:14.
10 Ke wa susuɔ si himi mi nɛ wa nyɛmimɛ ɔmɛ ngɛ ɔ he ɔ, lɔ ɔ ma nyɛ ma ha nɛ waa na kaa a gbɔjɔɔ we kulaa. Mo susu nyɛmimɛ yihi nɛ a weku mi bimɛ ngɛ si tee kɛ ngɛ mɛ woe jehahi babauu ji nɛ ɔ he nɛ o hyɛ. A ti ni komɛ ngɛ nɛ a hɛ mi peeɔ mɔbɔmɔbɔ mohu lɛɛ, se a jeɔ hemi kɛ yemi nɛ mi wa kpo. Ke o naa binyɛ ko nɛ e be huno, nɛ lɛ nɔ kake pɛ e ngɔɔ e bimɛ kɛ baa asafo mi kpehi daa a, anɛ o nɛ kaa e ngɛ hemi kɛ yemi nɛ mi wa lo? Nɛ nihewi kɛ yihewi nɛ a yi jeha 20 lolo nɛ a pɛtɛ anɔkuale ɔ he wawɛɛ, nɛ a ha we nɛ a sukuu bimɛ nɛ je mɛ kɛ je anɔkuale ɔ mi ɔ hu nɛɛ? Ke wa susu mɔde nɛ wa nyɛmimɛ ɔmɛ ngɛ bɔe kɛ ngɛ Yehowa sɔmɔe ɔ he ɔ, lɔ ɔ maa ye bua wɔ nɛ wa maa na kaa e ngɛ mi kaa wa naa mɛ kaa a gbɔjɔ mohu lɛɛ, se a ji “mumi mi niatsɛmɛ.”—Yak. 2:5.
w20.03 23 ¶17-18
Mɛni Be Nɛ E Sa Kaa O Tu Munyu?
17 Nɔ eywiɛne nɛ e ya slaa Hiob ji Abraham weku no Elihu. E bu nɔ́ nɛ Hiob kɛ e huɛmɛ etɛ ɔmɛ tsuo de ɔ tue saminya. E mi mi sã lɛ nɛ e nyɛ nɛ e wo Hiob ga nɛ e dla susumi nɛ e hɛɛ ɔ. Enɛ ɔ tsɔɔ heii kaa benɛ ní sɛɛmi ɔ ngɛ nɔ yae ɔ, e bu tue saminya. (Hiob 33:1, 6, 17) Pi nɛ Elihu ngɛ hlae nɛ e wo lɛ nitsɛ aloo nɔ kpa ko hɛ mi nyami, mohu ɔ, nɔ titli nɛ e ngɛ hlae nɛ e wo e hɛ mi nyami ji Yehowa. (Hiob 32:21, 22; 37:23, 24) Wa na ngɛ Elihu nɔ hyɛmi nɔ́ ɔ mi kaa e suu be nɛ e he hia nɛ waa pee dii nɛ waa bu tue. (Yak. 1:19) Jehanɛ hu ɔ, wa na kaa ke wa ngɛ nɔ ko ga woe ɔ, oti nɛ e sa nɛ wa kɛ ma wa hɛ mi ji kaa wa maa wo Yehowa hɛ mi nyami, se pi wɔ nitsɛmɛ.
18 Ke waa kɛ Baiblo ga womi nɛ kɔɔ be nɛ e sa nɛ waa tu munyu kɛ bɔ nɛ e sa nɛ waa tu munyu ha a he ɔ tsu ní ɔ, lɔ ɔ tsɔɔ kaa wa bua jɔ nike ní nɛ Yehowa kɛ ha wɔ kaa waa tu munyu ɔ he. Matsɛ Salomo nɛ e ji nile lɔ ɔ ngma ke: “Munyu nɛ a tu pɛpɛɛpɛ ngɛ be nɛ sa mi ɔ, e ngɛ kaa sika tsu akutuhi nɛ a to ngɔ wo sika hiɔ nɔ́ mi.” (Abɛ 25:11) Ke wa bu níhi nɛ nihi deɔ wɔ ɔ tue nɛ wa susuɔ níhi a he saminya loko wa tuɔ munyu ɔ, wa munyu maa pee kaa sika tsu akutuhi—e he jua maa wa, nɛ e maa hi fɛu hulɔ. Kɛkɛ ɔ, ke wa suɔ munyu tumi jio, wa sume munyu tumi tsɔ jio, wa munyu maa fia nihi kɛ ma si, nɛ Yehowa bua maa jɔ wa he. (Abɛ 23:15; Efe. 4:29) Enɛ ɔ ji blɔ nɛ hi pe kulaa nɛ wa ma nyɛ maa gu nɔ kɛ tsɔɔ kaa wa bua jɔ nike ní nɛ Mawu ha wɔ ɔ he!
Ngmami ɔ Mi Junehi
w13 1/1 19 ¶10
Moo Ya Nɔ Nɛ O Hɛ Mo Kɛ Su Yehowa He
10 Jã nɔuu kɛ̃ nɛ e da blɔ kaa wa ma ha nɛ wa he nɛ pee fɛu. Se ke wa bwɔ ɔ, e sɛ nɛ waa bɔ mɔde wawɛɛ kaa wa ma tsake wa nɔmlɔ tso ɔ konɛ nihi nɛ a na wɔ kaa wa wɛ. Ke nɔ ko ngɛ bwɔe ɔ, e ji okadi nɛ tsɔɔ kaa e wa, nɛ bumi ngɛ e he. Kaa nɔ hyɛmi nɔ́ ɔ, Baiblo ɔ de ke: “Yi mi mua ngɛ kaa jlasi nɛ woɔ nɔ hɛ mi nyami; nihi nɛ peeɔ nɔ́ nɛ da lɛ a náa lɔɔ.” (Abɛ 16:31) Yehowa susuɔ kaa bɔ nɛ wa ngɛ ha ngɛ wa tsui mi ɔ he hia kulaa pe bɔ nɛ wa nɔmlɔ tso ngɛ ha. (Kane 1 Petro 3:3, 4.) Ke jã a, anɛ nile ngɛ mi kaa wa ma ha nɛ a pee wɔ operation aloo waa kɛ nu kɛ jale komɛ nɛ a nya wa nɛ a ma nyɛ maa ye wɔ awi nɛ tsake bɔ nɛ wa nɔmlɔ tso ɔ kɛ wa he womi nɔ su ngɛ ha a hɛ mi ngɛ he fɛu he je lo? Wa bwɔ jio, nihewi kɛ yihewi ji wɔ jio, wa ngɛ nɔmlɔ tso mi he wami jio, wa be nɔmlɔ tso mi he wami jio, ‘bua jɔmi nɛ Yehowa haa wɔ’ ɔ ji nɔ́ nɛ haa nɛ wa he peeɔ fɛu nitsɛnitsɛ. (Neh. 8:10) Je ehe ɔ mi pɛ nɛ wa ma ná nɔmlɔ tso mi he wami kpakpa, nɛ wa he hu maa pee fɛu saminya ngɛ. (Hiob 33:25; Yes. 33:24) Loko e maa su jamɛ a be ɔ, e sa nɛ waa pee wa níhi ngɛ nile mi nɛ waa tsɔɔ kaa wa ngɛ hemi kɛ yemi. Enɛ ɔ maa ye bua wɔ nɛ wa maa hi Yehowa kasa mi nɛ wa be haoe tsɔ ngɛ si himi mi nɛ wa ngɛ amlɔ nɛ ɔ he.—1 Tim. 4:8.
JANUARY 8-14
JUETLI NƐ NGƐ MAWU MUNYU Ɔ MI | HIOB 34-35
Ke Ní Yayamihi Ba Nimli Kpakpahi A Nɔ
wp19.1 8 ¶2
Mɛni Suhi Nɛ Mawu Ngɛ?
Mawu peeɔ nɔ́ nɛ da be fɛɛ be. Ngmami ɔ de ke: “Anɛ Mawu maa pee yi wu tso ní lo? anɛ Ope ɔ maa pee nɔ́ nɛ dɛ blɔ lo?” (Hiob 34:10) Ngɛ anɔkuale mi ɔ, Mawu kojo ɔ ngɛ dami nya, kaa bɔ nɛ la tsɛ ɔ tsɔɔ ɔ, e de ngɛ Yehowa he ke: “O kojoɔ je ma amɛ pɛpɛɛpɛ nɛ nɔ hɛ mi hyɛmi be mi.” (La 67:4) Akɛnɛ ‘Yehowa hyɛɛ tsui mi’ he je ɔ, wa be nyɛe maa pee osato kɛ sisi lɛ ejakaa e naa anɔkuale ɔ be fɛɛ be nɛ e kɛ dami sane yemi kojoɔ. (1 Samuel 16:7) Jehanɛ se hu ɔ, Mawu naa dami sane nɛ a yi kɛ nɔ sisimi nɛ ngɛ nɔ yae ngɛ je ɔ mi ɔ tsuo, nɛ e wo si kaa e ma ‘kpata yiwutsotsɛmɛ, kɛ yayami peeli nɛ ɔmɛ a hɛ mi.’—Abɛ 2:22.
Ke Mawu Matsɛ Yemi ɔ Ba a, Mɛni Maa Je?
5 Mɛni Yehowa maa pee? Amlɔ nɛ ɔ, Yehowa ngmɛ yiwutsotsɛmɛ blɔ konɛ a tsake. (Yes. 55:7) Yiwutsotsɛmɛ a nine sui a nyagbe kojomi ɔ nɔ kaa ni kakaakahi lolo. Je yaya nɛ ɔ mohu nɛ a bu lɛ fɔ kɛ ha hɛ mi kpatami. Se nihi nɛ a tsakee we a tsui, nɛ́ a maa ya nɔ nɛ a fĩ je nɛ ɔ se kɛ ya si benɛ haomi ngua a maa ba a hu nɛɛ? Yehowa wo si kaa e ma je yayami peeli kɛ je zugba a nɔ kulaa. (Kane La 37:10.) Eko ɔ, yiwutsotsɛmɛ ma susu kaa a maa ye a he ngɛ kojomi nɛ ɔ he. Nihi fuu bɔɔ mɔde kaa a maa laa ní yayahi nɛ a peeɔ ɔ nɔ, nɛ behi fuu ɔ, je yaya nɛ ɔ haa nɛ a yeɔ a he. (Hiob 21:7, 9) Se kɛ̃ ɔ, Baiblo ɔ de ke: ‘Mawu hɛ ngɛ nɔmlɔ he be tsuaa be. E naa e ní peemi níhi tsuo. Diblii ko be nɛ nya tsa bɔ nɛ yayami peeli maa laa a he ngɛ mi.’ (Hiob 34:21, 22) Nɔ ko be nyɛe maa tu Yehowa Mawu nya fo. Nɔ ko be nyɛe maa sisi lɛ. Mawu naa nɔ́ tsuaa nɔ́, enɛ ɔ he ɔ, diblii ko be nɛ nya tsa hluu nɛ be hae nɛ Mawu nɛ na níhi nɛ ngɛ nɔ ko tsui mi. Ngɛ Harmagedon se ɔ, wa ma hla yiwutsotsɛmɛ ngɛ a hi he, se wa be mɛ nae. A ma kpata a hɛ mi kulaa!—La 37:12-15.
w21.05 7 ¶19-20
Anɛ O Ma Ha Nɛ O Nane Nɛ Tɔ̃tɔ̃ Ngɛ Yesu He Lo?
19 Anɛ wa naa nyagba nɛ ɔ mwɔnɛ ɔ lo? Ee. Nihi fuu kuaa wɔ akɛnɛ waa kɛ wa he wui ma kudɔmi sanehi a mi ɔ he je. A hyɛɛ blɔ kaa waa kɛ wa he maa wo sɔ fɔmi mi. Se ngɛ anɔkuale mi ɔ, ke wa hla adesa ko kaa e ye wa nɔ ɔ, lɔ ɔ tsɔɔ kaa wa kua Yehowa. (1 Sam. 8:4-7) Eko ɔ, nihi fuu susu kaa e sa nɛ waa ma sukuuhi, hiɔ tsami hehi, nɛ́ waa pee ní kpa komɛ kɛ ye bua ma a. Akɛnɛ waa kɛ fiɛɛmi ní tsumi ɔ pee oti ngɛ wa si himi mi se pi ní nɛ ɔmɛ he je ɔ, nihi fuu kua wa sɛ gbi ɔ.
20 Mɛni wa ma nyɛ maa pee konɛ wa nane ko tɔ̃tɔ̃? (Kane Mateo 7:21-23.) E sa nɛ ní tsumi nɛ Yesu fã wɔ kaa wa tsu ɔ nɛ pee oti ngɛ wa si himi mi. (Mat. 28:19, 20) E sɛ nɛ wa ha nɛ ma kudɔmi sanehi kɛ ní kpahi nɛ je wa juɛmi ngɛ ní tsumi nɛ ɔ nɔ. Wa suɔ nihi, nɛ wa susuɔ a he hulɔ, se blɔ nɛ hi pe kulaa nɛ wa maa gu nɔ kɛ ye bua mɛ ji kaa wa maa tsɔɔ mɛ Mawu Matsɛ Yemi ɔ he ní, nɛ́ waa ye bua mɛ nɛ a ha nɛ huɛ bɔmi kpakpa nɛ hi a kɛ Yehowa a kpɛti.
Ngmami ɔ Mi Junehi
w17.04 29 ¶3
Ngɔɔ O He Kɛ Ha Faa Konɛ A Je Yehowa Yi!
3 Yehowa de we nɔ́ ko nɛ tsɔɔ kaa e bua jɔɛ sane nɛ Elihu bi ɔ he. Elihu bi ke: “Ke o pee nɔ́ nɛ da a, mɛni ji nɔ́ nɛ o pee kɛ ha Mawu? Mɛni ji nɔ́ nɛ Mawu ma ná ngɛ o dɛ?” (Hiob 35:7) Anɛ Elihu ngɛ tsɔɔe kaa se nami be mɔde nɛ wa ngɛ bɔe kaa wa ma ja Mawu ɔ he lo? Dɛbi. Nɔ́ nɛ e ngɛ tsɔɔe mohu ji kaa wa jami ɔ be nyɛe maa pee nɔ́ ko ha Yehowa. Yehowa ye mluku. Wa be nyɛe ma ha nɛ Yehowa nɛ pee niatsɛ, aloo e he nɛ wa pe bɔ nɛ e ngɛ ɔ. Ngɛ anɔkuale mi ɔ, su kpakpahi nɛ wa ngɛ, ga nɛ wa le, kɛ he wami tsuo nɛ wa ngɛ ɔ je Mawu ngɔ, nɛ e hyɛɛ bɔ nɛ waa kɛ tsuɔ ní ha a.
JANUARY 15-21
JUETLI NƐ NGƐ MAWU MUNYU Ɔ MI | HIOB 36-37
Nɔ́ He Je Nɛ O Ma Nyɛ Ma He Mawu Siwo Kaa Wa Ma Ná Neneene Wami ɔ Ye
w15 10/1 13 ¶1-2
Anɛ Wa Ma Nyɛ Maa Na Mawu Niinɛ Lo?
MAWU BE SISIJE: Baiblo ɔ tsɔɔ kaa Mawu “ngɛ kɛ je neneene kɛ yaa si neneene.” (La 90:2) Ngɛ blɔ ko nɔ ɔ, wa ma nyɛ ma de ke Mawu be sisije nɛ e be nyagbe. Ngɛ adesahi a susumi nya a, “jeha nɛ e ye hu wa juɛmi sui he.”—Hiob 36:26.
Bɔ Nɛ O Ma Ná He Se Ha: Mawu wo si kaa ke o ba ná le nɔ tutuutu nɛ e ji ɔ, o ma ná neneene wami. (Yohane 17:3) Kɛ wa ma plɛ kɛ he si womi nɛ ɔ ye kɛɛ, ke Mawu nitsɛ hí si kɛ yɛ neneene? “Neneene Matsɛ ɔ” pɛ lɛ e ma nyɛ maa ye si womi kaa kikɛ ɔ nɔ.—1 Timoteo 1:17.
w20.05 22 ¶6
O Hɛ Sa Níhi Nɛ Mawu Pee Kɛ Ha Mo ɔ Lo?
6 Akɛnɛ bɔ nɛ zugba a tsɔ e he kɛ je pu ɔ he ha a sa he je ɔ, e ha we nɛ nyu nɛ ngɛ zugba a nɔ ɔ nɛ pee ice loo e dɔ la tsɔ nɛ e si. Kaa zugba a hɛ kɛ su pu ɔ he tsɔ ɔ, jinɛ nyu nɛ ngɛ nɔ ɔ ko dɔ la wawɛɛ nɛ e ko si. Nɛ ke e ba jã a, adesahi be nyɛe maa hi zugba a nɔ. Nɛ kaa zugba a je pu ɔ he tsɔ ɔ, jinɛ nyu nɛ ngɛ nɔ ɔ tsuo ko pee ice. Se akɛnɛ Yehowa ngɔ zugba a kɛ to he nɛ sa he je ɔ, nyu nɛ ngɛ zugba a nɔ ɔ ma nyɛ maa baa wami yi. Pu ɔ haa nɛ nyu nɛ ngɛ wo ɔ kɛ zugba a he kpahi ɔ dɔɔ la bɔ nɛ sa, nɛ e tsakeɔ kɛ yaa kɔɔhiɔ mi nɛ e ya peeɔ bɔku. Daa jeha a, nyu nɛ jeɔ zugba a nɔ kɛ yaa hiɔwe ɔ hiɛ pe nyu nɛ ngɛ takuhi tsuo nɛ a ngɛ zugba a nɔ ɔ a mi. Nyu ɔ hiɔ lejɛ ɔ maa pee ligbi nyɔngma loko e kpale baa zugba a nɔ kaa hiɔmi loo snoo. Nyu nɛ ɔ kpaleɔ kɛ ya sɛɛ wo ɔ loo pahi nɛ ngɛ zugba a nɔ ɔ a mi, nɛ blɔ nya tomi nɛ ɔ tsaa nɔ jã. Yehowa to blɔ nya nɛ ɔ konɛ nyu nɛ e hi zugba a nɔ be fɛɛ be, nɛ enɛ ɔ tsɔɔ kaa e ji ní lelɔ, nɛ e ngɛ he wami hulɔ.—Hiob 36:27, 28; Fiɛlɔ 1:7.
w22.10 28 ¶16
Yaa Nɔ Nɛ O Hɛɛ O Hɛ Kɛ Nɔ Fɔmi ɔ Mi Wawɛɛ
16 Neneene wami he hɛ kɛ nɔ fɔmi nɛ wa ngɛ ɔ ji nike ní nɛ se be nɛ je Mawu ngɔ. Wa ngɛ si himi kpakpa nɛ ɔ blɔ hyɛe wawɛɛ nitsɛ, nɛ wa ngɛ nɔ mi mami kaa e maa ba mi. Wa hɛ kɛ nɔ fɔmi ɔ ngɛ kaa osɛkɛ. E yeɔ bua wɔ nɛ wa nyɛɔ daa kahi, yi mi wami kɛ gbenɔ po nya. E ngɛ kaa dade pɛɛ. E poɔ wa susumihi a he piɛ, nɛ e yeɔ bua wɔ nɛ wa kuaa susumihi nɛ dɛ, nɛ wa susuɔ níhi nɛ a da he. Hɛ kɛ nɔ fɔmi nɛ ɔ nɛ Baiblo ɔ tu he munyu ɔ yeɔ bua wɔ nɛ wa leɔ Mawu saminya, nɛ e haa nɛ wa naa kaa e suɔ wɔ wawɛɛ nitsɛ. Ke wa ha nɛ wa hɛ kɛ nɔ fɔmi ɔ mi wa a, wa náa he se wawɛɛ nitsɛ.
Ngmami ɔ Mi Junehi
w22.12 2 ¶4
Yehowa Ngɛ Kɛ Yaa Neneene
4 Anɛ e he wa ha mo kaa o maa nu sisi kaa Yehowa “ngɛ daa” lo? (Yes. 40:28) E he wa ha nihi fuu kaa a maa nu sisi jã. Elihu de ngɛ Mawu he ke: ‘Jeha nɛ e ye ɔ, wa juɛmi sui he.’ (Hiob 36:26) Se ke wa nui nɔ́ ko sisi ɔ, lɔ ɔ tsɔɔ we kaa jamɛ a nɔ́ ɔ pi anɔkuale. Kaa nɔ hyɛmi nɔ́ ɔ, ke wa li bɔ nɛ oslabai he wami tsuɔ ní ha loko kane suɔ ɔ, anɛ lɔ ɔ tsɔɔ kaa pi oslabai he wami nɛ haa nɛ kane suɔ lo? Dɛbi. Jã kɛ̃ nɛ wɔ hu eko ɔ, e he maa wa ha wɔ kaa wa maa nu sisi kaa Yehowa ngɛ daa, nɛ e maa hi si kɛ ya daa. Se enɛ ɔ tsɔɔ we kaa munyu nɛ ɔ ji lakpa. Bɔ nɛ wa nuɔ nɔ́ sisi ha a be nyɛe ma tsake anɔkuale nɛ kɔɔ Bɔlɔ ɔ he ɔ. (Rom. 11:33-36) E ngɛ loko níhi nɛ ngɛ hiɔwe ɔ ba. Ní nɛ ɔmɛ ekomɛ ji pu ɔ kɛ dodoe ɔmɛ. Yehowa ha nɛ wa ná nɔ mi mami kaa ‘lɛ nɛ e bɔ je ɔ ngɛ e he wami nya.’ Ngɛ anɔkuale mi ɔ, e ngɛ si himi mi momo loko e “bli hiɔwe mi.” (Yer. 51:15; Níts. 17:24) Mɛni yi mi tomi kpa he je nɛ wa ma nyɛ ma ná nɔ mi mami kaa wa ma nyɛ maa hi si kɛ ya neneene ɔ?
JANUARY 22-28
JUETLI NƐ NGƐ MAWU MUNYU Ɔ MI | HIOB 38-39
Anɛ O Heɔ Be Kɛ Susuɔ Adebɔ Níhi A He Lo?
w21.08 9 ¶7
Anɛ O Maa To O Tsui Si Kɛ Hyɛ Yehowa Blɔ Lo?
7 Benɛ Baiblo ɔ ngɛ zugba a nɛ Yehowa bɔ ɔ he munyu tue ɔ, e tsɔɔ bɔ nɛ a fɔ kpã kɛ susu e “kami kɛ e blimi” ɔ, nɔ́ nɛ nɔ́ nɛ a fia “e sisi tomi ɔmɛ” kɛ ma, kɛ nɔ nɛ to “e kɔ nya tɛ ɔmɛ” a he blɔ nya a. (Hiob 38:5, 6) Yehowa ngɔ be po kɛ hyɛ níhi nɛ e bɔ ɔ. (1 Mose 1:10, 12) Anɛ o ma nyɛ maa po he foni nɛ o hyɛ bɔ nɛ bɔfo ɔmɛ nu he ha benɛ a na nɔ́ ehe fɛɛ nɔ́ ehe nɛ Yehowa bɔ ɔ lo? Atsinyɛ jemi ko be he kaa a bua jɔ wawɛɛ nitsɛ! Enɛ ɔ he ɔ, a “hwɔ lele.” (Hiob 38:7) Mɛni wa kaseɔ ngɛ mi? E he Yehowa jeha akpehi abɔ loko e bɔ níhi ta, se benɛ e hyɛ nɔ́ fɛɛ nɔ́ nɛ e je nile mi kɛ bɔ ɔ, a “muɔ e hɛ saminya.”—1 Mose 1:31.
w20.08 14 ¶2
Gbogboehi A Si Tlemi ɔ Tsɔɔ Kaa Yehowa Ngɛ Suɔmi, Nile, Nɛ E Toɔ E Tsui Si
2 Kekleekle ɔ, Yehowa bɔ e Bi Yesu. Lɔ ɔ se ɔ, e gu Yesu nɔ “kɛ bɔ ní kpahi tsuo” nɛ bɔfohi kɛ adesahi ayɔhi abɔ hu piɛɛ he ɔ. (Kol. 1:16) Yesu bua jɔ kaa e kɛ e Tsɛ ɔ tsu ní. (Abɛ 8:30) Nɛ bɔfo ɔmɛ hu a bua jɔ benɛ a na nɛ Yehowa kɛ e Ga Ní Tsulɔ Kpanaa nɛ ji Yesu pee kake kɛ bɔ hiɔwe kɛ zugba a. Mɛni a pee kɛ tsɔɔ kaa a bua jɔ? Mɛ tsuo a “hwɔ lele” benɛ a bɔ zugba a, nɛ a ya nɔ nɛ a je Yehowa yi benɛ a na nɛ e bɔ ní kpahi tsuo nɛ adesahi hu piɛɛ he ɔ. (Hiob 38:7; Abɛ 8:31) Níhi tsuo nɛ Yehowa bɔ ɔ tsɔɔ kaa e ngɛ suɔmi kɛ nile.—La 104:24; Rom. 1:20.
w23.03 17 ¶8
Moo Kase Yehowa He Ní Babauu Kɛ Gu E Nibɔ Ní Ɔmɛ A Nɔ
8 E sa nɛ waa ngɔ wa hɛ kɛ fɔ Yehowa nɔ. Yehowa ye bua Hiob nɛ e ná hɛ kɛ nɔ fɔmi nɛ mi wa ngɛ e mi. (Hiob 32:2; 40:6-8) Benɛ Mawu kɛ Hiob ngɛ ní sɛɛe ɔ, e tu e nibɔ níhi fuu a he munyu. Ekomɛ ji dodoehi, bɔku, kɛ oslaba. Jehanɛ hu ɔ, Yehowa tu lohwe komɛ kaa na kɛ okpɔngɔ he munyu. (Hiob 38:32-35; 39:9, 19, 20) Ní nɛ ɔmɛ tsuo maa nɔ mi kaa Yehowa ngɛ he wami kɛ nile wawɛɛ, nɛ e ngɛ suɔmi. Ní sɛɛmi nɛ ya nɔ ngɛ Yehowa kɛ Hiob a kpɛti ɔ ye bua lɛ nɛ e ba ná hɛ kɛ nɔ fɔmi nɛ mi wa wawɛɛ ngɛ Yehowa mi. (Hiob 42:1-6) Jã kɛ̃ nɛ ke wa kase adebɔ níhi a he ní ɔ, e haa nɛ wa naa kaa Yehowa le ní wawɛɛ, nɛ e ngɛ he wami kulaa pe wɔ. Enɛ ɔ he ɔ, wa le kaa Yehowa ma nyɛ maa po nyagbahi tsuo nɛ waa kɛ ngɛ kpee ɔ a se, nɛ e maa pee jã hulɔ. Enɛ ɔ nɛ wa le ɔ ma nyɛ ma ha nɛ hɛ kɛ nɔ fɔmi nɛ wa ngɛ ngɛ e mi ɔ mi maa wa.
Ngmami ɔ Mi Junehi
it-2 222
Mlaa Wolɔ
Yehowa Ji Mlaa Wolɔ. Yehowa Ji Mlaa Wolɔ nitsɛnitsɛ ngɛ je ɔ mi tsuo. Lɛ nɛ e wo mlaahi nɛ kudɔɔ adebɔ níhi nɛ wami be a mi (Hio 38:4-38; La 104:5-19), kɛ lohwehi nɛ wami ngɛ a mi. (Hio 39:1-30) Nɔmlɔ nɛ Mawu bɔ ɔ hu ngɛ mlaahi nɛ Yehowa wo nɛ kudɔɔ adebɔ ní ɔmɛ a sisi. Nɛ akɛnɛ adesa ngɛ juɛmi kɛ nyɛmihi nɛ e kɛ susuɔ níhi a he loko e peeɔ nɛ jehanɛ hu, e nyɛ jaa Mawu he je ɔ, e ngɛ heii kaa Mawu jemi bami he mlaa amɛ hu fiɔ lɛ. (Ro 12:1; 1Ko 2:14-16) Jehanɛ hu, Yehowa mlaa a kudɔɔ mumi mi bɔ níhi nɛ ji bɔfohi.—La 103:20; 2Pe 2:4, 11.
Wa be nyɛe ma gbo Yehowa mlaahi nɛ kudɔɔ adebɔ níhi ɔ nɔ tue nɛ wa maa ye wa he. (Yer 33:20, 21) Ngɛ je ɔ mi tsuo ɔ, wa na kaa mlaahi nɛ Yehowa wo ɔ ngɛ jã pɛ, a tsakee we. Enɛ ɔ he ɔ, ngɛ mlaahi nɛ kudɔɔ adebɔ níhi nɛ je mi si kpali ba kase ɔ nya a, a ma nyɛ maa bu bɔ nɛ nyɔhiɔ ɔ, je ɔ, kɛ si bɔlemi dodoe kpa amɛ nyɛɔ ngɛ be nya ha a pɛpɛɛpɛ. Ke nɔ ko gbo mlaahi nɛ kudɔɔ adebɔ ní ɔ nɔ tue ɔ, e ma ná e tue gblami oya nɔuu. Jã nɔuu kɛ̃ nɛ jemi bami he mlaahi nɛ Mawu wo ɔ hu tsakee we nɛ wa be nyɛe ma ma wa hɛ kɛ fɔ nɔ, aloo waa gu ga blɔ nɔ kɛ gbo nɔ tue nɛ wa be e mi nɔ́ nae. Jemi bami he mlaa amɛ tsakee we kaa bɔ nɛ adebɔ he mlaa amɛ ngɛ ɔ nɔuu, e ngɛ mi kaa be komɛ ɔ, tue gblami ɔ bɛ amlɔ nɔuu. “Mawu ɔ, pi nɔ nɛ a yeɔ e he fɛu. Ejakaa nɔ́ fɛɛ nɔ́ nɛ nɔ ko ngɛ due ɔ, lɔ ɔ nɔuu nɛ e ma kpa.”—Gal 6:7; 1Ti 5:24.
JANUARY 29–FEBRUARY 4
JUETLI NƐ NGƐ MAWU MUNYU Ɔ MI | HIOB 40-42
Nɔ́ Nɛ Wa Ma Nyɛ Maa Kase Ngɛ Nɔ́ Nɛ Ba Hiob Nɔ ɔ Mi
w10 10/15 4 ¶4-6
“Mɛnɔ Ba Le Yehowa Juɛmi?”
4 Ke wa ngɛ wa yi mi tɛ pue ngɛ níhi nɛ Yehowa pee ɔmɛ a he ɔ, e sa nɛ waa hyɛ saminya nɛ wa ko da adesahi a mlaahi a nɔ kɛ kojo Mawu. Kikɛmɛ a susumi nɛ dɛ nɛ ɔ nɛ Baiblo ɔ tu he munyu ngɛ La 50:21 ɔ ke: “O susu kaa i ngɛ kaa mo” ɔ nɛ. Maa pee jeha 175 nɛ be ɔ, Baiblo he ní lelɔ ko de ke: “Adesahi daa mɛ nitsɛmɛ a mlaahi nɛ a wo ɔ nɔ kɛ kojoɔ Mawu, nɛ a susuɔ kaa e sa nɛ Mawu nɛ hi si ngɛ jamɛ a mlaa amɛ a nya.”
5 E sa nɛ waa hyɛ saminya nɛ wa ko ha nɛ bɔ nɛ wa naa Yehowa ha a kɛ wɔ nitsɛmɛ wa mlaahi kɛ níhi nɛ wa suɔ ɔ nɛ kɔ. Mɛni he je nɛ enɛ ɔ he hia a? Akɛnɛ wa yi mluku he je ɔ, ke wa ngɛ Baiblo ɔ kasee ɔ, wa ma nyɛ maa nu he be komɛ kaa Yehowa ní peepee komɛ ngɛ kpa bɔɔ ngɛ bɔ nɛ wa susu ɔ he. Jã ji bɔ nɛ Israel bi nɛ a hi si blema a nu he, a ná juɛmi nɛ dɛ ngɛ bɔ nɛ Yehowa kɛ mɛ ye ha a he. Mo kadi nɔ́ nɛ Yehowa de mɛ: “Nyɛ deɔ ke, ‘Nɔ́ nɛ Nyɔmtsɛ ɔ pee ɔ dɛ.’ Israel bi, nyɛɛ bu mi tue. Nyɛ susuɔ kaa bɔ nɛ i peeɔ níhi ɔ dɛ lo? Anɛ pi nyɛ mohu nɛ nyɛ ní peepee ɔmɛ dɛ lo?”—Eze. 18:25.
6 Nɔ́ kake nɛ maa ye bua wɔ konɛ wa ko da nɔ́ nɛ wa susu kaa e da a nɔ kɛ kojo Yehowa ji kaa, wa ma yɔse kaa wa hyɛ we nɔ́ kɛ ya tsitsaa nɛ be komɛ ɔ, wa susumihi hu dɛ. E he ba hia nɛ Hiob nɛ e kase nɔ́ nɛ ɔ. Benɛ e ngɛ nɔ́ nae ɔ, e kɛ e juɛmi ma lɛ pɛ e nɔ nɛ e yɔse we kaa sanehi komɛ ngɛ nɛ a he hia wawɛɛ pe e nɔ́ ɔ. Se Yehowa ye bua lɛ konɛ e hyɛ nɔ́ aloo e susu níhi a he kɛ ya tsitsaa. E bi Hiob sane slɔɔtoslɔɔtohi nɛ hiɛ pe 70, se e nyɛ we nɛ e ha ekoeko heto. Yehowa ha nɛ Hiob ba na heii kaa pi níhi tsuo nɛ e le. Hiob je he si bami mi nɛ e tsake bɔ nɛ e susuɔ níhi a he ha a.—Kane Hiob 42:1-6.
w17.06 25 ¶12
Ngɔɔ O Juɛmi Kɛ Ma Sane Nɛ He Hia a Nɔ
12 Anɛ blɔ nɔ nɛ Yehowa gu kɛ dla Hiob juɛmi ngɛ e nɔ́ nami be ɔ mi ɔ tsɔɔ kaa Yehowa susuu we e he lo? Dɛbi, Hiob nitsɛ po susuu we jã. E ngɛ mi kaa Hiob ngɛ nɔ́ nae mohu lɛɛ, se nyagbenyagbe ɔ, e ba nu níhi a sisi. E de po ke: “Nɔ́ nɛ i pee ɔ dɔ mi. Lɔ ɔ he ɔ, i kɛ tabo zu kɛ la zu to okadi kaa i pia ye he niinɛ.” (Hiob 42:1-6) Loko Yehowa ma dla Hiob juɛmi po ɔ, niheyo ko nɛ a tsɛɛ lɛ ke Elihu ɔ sɛ hlami nɛ e ye bua Hiob konɛ e dla e juɛmi. (Hiob 32:5-10) Benɛ Hiob kplɛɛ tsɔsemi nɛ Mawu kɛ ha lɛ ɔ nɔ nɛ e tsake e juɛmi ɔ, Yehowa ha nɛ nihi na kaa e bua jɔ anɔkuale nɛ Hiob ye ɔ he.—Hiob 42:7, 8.
w22.06 25 ¶17-18
‘Ngɔɔ O Hɛ Kɛ Fɔ Yehowa Nɔ’
17 Yehowa sɔmɔli nɛ a ya nɔ nɛ a pee kã benɛ a kɛ kahi ngɛ kpeɔ a kpɛti nɔ kake ji Hiob. Ngɛ sɛ womi nɛ bɔfo Paulo ngma kɛ ya ha Hebri Bi ɔmɛ mi ɔ, e tu ni kpahi fuu a he munyu nɛ e tsɛ mɛ ke “odasefohi babauu nitsɛnitsɛ.” (Heb. 12:1) Mɛ tsuo a kɛ kahi nɛ a mi wa kpe, se a ya nɔ nɛ a ye Yehowa anɔkuale ngɛ a si himi mi. (Heb. 11:36-40) Anɛ si nɛ a fĩ kɛ a mɔde bɔmi ɔ pee yaka lo? Dɛbi kulaa! E ngɛ mi kaa ngɛ a si himi mi tsuo, a nɛ́ Mawu si womi ɔmɛ a mi bami mohu lɛɛ, se a ya nɔ nɛ a ngɔ a hɛ kɛ fɔ Yehowa nɔ. Nɛ akɛnɛ a le kaa Yehowa kplɛɛ a nɔ he je ɔ, a ngɛ nɔ mi mami kaa a maa na si womi ɔmɛ a mi bami. (Heb. 11:4, 5) A nɔ hyɛmi nɔ́ ɔ ma nyɛ maa wo wɔ he wami nɛ waa ya nɔ nɛ waa ngɔ wa hɛ kɛ fɔ Yehowa nɔ.
18 Mwɔnɛ ɔ, níhi ngɛ puɛe kulaa ngɛ je nɛ wa ngɛ mi nɛ ɔ mi. (2 Tim. 3:13) Satan ngmɛɛ we Mawu we bi a he, e yaa nɔ nɛ e kɛ kahi baa a nɔ. Ngɛ nyagbahi nɛ waa kɛ maa kpe hwɔɔ se ɔ tsuo se ɔ, nyɛ ha nɛ waa fia wa pɛɛ si kaa wa ma tsu babauu kɛ ha Yehowa, nɛ waa ngɔ “wa hɛ kɛ fɔ Mawu hɛ kalɔ ɔ nɔ.” (1 Tim. 4:10) Nyɛ ha nɛ wa kai kaa nɔ́ nɛ Mawu pee kɛ ha Hiob ɔ tsɔɔ kaa “Yehowa mi mi hi wawɛɛ nɛ e ji mɔbɔ nalɔ.” (Yak. 5:11) Kaa bɔ nɛ Hiob pee ɔ, nyɛ ha nɛ waa ya nɔ nɛ waa ye Yehowa anɔkuale nɛ wa ná nɔ mi mami kaa e maa jɔɔ “nihi nɛ a ngɛ e se blɔ hlae wawɛɛ” ɔ.—Kane Hebri Bi 11:6.
Ngmami ɔ Mi Junehi
it-2 808
He Fɛu Yemi
Hiob ji dalɔ nɛ e ngmɛɛ we e we anɔkuale yemi ɔ he benɛ a ngɛ e he fɛu ye ɔ. Se e ba ná juɛmi nɛ dɛ nɛ lɔ ɔ ha nɛ e tɔ. Se a dla e susumi. Elihu de ngɛ Hiob he ke “Anɛ nyɛ na nɔ ko hyɛ kaa Hiob lo? Nɔmlɔ nɛ bɔɔ musu bɔ nɛ e suɔ kaa bɔ nɛ a nuu nyu ɔ.” (Hio 34:7) Hiob ngɔ e hɛ kɛ fɔ anɔkuale nɛ e yeɔ ɔ nɔ nɛ e bu e he dalɔ pe Mawu. (Hio 34:5; 36:24) Benɛ Hiob “huɛmɛ” etɛ ɔmɛ ye e he fɛu wawɛɛ ɔ, e nu he kaa e he nɛ sane ɔ kɔ mohu pe Mawu. Ngɛ sane nɛ ɔ mi ɔ, e pee e ni kaa nɔ ko nɛ e ngɔ e he kɛ ha ahlua bɔmi kɛ he fɛu yemi nɛ lɔ ɔ ha nɛ e ná bua jɔmi, kaa bɔ nɛ a nuɔ nyu ɔ. Pee se ɔ, Mawu ha nɛ e ba pee heii kɛ ha Hiob kaa nihi nɛ a ngɛ e he fɛu ye ɔ (nyagbenyagbe ɔ) ngɛ lɛ Mawu ɔ he lakpa munyuhi tue. (Hio 42:7) Jã nɔuu kɛ̃ nɛ benɛ Israel bi ɔmɛ de kaa a hla matsɛ ha mɛ ɔ, Yehowa de gbalɔ Samuel ke: “Pi mo nɛ a kua a; imi mohu nɛ a kua ke ma ko ye a nɔ matsɛ ɔ nɛ.” (1Sa 8:7) Yesu hu de e kaseli ɔmɛ ke: “Ye biɛ ɔ [se pi nyɛɛ nyɛ biɛ ɔ] he je ɔ, je ma amɛ tsuo maa nyɛ nyɛ.” (Mat 24:9) Enɛ ɔ nɛ Kristofo no ko ma ha nɛ e hi e juɛmi mi ɔ, maa ye bua lɛ nɛ e kɛ juɛmi nɛ da ma fĩ si ke a ngɛ e he fɛu yee, nɛ lɔ ɔ ma ha nɛ e nine maa su hiɔwo ɔ nɔ.—Luk 6:22, 23.
FEBRUARY 5-11
JUETLI NƐ NGƐ MAWU MUNYU Ɔ MI | LA 1-4
Mo Fĩ Mawu Matsɛ Yemi ɔ Se
w21.09 15 ¶8
‘Ma Mimiɛɛ Je Ma Amɛ Tsuo’
8 Kɛ nihi peeɔ a ní ngɛ sɛ gbi ɔ he ha kɛɛ? Nihi fuu bui tue. (Kane La 2:1-3.) Je ma amɛ a mi mi fu wawɛɛ. A kplɛɛ we Nɔ Yelɔ nɛ Yehowa hla a nɔ. A nɛ Matsɛ Yemi ɔ sɛ gbi ɔ nɛ wa fiɛɛɔ ɔ kaa “sane kpakpa.” Ngɛ anɔkuale mi ɔ, nɔ yeli komɛ po tsi wa fiɛɛmi ní tsumi ɔ nya! E ngɛ mi kaa nɔ yeli fuu tsɔɔ kaa a ngɛ Mawu jae mohu lɛɛ, se a sume nɛ a ngmɛɛ he blɔ loo blɔ nya nɛ a ngɛ ɔ he. Kaa bɔ nɛ nɔ yeli nɛ a hi si ngɛ Yesu be ɔ mi ɔ pee ɔ, mwɔnɛ ɔ hu ɔ, nɔ yeli teɔ si kɛ woɔ nɔ nɛ Yehowa pɔ lɛ nu ɔ kɛ gu e we bi anɔkualetsɛmɛ nɛ a tuaa mɛ ɔ nɔ.—Níts. 4:25-28.
w16.04 24 ¶11
Yu O He Ngɛ Ma Kudɔmi Sanehi A He Ngɛ Je Nɛ Kake Peemi Be Mi Nɛ ɔ Mi
11 He lo nya níhi fuu a se dimi. Ke sika kɛ níhi nɛ wa ngɛ ɔ a he hia wɔ wawɛɛ ɔ, e ma nyɛ maa ye ha wɔ kaa wa maa yu wa he ngɛ ma kudɔmi sanehi a he. Ngɛ jeha 1970 ɔ se ɔ, Odasefohi fuu nɛ a ngɛ Malawi ɔ a níhi tsuo bɔ mɛ akɛnɛ a fĩ we ma kudɔmi kuu ko se ɔ he je. Mɔbɔ sane ji kaa a ti ni komɛ kɛ a he ya wo ma kudɔmi sanehi a mi, ejakaa a sume nɛ níhi nɛ a ngɛ ɔ nɛ je a dɛ. Nyɛmiyo ko nɛ a tsɛɛ lɛ ke Ruth ɔ de ke, “Nyɛmimɛ nɛ waa kɛ mɛ ya sa we ngɛ ma kpahi a nɔ ɔ a kpɛti ni komɛ kpale a se kɛ ho ma a mi ya nɛ a ya fĩ ma kudɔmi kuu ɔ se, ejakaa si himi ɔ mi wa ngɛ he nɛ wa ya sa we ngɛ ɔ.” Se Mawu we bi hiɛhiɛɛ pee we a ní jã. A yuɔ a he ngɛ ma kudɔmi sanehi a he ke lɔ ɔ ma ha nɛ a maa ye ohia aloo a níhi nɛ a ngɛ ɔ ma bɔ mɛ po.—Heb. 10:34.
Ngmami ɔ Mi Junehi
it-1 425
Jakati
E ji toto nɛ a kpɔ ɔ ngɛ ngmɔ ní komɛ kaa ngma loo omɔ he. E ngɛ mi kaa ngɛ Baiblo ɔ mi ɔ, a kɛ jakati tsu ní ngɛ foni peemi mi mohu lɛɛ, se e tsɔɔ níhi nɛ a pɔɔ peemi blema ke a ngɛ ngma mi saa. Ke a kpa ngmɔ si ní ta a, a sakeɔ jakati kɛ fɔɔ he akɛnɛ e mi jiɔ we nɛ se nami be he ɔ he je. Enɛ ɔ he ɔ, e da blɔ kaa a kɛ jakati maa da si kɛ ha nɔ́ ko nɛ e hí nɛ a ma je kɛ je nɔ́ nɛ hi ɔ he nɛ a ma sake ngɔ fɔ he.
Ngɛ ngma mi sami he ɔ, kekleekle ɔ, a gbeɔ ngma a. Lɔ ɔ se ɔ, a ngɔɔ ngma mi sami nɔ́ ɔ kɛ saa ngma a mi nɛ kɔɔhiɔ muɔɔ jakati ɔ kɛ yaa. (Moo hyɛ WINNOWING.) Enɛ ɔ tsɔɔ heii bɔ nɛ Yehowa Mawu je hemi kɛ yemi kuali kɛ je e we bi a kpɛti ha, kɛ jehanɛ se hu, bɔ nɛ e je yiwutsotsɛmɛ kɛ je mahi nɛ a teɔ si kɛ woɔ lɛ ɔ kɛ je a hi he ɔmɛ ha. (Hio 21:18; La 1:4; 35:5; Yes 17:13; 29:5; 41:15; Hos 13:3) Mawu Matsɛ Yemi ɔ maa ywia e he nyɛli ɔmɛ wɔtsɔwɔtsɔ nɛ e be yee kaa kɔɔhiɔ maa muɔɔ mɛ kɛ ho kaa jakati.—Da 2:35.
Behi fuu ɔ, a buaa jakati nɛ se nami be he ɔ nya nɛ a sãa konɛ kɔɔhiɔ ko kpale muɔɔ lɛ kɛ ba futu ngma nɛ a bua nya a. Jã kɛ̃ nɛ Yohane Nɔ Baptisilɔ ɔ gba kɛ fɔ si kaa ngɛ hɛ mi kpatami nɛ ma a mi ɔ, a ma kpata lakpa jali yiwutsotsɛmɛ ɔmɛ a hɛ mi—Yesu Kristo nɛ ji Ngma Mi Salɔ ɔ ma bua ngma a nya, “se jakati ɔ lɛɛ, e maa ngɔ la nɛ be hie gbemi ɔ kɛ maa sã.”—Mat 3:7-12; Luk 3:17; hyɛ THRESHING.
FEBRUARY 12-18
JUETLI NƐ NGƐ MAWU MUNYU Ɔ MI | LA 5-7
Yaa Nɔ Nɛ O Ye Anɔkuale Ngɛ Nɔ́ Nɛ Nihi Maa Pee ɔ Tsuo Se
w21.03 15 ¶7-8
Baiblo ɔ Kanemi Ma Nyɛ Maa Ye Bua Mo Nɛ O Da Kahi A Nya
7 Anɛ o huɛ ko, aloo o weku no ko pee mo nɔdɔ nɔ́ ko lo? Ke jã a, lɛɛ o ma nyɛ ma ná Matsɛ David sane ɔ nɛ wa ma susu he ɔ he se. E bi Absalom te si kɛ wo lɛ, nɛ e bɔ mɔde po kaa e ma kpɔ̃ matsɛ yemi ɔ ngɛ e dɛ.—2 Sam. 15:5-14, 31; 18:6-14.
8 (1) Moo sɔle. Be mi nɛ David sane ɔ ngɛ o juɛmi mi ɔ, mo de Yehowa bɔ nɛ o nuɔ he ha ngɛ bɔ nɛ nɔ ko kɛ mo ye ha a he. (La 6:6-9) Mo de lɛ bɔ nɛ o nuɔ he ha a tutuutu. Lɔ ɔ se ɔ, mo de Yehowa nɛ e ye bua mo konɛ o nyɛ nɛ o na sisi tomi mlaahi nɛ maa ye bua mo nɛ o nyɛ nɛ o da si fɔfɔɛ nɛ mi wa nɛ ɔ nya.
w20.07 8 ¶3-4
Mo Ná Nɔ Mi Mami Kaa O Na Anɔkuale ɔ
3 E sɛ nɛ wa hemi kɛ yemi ɔ nɛ da suɔmi nɛ ngɛ Mawu we bi a kpɛti ɔ pɛ nɔ. Mɛni he je? Ngɔɔ lɛ kaa asafo mi nɔkɔtɔma ko, aloo blɔ gbalɔ ko pee yayami nɛ hɛdɔ ngɛ he. Aloo nyɛmi ko pee mo nɔdɔ nɔ́ ko. Aloo eko ɔ, nɔ ko kua hemi kɛ yemi ɔ, nɛ e ngɛ tsɔɔe kaa nɔ́ nɛ wa heɔ yeɔ ɔ pi anɔkuale. Ke e ba jã a, anɛ o ma kpa Yehowa sɔmɔmi lo? Oti ɔ ji, ke hemi kɛ yemi nɛ o ngɛ ngɛ Mawu mi ɔ da bɔ nɛ nihi peeɔ a ní ha se pi huɛ bɔmi kpakpa nɛ maa hi o kɛ Yehowa nyɛ kpɛti ɔ nɔ ɔ, lɛɛ lɔ ɔ be hae nɛ o hemi kɛ yemi ɔ mi nɛ wa. Bɔ nɛ ni kpahi peeɔ a ní ha a ma nyɛ maa ye bua wɔ konɛ wa ná hemi kɛ yemi ngɛ Yehowa mi, se nɔ́ nɛ he hia wawɛɛ ji kaa wa maa kase Baiblo ɔ, waa nu nɔ́ nɛ wa ngɛ kasee ɔ sisi, nɛ wa hla níhi a mi konɛ wa ná nɔ mi mami kaa nɔ́ nɛ wa ngɛ kasee ngɛ Yehowa he ɔ ji anɔkuale. E sa nɛ mo nitsɛ o ná nɔ mi mami kaa níhi nɛ Baiblo ɔ tsɔɔ ngɛ Yehowa he ɔ ji anɔkuale.—Rom. 12:2.
4 Yesu tsɔɔ kaa ni komɛ maa kplɛɛ anɔkuale ɔ nɔ “kɛ bua jɔmi,” se ke a kɛ a hemi kɛ yemi ɔ he ka kpe ɔ, a maa ngmɛɛ a hemi kɛ yemi ɔ he. (Kane Mateo 13:3-6, 20, 21.) Eko ɔ, a li kaa Yesu se nɛ a maa nyɛɛ ɔ ma ha nɛ a kɛ nyagbahi aloo si himi nɛ mi wa nɛ kpe. (Mat. 16:24) Aloo eko ɔ, a susu kaa ke a nyɛɛ Kristo se ɔ, a ma ná jɔɔmi sɔuu. Se akɛnɛ wa ngɛ je yaya mi he je ɔ, waa kɛ nyagbahi maa kpe. Wa si fɔfɔɛ ma nyɛ ma tsake, nɛ lɔ ɔ ma ha nɛ bua jɔmi nɛ wa ngɛ ɔ maa ba si.—La 6:6; Fiɛlɔ 9:11.
Ngmami ɔ Mi Junehi
w19.06 16 ¶7-9
Haomihi
7 Anɛ o kɛ haomi ko ngɛ kpee lo? Lemi nɛ wa le kaa Yehowa nu Eliya sisi ɔ woɔ wa bua! Enɛ ɔ haa nɛ wa náa nɔ mi mami kaa wɔ hu Yehowa nuɔ wɔ sisi ke wa ngɛ haoe. E le wa nyɛmi, wa susumi kɛ bɔ nɛ e peeɔ wɔ ha. (La 103:14; 139:3, 4) Ke wa ngɔ wa hɛ kɛ fɔ Yehowa nɔ kaa bɔ nɛ Eliya pee ɔ, Yehowa maa ye bua wɔ kɛ da níhi nɛ haa nɛ wa hao ɔmɛ a nya.—La 55:22.
8 Haomi ma nyɛ ma ha nɛ o ná susumi nɛ dɛ, nɛ o kɔni mi ma nyɛ ma jɔ̃. Ke e ba jã a, mo kai kaa Yehowa maa ye bua mo kɛ da haomi ɔ nya. Mɛni blɔ nɔ e maa gu kɛ ye bua mo? E suɔ nɛ o de lɛ níhi nɛ ngɛ mo haoe ɔ, nɛ e pee klaalo kaa e maa ye bua mo. (La 5:3; 1 Pet. 5:7) Lɔ ɔ he ɔ, ko kpa sɔlemi ngɛ o haomi ɔmɛ a he. Yehowa kɛ mo be munyu tue tɛɛ kaa bɔ nɛ e kɛ Eliya tu munyu ɔ, mohu ɔ, e kɛ mo maa tu munyu kɛ gu Baiblo ɔ kɛ e we asafo ɔ nɔ. Níhi nɛ o maa kane ngɛ Baiblo ɔ mi ɔ maa wo o bua, nɛ e ma ha nɛ o ná hɛ nɔ kami. Jehanɛ hu ɔ, nyɛmimɛ nɛ a ngɛ asafo ɔ mi ɔ maa wo mo he wami.—Rom. 15:4; Heb. 10:24, 25.
9 Yehowa de Eliya ke é ngɔ e ní tsumi ɔ eko kɛ wo Elisha dɛ. Yehowa gu lɔ ɔ nɔ kɛ ha Eliya huɛ kpakpa, nɛ atsinyɛ jemi ko be he kaa Elisha ye bua lɛ benɛ e kɔni mi jɔ̃ ɔ. Jã nɔuu nɛ ke wa de wa huɛ ko nɛ wa he lɛ ye wa haomi ɔ, e ma nyɛ maa ye bua wɔ konɛ wa nyɛ nɛ waa da nya. (2 Ma. 2:2; Abɛ 17:17) Ke e peeɔ mo kaa o be nɔ ko nɛ maa ye bua mo ɔ, moo sɔle ha Yehowa nɛ e ye bua mo konɛ o na nyɛmi ko nɛ e nane pi si nɛ e ma nyɛ maa wo mo he wami.
FEBRUARY 19-25
JUETLI NƐ NGƐ MAWU MUNYU Ɔ MI | LA 8-10
“Yehowa, Ma Je O Yi”!
w21.08 3 ¶6
O Bua Nɛ Jɔ He Blɔ Nɛ O Ngɛ Ngɛ Yehowa Weku ɔ Mi ɔ He
6 Yehowa ha wɔ we nɛ se be. Yehowa sɛ hlami dla zugba a kɛ ha adesahi loko e bɔ kekleekle nyumu ɔ. (Hiob 38:4-6; Yer. 10:12) Akɛnɛ Yehowa susuɔ nɔ he nɛ e haa nɔ nɔ́ he je ɔ, e bɔ ní kpakpahi fuu ngɛ zugba a nɔ nɛ ma ha nɛ adesahi a bua nɛ jɔ. (La 104:14, 15, 24) E suu be nɛ Yehowa hyɛɛ níhi nɛ e bɔ ɔ, nɛ ‘a mwɔɔ e hɛ.’ (1 Mose 1:10, 12, 31) Yehowa pee adesahi ní nguanguahi nɛ e bɔ ɔ a “nɔ yelɔ,” nɛ e kɛ wo a hɛ mi nyami. (La 8:6) Mawu yi mi tomi ji kaa adesahi nɛ a ye mluku ɔ nɛ a hyɛ ní nguanguahi nɛ e bɔ ɔ a nɔ kɛ ya neneene. Anɛ o naa Yehowa si be fɛɛ be ngɛ si womi kpakpa nɛ ɔ he lo?
w20.05 23 ¶10
O Hɛ Sa Níhi Nɛ Mawu Pee Kɛ Ha Mo ɔ Lo?
10 Blɔ kake nɛ wa ma nyɛ maa gu nɔ kɛ tsɔɔ kaa wa hɛ sa nike ní nɛ ɔ ji kaa wa maa tsɔɔ nihi nɛ a heɔ bilemi tsɔɔmi ɔ yeɔ ɔ wa hemi kɛ yemi ngɛ Mawu mi ɔ he ní. (La 9:1; 1 Pet. 3:15) Nimli nɛ ɔmɛ heɔ yeɔ kaa zugba a kɛ níhi nɛ ngɛ nɔ ɔ tsuo ba ngɛ a dɛ he. Ke waa kɛ Baiblo ɔ kɛ otihi nɛ wa tu a he munyu ngɛ ní kasemi nɛ ɔ mi ɔ tsu ní ɔ, wa ma nyɛ ma fã wa hiɔwe Tsɛ ɔ he, nɛ́ waa tsɔɔ nihi nɛ a suɔ nɛ a bu tue ɔ nɔ́ he je nɛ wa he ye kaa Yehowa ji hiɔwe kɛ zugba Bɔlɔ ɔ.—La 102:25; Yes. 40:25, 26.
w22.04 7 ¶13
Anɛ O Peeɔ ‘Nɔ Hyɛmi Nɔ́ Ngɛ Munyu Tumi Mi’ Lo?
13 La kɛ je o tsui mi. Ke wa ya asafo mi kpe ɔ, nɔ́ titli he je nɛ wa laa Matsɛ Yemi lahi ji kaa wa kɛ je Yehowa yi. Nyɛmiyo ko nɛ a tsɛɛ lɛ ke Sara a susu kaa e gbi ngɔɛ. Se kɛ̃ ɔ, e suɔ nɛ e ma la kɛ je Yehowa yi. Enɛ ɔ he ɔ, ke e ngɛ e he dlae kɛ ha asafo mi kpe ɔ, e laa lahi nɛ a ma la ngɛ kpe ɔ sisi ɔ hulɔ. E kaseɔ la amɛ, nɛ e hyɛɔ bɔ nɛ munyuhi nɛ a ngɛ la amɛ a mi ɔ kɛ níhi nɛ a maa kase ngɛ asafo mi kpe ɔ sisi ɔ kɔ ha. Sara de ke: “Enɛ ɔ yeɔ bua mi wawɛɛ nɛ i ngɔɔ ye juɛmi kɛ maa la amɛ a mi munyu ɔmɛ a nɔ mohu pe ye gbi nɛ ngɔɛ ɔ nɔ.”
Ngmami ɔ Mi Junehi
it-1 832
Nine Nguɛ
Ngɛ foni peemi blɔ nɔ ɔ, a tu Mawu he munyu kaa e kɛ e “nine nguɛ” tsuɔ ní. Nɔ hyɛmi nɔ́ ji kita nyɔngma a nɛ e ngma ngɛ tɛ tɛtlɛɛhi a nɔ ɔ (2Mo 31:18; 5Mo 9:10;), nyakpɛ níhi nɛ e pee (2Mo 8:18, 19), kɛ bemi nɛ e ngɛ níhi nɛ ngɛ hiɔwe ɔmɛ bɔe ɔ (La 8:3). Ngɛ Mose kekleekle womi ɔ mi ɔ, a kɛ mumi klɔuklɔu ɔ da si kɛ ha Mawu “nine” loo e he wami nɛ e kɛ bɔ ní ɔ. E de ke, Mawu he wami ɔ (ruʹach, “Mawu mumi ɔ”) nɛ e kɛ tsuɔ ní ɔ ngɛ yae nɛ e ngɛ bae ngɛ nyu babauu ɔ hɛ mi. (1Mo 1:2) Se kɛ̃ ɔ, Hela Ngmami ɔ ha nɛ wa nu foni peemi munyu nɛ a kɛ tsu ní nɛ ɔ sisi saminya. Mateo bɔ amaniɛ kaa Yesu kɛ ‘Mawu mumi’ ɔ lɛ hia daimoniohi ɔ nɛ, nɛ Luka hu de kaa e kɛ “Mawu nine nguɛ” lɛ hia daimoniohi.—Mat 12:28; Luk 11:20.
FEBRUARY 26–MARCH 3
JUETLI NƐ NGƐ MAWU MUNYU Ɔ MI | LA 11-15
Moo Po He Foni Kaa O Ngɛ Mawu Je Ehe Nɛ Tue Mi Jɔmi Ngɛ Mi ɔ Mi
w06 5/15 18 ¶3
Otihi Nɛ Ngɛ La Womi ɔ Kekleekle Fã a Mi
11:3—Mɛni nɛ ngmami nɛ ɔ ngɛ tsɔɔe? Sisi tomi níhi nɛ ji mlaahi, kɔhi, kɛ dami sane yemi ji níhi nɛ hɛɛ adesahi tsuo. Ke a kɛ ní nɛ ɔmɛ tsu we ní ɔ, e kɛ basabasa peemi kɛ dami sane nɛ a yi lɛ baa. Ke e ba lɛ jã a, e sa nɛ “dali” nɛ a ngɔ a hɛ kɛ fɔ Mawu nɔ kulaa.—La 11:4-7.
wp16.4 11
Anɛ Je Ko Maa Ba Niinɛ Nɛ A Be Yi Wu Tso Ní Pee Ngɛ Mi Lo?
Baiblo ɔ wo si kaa, e piɛ bɔɔ nɛ Mawu ma je yi wu tso ní peepee kɛ maa je zugba a nɔ. Mawu “kojomi ligbi ɔ kɛ nimli nɛ a yi Mawu gbeye ɔmɛ a hɛ mi kpatami ligbi ɔ” maa ba je nɛ yi wu tso ní peepee hyi lɛ tɔ nɛ ɔ nɔ. (2 Petro 3:5-7) Yiwutsotsɛmɛ be hae nɛ ni kpahi nɛ a na nɔ́ hu. Kɛ wa ma plɛ kɛ ná nɔ mi nami kaa Mawu ma je yi wu tso ní peepee kɛ yiwutsotsɛmɛ kɛ je si himi mi ha kɛɛ?
Baiblo ɔ de ke Mawu ‘sume yiwutsotsɛmɛ kulaa.’ (La 11:5) Bɔlɔ ɔ suɔ tue mi jɔmi kɛ dami sane yemi. (La 33:5; 37:28) Enɛ ɔ he je nɛ e be yiwutsotsɛmɛ blɔ ngmɛe nɛ a hi si kɛ ya neneene ɔ nɛ.
w17.08 6 ¶15
Anɛ O Maa Suɔ Nɛ O To O Tsui Si Kɛ Mlɛ Lo?
15 Mɛni he je nɛ David ná suɔmi ɔ kaa e maa to e tsui si kɛ hyɛ Yehowa blɔ ɔ? David ha sane bimi nɛ ɔ heto ngɛ La 13 ɔ nɔuu mi, he nɛ e bi si ngɛ si eywiɛ ke, ‘Kɛ yaa si mɛni be?’ ɔ. E de ke: ‘Se imi lɛɛ, o suɔmi nɛ ngɛ daa a, lɔ ɔ nɔ lɛ i ngɔ ye hɛ kɛ fɔ. Ma ná bua jɔmi, ejakaa o ma he ye yi wami. Ma la kɛ je mo Yehowa o yi ejakaa o pee ye hiami ní ɔmɛ ha mi.’ (La 13:5, 6) David ngɔ e hɛ kɛ fɔ Yehowa suɔmi nɛ ngɛ daa a nɔ. E kɛ bua jɔmi hyɛ e yi wami hemi blɔ, nɛ e susu bɔ nɛ Yehowa kɛ lɛ hi si saminya ha a he. Niinɛ, David le kaa ke e to e tsui si ɔ, e ma ná he se.
kr 236 ¶16
Matsɛ Yemi ɔ Maa Pee Mawu Suɔmi Nya Ní Ngɛ Zugba a Nɔ
16 Si himi nɛ ngɛ slɔkee. Nyagbenyagbe ɔ, wa maa na gbami nɛ ngɛ Yesaya 11:6-9 ɔ mi bami nitsɛnitsɛ. Nyumuhi, yihi, kɛ jokuɛwi maa pee slɔkee ngɛ he tsuaa he nɛ a maa ya ngɛ zugba a nɔ. Adebɔ níhi tsuo, adesahi loo lohwehi be a sibi awi yee. Moo po he foni ngɛ o juɛmi mi kaa zugba a tsuo ba pee o we mi, nɛ o ma nyɛ maa sile ngɛ pahi, takuhi, kɛ wo ɔ mi; o ma nyɛ maa nyɛɛ yokuhi a nɔ; nɛ o ma nyɛ ma ya slaa si ngɛ ngahi a nɔ nɛ nɔ́ ko be mo pee. Ke je jɔ po ɔ, o be gbeye yee. Ezekiel 34:25 ɔ mi munyu ɔmɛ maa ba mi, nɛ Mawu we bi maa ‘hi si ngɛ nga a nɔ ngɛ tue mi jɔmi mi, nɛ a maa hwɔ mahe fuaa.’
Ngmami ɔ Mi Junehi
w13 9/1 19 ¶12
Anɛ O Tsake Lo?
12 Dɔmi sane ji kaa, nihi nɛ a bɔle wɔ ngɛ je ɔ mi ɔ peeɔ a ní kaa bɔ nɛ Paulo tsɔɔ ɔ pɛpɛɛpɛ. A susu kaa se nami be he kaa a kɛ sisi tomi mlaahi ma tsu ní, nɛ e sɛ nɛ nɔ ko hu nɛ nyɛ a nɔ nɛ a pee jã. Tsɔɔli kɛ fɔli fuu ngmɛɛ jokuɛwi blɔ konɛ a pee nɔ́ nɛ mɛ nitsɛmɛ a suɔ. A tsɔɔ jokuɛwi ɔmɛ po kaa nɔ tsuaa nɔ ngɛ he blɔ nɛ e mwɔɔ e yi mi kpɔ ngɛ nɔ́ nɛ da kɛ nɔ́ nɛ dɛ he. Nihi fuu nɛ a tsɔɔ kaa a he Mawu ye ɔ po susu kaa e he hia we nɛ a pee Mawu suɔmi nya ní. (La 14:1) E sɛ nɛ Kristofoli kaseɔ su nɛ ɔ. Eko ɔ, ke wa hyɛ we nɛ hi ɔ, waa kɛ teokrase blɔ nya tomihi be ní tsue hu. Eko ɔ, wa be suɔe kaa waa kɛ asafo ɔ blɔ tsɔɔmi nɛ tsu ní, nɛ wa maa tu níhi nɛ wa sume ɔ a he munyu. Aloo eko ɔ, wa nui Ngmami ɔ mi ga nɛ a wo wɔ kɛ kɔ hɛja jemi, Internet ɔ kɛ ní tsumi, kɛ sukuu yami kɛ ya tsitsaa he ɔ sisi saminya.