Womihi Nɛ A Tsɛ Se Ngɛ Si Himi Kɛ Sɔmɔmi Ní Tsumi Kpe ɔ He Ní Kasemi Womi ɔ Mi
© 2025 Watch Tower Bible and Tract Society of Pennsylvania
JULY 7-13
JUETLI NƐ NGƐ MAWU MUNYU Ɔ MI ABƐ 21
Sisi Tomi Mlaahi Nɛ Nile Ngɛ Mi Nɛ Haa Bua Jɔmi Hii Gba Si Himi Mi
w03 10/15 4 ¶5
Mɛni Blɔ Nɔ O Maa Gu Kɛ Mwɔ Yi Mi Kpɔhi Nɛ Nile Ngɛ Mi?
E he wɛ kulaa kaa nyagba ma nyɛ maa je yi mi kpɔhi nɛ a kɛ oya yemi mwɔɔ ɔ mi kɛ ba. Abɛ 21:5 de ke: “Nɔ nɛ bɔɔ mɔde ɔ, e blɔ nya tomihi maa ye manye kokooko, nɛ nihi tsuo nɛ a yeɔ oya kɛ peeɔ níhi ɔ maa ye ohia kokooko.” Kaa nɔ hyɛmi nɔ́ ɔ, e sa kaa nihewi kɛ yihewi nɛ a yi jeha 20 lolo nɛ a náa akɔnɔ nɛ nya wa a, nɛ́ a to a tsui si saminya kɛ mwɔ yi mi kpɔ ngɛ gba si himi mi nɛ a maa sɛ ɔ he. Ke pi jã a, lɛɛ munyu nɛ William Congreve nɛ e hi si ngɛ jeha 1700 jeha amɛ a mi, nɛ e ji fiɛmi ngmalɔ ɔ tu ɔ maa ba mi ngɛ a blɔ fa mi, e de ke: “Ke waa kɛ oya yemi sɛ gba si himi mi ɔ, lɔ ɔ ma nyɛ ma ha nɛ daa nɛ ɔ, wa maa hi wa he piae.”
g 7/08 7 ¶2
Nɔ́ Nɛ O Maa Pee Konɛ O Gba Si Himi ɔ Nɛ Ye Manye
Moo ba o he si. “Nyɛ ko ngɔ pɛ aloo yaka hɛ mi nyami hlami kɛ pee nɔ́ ko nɔ́ ko, mohu ɔ, nyɛɛ je he si bami mi nɛ nyɛɛ bu ni kpahi kaa a nɔ kuɔ pe nyɛ.” (Filipi Bi 2:3) Nyagbahi fuu baa ngɛ gba si himi mi, ejakaa gba si himi he piɛɛli fuu woɔ a he nɔ, nɛ a piaa a sibi ngɛ nyagbahi nɛ baa a he mohu pe nɛ a maa je he si bami mi kɛ hla blɔhi a nɔ nɛ a maa gu kɛ ha nɛ níhi nɛ pee gbɔjɔɔ kɛ ha a sibi. Ke nya sami ko ba a, he si bami maa ye bua mo nɛ o ko de ke doo ɔ, o maa tsɔɔ kaa mo lɛ o sane da.
w06 9/15 28 ¶13
“O Kɛ O Nihe Mi Yo ɔ Nɛ Nya”
13 Ke bua jɔmi be gba si himi ko mi akɛnɛ gba si himi mi he piɛɛli ɔmɛ kɛ a sibi hí si saminya a hu nɛɛ? E biɔ mɔde bɔmi loko a ma ná nyagba nɛ ɔ nya tsaba. Kaa nɔ hyɛmi nɔ́ ɔ, eko ɔ, a kɛ a sibi tui munyu ngɛ mi mi jɔmi mi be kɛkɛɛ nɛ enɛ ɔ ba pee a su. (Abɛ 12:18) Enɛ ɔ ma nyɛ maa ngɔ nyagba agbo kɛ ba: Baiblo mi abɛ ko de ke: “E hi kaa o ma ya hi nga nɔ, pe nɛ o kɛ yogbayo nɛ suɔ pɛ nɛ e woɔ nɔ mi mi la maa hi si.” (Abɛ 21:19) Ke yogbayo ji mo nɛ o gba a ngɛ kaa jã a, mo bi o he ke, ‘Anɛ ye ní peepee haa nɛ e he waa ha ye huno ɔ kaa e maa hɛ kɛ su ye he lo?’ Baiblo ɔ de hunomɛ ke: “Nyɛɛ ya nɔ nɛ nyɛɛ suɔ nyɛ yi ɔmɛ nɛ nyɛ mi mi nɛ ko fu mɛ wawɛɛ.” (Kolose Bi 3:19) Ke huno ji mo ɔ, mo bi o he ke, ‘Anɛ ye ní peepee tsɔɔ kaa i nui nɔ́ he ha ye yo ɔ, nɛ lɔ ɔ haa nɛ e nuɔ he kaa e sa nɛ e ya hlá bua womi ngɛ he kpa lo?’ Ngɛ anɔkuale mi ɔ, ke nɔ ko kɛ e he ya wo ajuama bɔmi mi ɔ, e be nya jemi ko ngɛ e ní peepee ɔ he. Se kɛ̃ ɔ, akɛnɛ oslaa ko kaa jã ma nyɛ maa ba he je ɔ, e sa nɛ lɔ ɔ nɛ ha nɛ nyɛɛ je nyɛ tsui mi nɛ nyɛɛ sɛɛ nyagbahi a he ní faa.
Ngmami ɔ Mi Junehi
w05 1/15 17 ¶9
Níhi Nɛ A De Ngɛ Mawu Matsɛ Yemi ɔ He ɔ Ba Mi
9 Amlɔ nɛ ɔ, pi adesa nɛ e hii si ngɛ teji ku nyafii nɔ ji Yesu hu, mohu ɔ, e ji Matsɛ nɛ ngɛ he wami. A kale lɛ kaa e hii si ngɛ okpɔngɔ nɔ—nɛ́ ji nɔ́ nɛ Baiblo ɔ kɛ tsuɔ ní kɛ daa si ha ta hwumi. (Abɛ 21:31) Kpo Jemi 6:2 ɔ de ke: “Hyɛ! okpɔngɔ futaa ko, nɛ nɔ nɛ e hii si ngɛ nɔ ɔ hɛɛ kɛ̃ɛ̃; nɛ a ha lɛ jlasi, nɛ e je kpo nɛ e ngɛ kunimi yee, nɛ e maa gbe e kunimi yemi ɔ nya.” Jehanɛ hu ɔ, David nɛ ji la polɔ ɔ de ngɛ Yesu he ke: “Yehowa maa kpã o matsɛ tso ɔ nɛ ji he wami ɔ mi kɛ je Zion, nɛ e ma de ke: ‘Yaa o he nyɛli a kpɛti nɛ o ya ye a nɔ.’”—La 110:2.
JULY 14-20
JUETLI NƐ NGƐ MAWU MUNYU Ɔ MI ABƐ 22
Sisi Tomi Mlaahi Nɛ Nile Ngɛ Mi Nɛ Maa Ye Bua Fɔli Ngɛ Bimɛ A Tsɔsemi Mi
Anɛ A Maa Wa Nɛ A Ba Sɔmɔ Mawu Lo?
7 Ke nyɛ ji nihi nɛ nyɛ sɛ gba si himi mi nɛ nyɛ suɔ nɛ nyɛ fɔ bimɛ ɔ, nyɛ bi nyɛ he ke: ‘Anɛ wa ji nihi nɛ wa baa wa he si nɛ wa suɔ Yehowa kɛ e Munyu ɔ lo? Anɛ Yehowa maa hla wɔ kaa waa hyɛ bi nɔ lo?’ (La 127:3, 4) Ke nyɛ ji fɔli momo ɔ, nyɛ bi nyɛ he ke: ‘Anɛ wa ngɛ wa bi ɔmɛ tsɔɔe kaa e hi kaa a ma tsu ní wawɛɛ lo?’ (Fiɛlɔ 3:12, 13) ‘Anɛ wa bɔɔ mɔde kɛ poɔ wa bimɛ a he piɛ kɛ jeɔ oslaahi nɛ ngɛ Satan je ɔ mi nɛ a kɛ ma nyɛ maa kpe ɔ a he lo?’ (Abɛ 22:3) Nyɛ be nyɛe maa po nyɛ bi ɔmɛ a he piɛ kɛ je oslaahi tsuo nɛ a kɛ ma nyɛ maa kpe ɔ a he. Jã be hie peemi kɔkɔɔkɔ. Se kɛ̃ ɔ, ke nyɛ ya nɔ nɛ nyɛ je suɔmi mi kɛ tsɔɔ mɛ bɔ nɛ a kɛ Mawu Munyu ɔ mi ga womihi ma tsu ní ha a, lɔ ɔ ma nyɛ ma dla mɛ kɛ ha nyagbahi nɛ a kɛ maa kpe ngɛ si himi mi ɔ. (Kane Abɛ 2:1-6.) Kaa nɔ hyɛmi nɔ́ ɔ, ke nyɛ weku no ko kpa Yehowa sɔmɔmi ɔ, nyɛɛ da Mawu Munyu ɔ nɔ kɛ ye bua nyɛ bi ɔmɛ konɛ a le nɔ́ he je nɛ e he hia kaa a maa ya nɔ nɛ a ye Yehowa anɔkuale ɔ. (La 31:23) Aloo eko ɔ, ke nyɛ weku no ko gbo ɔ, nyɛɛ ngɔ ngmami komɛ kɛ ye bua nyɛ bi ɔmɛ konɛ a nyɛ nɛ a da aywilɛho ɔ nya nɛ a ná tue mi jɔmi.—2 Kor. 1:3, 4; 2 Tim. 3:16.
Fɔli—Nyɛ Tsɔse Nyɛ Bimɛ Nɛ A Suɔ Yehowa
17 Nyɛɛ je bimɛ ɔmɛ a tsɔsemi sisi mla. Ke fɔli je a bimɛ a tsɔsemi sisi mla a, e maa ye bua wawɛɛ nitsɛ. (Abɛ 22:6) Nyɛ ha nɛ wa susu Timoteo nɛ pee se ɔ e kɛ Paulo hia blɔ ɔ he nɛ waa hyɛ. Timoteo yayo Yunis kɛ e na Lɔis tsɔse lɛ “kɛ je [e] bimwɔyo mi tɔɔ.”—2 Tim. 1:5; 3:15.
18 Jean-Claude kɛ e yo Peace nɛ mɛ hu a ngɛ Côte d’Ivoire a nyɛ nɛ a tsɔse a bimɛ ekpa amɛ tsuo nɛ a suɔ Yehowa, nɛ a ngɛ lɛ sɔmɔe. Mɛni lɛ ye bua mɛ nɛ a ye manye? A kase Yunis kɛ Lɔis a nɔ hyɛmi nɔ́ ɔ. A de ke, “Wa bɔni wa bimɛ ɔmɛ Mawu Munyu ɔ tsɔɔmi kɛ je a bimwɔyo mi.”—5 Mose 6:6, 7.
19 Ke a ke nyɛɛ “tsɔɔ” nyɛ bimɛ Yehowa Munyu ɔ, mɛni e tsɔɔ? E tsɔɔ kaa nyɛ maa tsɔɔ mɛ ní, nɛ́ nyɛɛ tĩ mi si abɔ konɛ a hɛ ko je nɔ. Loko fɔli ma nyɛ maa pee jã a, ja a ná be fuu kɛ ha a bimɛ ɔmɛ. Be komɛ ɔ, fɔli a kɔni mi ma nyɛ ma jɔ̃ ke e ba kaa a ngɛ nɔ́ kake mi tie kpamisaa kɛ tsɔɔ a bimɛ. Se e sa nɛ fɔli nɛ a nu sisi kaa enɛ ɔ lɛ maa ye bua a bimɛ ɔmɛ konɛ a nu Mawu Munyu ɔ sisi nɛ a kɛ tsu ní.
w06 4/1 9 ¶4
Fɔli—Nyɛɛ Pee Nɔ Hyɛmi Nɔ́ Kpakpa Kɛ Ha Nyɛ Bimɛ Ɔmɛ
Bɔ nɛ jokuɛwi peeɔ a ní ha a tsɔɔ kaa a ji jokuɛwi niinɛ, a ti ni komɛ sume kaa a kɛ blɔ tsɔɔmi ma tsu ní nɛ a tsɔɔ atuã po. (1 Mose 8:21) Ke e ba lɛ jã a, mɛni fɔli ma nyɛ maa pee? Baiblo ɔ de ke: “Kuasia jemi mɛtɛ jokuɛ tsui he, se tsɔsemi tso ma je lɛ kɛ je jokuɛ ɔ he kɛ ya se kulaa. (Abɛ 22:15) Ni komɛ naa enɛ ɔ kaa e ji tsɔsemi nɛ nya wa tsɔ nɛ́ e be be. Ngɛ anɔkuale mi ɔ, Baiblo ɔ tu munyu kɛ si yiwutso ní peepee kɛ yi mi wami ní peepee slɔɔtohi. E ngɛ mi kaa be komɛ ɔ, munyungu nɛ ji “tso” ɔ daa si ha kpã nitsɛnitsɛ nɛ a kɛ tsɔseɔ jokuɛyo mohu lɛɛ, se e tsɔɔ he blɔ nɛ fɔli ngɛ ngɛ́ a bimɛ a nɔ nɛ́ a ngɔɔ a nane kɛ maa si kɛ tsuɔ he blɔ nɛ ɔ he ní, se kɛ̃ ɔ, a jeɔ suɔmi mi kɛ peeɔ jã ngɛ blɔ nɛ sa nɔ, bɔ nɛ pee nɛ e hi ha a bimɛ ɔmɛ kɛ ya daa.—Hebri Bi 12:7-11.
Ngmami ɔ Mi Junehi
O Bua Nɛ Jɔ Níhi Nɛ O Nyɛɔ Peeɔ Ha Yehowa a He
11 Jã kɛ̃ nɛ wɔ hu wa ma nyɛ ma ná bua jɔmi wawɛɛ ke wa bua jɔ nɔ́ nɛ wa ngɛ tsue ngɛ Yehowa sɔmɔmi mi ɔ he. Moo ngɔ o “be tsuo” kɛ tsu fiɛɛmi ní tsumi ɔ nɛ o ngɔ o he kɛ wo asafo ɔ ní tsumihi a mi. (Níts. 18:5; Heb. 10:24, 25) Dla o he saminya loko o ya asafo mi kpehi konɛ o nyɛ nɛ o ha hetohi nɛ woɔ nɔ he wami. Moo na ní tsumi nɛ a kɛ maa wo o dɛ ngɛ otsi kpɛti kpe ɔ mi ɔ kaa e he hia saminya. Ke a ngɔ ní tsumi ko kɛ wo o dɛ ngɛ asafo ɔ mi ɔ, tsu ngɛ be nya nɛ a na kaa a ma nyɛ maa ngɔ hɛ kɛ fɔ o nɔ. Ke a ngɔ ní tsumi ko kɛ wo o dɛ ɔ, koo bu lɛ kaa e he hia we lɔ ɔ, o be be pue ngɛ he. Bɔɔ mɔde kaa o ma tsu lɛ saminya. (Abɛ 22:29) Ke o tsu ní wawɛɛ kɛ ha Yehowa a, lɔ ɔ ma ha nɛ o ma ba pee e huɛ nɛ o bua maa jɔ wawɛɛ. (Gal. 6:4) Ke ni kpahi a nine su he blɔ ko nɛ o kɛ ma hɛ mi ɔ nɔ po ɔ, e be yee ha mo kaa o kɛ mɛ ma nya.—Rom. 12:15; Gal. 5:26.
JULY 21-27
JUETLI NƐ NGƐ MAWU MUNYU Ɔ MI ABƐ 23
Sisi Tomi Mlaahi Nɛ Nile Ngɛ Mi Nɛ Maa Ye Bua Wɔ Ke Waa Kɛ Dã Ma Tsu Ní
w04 12/1 19 ¶5-6
Mo Ná Juɛmi Nɛ Da Ngɛ Bɔ Nɛ O Kɛ Dã Tsuɔ Ní Ha a He
5 Ke nɔ ko nuɔ dã, se e hyɛɛ saminya konɛ dã a ko de lɛ nɛ́ nihi nɛ a na a hu nɛɛ? Ni komɛ ngɛ nɛ ke a nu dã fuu po ɔ, o be nae kaa a de. Ke nɔ ko susu kaa oslaa be ní peepee kaa jã he ɔ, e ngɛ lɛ nitsɛ e he sisie. (Yeremia 17:9) Bɔɔbɔɔbɔɔ ɔ, nɔ ko ma nyɛ maa nu he kaa, ke e nui dã a, e be nyɛe si himi nɛ enɛ ɔ ma ha nɛ e ma ba pee nɔ ko nɛ ‘wai fuu numi ngɔ lɛ nyɔguɛ.’ (Tito 2:3) Womi ngmalɔ ko nɛ a tsɛɛ lɛ Caroline Knapp de kɛ kɔɔ blɔ nɔ nɛ nɔ ko guɔ kɛ ba peeɔ dã delɔ ɔ he ke: “E jeɔ sisi bɔɔbɔɔbɔɔ ngɛ blɔ nɛ ngɛ nigii nɛ e yɔsemi yee ɔ nɔ.” Dã fuu numi ji klama nɛ he ngɛ oslaa wawɛɛ!
6 Jehanɛ hu ɔ, Yesu bɔ wɔ kɔkɔ ke: “Nyɛɛ hyɛ nyɛ he nɔ saminya konɛ ní nɛ a yeɔ kɛ beɔ nɔ, kɛ ní babauu numi, kɛ si himi ɔ mi yeyeeye peemi nɛ ko ba he nyɛ tsui kɔkɔɔkɔ, nɛ jamɛ a ligbi ɔ nɛ ba ti nyɛ si tlukaa kaa klama. Ejakaa e maa ba nihi tsuo nɛ a ngɛ zugba a nɔ he fɛɛ he ɔ nɔ.” (Luka 21:34, 35) Pi dã nɛ nɔ ko maa nu kɛ ya si e ma bɔni lɛ demi ɔ pɛ nɛ ma ha nɛ nɔ ko nɛ pee hejɔtsɛ loo e de kɔnɛɛ ngɛ mumi mi kɛ he lo nya tsuo. Kɛ e maa pee e ní ha kɛɛ ke Yehowa ligbi ɔ ba ná lɛ tlukaa ngɛ jamɛ a si fɔfɔɛ ɔ mi?
it-1 656
Dã Demi
Baiblo ɔ tu munyu kɛ si dã demi. Baiblo ɔ tu munyu kɛ si dã fuu nɛ nɔ ko maa nu kɛ yaa si e maa de ɔ. Ní lelɔ nɛ ngma Abɛ womi ɔ kale nyagba nɛ jeɔ dã fuu numi mi kɛ baa a heii, nɛ enɛ ɔ kɛ níhi a mi hlamihi nɛ dɔkitahi pee ɔ kɔ. E bɔ kɔkɔ ke: “Mɛnɔ naa nɔ́? Mɛnɔ he mi jɔɛ lɛ? Mɛnɔ kɛ nihi náa pɛ? Mɛnɔ tuɔ níhi a he munyu? Mɛnɔ plaa yaka gu? Mɛnɔ hɛngmɛ tsuɔ tsutsuutsu? Nihi nɛ a se kɛɔ ngɛ wai he; nihi nɛ a hlaa wai nɛ a futu se blɔ. Koo hyɛ bɔ nɛ wai tsuɔ paa, bɔ nɛ e kpɛɔ ngɛ kplu mi [bɔ nɛ wai he ngɛ akɔnɔ, nɛ e kpɛɔ ha a], kɛ bɔ nɛ e bee miaa ngɛ kuɛ si ha a [benɛ e beɔ mlamlaamla ha ngɛ nɔ kuɛ si]. Ejakaa nyagbe ɔ, e kɔ̃ɔ nɔ kaa sinɔ, nɛ e suɔ duɔ kaa sinɔ duɔtsɛ [e ma nyɛ maa wo nɔ hiɔ (kaa nɔ hyɛmi nɔ́ ɔ, e haa nɛ ko ɔ náa nyagba) nɛ e ma ha nɛ nɔ ma ná juɛmi mi hiɔ (e haa nɛ nɔ juɛmi tsu we ní saminya), nɛ e ma nyɛ maa gbe nɔ]. O hɛngmɛ maa na nyakpɛ níhi [dã náa kalegbɔ ɔ hehi nɛ a kudɔɔ wa nɔ́ he numi kɛ wa susumi ɔ nɔ he wami, nɛ e ha we nɛ ní nɛ ɔmɛ nɛ a tsu ní saminya; subai nɛ ke nɔ nui dã nɛ́ e je we mɛ kpo ɔ tsuo jeɔ a he kpo; e maa pee lɛ kaa nɔ́ nɛ e ngɛ ní komɛ hyɛe pohu nɔ́ ko be; akɛnɛ kalegbɔ ɔ tsu we ní saminya he je ɔ, lɔ ɔ haa nɛ e tuɔ níhi nɛ pi anɔkuale ɔ he munyu kaa nɔ́ nɛ jamɛ a ní ɔmɛ ngɛ mi niinɛ; nɔ ɔ jeɔ subai komɛ kpo nɛ pi e kɔmɔ ji bɔ nɛ nihi maa na lɛ ha], nɛ o tsui maa tu munyu yayahi [susumihi kɛ ní komɛ nɛ nɔ ɔ bua jɔ he nɛ́ behi fuu ɔ ke e nui dã nɛ́ e tu we a he munyu ɔ, e ma bɔni a he munyu tumi].”—Abɛ 23:29-33; Hos 4:11; Mat 15:18, 19.
Ngmami ɔ tsa nɔ́ nɛ baa dã delɔ nɔ ɔ nɔ ke: “Nɛ o maa pee kaa nɔ ko nɛ e hwɔɔ si ngɛ wo kpɛti [e maa pee lɛ kaa bɔ nɛ ke nɔ ko ngɛ mue kɛ yaa nyu sisi nɛ́ e peeɔ lɛ ɔ, e suɔ he ko kɛkɛ e li he nɛ e ngɛ hu], kaa nɔ ko nɛ e hwɔɔ si ngɛ mele mi abalaa tso yi mi [kaa bɔ nɛ ke mele ngɛ nyɛɛe nɛ e su he ko nɛ́ e kpaa wawɛɛ kɛ yaa hiɔ nɔ kɛ muɔ nɔ, loo e gbaa kɛ jeɔ e blɔ nɔ nɛ́ enɛ ɔ ma nyɛ maa pee oslaa a, jã kɛ̃ nɛ dã delɔ ɔ ma nyɛ ma ná oslaa, nihi kɛ lɛ ma nyɛ maa nɔ kunɔ, nɛ e ma nyɛ ma ná nyagba kpahi hulɔ]. O ma de ke: ‘A fia mi nɔ́, se e yi mi. A kongo mi, se i li [e ngɛ kaa nɔ́ nɛ dã delɔ ɔ kɛ e he ngɛ munyu nɛ ɔmɛ tue; e li nɔ́ tutuutu nɛ ngɛ nɔ yae, nɛ e li tue gblami nɛ e ná kɛ je dã nɛ e de ɔ hu mi]. Mɛni be ma te si? I kpale hia dã ekohu [amlɔ nɛ ɔ lɛɛ e hwɔ si nɛ e te si nɛ dã a tsɔ ngɛ e hɛ mi, se akɛnɛ e pee nyɔguɛ kɛ ha dã he je ɔ, e ngɛ blɔ hyɛe kaa e maa kpale ya nu ekohu ke e ná he blɔ].’” Akɛnɛ e puɛɔ sika fuu ngɛ dã numi he, nɛ́ jehanɛ hu nihi kɛ a hɛ be nyɛe maa fɔ e nɔ, nɛ́ e be nyɛe ma tsu e ní tsumi saminya hulɔ he je ɔ, e maa ye ohia.—Abɛ 23:20, 21, 34, 35.
Ngmami ɔ Mi Junehi
w04 11/1 31 ¶2
Sane Bimihi Nɛ Je Ní Kaneli A Ngɔ
Kaa nɔ hyɛmi nɔ́ ɔ, ke nɔ ko kle kɛ be nɔ ɔ, eko ɔ, lɔ ɔ ma nyɛ maa tsɔɔ kaa nɔ ɔ ji jiklɔɔtsɛ, se pi jã nɛ e ji ngɛ nɔ fɛɛ nɔ nɛ e kle kɛ be nɔ ɔ blɔ fa mi. Ni komɛ ngɛ nɛ eko ɔ, hiɔ lɛ pee mɛ jã. Ni komɛ hu ngɛ nɛ e ji nɔ́ ko nɛ ngɛ a weku mi. Jehanɛ hu e sa nɛ wa kai kaa, klemi tsɔ ɔ daa si ngɛ nɔmlɔ tso ɔ nɔ, se jiklɔɔ peemi lɛɛ e daa si ngɛ nɔ ko subai kɛ e ní peepee nɔ. Ke nɔ ko kle kɛ be nɔ ɔ, e jeɔ kpo ngɛ e he womi nɔ, enɛ ɔ tsɔɔ kaa “klemi tsɔ ɔ ji he lo ɔ mi nɔ́,” se nɔ nɛ peeɔ jiklɔɔ ɔ ji “nɔ ko nɛ e hɛ tsuɔ aloo e yeɔ ní kɛ beɔ nɔ.” Enɛ ɔ he ɔ, pi bɔ nɛ nɔ ko klemi ngɛ ha a nɛ tsɔɔ kaa e ji jiklɔɔtsɛ, se mohu bɔ nɛ e peeɔ e ní ngɛ niye ní he ha a. Nɔ ko ngɛ nɛ e klee we tsɔ loo e klee we kulaa, se kɛ̃ ɔ, e ji jiklɔɔtsɛ. Jehanɛ hu ɔ, bɔ nɛ a naa klemi nɛ sa ha a ngɛ ekpaekpa ngɛ he fɛɛ he.
JULY 28–AUGUST 3
JUETLI NƐ NGƐ MAWU MUNYU Ɔ MI ABƐ 24
Moo Pee Níhi Nɛ Maa Wo Mo He Wami Ngɛ Behi Nɛ A Mi Wa Mi
it-2 610 ¶8
Yi Mi Wami
Kristofohi hu bua jɔ hiɔwo nɛ ngɛ kɛ ha nihi nɛ a fĩɔ si ɔ he. Yesu de ngɛ hiɔwo nɛ ɔ he ke: “Nihi nɛ a peeɔ nɔ́ nɛ da nɛ lɔ ɔ he je a waa mɛ yi mi ɔ ngɛ bua jɔmi, ejakaa a nɔ́ ji hiɔwe Matsɛ Yemi ɔ nɛ.” (Mat 5:10) Nile nɛ a ba ná ngɛ gbogboehi a si tlemi ɔ he hɛ kɛ nɔ fɔmi ɔ he, kɛ nile nɛ a ba ná ngɛ Nɔ nɛ to blɔ nya nɛ ɔ he ɔ, woɔ mɛ he wami. Lɔ ɔ woɔ mɛ he wami konɛ a ye Mawu anɔkuale ke si temi kɛ woli nɛ a yi mi wa a wo a he gbeye kaa a maa gbe mɛ. Hemi kɛ yemi nɛ a ngɛ ngɛ nɔ́ nɛ Yesu gbenɔ ɔ tsu ɔ mi ɔ ha nɛ a yi gbenɔ gbeye ko kulaa. (Heb 2:14, 15) Loko Kristofono ko ma nyɛ maa hɛɛ e we anɔkuale yemi ɔ mi ke e kɛ si temi kɛ womi ko ngɛ kpee ɔ, e daa si ngɛ susumi nɛ e ma ná ngɛ si fɔfɔɛ nɛ e ya je mi ɔ he. “Nyɛ ha nɛ juɛmi nɛ ɔ nɛ ngɛ Kristo Yesu mi ɔ nɛ ya nɔ nɛ e hi nyɛ hu nyɛ mi . . . e ba e he si nɛ e bu tue hluu kɛ ya su gbenɔ mi, ee, sɛumi tso nɔ gbenɔ.” (Flp 2:5-8) “Ejakaa bua jɔmi nɛ a ngɔ kɛ ma [Yesu] hɛ mi ɔ he je ɔ, e fĩ si ngɛ sɛumi tso ɔ nɔ, nɛ zo pee we lɛ.”—Heb 12:2; hyɛ 2Ko 12:10; 2Tɛ 1:4; 1Pe 2:21-23 ɔ hulɔ.
w09 12/15 18 ¶12-13
Yaa Nɔ Nɛ O Ná Bua Jɔmi Ngɛ Haomi Behi A Mi
12 Abɛ 24:10 de ke: “Ke o kɔni mi jɔ̃ ngɛ haomi ligbi nɔ ɔ, o he wami nɔ ma gbɔ.” Abɛ kpa ko hu de ke: “Tsui yemi gbeɔ nɔ mumi.” (Abɛ 15:13) Kristofohi komɛ yeɔ tsui hluu kaa a kase we Baiblo ɔ nɛ a pue we a yi mi tɛ ngɛ Mawu Munyu ɔ he hu. A sɔlemi nui tso hu, nɛ a yuɔ a he ngɛ a nyɛmimɛ Kristofohi a he. Ngɛ anɔkuale mi ɔ, ke daa nɛ ɔ nɛ nɔ ko ngɛ haoe ɔ, e ngɛ oslaa wawɛɛ.—Abɛ 18:1, 14.
13 Se kɛ̃ ɔ, ke wa náa juɛmi nɛ da ngɛ níhi a he ɔ, e maa ye bua wɔ konɛ waa ngɔ wa juɛmi kɛ ma níhi nɛ wa maa pee nɛ́ ma ha wɔ bua jɔmi ngɛ si himi mi ɔ nɔ. David ngma ke: “Oo ye Mawu, ye bua jɔɔ o suɔmi nya ní peemi he.” (La 40:8) Ke níhi yɛ nɔ saminya ngɛ wa si himi mi ɔ, e sɛ nɛ wa kpa níhi nɛ haa nɛ huɛ bɔmi kpakpa hiɔ waa kɛ Mawu wa kpɛti ɔ peemi. Ngɛ anɔkuale mi ɔ, nɔ́ nɛ maa ye bua wɔ ke wa ngɛ haoe ɔ ji kaa wa maa pee níhi nɛ ma ha wa ná bua jɔmi. Yehowa de wɔ kaa wa ma ná bua jɔmi kɛ he wami womi ke wa kaneɔ e Munyu ɔ nɛ wa susuɔ he kɛ yaa tsitsaa be fɛɛ be. (La 1:1, 2; Yak. 1:25) Wa naa “Munyu ngɔngɔɛhi” kɛ jeɔ Ngmami Klɔuklɔu ɔ nɛ wa kaneɔ ɔ mi kɛ jehanɛ se hu asafo mi kpehi nɛ wa yaa a sisi, nɛ enɛ ɔ haa nɛ wa nɔ gbãgbã tee nɛ wa bua jɔɔ.—Abɛ 12:25; 16:24.
Sane Bimihi Nɛ Je Ní Kaneli A Ngɔ
Abɛ 24:16 de ke: “Nɔmlɔ kpakpa a, ke e nɔ si nɔtonɔto si kpaago po, e maa te si ekohu.” Anɛ ngmami nɛ ɔ ngɛ nɔ ko nɛ e peeɔ yayami kpamisaa se Mawu kɛ keɔ lɛ ɔ he munyu tue lo?
Ngɛ anɔkuale mi ɔ, tsa pi jã nɛ ngmami nɛ ɔ ngɛ tsɔɔe. Ngmami nɛ ɔ ngɛ nɔ ko nɛ e kɛ haomihi babauu kpeɔ se e nyɛɔ fĩɔ si ngɛ tsuo mi ɔ he munyu tue.
Lɔ ɔ he ɔ, odase nɛ ɔmɛ tsuo tsɔɔ kaa tsa pi yayami nɛ nɔ ko maa pee ɔ he munyu nɛ Abɛ 24:16 ngɛ tue, mohu ɔ, e ngɛ nyagbahi nɛ nɔ ko kɛ kpeɔ si abɔ ɔ he munyu tue. Ngɛ je yaya nɛ ɔ mi ɔ, nɔ nɛ peeɔ nɔ́ nɛ da a ma nyɛ maa nu hiɔ loo e kɛ nyagba kpahi maa kpe. Eko ɔ, nɔ yeli ɔmɛ ma nyɛ maa wa lɛ yi mi ngɛ e hemi kɛ yemi ɔ he je. Se e ma nyɛ ma ná nɔ mi mami kaa Mawu ma fĩ e se, nɛ e maa ye bua lɛ konɛ e nyɛ nɛ e da nyagba nɛ ɔmɛ a nya. Mo bi o he ke: ‘Anɛ i yɔse we kaa níhi pɔɔ nɔ yami saminya ha Mawu sɔmɔli lo?’ Mɛni he je? Ejakaa wa ngɛ nɔ mi mami kaa “nihi nɛ ngɛ haomi mi ɔ, [Yehowa] piɛɔ a he, nɛ nihi nɛ nɔ si ɔ, e woɔ a nɔ kɛ daa si ekohu.”—La 41:1-3; 145:14-19.
Ngmami ɔ Mi Junehi
w09 10/15 12
Sane Bimihi Nɛ Je Ní Kaneli A Ngɔ
Blema a, ke nyumu ko suɔ kaa e “[fia e] we mi bimɛ kɛ ma si,” aloo e maa to weku sisi kɛ gu gba si himi mi nɛ e maa sɛ ɔ nɔ ɔ, e he hia nɛ e bi e he ke, ‘Anɛ i pee klaalo kaa ma hyɛ ye yo ɔ kɛ bimɛ nɛ eko ɔ, wa ma fɔ pee se ɔ nɔ nɛ ma ye bua mɛ lo?’ Loko e maa sɛ gba si himi mi nɛ́ e to weku sisi ɔ, ní tsumi ngɛ nɛ e sa kaa e tsu, nɛ lɔ ɔ ji e maa hyɛ e ngmɔhi kɛ e ngmɔ níhi a nɔ saminya. Enɛ ɔ he ɔ, Today’s English Version ɔ tsɔɔ kuku nɛ ɔ sisi ke: “E sa nɛ o ngmɔ ɔmɛ nɛ a ba ní kekle, nɛ o ná nɔ mi mami kaa o ma nyɛ maa hyɛ we nɔ loko o ma o we nɛ o to sihi he he blɔ nya.” Anɛ sisi tomi mlaa nɛ ɔ kɔɔ wa he mwɔnɛ ɔ lo?
Ee. E sa nɛ nyumu nɛ e ngɛ hlae maa sɛ gba si himi mi ɔ nɛ e dla e he saminya kɛ ha blɔ nya ní tsumi nɛ ɔ. Ke e ngɛ nɔmlɔ tso mi he wami nɛ e ma nyɛ ma tsu ní ɔ, e sa nɛ e tsu ní. Ngɛ anɔkuale mi ɔ, pi he lo nya níhi nɛ e sa nɛ nyumu ko nɛ e ha e weku ɔ pɛ he je nɛ e sa nɛ e tsu ní wawɛɛ ngɛ. Mawu Munyu ɔ tsɔɔ kaa, nyumu nɛ e ha we e weku ɔ a he lo nya kɛ mumi mi hiami níhi, kɛ níhi nɛ ma ha nɛ a ná bua jɔmi ɔ, lɛɛ e ji nɔmlɔ yayami kulaa pe nɔ nɛ e be hemi kɛ yemi! (1 Tim. 5:8) Enɛ ɔ he ɔ, ke niheyo ko ngɛ e he dlae kɛ ha gba si himi kɛ weku sisi tomi ɔ, e sa nɛ e bi e he sane komɛ kaa: ‘Anɛ i dla ye he saminya nɛ ma nyɛ ma ha ye weku ɔ a he lo nya hiami níhi lo? Anɛ i pee klaalo kaa ma nyɛɛ ye weku ɔ hɛ mi ngɛ Mawu jami mi kaa weku yi lo? Anɛ ma nyɛ ma tsu ye blɔ nya ní tsumi nɛ ji kaa i kɛ ye yo ɔ kɛ ye bimɛ ɔmɛ nɛ kase Baiblo ɔ be fɛɛ be ɔ he ní lo?’ E ngɛ heii kaa Mawu Munyu ɔ ma bɔ nɛ blɔ nya ní tsumi nɛ ɔmɛ a he hia a ha a nɔ mi.—5 Mose 6:6-8; Efe. 6:4.
Lɔ ɔ, e sa nɛ nyumu nɛ e ngɛ yo hlae maa ngɔ ɔ nɛ e susu sisi tomi mlaa nɛ ngɛ Abɛ 24:27 ɔ he saminya. Jã nɔuu nɛ e sa nɛ nyɛmiyo nɛ e ngɛ hlae maa sɛ gba si himi mi ɔ nɛ́ e bi e he ke ji e dla e he kɛ ha blɔ nya ní tsumihi nɛ ngɛ kɛ ha yogbayo kɛ binyɛ ɔ lo. Nyumu kɛ yo nɛ a sɛ gba si himi mi kɛ we ɔ ma nyɛ ma bi a he sane bimi nɛ ɔmɛ nɔuu ke a ngɛ he susue ke ji a ma fɔ bimɛ. (Luka 14:28) Ke Mawu we bi kɛ blɔ tsɔɔmi nɛ ɔmɛ nɛ je Mawu ngɔ ɔ tsu ní ɔ, e maa ye bua mɛ konɛ a yu a he kɛ je nyagbahi a he nɛ a ná bua jɔmi ngɛ a weku ɔ mi.
AUGUST 4-10
JUETLI NƐ NGƐ MAWU MUNYU Ɔ MI ABƐ 25
Sisi Tomi Mlaahi Nɛ Nile Ngɛ Mi Nɛ Maa Ye Bua Wɔ Ngɛ Wa Munyu Tutui Mi
Ha Munyu Kpakpa Nɛ Je O Nya
6 Mɛni he je nɛ e he hia kaa wa maa tu munyu ngɛ be nɛ sa mi ɔ? Abɛ 25:11 ɔ de ke: “Munyu nɛ a tu pɛpɛɛpɛ ngɛ be nɛ sa mi ɔ, e ngɛ kaa sika tsu akutuhi nɛ a to ngɔ wo sika hiɔ nɔ́ mi.” Sika tsu akutuhi ngɛ fɛu, se ke a kɛ wo sika hiɔ nɔ́ mi ɔ, e pa peeɔ fɛu wawɛɛ nitsɛ. Jã kɛ̃ nɛ eko ɔ, ke wa ngɛ nɔ́ kpakpa ko nɛ wa suɔ kaa wa ma de nɔ ko, nɛ wa de nɔ ɔ ngɛ be nɛ sa mi ɔ, nɔ ɔ bua maa jɔ he wawɛɛ nitsɛ. Mɛni blɔ nɔ wa ma nyɛ maa gu kɛ pee jã?
7 Ke wa tu munyu ngɛ be nɛ sɛ mi ɔ, eko ɔ, nihi be sisi nue, aloo a bua be he jɔe. (Kane Abɛ 15:23.) Kaa nɔ hyɛmi nɔ́ ɔ, ngɛ March 2011 ɔ mi ɔ, zugba mimiɛmi kɛ tsunami kpata mahi babauu nɛ a ngɛ Japan puje he blɔ ɔ a hɛ mi. Nimli nɛ a hiɛ pe 15,000 sɔuu gbo. E ngɛ mi kaa Yehowa Odasefohi nɛ a ngɛ lejɛ ɔ a kpɛti nihi fuu a weku li kɛ a huɛmɛ gbo mohu lɛɛ, se a suɔ kaa a maa ngɔ Baiblo ɔ kɛ ye bua ni kpahi nɛ a ya je si himi kaa jã a mi ɔ. Se a le kaa nimli nɛ ɔmɛ a ti nihi hiɛhiɛɛ ngɛ Buda jami ɔ mi, nɛ a li nɔ́ ko tsɔ ngɛ Baiblo ɔ he. Enɛ ɔ he ɔ, nyɛmimɛ ɔmɛ de we mɛ nɔ́ ko ngɛ gbogbohi a si temi ɔ he, mohu ɔ, a wo a bua, nɛ a tsɔɔ mɛ nɔ́ he je nɛ ní yayahi kaa jã a baa nimli kpakpahi a nɔ ɔ.
Ha Munyu Kpakpa Nɛ Je O Nya
15 Ke waa kɛ nihi maa tu munyu ko ɔ, tsa pi nɔ́ nɛ wa ma de ɔ pɛ nɛ he hia, se bɔ nɛ wa ma plɛ kɛ de nɔ́ ɔ ha a hu he hia. Nihi suɔ kaa a maa bu Yesu tue, ejakaa ‘munyuhi nɛ jeɔ e nya a he jua wa,’ aloo a ji mi mi jɔmi munyuhi. (Luka 4:22) Ke wa tuɔ mi mi jɔmi munyuhi ɔ, e ngɛ heii kaa nihi maa suɔ kaa a maa bu wɔ tue, nɛ a bua maa jɔ nɔ́ nɛ wa ngɛ mɛ dee ɔ he. (Abɛ 25:15) Ja wa buɔ nihi, nɛ wa susuɔ a he loko wa ma nyɛ maa tu mi mi jɔmi munyu kɛ tsɔɔ mɛ. Yesu pee jã. Kaa nɔ hyɛmi nɔ́ ɔ, benɛ e na nimli asafo ko nɛ a ngɛ mɔde bɔe kaa a maa bu lɛ tue ɔ, e bua jɔ wawɛɛ, nɛ e ná deka kɛ tsɔɔ mɛ ní. (Marko 6:34) Benɛ nihi jɛ Yesu po ɔ, Yesu jɛ we mɛ kɛ tui nane mi.—1 Petro 2:23.
16 E ngɛ mi kaa wa suɔ wa weku mi bimɛ kɛ wa huɛmɛ mohu lɛɛ, se eko ɔ, akɛnɛ wa le mɛ he je ɔ, waa kɛ mɛ be munyu tue ngɛ mi mi jɔmi mi. Eko ɔ, wa ma susu kaa e he hia we nɛ waa hyɛ bɔ nɛ waa kɛ mɛ tuɔ munyu ha a saminya. Se Yesu kɛ e huɛmɛ ɔmɛ tui munyu basabasa gblee. Benɛ a ti ni komɛ sã nya ngɛ nɔ nɛ ji nɔmlɔ ngua pe kulaa ngɛ a kpɛti ɔ he ɔ, e je mi mi jɔmi mi nɛ e dla a juɛmi. E ngɔ jokuɛ wayoo ko kɛ pee nɔ hyɛmi nɔ́ kɛ ha mɛ, konɛ lɔ ɔ nɛ ha nɛ a tsake a susumi. (Marko 9:33-37) Asafo mi nikɔtɔmahi hu ma nyɛ maa kase Yesu konɛ a to a tsui si blɛuu kɛ wo nihi ga.—Galatia Bi 6:1.
w95 4/1 17 ¶8
Mɛni Blɔ Nɔ Wa Maa Gu Kɛ Ha Nɛ Wa Sibi A Nɔ Gbãgbã Nɛ E Te Kɛ Ha Suɔmi Kɛ Ní Tsumi Kpakpahi?
8 Ke e ba lɛ ngɛ Yehowa sɔmɔmi mi ɔ, wɔ tsuo wa ma nyɛ ma ha nɛ wa sibi a nɔ gbãgbã nɛ e te kɛ gu nɔ hyɛmi nɔ́ nɛ wa maa pee ɔ nɔ. Yesu ha nɛ e tue buli ɔmɛ a nɔ gbãgbã te. E bua jɔ sɔmɔmi ní tsumi ɔ he, nɛ e kɛ kã tsu. E de ke e ngɛ kaa niye ní kɛ ha lɛ. (Yohane 4:34; Roma Bi 11:13) Gɛjɛmi kaa jã a ma nyɛ ma ná ni kpahi a nɔ he wami. Anɛ mo hu o ma nyɛ ma ha nɛ ni kpahi nɛ a na bɔ nɛ o kɛ bua jɔmi tsuɔ sɔmɔmi ní tsumi ɔ ha a lo? Mo de ni kpahi nɛ a ngɛ asafo ɔ mi ɔ o níhi a si kpami kpakpa amɛ ngɛ blɔ nɛ maa wo mɛ he wami ɔ nɔ, se pi ngɛ blɔ nɛ tsɔɔ kaa o ngɛ fĩae ɔ nɔ. Ke o kɛ ni kpahi ngɛ fiɛɛmi ní tsumi ɔ tsue ɔ, moo hyɛ ke ji o ma nyɛ maa ye bua mɛ konɛ a kɛ ni kpahi nɛ sɛɛ Yehowa nɛ ji wa Bɔlɔ Ngua a he ní, konɛ mɛ hu a ná bua jɔmi nitsɛnitsɛ nɛ ngɛ jã peemi mi ɔ eko.—Abɛ 25:25.
Ngmami ɔ Mi Junehi
it-2 399
He Jɔmi
Ke nɔ ko he jɔ ɔ, e ní peepee tsɔɔ jã, ejakaa e ngɛ hemi kɛ yemi, nɛ e ngɛ nɔ́ nɛ woɔ lɛ he wami hulɔ. Níhi gba we e nya mlamlaamla, nɛ e he waa kaa nɔ́ ko ma ha nɛ e ngmɛɛ juɛmi nɛ da nɛ e ngɛ ngɛ́ níhi a he ɔ he. Níhi nɛ haa nɛ nɔ ko nyɛ we nɛ e jeɔ he jɔmi su kpo ɔ ji, ke e nuɔ he kaa e be slɔkee, e pee basaa, e be hemi kɛ yemi kɛ hɛnɔkami, nɛ e yeɔ gbeye kaa si fɔfɔɛ nɛ e ngɛ mi ɔ he nɔ́ ko be hie peemi. Abɛ womi ɔ kale nɔ ko nɛ e be he jɔmi su nɛ e nyɛ we e he nɔ yemi ɔ. E de ke: “Kaa bɔ nɛ ma nɛ a ku e gbogbo kɛ pue si ngɛ ɔ, jã nɛ adesa nɛ e nyɛ we e we abofu nɔ yemi ɔ ngɛ.” (Abɛ 25:28) Susumi yayami fɛɛ susumi yayami ma nyɛ ma ná nɔ ko kaa jã nɔ he wami, nɛ lɔ ɔ ma nyɛ ma ha nɛ e ngɔ e he kɛ wo ní peepeehi nɛ sɛ mi.
AUGUST 11-17
JUETLI NƐ NGƐ MAWU MUNYU Ɔ MI ABƐ 26
Yu O He Ngɛ “Kuasia” He
it-2 729 ¶6
Hiɔmi
Behi nɛ kɔɔhiɔ mi si fɔfɔɛ tsakeɔ. A ma nyɛ maa tu mawulɛ kɛ fiɛ be, nɛ́ ji be titli enyɔ nɛ kɔɔhiɔ mi tsakeɔ ngɛ Si Womi Zugba a nɔ ɔ he munyu kaa a ji be nɛ hiɔmi pɔɛ nɛmi, kɛ hiɔmi nɛmi be. (Kɛ to La 32:4; Lah 2:11, sisi ningma a he.) Kɛ je April nyɔhiɔ ɔ kpɛti kɛ ya si October nyɔhiɔ ɔ kpɛti ɔ, hiɔmi pɔɛ nɛmi tsɔ. Akɛnɛ hiɔmi pɔɛ nɛmi he je ɔ, be nɛ ɔ mi lɛ a pɔɔ ní kpami. Abɛ 26:1 ɔ tsɔɔ kaa ke hiɔmi nɛ ngɛ ní kpami be mi ɔ, nihi naa lɛ kaa e ji nɔ́ ko nɛ e sɛ ngɛ ní kpami be mi. (Kɛ to 1Sa 12:17-19 ɔ he.) Ke e su hiɔmi nɛmi be ɔ, pi be fɛɛ be nɛ hiɔmi nɛɛ; ligbi komɛ ngɛ nɛ́ hiɔmi ɔ nɛ́. Akɛnɛ be nɛ ɔ hu ji fĩɛ be he je ɔ, ke hiɔmi ngɛ nɛe ɔ, e haa nɛ fĩɛ yee wawɛɛ. (Ezr 10:9, 13) Enɛ ɔ he ɔ, nihi suɔ kaa a maa na he ko nɛ ngɛ slɔkee nɛ maa po a he piɛ.—Yes 4:6; 25:4; 32:2; Hio 24:8.
w87 10/1 19 ¶12
Tsɔsemi Woɔ Tue Mi Jɔmi Yiblii
12 Ngɛ ni komɛ a blɔ fa mi ɔ, a hia tsɔsemi nɛ nya wa, kaa bɔ nɛ Abɛ 26:3 ɔ de ɔ. E de ke: “Kpã ngɛ kɛ ha okpɔngɔ, kudɔmi kpã ngɛ kɛ ha teji, nɛ tso ngɛ kɛ ha kuasiahi a se mi.” Be komɛ ɔ, Yehowa ngmɛɛɔ blɔ nɛ nyagbahi nɛ Israel ma a ngɔ kɛ ba mɛ nitsɛmɛ a nɔ ɔ, a naa mi nɔ́. Ngmami ɔ de ke: “Ejakaa a tsɔ atuã kɛ si Mawu munyu ɔ; a bui Nɔ Nɛ E Nɔ Kuɔ Pe Kulaa a ga womi ɔ fɛɛ. Enɛ ɔ he ɔ, e ha nɛ a gblee haomi mi, nɛ e kɛ ha nɛ a ba a he si; a tɛ si, nɛ nɔ ko be nɛ maa ye bua mɛ. A tsɛ Yehowa kaa e ye kɛ bua mɛ ngɛ a haomi ɔ mi; nɛ e he a yi wami ngɛ a haomi ɔ mi.” (La 107:11-13) Se kɛ̃ ɔ, a kpɛti ni komɛ nɛ a ji kuasiahi ɔ kplii a tsui nɛ tsɔsemi ko nyɛ we nɛ ye bua mɛ. Ngmami ɔ de ke: “Adesa nɛ a kã e hɛ mi si abɔ, se loloolo ɔ, e kuɛ wa a, a maa ku lɛ tlukaa nɛ e be hie tsami.”—Abɛ 29:1.
it-2 191 ¶4
Libɔɔ
Ke a kɛ libɔɔ tsu ní ngɛ abɛ mi. Matsɛ Salomo nɛ e ji ní lelɔ ɔ de ke: “Bɔ nɛ nɔ nɛ kuɔ lɛ nitsɛ e nanehi nɛ́ e peeɔ libɔɔ kɛ yeɔ e he awi ngɛ ɔ, jã nɛ nɔ nɛ tuu sanehi kɛ woɔ kuasia dɛ ɔ hu ngɛ.” Ngɛ anɔkuale mi ɔ, nɔ nɛ e kɛ ní tsumi woɔ kuasia dɛ ɔ, e ngɛ lɛ nitsɛ e he awi yee ejakaa e ní tsumi ɔ be nɔ yae. Bɔ fɛɛ bɔ nɛ ji ɔ, e ní tsumi ɔ maa gbee si, nɛ e maa ye lɛ nitsɛ e he awi.—Abɛ 26:6.
Ngmami ɔ Mi Junehi
it-1 846
Kuasia
Heto nɛ nɔ ko ma ha kuasia “ngɛ e kuasia jemi ɔ nya,” nɛ́ lɔ ɔ ji kaa lɛ hu e maa gu blɔ nɛ sɛ nɛ kuasia a gu nɔ kɛ ngɛ e sane ɔmɛ kpo jee ɔ nɔ kɛ ha lɛ heto ɔ, ma ha nɛ e kɛ kuasia a maa sɔ ngɛ blɔ nɛ dɛ nɛ e gu nɔ kɛ ngɛ e munyu ɔ tue ɔ mi, aloo e kɛ lɛ maa sɔ ngɛ susumihi nɛ dɛ nɛ e hɛɛ ɔ mi. Bɔ nɛ pee nɛ wa ko ba pee kaa kuasia a ngɛ blɔ nɛ ɔ nɔ ɔ, abɛ womi ɔ wo wɔ ga ke: “Ko ha kuasia heto ngɛ e kuasia jemi ɔ nya.” Se Abɛ 26:4, 5 ɔ tsɔɔ kaa o ha kuasia heto “ngɛ e kuasia jemi ɔ nya,” nɛ́ lɔ ɔ ji kaa o ma susu munyuhi nɛ kuasia a ngɛ tue ɔ he kɛ ya tsitsaa nɛ́ o ha nɛ e na kaa juɛmi be e munyu ɔmɛ a mi, nɛ jehanɛ hu o ma ha nɛ e le kaa munyuhi nɛ lɛ nitsɛ e ngɛ tue ɔ tsɔɔ kaa e juɛmi nya si nɛ e ma ngɛ sane ɔ he ɔ dɛ kulaa, nɛ jã nɛ o maa pee ɔ ji nɔ́ nɛ se nami ngɛ he.
AUGUST 18-24
JUETLI NƐ NGƐ MAWU MUNYU Ɔ MI ABƐ 27
Bɔ Nɛ Wa Náa Huɛmɛ Kpakpahi Nɛ Waa Kɛ Bɔɔ ɔ He Se Ha
Yehowa Sɔmɔli Nɛ Nyɛ Baa Nyɛ He Si—Nyɛ He Jua Wa Ha Lɛ
12 Nɔ nɛ baa e he si ɔ bua jɔɔ ga womi he. Nɔ́ he tomi nɔ́ ko ji nɛ ɔ nɛ: Moo ngɔ lɛ kaa o ya asafo mi kpe nɛ o kɛ nyɛmimɛ saii sɛɛ ní. Benɛ o kɛ nyɛmi kpa ko hu ngɛ ní sɛɛe ɔ, e gbla mo blɛuu kɛ ya se, nɛ e de mo ke niye ní ko tlɔ o lungu kpɛ. Atsinyɛ jemi ko be he kaa e maa pee mo zo wawɛɛ. Se anɛ o bua be jɔe kaa nyɛmi ɔ ha nɛ o le lo? Ngɛ anɔkuale mi ɔ, o ná nɛ jinɛ nɔ ko de mo mla! Jã nɔuu kɛ̃ nɛ ke nyɛmi ko pee kã nɛ e wo wɔ ga ngɛ be nya a, e sa nɛ waa kɛ bua jɔmi nɛ kplɛɛ nɔ. Wa naa jamɛ a nɔ ɔ kaa wa huɛ, se pi wa he nyɛlɔ.—Kane Abɛ 27:5, 6; Gal. 4:16.
it-2 491 ¶3
Nɔ Nɛ Ngɛ O Kasa Nya
Abɛ womi ɔ wo wɔ ga ngɛ hemi kɛ yemi kɛ nɔ mi mami nɛ wa ma ná ngɛ wa huɛ ko mi kɛ se nami nɛ ngɛ wa huɛ ɔ nɛ wa ma bi lɛ yemi kɛ buami ngɛ haomi be mi ɔ he. E de ke: “Ko kua o huɛ aloo o tsɛ huɛ, nɛ koo ya mo nitsɛ o nyɛmi we mi ngɛ o haomi ligbi nɔ; nɔ nɛ ngɛ o kasa nya a [sha·khenʹ] hi pe o nyɛmi nɛ ngɛ tsitsaa lokoo.” (Abɛ 27:10) E ma nyɛ maa ba lɛ kaa nɔ nɛ ngma Abɛ womi ɔ ngɛ tsɔɔe kaa e sa nɛ o bua nɛ jɔ huɛ nɛ hɛ kɛ su nyɛ weku ɔ he nɛ́ e ngɛ o kasa nya a he wawɛɛ, nɛ ke o hia yemi kɛ buami ɔ, o bi lɛ, mohu pe o wekuno nɛ hɛ kɛ su o he nɛ e ji o nyɛmi nɛ o kɛ lɛ he kɛ ɔ, ejakaa e ma nyɛ maa ba lɛ kaa e be nyɛe maa ye kɛ bua mo nɔuu be mi nɛ o hia yemi kɛ buami ɔ kaa bɔ nɛ o huɛ nɛ hɛ kɛ su nyɛ weku ɔ he nɛ ngɛ o kasa nya a ma nyɛ maa ye bua mo nɔuu ɔ.
Nihewi Kɛ Yihewi—Kɛ Nyɛ Suɔ Nɛ Nyɛ Si Himi Nɛ Hi Ha Kɛɛ?
7 Nɔ́ kake nɛ wa ma nyɛ maa kase kɛ je yi mi kpɔ nɛ dɛ nɛ Yoash mwɔ ɔ mi ji kaa e sa nɛ waa kɛ nihi nɛ a suɔ Yehowa, nɛ a suɔ kaa a ma ha nɛ e bua nɛ jɔ ɔ nɛ bɔ. Huɛmɛ nɛ ɔmɛ maa ye bua wɔ nɛ́ waa pee ní kpakpahi. Tsa pi wa juami bimɛ pɛ nɛ e sa nɛ waa kɛ mɛ nɛ bɔ, mohu ɔ, e sa nɛ waa kɛ nihi nɛ a wa pe wɔ loo wa wa pe mɛ ɔ hu nɛ bɔ. Mo kai kaa Yehoyada wa pe e huɛ Yoash kulaa. Ke o suɔ nɛ o le ke ji nihi nɛ o kɛ bɔɔ ɔ ji huɛmɛ kpakpahi loo huɛmɛ yayahi ɔ, mo bi o he ke: ‘Anɛ huɛmɛ nɛ ɔmɛ maa ye bua mi konɛ hemi kɛ yemi nɛ i ngɛ ngɛ Yehowa mi ɔ mi nɛ wa lo? Anɛ a woɔ mi he wami kaa ma ye Mawu mlaa amɛ a nɔ lo? Anɛ a tuɔ Yehowa kɛ níhi nɛ a kase ngɛ Baiblo ɔ mi ɔ a he munyu lo? Anɛ a deɔ mi níhi nɛ i suɔ nɛ ma nu pɛ lo, aloo ke i pee nɔ́ ko nɛ dɛ ɔ, a nyɛɔ nɛ a deɔ mi?’ (Abɛ 27:5, 6, 17) Ngɛ anɔkuale mi ɔ, ke o huɛmɛ sume Yehowa a, lɛɛ e sa nɛ o kɛ mɛ nɛ kpa bɔmi. Se ke o ngɛ huɛmɛ nɛ a suɔ Yehowa a, lɛɛ yaa nɔ nɛ o kɛ mɛ nɛ bɔ, ejakaa a maa ye bua mo!—Abɛ 13:20.
Ngmami ɔ Mi Junehi
w06 9/15 19 ¶12
Otihi Nɛ Ngɛ Abɛ Womi ɔ Mi
27:21. Ke a je wa yi ɔ, bɔ nɛ wa peeɔ wa ní ha a maa tsɔɔ nɔ nɛ wa ji. Ke a je wa yi, nɛ bɔ nɛ wa pee wa ní ha ngɛ yi jemi ɔ he ɔ tsɔɔ kaa wa le kaa Yehowa ji nɔ nɛ ye bua wɔ, nɛ wa ha nɛ lɔ ɔ wo wɔ he wami konɛ waa ya nɔ nɛ wa sɔmɔ Yehowa a, lɔ ɔ tsɔɔ kaa wa baa wa he si. Ke a je wa yi nɛ lɔ ɔ ha nɛ wa nu he kaa wa nɔ kuɔ ɔ, lɔ ɔ tsɔɔ kaa wa be he si bami.
AUGUST 25-31
JUETLI NƐ NGƐ MAWU MUNYU Ɔ MI ABƐ 28
Slɔɔto Nɛ Ngɛ Yiwutsotsɛ Kɛ Dalɔ A Kpɛti
w93 5/15 26 ¶2
Anɛ O Kɛ O Tsui Tsuo Fĩ Yehowa Se Lo?
“DALI ngɛ kã kaa jata nɛ he wa.” (Abɛ 28:1) A ngɛ hemi kɛ yemi, nɛ a ngɔɔ a hɛ kɛ fɔɔ Mawu Munyu ɔ nɔ, nɛ ke a kɛ si fɔfɔɛhi nɛ a ngɛ gbeye kpe ngɛ Yehowa sɔmɔmi mi po ɔ, a kɛ kã fĩɔ si.
it-2 1139 ¶3
Nɔ́ Sisi Numi
Nihi nɛ a je a he kɛ je Nɔ nɛ haa nɔ nɔ́ sisi numi ɔ he. Nɔ nɛ e kɛ e he woɔ yayami peemi mi ɔ nɛ́ Mawu kaa nɔ ko nɛ e sa nɛ e susu e blɔ tsɔɔmihi a he ke e ngɛ e yi mi kpɔ mwɔe ngɛ níhi nɛ e maa pee ɔ he. (Hio 34:27) Nɔ ko kaa jã haa nɛ e tsui ɔ sisiɔ lɛ, nɛ e nɛ kaa níhi nɛ e peeɔ ɔ dɛ, nɛ e kɔ we nɔ́ se hulɔ. (La 36:1-4) Ke e ke Mawu sɔmɔlɔ ji lɛ po ɔ, e ngɔɔ adesahi a blɔ tsɔɔmihi kɛ yeɔ kekle blɔ he pe Mawu nɔ́ ɔ, ejakaa lɔ ɔmɛ ji nɔ́ nɛ e bua jɔ he. (Yes 29:13, 14) E jeɔ e nya ngɛ e je mi bami yayami ní peepeehi nɛ́ tsɔɔ kaa e zo tɔ ywia a he, nɛ e naa ní peepee nɛ ɔmɛ kaa “fiɛmi” kɛkɛ, (Abɛ 10:23) nɛ e ní peepee poɔ blɔ mi, e peeɔ yiwutso ní, e susumi hu dɛ kulaa, hluu kaa e susuɔ kaa Mawu nɛ a nɛ́ lɛ ɔ yɔse we ní yayamihi nɛ e ngɛ pee ɔ aloo Mawu nɛ́, kaa nɔ́ nɛ Mawu be he wami nɛ e kɛ maa le ní yayamihi nɛ e ngɛ pee ɔ. (La 94:4-10; Yes 29:15, 16; Yer 10:21) Ngɛ blɔ ko nɔ ɔ, e ngɔ e ní peepee kɛ tsɔɔ kaa “Yehowa ko be,” (La 14:1-3) nɛ ‘pi e kɔmɔ ji Mawu ngɛ e si himi mi.’ Akɛnɛ e ha we nɛ Mawu sisi tomi mlaahi nɛ kudɔ e susumi he je ɔ, e be nyɛe maa ma sane nya si ngɛ blɔ nɛ da nɔ, nɛ e be nyɛe ma ná juɛmi nɛ da ngɛ sane ɔmɛ a he, nɛ e be nyɛe ma susu nɔ́ fɛɛ nɔ́ nɛ kɔɔ sane ɔ he ɔ he saminya konɛ e nyɛ nɛ e mwɔ yi mi kpɔhi nɛ da.—Abɛ 28:5.
it-1 1211 ¶4
Anɔkuale Yemi
Wa ma nyɛ maa hɛɛ wa anɔkuale yemi ɔ mi kɛ gu hemi kɛ yemi nɛ mi wa kɛ hɛ kɛ nɔ fɔmi nɛ wa ma ná ngɛ Yehowa he wami nɛ e kɛ heɔ nɔ yi wami ɔ mi ɔ nɔ, se pi ngɛ wɔ nitsɛmɛ wa he wami nya. (La 25:21) Mawu wo si kaa e maa pee wa “tsɛ̃i” kɛ wa “he piɛ pomi he,” nɛ e maa bu nihi nɛ a nyɛɛɔ ngɛ anɔkuale yemi mi ɔ a blɔ ɔmɛ a he. (Abɛ 2:6-8; 10:29; La 41:12) Akɛnɛ nihi kaa jã suɔ kaa be fɛɛ be ɔ, a maa pee níhi nɛ ma ha nɛ Yehowa nɛ kplɛɛ a nɔ he je ɔ, lɔ ɔ haa nɛ a si himi peeɔ gbugbuugbu, nɛ lɔ ɔ yeɔ bua mɛ nɛ a nyɛɔ suu oti nɛ a kɛ ma a hɛ mi kaa a maa sa Yehowa hɛ mi ɔ he. (La 26:1-3; Abɛ 11:5; 28:18) E ngɛ mi kaa Hiob hao kaa nihi nɛ a peeɔ nɔ́ nɛ da a naa nɔ́ akɛnɛ nimli yayamihi ngɛ nɔ yee ɔ he je, nɛ a gboɔ kaa bɔ nɛ nimli yayamihi hu gboɔ ɔ mohu lɛɛ, se Yehowa ha nɛ wa ná nɔ mi mami kaa e le si himi nɛ nihi nɛ a peeɔ nɔ́ nɛ da a ngɛ mi gblee, nɛ e wo si kaa nihi kaa jã a, a weto ní maa hi si kɛ maa ya daa, a ma ná tue mi jɔmi hwɔɔ se, nɛ a ma ná ní kpakpahi. (Hio 9:20-22; La 37:18, 19, 37; 84:11; Abɛ 28:10) Kaa bɔ nɛ e ji ngɛ Hiob blɔ fa mi ɔ, nɔ́ nɛ haa nɛ nɔ ko he baa se nami nɛ́ e sa bumi ji, anɔkuale nɛ e yeɔ be fɛɛ be ɔ, se pi he lo nya ní nɛ e ngɛ. (Abɛ 19:1; 28:6) E sa nɛ jokuɛwi nɛ a ngɛ fɔlɔ ko kaa jã a bua nɛ jɔ, ejakaa e ji he blɔ nɛ a ná (Abɛ 20:7), nɛ jehanɛ hu e ji nɔ hyɛmi nɔ́ nɛ se be nɛ fɔlɔ ɔ pee kɛ ha mɛ, nɛ a náa biɛ kpakpa nɛ fɔlɔ ɔ ngɛ, kɛ bɔ nɛ nihi buɔ lɛ ha a he se.
Ngmami ɔ Mi Junehi
w01 12/1 11 ¶3
O Ma Nyɛ Maa Yu O He Ngɛ Níhi Nɛ Ma Ha Nɛ Nɔ Ko Nɛ E Gbo Ngɛ Mumi Mi ɔ He
Ke nɔ ko heɔ e he yeɔ tsɔ. Nihi fuu nɛ a ná tsui hiɔ ɔ ji nihi nɛ́ benɛ a ná we tsui hiɔ ɔ lolo ɔ, a he ye ngɛ a mi kaa a ngɛ nɔmlɔ tso mi he wami kpakpa. Behi fuu ɔ, a yɛ dɔkita konɛ a ya hyɛ a nɔmlɔ tso mi ha mɛ ke ji a ngɛ hiɔ ko lo. Nɛ ke nɔ ko wo mɛ he wami kaa a pee jã po ɔ, a kɛ peeɔ mwɔ nɔ́, nɛ a deɔ ke e he hia we. Jã nɔuu kɛ̃ nɛ ni komɛ ma nyɛ ma susu kaa akɛnɛ a kɛ jeha babauu ngɛ Yehowa sɔmɔe he je ɔ, a kɛ nyagba ko be nyɛe maa kpe. A ma nyɛ ma ma a hɛ kɛ fɔ mumi mi níhi nɛ e sa nɛ a pee, loo a mi nɛ e sa nɛ a kpa kɛ hyɛ bɔ nɛ a ngɛ ha ngɛ mumi mi ɔ nɔ, ja benɛ a ná nyagba ko. E sa nɛ wa ha nɛ ga womi nɛ he hia nɛ bɔfo Paulo kɛ ha kɛ kɔ nɔ ko nɛ e ma he e he maa ye tsɔ ɔ he ɔ nɛ hi wa juɛmi mi. E de ke: “Ha nɛ nɔ nɛ e susu kaa e daa si ɔ nɛ e hyɛ nɛ hi konɛ e ko nɔ si.” Nɔ́ nɛ ma nyɛ maa ye bua wɔ konɛ waa pee ní leli ji kaa wa ma yɔse kaa wa yi mluku, nɛ jehanɛ hu waa kɛ mumi mi níhi maa kpa wa mi be fɛɛ be.—1 Korinto Bi 10:12; Abɛ 28:14.