Sane Bimihi Nɛ Je Ní Kaneli A Ngɔ
Mɛni be nɛ fiɛɛmi ní tsumi ɔ maa ba nyagbe?
Yesu de ke: “Sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ ngɛ zugba a nɔ tsuo nɛ a kɛ maa ye je ma amɛ tsuo odase, nɛ lɔ ɔ se loko nyagbe ɔ maa ba.” (Mat. 24:14) Hela munyungu nɛ a tsɔɔ sisi ke “nyagbe” ngɛ ngmami nɛ ɔ kɛ kuku 6 kɛ 13 ɔ mi ɔ ji, teʹlos. Enɛ ɔ tsɔɔ Satan je yaya nɛ ɔ hɛ mi kpatami ngɛ Harmagedon. (Kpoj. 16:14, 16) Enɛ ɔ tsɔɔ kaa wa maa ya nɔ maa fiɛɛ sane kpakpa a kɛ ya si be nɛ Harmagedon maa je sisi. Enɛ ɔ ji tsakemi ehe nɛ wa pee ngɛ sisi numi nɛ wa ná be ko nɛ be ɔ he.
Be ko nɛ be ɔ, wa nu sisi kaa ke amanehlu ngua a je sisi, nɛ ji kaa a kpata Babilon Ngua a hɛ mi ɔ, wa ma kpa sane kpakpa a fiɛɛmi. (Kpoj. 17:3, 5, 15, 16) Jinɛ wa he ye kaa ke amanehlu ngua a je sisi ɔ, Yehowa be nihi blɔ ngmɛe hu nɛ a ba nu sane kpakpa a konɛ a pee tsakemi. (Yes. 61:2) Jehanɛ hu ɔ, wa nu sisi kaa e ma bi nɛ nihi nɛ a maa baa a yi ngɛ amanehlu ngua a mi ɔ nɛ a ngɔ a ní peepee kɛ tsɔɔ kaa a ji anɔkualetsɛmɛ loko amanehlu ngua a nɛ je sisi po. Wa ngɔ nimli nɛ ɔmɛ kɛ to Yudabi nɛ a ná yi baami benɛ a kpata Yerusalem ma a hɛ mi ngɛ jeha 607 loko a fɔ Kristo ɔ he. A kadi Yudabi nɛ a ná yi baami ɔ a ti nɔ fɛɛ nɔ kɛ sɛ hlami momo, ejakaa a kɛ anɔkuale yemi sɔmɔ Yehowa, nɛ a hiɔ yiwutso ní peepee hulɔ. (Eze. 5:11; 9:4) Se nɔ́ he tomi nɔ́ nɛ ɔ kɛ nɔ́ nɛ Yesu de ngɛ Mateo 24:14 ɔ kɔ we kulaa. Nɔ́ nɛ Yesu de ɔ tsɔɔ kaa ni komɛ ma nyɛ ma ná he blɔ kɛ kase sane kpakpa a hluu kɛ ya si be nɛ Harmagedon maa je sisi.
Akɛnɛ wa ba nu Mateo 24:14 ɔ sisi saminya he je ɔ, e he maa hia nɛ waa pee tsakemi ngɛ bɔ nɛ wa nu Kpo Jemi 16:21 ɔ sisi ha a he. Ngmami nɛ ɔ tu sɛ gbi ko nɛ e ngɛ kaa gbiɛ ngo ngu ɔ he munyu. Níhi a mi hlami kpahi nɛ wa pee ɔ ha nɛ wa na kaa ngmami enyɔ nɛ ɔmɛ kɛ a sibi ngɛ tsakpa. Ngɛ mɛni blɔ nɔ? Bɔ nɛ Baiblo ɔ tsɔɔ kaa nihi peeɔ a ní ha ngɛ Matsɛ Yemi sɛ gbi ɔ he ɔ haa nɛ wa naa heto ɔ. Bɔfo Paulo tsɔɔ kaa “ni nɛmɛ nɛ a ngɛ a yi wami hee” ɔ naa sɛ gbi ɔ kaa e ji sane kpakpa, nɛ ji “wami he via.” Se Mawu he nyɛli ɔmɛ lɛɛ, a naa sɛ gbi ɔ kaa e ji sane yaya, nɛ ji “gbenɔ he fu.” (2 Kor. 2:15, 16) Nimli nɛ ɔmɛ sume Matsɛ Yemi ɔ he sɛ gbi ɔ, ejakaa e kpaa a he bo. E haa nɛ e peeɔ heii kaa je ɔ nɛ a bua jɔ he ɔ ji je yaya nɛ Satan lɛ ngɛ nɔ yee, nɛ e be kɛe nɛ a ma kpata je nɛ ɔ hɛ mi.—Yoh. 7:7; 1 Yoh. 2:17; 5:19.
Mo kadi hu kaa gbiɛ ngo ngu ɔ nɛ a tu he munyu ngɛ Kpo Jemi 16:21 ɔ ‘nya maa wa wawɛɛ.’ Enɛ ɔ ma nyɛ maa tsɔɔ kaa ngɛ amanehlu ngua a mi ɔ, wa ma tsu fiɛɛmi ní tsumi ɔ wawɛɛ nɛ wa be munyuhi a he bo woe kulaa. Enɛ ɔ ma ha nɛ nihi nɛ a ba le Yehowa biɛ ɔ saminya pe be ko nɛ be ɔ. (Eze. 39:7) Ngɛ jamɛ a be ɔ mi ɔ, akɛnɛ a kpata Babilon Ngua a hɛ mi he je ɔ, anɛ ni komɛ maa kplɛɛ sɛ gbi ɔ nɔ kaa nɔ́ ko nɛ ngɛ via jee liliili lo? E ma nyɛ maa ba jã. Eko ɔ, nihi nɛ a maa na Babilon Ngua a hɛ mi kpatami ɔ a kpɛti ni komɛ ma kai kaa jehahi babauu nɛ be ɔ, Yehowa Odasefo ɔmɛ de mɛ kaa nɔ́ nɛ ɔ maa ya nɔ.
Enɛ ɔ ngɛ kaa nɔ́ nɛ ya nɔ ngɛ blema Egipt benɛ Haomi Nyɔngma a ba a. Benɛ Yehowa “kojo Egipt mawu ɔmɛ tsuo” se ɔ, “futufututsɛmɛ babauu” nɛ tsa pi Israelbi ji mɛ ɔ piɛɛ Israelbi ɔmɛ a he kɛ je. (2 Mose 12:12, 37, 38) Eko ɔ, nibwɔ nɛ ɔmɛ ba piɛɛ Mawu we bi a he benɛ a na kaa Haomi Nyɔngma a nɛ Mose tu he munyu ɔ tsuo ba mi pɛpɛɛpɛ ɔ.
Nihi tsuo nɛ a maa kpale kɛ ba Yehowa ngɔ ngɛ Babilon Ngua a hɛ mi kpatami se ɔ, ma ná he blɔ kɛ fĩ Kristo nyɛmimɛ ɔmɛ nɛ a maa hi zugba a nɔ loloolo ɔ a se. (Mat. 25:34-36, 40) Se kɛ̃ ɔ, nihi nɛ a maa kojo mɛ kaa apletsihi loo jijɔhi ɔ a kojomi ɔ maa ba nyagbe loko Harmagedon maa je sisi. Kristofohi nɛ a pɔ mɛ nu ɔ a ti ni nɛmɛ nɛ a piɛ ngɛ zugba a nɔ ɔ a nine maa su a hiɔwo ɔ nɔ ngɛ hiɔwe.
Sisi numi ehe nɛ ɔ nɛ wa ná a ha nɛ wa na kaa Yehowa suɔmi ɔ kɛ e mɔbɔ nami ɔ se be kulaa. Niinɛ, “e sume nɛ a kpata nɔ ko nɔ ko hɛ mi, mohu ɔ, e suɔ kaa nihi tsuo nɛ a tsake a tsui.”—2 Pet. 3:9.