“Nihi Tsuo Nɛ A Ngɛ Tsui Kpakpa” a Maa Bu Sane Kpakpa a Tue

1. Kɛ ni komɛ peeɔ a ní ngɛ sane kpakpa a he ha kɛɛ? (Ní Tsumi 13:​47, 48; 16:​14, 15)

NIHI fuu nɛ a hi si ngɛ kaseli ɔmɛ a be ɔ mi ɔ a bua jɔ benɛ a ba kase Kristo he ní ɔ, nɛ a suɔ nɛ a ba pee Kristofohi oya nɔuu. (Kane Ní Tsumi 13:​47, 48; 16:​14, 15.) Mwɔnɛ ɔ hu ɔ, ke nihi ba kase sane kpakpa a pɛ ɔ, a bua jɔɔ wawɛɛ. Be komɛ po ɔ, nihi nɛ sisije ɔ, a bua jɔɛ sɛ gbi ɔ he ɔ peeɔ tsakemi nɛ a kplɛɛɔ sɛ gbi ɔ nɔ. Mɛni e sa kaa waa pee ke wa na ‘tsui kpakpatsɛ’ ko ngɛ fiɛɛmi mi?

2. Ngɛ mɛni blɔ nɔ nɛ wa fiɛɛmi ní tsumi ɔ ngɛ kaa ngmɔ humi?

² Wa ma nyɛ maa ngɔ wa fiɛɛmi ní tsumi ɔ kɛ to ngmɔ humi he. Ke ngmɔ ní ɔ ekomɛ wa mla a, ngmɔ hulɔ ɔ kpaa oya nɔuu. Se kɛ̃ ɔ, e yaa nɔ nɛ e pueɔ ngmɔ ní nɛ piɛ ɔ nɔ nyu konɛ lɔ ɔmɛ hu nɛ a wa. Jã kɛ̃ nɛ e ji ngɛ wa fiɛɛmi ní tsumi ɔ blɔ fa mi. Ke wa na nɔ ko nɛ e bua jɔ wa sɛ gbi ɔ he ɔ, wa yeɔ buaa lɛ oya nɔuu konɛ e ba pee Kristo kaselɔ. Se wa bɔɔ mɔde kaa wa maa ye bua nihi nɛ a bua jɔɛ sɛ gbi ɔ he lolo ɔ konɛ a na kaa se nami ngɛ he kaa a maa kase Mawu he ní. (Yoh. 4:​35, 36) Nɔ́ se kɔmi maa ye bua wɔ konɛ waa na blɔ nɛ hi pe kulaa nɛ wa ma nyɛ maa gu nɔ kɛ ye bua nihi nɛ wa fiɛɛɔ kɛ haa mɛ ɔ. Enɛ ɔ he ɔ, ngɛ ní kasemi nɛ ɔ mi ɔ, wa maa na nɔ́ nɛ wa ma nyɛ maa pee kɛ ye bua nɔ ko nɛ waa kɛ lɛ kpe kekleekle be ngɛ fiɛɛmi mi nɛ e bua jɔ sɛ gbi ɔ he ɔ. Jehanɛ hu ɔ, wa ma susu nɔ́ nɛ wa ma nyɛ maa pee kɛ ye bua nihi kaa jã a he, konɛ a ya a hɛ mi ngɛ Yehowa sɔmɔmi mi.

KE NIHI A BUA JƆ SANE KPAKPA A HE

3. Ke wa na nɔ ko nɛ e bua jɔ sɛ gbi ɔ he ɔ, mɛni e sa kaa waa pee? (1 Korinto Bi 9:26)

³ Ke wa na nihi nɛ a bua jɔ wa sɛ gbi ɔ he ɔ, wa suɔ nɛ waa ye bua mɛ oya nɔuu konɛ a ba nyɛɛ blɔ nɛ e kɛ nɔ yaa neneene wami mi ɔ nɔ. Ke waa kɛ nɔ ko kaa jã kpe kekleekle be ɔ, e sa nɛ waa kɛ lɛ nɛ to blɔ nya kɛ ha Baiblo ɔ kasemi oya nɔuu, nɛ waa fɔ lɛ nine kɛ ba asafo mi kpe.—Kane 1 Korinto Bi 9:26.

4. Moo tu níhi a si kpami ko nɛ kɔɔ nɔ ko nɛ e bua jɔ he kaa e maa kase Baiblo ɔ oya nɔuu ɔ he ɔ he munyu.

⁴ Moo to blɔ nya kɛ ha Baiblo ɔ kasemi. Be komɛ ɔ, nihi nɛ waa kɛ mɛ kpeɔ ngɛ fiɛɛmi mi ɔ a kpɛti ni komɛ suɔ kaa a maa kase Baiblo ɔ oya nɔuu. Kaa nɔ hyɛmi nɔ́ ɔ, ngɛ So ko nɔ ɔ, yo ko nɛ e ngɛ Canada a ya atsɛ̃se ko he nɛ e ya ngɔ Ná Bua Jɔmi Kɛ Ya Neneene! womiyo ɔ eko. Nyɛmiyo ɔ nɛ e daa si ngɛ atsɛ̃se ɔ he ɔ de lɛ kaa waa kɛ nihi kaseɔ womiyo nɛ ɔ nɛ wa he we nɔ́ ko. Yo ɔ bua jɔ he, enɛ ɔ he ɔ, e ha nyɛmiyo ɔ e fon nɔma. Ngɛ jamɛ a ligbi ɔ mi nɔuu ɔ, yo ɔ mane nyɛmiyo ɔ sɛ gbi, nɛ e bi lɛ kaa mɛni be lɛ a ma nyɛ maa kase Baiblo ɔ? Benɛ nyɛmiyo ɔ de yo ɔ kaa e maa ba e we ɔ mi ngɛ otsi ɔ nyagbe ɔ, yo ɔ bi nyɛmiyo ɔ ke: “Nɛ hwɔɔ nɛɛ? Ma hi we ɔ mi o.” E nɔ jena Soha a, a je Baiblo ɔ kasemi sisi. Yo ɔ ya asafo mi kpe kekleekle be ngɛ jamɛ a otsi ɔ nyagbe, nɛ e ya e hɛ mi mlamlaamla.

5. Mɛni wa ma nyɛ maa pee kɛ tsɔɔ kaa wa kɔɔ nɔ́ se ke waa kɛ nɔ ko ngɛ blɔ nya toe kɛ ha Baiblo ɔ kasemi? (Hyɛ foni ɔmɛ hulɔ.)

⁵ Ngɛ anɔkuale mi ɔ, pi nihi tsuo nɛ wa fiɛɛɔ kɛ haa mɛ ɔ nɛ a maa pee a ní kaa yo ɔ nɛ wa tu e he munyu kɛ sɛ hlami ɔ. Ni komɛ ngɛ nɛ e ma he be loko a bua maa jɔ sɛ gbi ɔ he. Eko ɔ, e ma bi nɛ waa kɛ mɛ nɛ sɛɛ nɔ́ ko nɛ a bua jɔ he ɔ he ní kekle. Ke wa ya nɔ nɛ wa je su kpakpahi kpo, nɛ wa peeɔ níhi nɛ tsɔɔ kaa wa susuɔ nɔ he ɔ, eko ɔ, waa kɛ mɛ ma nyɛ maa je Baiblo ɔ kasemi sisi ngɛ be kpiti mi. Ke wa ngɛ blɔ nya toe kɛ ha Baiblo ɔ kasemi ɔ, mɛni wa ma nyɛ ma de? Nyɛ ha nɛ wa susu nɔ́ nɛ nyɛmimɛ komɛ nɛ e yi ha mɛ kaa a kɛ nihi maa je Baiblo ɔ kasemi sisi ɔ pee nɛ e nu tso wawɛɛ ɔ he.

6. Mɛni wa ma nyɛ ma de nihi konɛ a na kaa Baiblo ɔ nɛ a maa kase ɔ maa ye bua mɛ wawɛɛ?

⁶ Fiɛɛli kɛ blɔ gbali komɛ tsɔɔ kaa ngɛ he komɛ ɔ, ke o ngɛ hlae nɛ o kɛ nɔ ko nɛ to Baiblo ɔ kasemi he blɔ nya a, e maa hi wawɛɛ kaa o kɛ munyu komɛ kaa “kase,” “Baiblo mi ní kasemi” loo “tsɔɔ mo” ɔ be ní tsue kulaa. Mohu ɔ, e maa hi wawɛɛ kaa o kɛ munyu komɛ kaa “ní sɛɛmi,” “níhi a he susumi,” loo “o maa le ní komɛ ngɛ Baiblo ɔ mi” ɔ ma tsu ní. Bɔ nɛ pee nɛ o nyɛ nɛ o ye bua nɔ ko nɛ e suɔ kaa nyɛ tsa nyɛ ní sɛɛmi ɔ nɔ pee se ɔ, o ma nyɛ ma de ke, “Nyakpɛ sane ji kaa, sanehi fuu nɛ wa biɔ ɔ a heto ngɛ Baiblo ɔ mi.” Aloo “Baiblo ɔ pi jami womi ko kɛkɛ, mohu ɔ, e ji womi ko nɛ ma nyɛ maa ye bua wɔ ngɛ blɔhi fuu a nɔ.” O ma nyɛ ma de hu ke: “O ma nyɛ maa ngɔ hɛngmɛfia bɔɔ ko pɛ kɛ kase nɔ́ ko nɛ maa ye bua mo ngɛ o si himi mi.” E he hia we nɛ o kɛ munyu komɛ kaa “blɔ nya tomi” loo “daa otsi” nɛ tsu ní konɛ nɔ ɔ nɛ e ko nu he kaa e be nyɛe, ejakaa o ma e nya gbami.

7. Mɛni be nɛ ni komɛ yɔse kaa a na anɔkuale ɔ? (1 Korinto Bi 14:​23-25)

⁷ Moo fɔ mɛ nine kɛ ba asafo mi kpe. E ma nyɛ maa ba kaa ngɛ bɔfo Paulo be ɔ mi ɔ, ni komɛ yɔse kaa a na anɔkuale ɔ benɛ a ya Kristofohi a kpe kekleekle be ɔ. (Kane 1 Korinto Bi 14:​23-25.) Nɔ́ ko kaa jã pɔɔ bami mwɔnɛ ɔ hulɔ. Nihi fuu yaa a hɛ mi mlamlaamla ke a bɔni wa kpe ɔmɛ bami. Mɛni be nɛ e sa nɛ waa fɔ nihi nine kɛ ba asafo mi kpe sisi? Ngɛ Ná Bua Jɔmi Kɛ Ya Neneene! womi ɔ ní kasemi 10 mi ɔ, a tu nihi nɛ wa maa fɔ mɛ nine kɛ ba asafo mi kpe ɔ he munyu. Se e he hia we nɛ o mlɛ kɛ ya si be nɛ nyɛ maa su ní kasemi nɛ ɔ nɔ loko ji o fɔ nɔ ko nine. Ke o kɛ nɔ ko sɛɛ ní kekleekle be po ɔ, o ma nyɛ maa fɔ lɛ nine kɛ ba asafo mi kpe nɛ wa peeɔ Hɔ, loo Hɔgba a. Eko ɔ, o ma nyɛ ma de lɛ magbɛ nɔ munyu nɛ a maa tu ɔ yi, aloo o ma nyɛ ma de lɛ oti ko nɛ ngɛ Hwɔɔmi Mɔ ɔ Mi Ní Kasemi ɔ mi.

8. Mɛni wa ma nyɛ ma de nihi ke wa fɔ mɛ nine kaa a ba asafo mi kpe? (Yesaya 54:13)

⁸ Ke o ngɛ nɔ ko nɛ e bua jɔ wa sɛ gbi ɔ he ɔ nine fɔe kɛ ba asafo mi kpe ɔ, moo tsɔɔ lɛ slɔɔto nɛ ngɛ wa kpe ɔmɛ kɛ níhi nɛ yaa nɔ ngɛ sɔlemi ɔmɛ a mi ɔ a kpɛti. Benɛ Baiblo kaselɔ ko ba asafo mi kpe kekleekle be nɛ e na bɔ nɛ wa kaseɔ Hwɔɔmi Mɔ ɔ ha a, e bi e Baiblo tsɔɔlɔ ɔ ke, “Anɛ nɔ nɛ ngɛ ní kasemi ɔ nɔ hyɛe ɔ le nɔ fɛɛ nɔ biɛ lo?” Nyɛmiyo ɔ ha nɛ Baiblo kaselɔ ɔ le kaa wɔ tsuo wa ngɛ mɔde bɔe kaa wa maa le nɔ fɛɛ nɔ nɛ e ngɛ asafo ɔ mi ɔ biɛ kaa bɔ nɛ wa le wa wekuli a biɛ ɔ. Baiblo kaselɔ ɔ tsɔɔ kaa enɛ ɔ ngɛ ekpa kulaa ngɛ e jami ɔ he. Jehanɛ hu ɔ, wa ma nyɛ maa tsɔɔ nɔ nɛ wa fɔ lɛ nine ɔ ní kpahi nɛ haa nɛ wa kpe ɔmɛ ngɛ slɔɔto ɔ. (Kane Yesaya 54:13.) Wa kpeɔ konɛ wa ja Yehowa nɛ waa kase e he ní, nɛ waa wo wa sibi he wami. (Heb. 2:12; 10:​24, 25) Enɛ ɔ he ɔ, a to wa kpe ɔmɛ a he blɔ nya konɛ e ye bua wɔ nɛ waa kase ní, nɛ wa ngɔɛ adesahi a kusumi kɛ piɛɛ we he. (1 Kor. 14:40) Jehanɛ hu ɔ, wa Matsɛ Yemi Asa amɛ ngɛ kpokploo, nɛ bɔ nɛ a to he blɔ nya ha a ha nɛ e kɛ ní kasemi yi. Akɛnɛ waa kɛ wa he wui ma kudɔmi sanehi a mi he je ɔ, wa pee we nɔ́ ko nɛ maa tsɔɔ kaa wa fĩ ma kudɔmi kuu ko se, nɛ wa sɛ̃ nya ngɛ níhi a he hulɔ. E maa hi wawɛɛ kaa wa ma je video nɛ ji Mɛni A Peeɔ Ngɛ Matsɛ Yemi Asahi A Nɔ? ɔ kɛ tsɔɔ nɔ ɔ kekle. Lɔ ɔ maa ye bua lɛ nɛ e maa le nɔ́ nɛ yaa nɔ ngɛ Matsɛ Yemi Asa a nɔ.

9-10. Ke wa ngɛ nɔ ko nine fɔe kɛ ba asafo mi kpe ɔ, mɛni wa ma nyɛ ma de lɛ konɛ e ko ye gbeye kaa e maa ba? (Hyɛ foni ɔ hulɔ.)

⁹ Ni komɛ gblaa a nane si kaa a maa ya wa kpe ɔmɛ ejakaa a yeɔ gbeye kaa ke a ba a, a maa nyɛ a nɔ kaa a ba pee Yehowa Odasefohi. Ke o fɔ nɔ ko nine kaa e ba asafo mi kpe ɔ, ha nɛ e ná nɔ mi mami kaa e ma nyɛ ma ba bu tue kɛkɛ, nɛ e kɛ e he be kpe ɔ mi woe. Fɔli kɛ a bimɛ nɛ a wɛ ɔ ma nyɛ maa ba faa. Ngɛ wa kpe ɔmɛ a sisi ɔ, jokuɛwi kɛ nikɔtɔmahi tsuo kaseɔ nɔ́ kake. Fɔli kɛ a bimɛ ɔmɛ hiɔ si ngɛ he kake kɛ kaseɔ ní ɔ. Enɛ ɔ haa nɛ fɔli ɔmɛ a hɛ hii a bimɛ ɔmɛ a he be fɛɛ be, nɛ a leɔ nɔ́ nɛ a bimɛ ɔmɛ kaseɔ. (5 Mose 31:12) Wa sɛ̃ afɔle, nɛ wa nyɛ we nihi a nɔ kaa a wo sika ko ngɛ wa kpe ɔmɛ a sisi. Mohu ɔ, waa kɛ Yesu fami nɛ ji: “Nyɛ ná lɛ yaka gu, nyɛɛ ngɔ kɛ ha yaka gu” ɔ tsuɔ ní. (Mat. 10:8) Jehanɛ hu ɔ, o ma nyɛ ma de nɔ ɔ kaa e hia we nɛ e ná tadehi nɛ a he jua wa loko e ba asafo mi kpe, ejakaa Mawu ngɔɛ e juɛmi kɛ mɛ wa he dlami nɔ, mohu ɔ, wa tsui mi lɛ e hyɛɔ.—1 Sam. 16:7.

¹⁰ Ke o fɔ nɔ ko nine kɛ ba asafo mi kpe ɔ, bɔɔ mɔde nɛ o nya e he wawɛɛ, nɛ o ngɔ lɛ kɛ nga asafo mi nikɔtɔma amɛ kɛ nyɛmimɛ kpahi. Ke nɔ ɔ na kaa nyɛmimɛ ɔmɛ bua jɔ e he nɛ a susuɔ e he ɔ, eko ɔ, lɔ ɔ ma ha nɛ e maa kpale kɛ ba asafo mi kpe ekohu. Ke asafo mi kpe ɔ ngɛ nɔ yae nɛ o na kaa nɔ ɔ be Baiblo ɔ, ha nɛ e hyɛ o nɔ́ ɔ nɔ, nɛ o ye bua lɛ nɛ e nyɛɛ munyu tulɔ ɔ se, nɛ e na bɔ nɛ wa kaseɔ ní ɔ ha.

KE O KƐ NƆ KO JE BAIBLO MI NÍ KASEMI SISI

11. Ke o kɛ nɔ ko to Baiblo mi ní kasemi he blɔ nya a, mɛni o ma nyɛ maa pee kɛ tsɔɔ kaa o ngɛ bumi kɛ ha lɛ?

¹¹ Mɛni otihi lɛ e sa kaa e hi wa juɛmi mi ke waa kɛ nɔ ko bɔni Baiblo ɔ kasemi? Moo ye be nɛ nyɛ to ɔ nɔ kɛ tsɔɔ kaa o ngɛ bumi kɛ ha Baiblo kaselɔ ɔ. Kaa nɔ hyɛmi nɔ́ ɔ, ke nyɛ to blɔ nya kaa nyɛ maa kase ní ngɛ be pɔtɛɛ ko nɔ ɔ, moo ye nɔ, ke nihi ngɛ o kpɔ ɔ mi ɔ yi be nɔ po. Jehanɛ hu ɔ, e maa hi wawɛɛ kaa kekleekle ní kasemi ɔ maa pee kpiti. Fiɛɛli komɛ nɛ a ngɛ níhi a si kpami ɔ tsɔɔ kaa ke nɔ ɔ suɔ nɛ e kase níhi fuu po ɔ, o ma nyɛ maa pee lɛ kpiti. Koo tu munyu fuu, mohu ɔ, moo ngmɛ Baiblo kaselɔ ɔ blɔ nɛ e tsɔɔ e susumi, kɛ bɔ nɛ e ngɛ he nue ha.—Abɛ 10:19.

12. Mɛni oti lɛ sa nɛ wa kɛ ma wa hɛ mi ke waa kɛ nɔ ko je Baiblo ɔ kasemi sisi?

¹² Ke waa kɛ nɔ ko bɔni Baiblo ɔ kasemi pɛ ɔ, oti nɛ wa suɔ nɛ waa su he ji kaa wa maa ye bua nɔ ɔ konɛ e ba le Yehowa kɛ Yesu, nɛ e ná suɔmi kɛ ha mɛ. Enɛ ɔ he ɔ, wa suɔ nɛ waa gbla nɔ ɔ juɛmi kɛ ya Baiblo ɔ nɔ mohu pe wɔ nitsɛmɛ wa nɔ. (Níts. 10:​25, 26) Bɔfo Paulo pee enɛ ɔ he nɔ hyɛmi nɔ́. Akɛnɛ Yehowa tsɔ Yesu Kristo konɛ e ba ye bua wɔ nɛ waa le Yehowa nɛ waa suɔ lɛ he je ɔ, behi fuu ɔ, ke Paulo ngɛ nihi ní tsɔɔe ɔ, e gblaa ni ɔmɛ a juɛmi kɛ yaa Yesu nɔ. (1 Kor. 2:​1, 2) Jehanɛ hu ɔ, Paulo ha nɛ e pee heii kaa e he hia nɛ a ye bua kaseli ehehi konɛ a ná su kpakpahi. Wa ma nyɛ maa ngɔ su kpakpa nɛ ɔmɛ kɛ to sika tsu, sika hiɔ kɛ tɛhi nɛ a he jua wa a he. (1 Kor. 3:​11-15) Su kpakpa nɛ ɔmɛ ekomɛ ji, hemi kɛ yemi nɛ wa ma ná, juɛmi nɛ waa kɛ ma tsu ní, nɔ́ se kɔmi kɛ Yehowa gbeye yemi. (La 19:​9, 10; Abɛ 3:​13-15; 1 Pet. 1:7) Nyɛ ha nɛ waa kase bɔ nɛ Paulo tsɔɔ ní ha a, nɛ waa ye bua nihi nɛ waa kɛ mɛ kaseɔ Baiblo ɔ nɛ a ná hemi kɛ yemi nɛ mi wa ngɛ wa hiɔwe Tsɛ nɛ e ngɛ suɔmi ɔ mi, konɛ huɛ bɔmi kpakpa nɛ hi a kɛ lɛ a kpɛti.—2 Kor. 1:24.

13. Ke wa ngɛ Baiblo kaselɔ ko ye buae ɔ, mɛni wa ma nyɛ maa pee kɛ tsɔɔ kaa wa toɔ wa tsui si nɛ wa pee we kpɛii? (2 Korinto Bi 10:​4, 5) (Hyɛ foni ɔ hulɔ.)

¹³ Ke o ngɛ nihi ní tsɔɔe ɔ, moo kase Yesu nɔ hyɛmi nɔ́ ɔ. Moo to o tsui si nɛ o ko pee kpɛii. Ko bi sanehi nɛ ma ha nɛ zo nɛ gbe Baiblo kaselɔ ɔ. Ke e he wa ha Baiblo kaselɔ ɔ kaa e maa nu oti ko sisi ɔ, nyɛ ma nyɛ ma tsa ní kasemi ɔ nɔ konɛ pee se ɔ, nyɛ ba susu jamɛ a oti ɔ he ekohu. Koo nyɛ e nɔ kaa e kplɛɛ tsɔɔmi ko nɔ, mohu ɔ, ha lɛ be nɛ e kɛ susu he konɛ lɛ nitsɛ e pee tsakemi. (Yoh. 16:12; Kol. 2:​6, 7) Baiblo ɔ ngɔ lakpa tsɔɔmihi kɛ to “níhi nɛ a du si wawɛɛ,” nɛ e sa nɛ wa ‘plɛ a hɛ mi kɛ bu si’ ɔ a he. (Kane 2 Korinto Bi 10:​4, 5.) E he ma nyɛ maa wa kɛ ha Baiblo kaselɔ ko kaa e maa ngmɛɛ nɔ́ ko nɛ e he ye jeha babauu ɔ he. Enɛ ɔ he ɔ, e sa nɛ waa ye bua Baiblo kaselɔ ɔ nɛ huɛ bɔmi kpakpa nɛ hi e kɛ Yehowa a kpɛti kekle. Kɛkɛ ɔ, lɔ ɔ maa ye bua lɛ nɛ e ngmɛɛ hemi kɛ yemi nɛ e hɛɛ nɛ e du si ɔ he.

KE NI HEHI BA WA KPE ƆMƐ

14. Kɛ e sa kaa waa kɛ ni hehi nɛ a baa wa kpe ɔmɛ ɔ nɛ hi si ha kɛɛ?

¹⁴ Yehowa suɔ nɛ waa kɛ nihi tsuo nɛ e slo a kusumi, he blɔ nɛ a ngɛ loo wɛtso nɛ a je mi ɔ nɛ hi si saminya. (Yak. 2:​1-4, 9) Ke jã a, mɛni blɔ nɔ wa ma nyɛ maa gu kɛ je suɔmi kpo kɛ tsɔɔ ni hehi nɛ a baa wa kpe ɔmɛ ɔ?

15-16. Mɛni wa ma nyɛ maa pee kɛ ye bua ni hehi nɛ a baa wa kpe ɔmɛ ɔ konɛ a hɛ nɛ mwɔ si?

¹⁵ Eko ɔ, ni komɛ maa ba wa kpe ɔmɛ akɛnɛ a suɔ nɛ a ba hyɛ nɔ́ nɛ yaa nɔ ngɛ lejɛ ɔ he je, loo eko ɔ, akɛnɛ nɔ ko nɛ e ngɛ he kpa a wo mɛ he wami kaa a ba a he je. Enɛ ɔ he ɔ, ke o na kaa nɔ he ko ba asafo mi kpe ɔ, moo su e he nɛ o kɛ lɛ nɛ sɛɛ ní. Mo nya e he, nɛ koo pee nɔ́ ko nɛ ma ha nɛ zo nɛ gbe lɛ. Ha nɛ e ba hi o kasa nya nɛ e hyɛ o Baiblo ɔ kɛ womi nɛ a ngɛ kasee ɔ nɔ, loo o ha nɛ e nine nɛ su eko nɔ. Jehanɛ hu ɔ, mo susu ní kpahi nɛ o ma nyɛ maa pee konɛ nɔ ɔ hɛ nɛ mwɔ si ɔ he. Nyumu ko nɛ e ba Matsɛ Yemi Asa a nɔ ɔ de nyɛminyumu ɔ nɛ e nya e he ɔ kaa e pee lɛ zo kaa e dla we e he kaa ni kpa amɛ. Nyɛminyumu ɔ ye bua lɛ nɛ e tsui nɔ e mi, nɛ e ha nɛ e le kaa slɔɔto be Yehowa Odasefo ɔmɛ kɛ ni kpahi a kpɛti. Pee se ɔ, nyumu ɔ ya e hɛ mi, nɛ e ha nɛ a baptisi lɛ, sɛ kɛ̃ ɔ, e hɛ ji bɔ nɛ nyɛminyumu ɔ ye bua lɛ ha a nɔ gblee. Oti ɔ ji, ke waa kɛ ni hehi nɛ a ba asafo mi kpe ɔ ngɛ ní sɛɛe ɔ, e sa nɛ waa hyɛ saminya nɛ wa ko bi mɛ sanehi nɛ maa gbe mɛ zo, loo e ma ha nɛ a nu he kaa wa ngɛ a nya mi kolie.—1 Pet. 4:15.

¹⁶ Jehanɛ hu ɔ, e sɛ nɛ waa pee ní komɛ nɛ ma ha nɛ ni hehi nɛ a baa asafo mi kpe ɔ nɛ a hao. Kaa nɔ hyɛmi nɔ́ ɔ, ke wa ngɛ ní sɛɛe loo wa ngɛ sane heto hae ɔ, e sa nɛ wa je bumi kpo. Jehanɛ hu ɔ, ke wa ngɛ assignment ko nɛ kɔɔ nihi nɛ tsa pi Odasefohi ji mɛ loo níhi nɛ a heɔ yeɔ ɔ he ní tsue ɔ, e sa nɛ wa je bumi kpo. Wa sume nɛ wa de nɔ́ ko nɛ maa tɔ̃tɔ̃ ni hehi a nane, loo nɛ ma ha nɛ a nu he kaa wa jɛ mɛ. (Tito 2:8; 3:2) Kaa nɔ hyɛmi nɔ́ ɔ, wa sume nɛ waa gbe níhi nɛ a heɔ yeɔ ɔ he guɛ kɛ tsɔɔ kaa wa bui mɛ. (2 Kor. 6:3) E he hia nɛ nyɛmimɛ nyumuhi nɛ a tuɔ magbɛ nɔ munyu ɔ nɛ a hyɛ saminya ngɛ enɛ ɔ he. Jehanɛ hu ɔ, ke e ngɛ a juɛmi mi kaa ni hehi baa wa kpe ɔmɛ ɔ, lɔ ɔ maa ye bua mɛ konɛ a tsɔɔ munyuhi loo munyunguhi nɛ ni hehi be sisi nue ɔ mi.

17. Ke wa na nɔ ko ngɛ fiɛɛmi mi nɛ́ e ngɛ “tsui kpakpa” a, mɛni wa suɔ nɛ waa pee?

¹⁷ Daa je nɛ maa na a, e sa nɛ waa kɛ hɛdɔ nɛ tsu fiɛɛmi ní tsumi ɔ, nɛ waa ya nɔ nɛ wa hla nihi tsuo nɛ a ngɛ “tsui kpakpa nɛ ma ha nɛ a ná neneene wami ɔ” a se blɔ. (Níts. 13:48) Ke wa na nihi kaa jã a, e sɛ nɛ waa gbla wa nane si kaa waa kɛ mɛ maa to blɔ nya kɛ ha Baiblo ɔ kasemi, nɛ waa fɔ mɛ nine kɛ ba asafo mi kpe. Ke wa pee jã a, wa ma nyɛ maa ye bua mɛ konɛ a ba nyɛɛ ‘blɔ nɛ kɛ nɔ yaa wami mi ɔ’ nɔ.—Mat. 7:14.