NƆ́ NƐ A MAA KASE

Wa ma susu nɔ́ he je nɛ nihi fuu deɔ ke Yehowa Odasefohi na anɔkuale ɔ, kɛ nɔ́ he je nɛ wɔ nitsɛmɛ hu wa ngɛ nɔ mi mami kaa anɔkuale ɔ ji nɛ ɔ he ngɛ munyu nɛ ɔ mi.

Wɔ tsuo wa naa amanehlu, ejakaa wa ngɛ Satan je ɔ mi. Be komɛ ɔ, Satan tuaa wɔ tɛ̃ɛ, nɛ be komɛ hu e tuaa wɔ ngɛ blɔhi nɛ a yɔsemi yee nɔ konɛ e kɛ puɛ wa hemi kɛ yemi ɔ. Wa maa kase bɔ nɛ wa ma plɛ kɛ dla wa he kɛ to Satan tuami ɔmɛ ngɛ ní kasemi nɛ ɔ mi.

E ji fɔli a ní tsumi kaa a maa ye bua a bimɛ ɔmɛ nɛ a sɔmɔ Yehowa. (Efeso Bi 6:4) A tsɔɔ blɔ etɛ a nɔ nɛ fɔli ma nyɛ maa gu kɛ pee jã ngɛ ní kasemi nɛ ɔ mi.

Gbenɔ haa nɛ wa haoɔ wawɛɛ. Mɛni he je nɛ nihi gboɔ? Mɛni blɔ nɔ a maa gu kɛ ‘kpata gbenɔ, nɛ ji nyagbe he nyɛlɔ ɔ hɛ mi’? (1 Korinto Bi 15:26) Wa ma susu sane bimi nɛ ɔmɛ a heto ɔ he ngɛ ní kasemi nɛ ɔ mi. Enɛ ɔ ma ha nɛ wa maa na kaa Yehowa yeɔ dami sane, e ngɛ nile, nɛ e ngɛ suɔmi hulɔ.

Yehowa sɔmɔli nɛ a hi si blema a bɔ mɔde wawɛɛ ngɛ be tsuo sɔmɔmi ní tsumi ɔ mi, nɛ jã kɛ̃ nɛ ni nɛmɛ nɛ ngɛ mwɔnɛ ɔ hu ngɛ pee. Mɛni wa maa pee kɛ kai ‘bɔ nɛ a hemi kɛ yemi ɔ jeɔ kpo ngɛ a ní tsumi mi kɛ bɔ nɛ suɔmi nɛ a ngɛ ɔ haa nɛ a tsuɔ ní wawɛɛ’ ɔ?​—1 Tesalonika Bi 1:3.