NƆ́ NƐ A MAA KASE

Yehowa dloo e we bi nɛ́ a ngɛ lɛ sɔmɔe ngɛ zugba a nɔ ɔ tue mi jɔmi si himi nɛ se be. Mɛni wa maa pee kɛ tsɔɔ kaa wa bua jɔ blɔ nya nɛ e to konɛ wa nyɛ nɛ wa ja lɛ ngɛ anɔkuale mi ɔ he? Mɛni wa ti nɔ tsuaa nɔ ma nyɛ maa pee konɛ tue mi jɔmi nɛ ngɛ wa kpɛti ɔ mi nɛ wa? Munyu nɛ ɔ nɛ wa maa kase ɔ ma ha sane bimi nɛ ɔmɛ a heto.

A maa tsɔɔ wɔ nyakpɛ ní komɛ nɛ maa ya nɔ hwɔɔ se ngɛ munyu nɛ ɔ mi. Wa maa kase nɔ́ he je nɛ waa kɛ wa he ma nyɛ maa fɔ Yehowa nɔ kulaa ngɛ haomi ngua a mi ɔ hulɔ.

Nihi fuu ngɛ Satan je ɔ mi ɔ fĩɔ a ma kɛ a kusumi ní peepeehi a se. Se wɔɔ lɛɛ wa wo Yehowa si kaa wa maa ye lɛ anɔkuale. Munyu nɛ ɔ maa tsɔɔ wɔ nɔ́ he je nɛ waa kɛ wa he wui kunɔ kɛ pɛhi nɛ yaa nɔ ngɛ je ɔ mi ɔ mi, kɛ bɔ nɛ wa ma plɛ kɛ tsɔse wa he konɛ wa nyɛ nɛ waa pee wa ní kaa Yehowa kɛ Yesu.

Yehowa we bi nɛ a ngɛ je kɛ wɛ ɔ kpeɔ ngɛ Matsɛ Yemi Asahi a nɔ kɛ tsu kpahi a mi nɛ a jaa lɛ. Ngɛ munyu nɛ ɔ mi ɔ, wa ma susu Baiblo sisi tomi mlaa komɛ a he. Sisi tomi mlaa nɛ ɔmɛ maa ye bua wɔ konɛ wa ná bumi kɛ ha wa jami he ɔmɛ, waa kɛ sika nɛ ye bua kɛ ma wa jami he ɔmɛ, konɛ wa dla mɛ saminya kɛ wo Yehowa hɛ mi nyami.