Mɛni He Je Nɛ Ninyɛ Pɔ He Jã a?​—⁠Mɛni Baiblo ɔ De?

Munyuhi nɛ a woɔ nɔ mi mi la nɛ nihi tuɔ kɛ siɔ ni kpahi, yi wu tso níhi nɛ nihi peeɔ a sibi akɛnɛ a sume a he, si nɛ nihi teɔ kɛ woɔ nihi nɛ a je wɛtso kpahi a mi, kɛ tahi ji níhi nɛ a tuɔ he munyu wawɛɛ ngɛ amaniɛ bɔmihi a mi.

• “Ta nɛ ngɛ nɔ yae ngɛ Israel kɛ Gaza a kpɛti, kɛ nihi nɛ a haa nɛ basabasa peemi baa, nɛ́ a haa nɛ nihi náa a sibi a he ninyɛ ɔ ha nɛ amlɔ nɛ ɔ, nihi tuɔ munyuhi nɛ sɛ kɛ siɔ a sibi wawɛɛ ngɛ social media amɛ a nɔ pe be ko nɛ be ɔ.”​—The New York Times, November 15, 2023.

• “Kɛ je October 7 kɛ ma nɛ ɔ, ninyɛ nɛ́ nihi náa kɛ haa ni kpahi, kɛ munyuhi nɛ sɛ nɛ a tuɔ kɛ siɔ a sibi, kɛ yi wu tso níhi nɛ nihi peeɔ a sibi akɛnɛ a sume a he ɔ ya hɛ mi mlamlaamla, nɛ e pɔ he wawɛɛ pe be ko nɛ be ɔ.”​—Dennis Francis, president of the United Nations General Assembly, November 3, 2023.

Munyuhi nɛ sɛ nɛ nihi tuɔ kɛ siɔ a sibi akɛnɛ a sume a he, kɛ yi wu tso níhi kɛ tahi nɛ́ ngɛ nɔ yae ɔ ji níhi nɛ ngɛ kɛ je blema. Ngɛ anɔkuale mi ɔ, Baiblo ɔ tu ni komɛ nɛ a hi si blema a nɛ a haa nɛ a “munyu yaya amɛ [peeɔ] kaa kɛ̃ɛ̃ mi bihi” nɛ́ a kɛ a he wo ta hwumi mi nɛ a pee yi tsu tso ní ɔ he munyu. (La 64:3; 120:7; 140:1) Se kɛ̃ ɔ, Baiblo ɔ tsɔɔ kaa ninyɛ nɛ pɔ he ngɛ wa be nɛ ɔ mi ɔ tsɔɔ wɔ nɔ́ ko nɛ he hia.

Ninyɛ​—Okadi nɛ tsɔɔ kaa wa ngɛ nyagbe be ɔ mi

Baiblo ɔ tsɔɔ yi mi tomi enyɔ he je nɛ ninyɛ pɔ he wawɛɛ mwɔnɛ ɔ.

1. 1. E gba kɛ fɔ si kaa be ko maa ba nɛ “suɔmi nɛ nihi babauu ngɛ ɔ, nya maa jɔ.” (Mateo 24:12) Nihi babauu be suɔmi kpo jee, mohu ɔ, a ma je suhi nɛ ma ha nɛ nihi ma ná a sibi a he ninyɛ ɔ kpo.​—2 Timoteo 3:1-5.

2. 2. Satan Abosiami ji nɔ nɛ hɔ wo ninyɛ nɛ pɔ he wawɛɛ mwɔnɛ ɔ se. Baiblo ɔ de ke, “je ɔ tsuo lɛɛ, nɔ yayami ɔ nɛ ngɛ lɛ kudɔe.”​—1 Yohane 5:19; Kpo Jemi 12:9, 12.

Se kɛ̃ ɔ, Baiblo ɔ ha nɛ wa le kaa e be kɛe nɛ Mawu ma je níhi nɛ ngɔɔ ninyɛ kɛ baa a tsuo kɛ je. Nɛ jehanɛ se hu ɔ, e ma je nyagbahi tsuo nɛ ninyɛ ngɔ kɛ ba a kɛ je. Baiblo ɔ wo si kaa:

• Mawu “ma tsu vo nyu fɛɛ vo nyu ngɛ a hɛ mi, nɛ gbenɔ be si hie hu, jã kɛ̃ nɛ kɔmɔ yemi aloo ya fomi aloo nɔ́ yeyee ko hu be si hie hu. Blema ní ɔmɛ be kɛ ho.”​—Kpo Jemi 21:4.