Lohwehi Nɛ A Ngɛ Huetso Ɔmɛ A Mi ɔ A Yibɔ ɔ Nɔ Gbɔ Lafa Mi 73 Ngɛ Jeha 50 Nɛ Be ɔ Mi​—⁠Mɛni Baiblo ɔ De?

Ngɛ October 9, 2024 mi ɔ, World Wildlife Fund ɔ bɔ amaniɛ ko nɛ ngɛ hɛdɔ nɛ kɔɔ bɔ nɛ adesahi a ní peepee ngɛ lohwehi nɛ a ngɛ huetso ɔmɛ a mi ɔ a hɛ mi kpatae ha a he. A de kaa “kɛ je jeha 50 nɛ be ɔ” (1970-2020), lohwehi nɛ a ngɛ huetso ɔmɛ a mi ɔ a yibɔ ɔ nɔ gbɔ kɛ su 73%.” A kɛ kɔkɔ bɔmi ha kaa: “ke a de ke níhi nɛ maa ya nɔ jeha enuɔ nɛ ngɛ wa hɛ mi ɔ maa tsɔɔ bɔ nɛ wami ma ji ha ngɛ zugba a nɔ ɔ, pi nɛ a ngɛ he za woe.”

Amaniɛ bɔmi nɛ ɔ ha nɛ nihi fuu a he mi po. Wa suɔ wa zugba nɛ ngɛ fɛu ɔ wawɛɛ nitsɛ nɛ wa bua juɛ he ke wa na lohwe ɔmɛ nɛ a ngɛ nɔ́ nae. Wa nuɔ he kikɛ nɛ ɔ ejakaa Mawu to e yi mi kaa waa hyɛ lohwe ɔmɛ a nɔ.​—1 Mose 1:27, 28; Abɛ 12:10.

Lɔɔ eko ɔ o ma bi o he ke, ‘Anɛ wa nyɛ maa po lohwe ɔmɛ nɛ a ngɛ huetso ɔmɛ a mi ɔ a he piɛ lo? Mɛni Baiblo ɔ De?’

Hɛ nɔ kami kɛ ha hwɔɔ se

Ngɛ mɔde nɛ wa ngɛ bɔe kaa wa maa po lohwe ɔmɛ a piɛ tsuo se ɔ, Mawu pɛ ji nɔ nɛ ma nyɛ maa po a he piɛ nitsɛnitsɛ. Baiblo ɔ gba kɛ fɔ si ngɛ Kpo Jemi 11:18 kaa, Mawu ma “kpata ni nɛmɛ nɛ a ngɛ zugba a hɛ mi kpatae ɔmɛ a hɛ mi.” Ngmami nɛ ɔ tsɔɔ wɔ ní enyɔ komɛ:

1. 1. Mawu maa tsi nihi nɛ a ngɛ zugba a pue ɔ a nya kulaa.

2. 2. E be kɛe nɛ Mawu maa pee he nɔ́ ko. Kɛ wa plɛ kɛ le kɛɛ? Mwɔnɛ ɔ, oslaa ngɛ he wawɛɛ ejakaa adesahi ngɛ lohwehi a hɛ mi kpatae wawɛɛ pe be ko nɛ be.

Mɛni Mawu ma kɛ tsu nyagba nɛ ɔ he ní? E kɛ e Nɔ Yemi ɔ aloo e hiɔwe matsɛ yemi ɔ maa ye zugba a tsuo nɔ. (Mateo 6:10) Nɔ Yemi nɛ ɔ ma tsɔse adesahi nɛ a peeɔ tue bumi ɔ konɛ a nyɛ nɛ a hyɛ lohwe ɔmɛ a nɔ nɛ a po a he piɛ.​—Yesaya 11:9.