Mɛni Ma Pee Konɛ Ma Ko Tsɛ̃ Níhi Kɛ To Hu?

Baiblo ɔ tsɔɔ kaa ke wa tsɛ̃ níhi kɛ to ɔ, e kɛ haomihi baa. E de ke: “Nɔ nɛ slaa kɔɔhiɔ ɔ, e du we ní; nɔ nɛ hyɛɛ bɔku mi ɔ, e kpa we ní.”​—Fiɛlɔ 11:4.

Mo susu níhi nɛ e haa nɛ o tsɛ̃ɛ níhi kɛ toɔ ɔ he konɛ o hyɛ nɔ́ nɛ o ma nyɛ maa pee ngɛ he nɛ o kpa.

Ke ní tsumi ɔ he wa tsɔ.

Ngɛ anɔkuale mi ɔ, ní tsumi komɛ a he wa nitsɛ, nɛ lɔ ɔ ma nyɛ ma ha nɛ o ngmɛɛ he kɛ fɔ si. Se ní nɛ ɔmɛ maa ye bua mo.

• Mo gba ní tsumi ɔ mi bɔɔbɔɔbɔɔ. Melissa de ke: “Ke i na kaa ní tsumi ɔ he wa a, i peeɔ lɛ bɔɔbɔɔbɔɔ konɛ ma gbe nya ngɛ be nya.”

• Jee sisi mla. Vera de ke: “Ke a ha mo ní tsumi ko ɔ, jee sisi mla. Behi fuu ɔ, e maa hi kaa o maa ngma níhi nɛ o suɔ nɛ o pee ngɛ ligbi ɔ mi ɔ kɛ fɔ si, konɛ o hɛ ko je nɔ.”

• Mo bi yemi kɛ buami. O fɔli kɛ o tsɔɔli kɛ níhi kaa jã kpe hyɛ. Mɛni he je nɛ o bi we mɛ konɛ a ye bua mo? A maa ye bua mo konɛ o to nɔ́ nɛ o suɔ nɛ o peeɔ he blɔ nya saminya.

Nɔ́ ko hu nɛ maa ye bua “Moo to ní tsumi ɔ he blɔ nya ngɛ womi nɔ. Lɔ ɔ se ɔ, moo bɔ mɔde nɛ o nyɛɛ blɔ nya tomi ɔ se. Ke o pee jã a, nɔ́ tsuaa nɔ́ maa ya nɔ saminya ha mo, nɛ o maa gbe ní tsumi ɔ nya ngɛ be nya.”​—Abbey.

Ke hejɔ sɛ o mi.

Eko ɔ, sukuu ní tsumihi nɛ a ma ha mo ɔ ji níhi nɛ o bua jɔɛ a he. Ke a ha mo ní tsumihi kaa jã a, mɛni o ma nyɛ maa pee? Moo ka níhi nɛ nyɛɛ se ɔ nɛ o hyɛ.

• Mo susu nɔ́ he je nɛ e sa nɛ o pee lɛ mla a he. Kaa nɔ hyɛmi nɔ́ ɔ, ke o gbe ní tsumi ko nya a, hyɛ bɔ nɛ o bua jɔɔ ha. Amy de ke: “Be tsuaa be nɛ ma gbe ní tsumi ko nya mla, aloo ngɛ be nya a, ye bua jɔɔ wawɛɛ.”

• Mo susu nɔ́ nɛ maa je mi kɛ ba a he. Ke o ji sisi mla a, e ma ha nɛ pɔ maa tɔ o he wawɛɛ nɛ o be manye yee. Baiblo ɔ de ke: “Nɔ́ nɛ nɔmlɔ du ɔ, lɔ ɔ nɔuu e ma kpa.”​—Galatia Bi 6:​7.

• Moo ngɔ lɛ kaa a ngɛ ní tsumi ɔ ngɔe nɔuu. Alicia de ke: “I ngɔɔ lɛ kaa a maa ngɔ ní tsumi ɔ ngɛ ligbi kake loo ligbi enyɔ se, nɛ i tsuɔ he ní mla. Ke i pee jã a, i náa be kɛ hyɛɛ kaa nɔ́ fɛɛ nɔ́ da pɛpɛɛpɛ lo, nɛ i náa ligbi kake loo enyɔ ko kɛ jɔɔ ye he.”

Nɔ́ ko hu nɛ maa ye bua. “E he hia nɛ o dla o juɛmi. Mo de o he ke, bɔ tsuaa bɔ nɛ ji ɔ, o maa pee, nɛ o be hae nɛ nɔ́ ko nɛ tsi o nya. Ke i de ye he jã a, i nyɛɔ nɛ i tsuɔ ní tsumi tsuaa ní tsumi.”​—Alexis.

Ke ní tsumi fuu ngɛ o kuɛ nɔ momo.

Nathan de ke: “Nihi deɔ ke i tsɛ ɔ níhi kɛ toɔ, se pi anɔkuale! A li kaa ní tsumi fuu ngɛ ye kuɛ nɔ!” Ke o si fɔfɔɛ ɔ ngɛ kaa Nathan nɔ́ ɔ, lɛɛ moo ka enɛ ɔ nɛ o hyɛ.

• Mo tsu níhi nɛ a he wɛ ɔ he ní kekle. Amber de ke: “Be ko ɔ, nɔ ko de mi ke, ke e sa nɛ ma pee nɔ́ ko nɛ be be fuu ngɔe ɔ, e sɛ nɛ ma to tsle ngɛ he. Ní nɛ ɔmɛ ekomɛ ji, tsumi dlami, níhi a he fɔmi, tadehi a nɔ tomi kɛ tsesihi a mi sami.”

• Moo le níhi nɛ o maa pee kekle. Baiblo ɔ de ke: “Moo le níhi nɛ a he hia wawɛɛ ɔ.” (Filipi Bi 1:10, NW) Kɛ o kɛ Baiblo ga womi nɛ ɔ ma tsu ní ngɛ o si himi mi ha kɛɛ? Anna de ke: “I ngmaa níhi nɛ ma pee ɔmɛ kɛ be nɛ ma kɛ peeɔ kɛ fɔɔ si. Se nɔ́ titli nɛ i peeɔ ji kaa, i ngmaa be nɛ ma kɛ gbe ní tsumi ɔ eko fɛɛ ko nya a kɛ fɔɔ si.”

Anɛ jã peemi he wa lo? Moo lɛɛ, mo susu he ekohu nɛ o hyɛ! Ngɛ anɔkuale mi ɔ, ke o ngma níhi nɛ o maa pee ɔ kɛ fɔ̃ si ɔ, e ma ha nɛ o ná be kɛ tsu níhi a he ní, nɛ be ɔ be mo tɔtɔe. Ke o pee jã a, pɔ be o he tɔe tsɔ. Kelly de ke: “Ke i to níhi a he blɔ nya a, i yi tsui nɛ níhi yaa nɔ saminya.”

• Ko ha nɛ nɔ́ ko nɛ je o juɛmi kɛ je ní tsumi ɔ nɔ. Jennifer de ke: “Ke i yaa je ní tsumi ko sisi ɔ, i haa nɛ ye we ɔ mi bi ɔmɛ tsuo leɔ loko i jeɔ sisi. Ke a ngɛ ní tsumi ko nɛ a suɔ nɛ ma tsu ha mɛ ɔ, i biɔ mɛ konɛ ma pee ha mɛ mla loko ma je ye ní tsumi ɔ sisi. I gbeɔ ye fon ɔ konɛ nihi ko fia mi.”

Nɔ́ ko hu nɛ maa ye bua “Ke o tsu we ní tsumi ɔ, ní tsumi ɔ maa hi si maa hi mo mlɛe. Mo tsu he ní mla mohu pe nɛ e maa pee tlomi ngɛ o kuɛ nɔ. Ke o pee jã a, o ma ná be kɛ jɔɔ o he ngɛ ligbi ɔ mi.”​—Jordan.