Anɛ Yehowa Odasefohi Tsuɔ Ma Se Sane Kpakpa Fiɛɛmi Ní Tsumi ɔ Lo?

Ee. He tsuaa he nɛ Yehowa Odasefohi ngɛ ɔ, a bɔɔ mɔde nɛ a tsuɔ ní kaa ma se sane kpakpa fiɛɛli, nɛ daa nɛ ɔ, a tuɔ a hemi kɛ yemi he munyu kɛ tsɔɔ nihi.​—Mateo 28:19, 20.

Jehanɛ hu, Odasefo ɔmɛ a kpɛti ni komɛ yaa a ma a mi hehi nɛ nihi nui sane kpakpa nɛ ngɛ Baiblo ɔ mi ɔ he lolo ɔ, nɛ a fiɛɛ kɛ haa mɛ, nɛ a ti ni komɛ hu hiaa kɛ ya hii lejɛ ɔmɛ. Odasefo ɔmɛ a kpɛti ni komɛ hu hiaa kɛ ya hii ma se konɛ a nyɛ nɛ a fiɛɛ kɛ ha nihi babauu. Yesu gba ke: “Nyɛ maa ye odase ha mi . . . kɛ yaa su je ɔ nyagbe he tɔɔ.” (Bɔfo Ɔmɛ A Ní Tsumi 1:8) A bua jɔ kaa a ná Yesu gbami nɛ ngɛ mi bae ɔ mi blɔ fa mi nɔ́.

Ngɛ jeha 1943 ɔ mi ɔ, wa to sukuu ko sisi konɛ waa kɛ tsɔsemi klɛdɛɛ nɛ ha wa ma se sane kpakpa fiɛɛli ɔmɛ ekomɛ. Kɛ je jamɛ a be ɔ mi kɛ ma nɛ ɔ, Odasefohi nɛ a he hiɛ pe 8,000 ya sukuu nɛ a tsɛɛ ke Watchtower Gilead Baiblo Sukuu ɔ eko.