Mɛni Baiblo ɔ De Ngɛ Dinosaur Ɔmɛ A He?
Nɔ́ nɛ Baiblo ɔ de
Baiblo ɔ tu we dinosaur ɔmɛ a he munyu pɔtɛɛ. Se kɛ̃ ɔ, Baiblo ɔ tsɔɔ kaa Mawu lɛ “bɔ níhi tsuo,” enɛ ɔ he ɔ, e ngɛ heii kaa a piɛɛ níhi nɛ e bɔ ɔmɛ a he.a (Kpo Jemi 4:11) E ngɛ mi kaa Baiblo ɔ tu we dinosaur ɔmɛ a he munyu tutuutu mohu lɛɛ, se e tu lohwehi a kuu komɛ nɛ eko ɔ dinosaur ɔmɛ piɛɛ he ɔ a he munyu:
“Wo mi lohwe nguanguahi,” loo “lohwehi nɛ a he ngɛ gbeye.”—1 Mose 1:21; New American Bible.
“Lohwehi tsuo nɛ a sãa si ngɛ zugba a nɔ.”—1 Mose 1:25, NW.
“Pu mi lohwehi nɛ a ngɛ zugba a nɔ.”—1 Mose 1:25, NW.
Anɛ dinosaur ɔmɛ ble kɛ je lohwe kpahi a mi lo?
Fossil records ɔ tsɔɔ we kaa dinosaur ɔmɛ ba wami mi kɛ gu bilemi nɔ, mohu ɔ, e tsɔɔ kaa a ba wami mi si kake too. Enɛ ɔ kɛ nɔ́ nɛ Baiblo ɔ de kaa Mawu lɛ bɔ lohwehi tsuo ɔ kɔ. Kaa nɔ hyɛmi nɔ́ ɔ, La 146:6 tsɔɔ kaa Mawu lɛ “pee hiɔwe, zugba, wo, kɛ a mi níhi tsuo.”
Mɛni be nɛ dinosaur ɔmɛ hi si?
Baiblo tsɔɔ kaa a bɔ lohwehi nɛ a ngɛ wo mi kɛ lohwehi nɛ a ngɛ zugba nɔ ɔ ngɛ ligbi enuɔne kɛ ekpane ɔ nɔ.b (1 Mose 1:20-25, 31) Enɛ ɔ he ɔ, nɔ́ nɛ Baiblo ɔ de ɔ ha nɛ wa naa kaa dinosaur ɔmɛ hi si be kɛkɛɛ loko a sisi gu.
Anɛ dinosaur ɔmɛ nɔuu ji lohwehi nɛ a wo a biɛ ta ngɛ Baiblo ɔ mi ke Behemoth kɛ Leviathan ɔ lo?
Dɛbi. E ngɛ mi kaa a li lohwehi tutuutu nɛ Baiblo ɔ wo a biɛ ta ngɛ hiob womi ɔ mi tso mohu lɛɛ, se a tsɔɔ kaa eko ɔ, Behemoth ɔ ji pa mi suɔ, nɛ Laviathan ɔ hu ji nyaka. Bɔ nɛ a kale lohwe nɛ ɔmɛ ngɛ Ngmami ɔ mi ɔ kɛ bɔ nɛ suɔ kɛ nyaka ngɛ ha a kɔ. (Hiob 40:15-23; 41:1, 14-17, 31) Se bɔ fɛɛ bɔ nɛ ji ɔ, tsa pi dinosaur ɔmɛ nɔuu ji “Behemoth” kɛ “Leviathan.” Mawu de Hiob ke lɛ nitsɛ e hyɛ lohwe nɛ ɔmɛ. Dinosaur ɔmɛ a sisi gu kulaa loko Hiob hi si.—Hiob 40:16; 41:8.
Mɛni lɛ ba dinosaur ɔmɛ a nɔ?
Baiblo ɔ tu we bɔ nɛ dinosaur ɔmɛ a sisi plɛ kɛ gu ha a he munyu. Se kɛ̃ ɔ, e tsɔɔ kaa “[Mawu] suɔmi nya” nɛ a bɔ níhi tsuo ngɛ, enɛ ɔ tsɔɔ kaa yi mi tomi ko he je nɛ Mawu bɔ dinosaur ɔmɛ ngɛ. (Kpo Jemi 4:11) Benɛ jamɛ a yi mi tomi ɔ ba mi ta a, Mawu ngmɛ blɔ nɛ dinosaur ɔmɛ a sisi gu.
a Fossil records ɔ maa nɔ mi kaa dinosaur ɔmɛ hi si niinɛ. Ngɛ anɔkuale mi ɔ, fossil records ɔ tsɔɔ kaa be ko nɛ be ɔ, dinosaur ɔmɛ hiɛ babauu kɛ a he nɔ slɔɔtohi.
b Ngɛ Baiblo ɔ mi ɔ, munyu nɛ ji “ligbi” ɔ ma nyɛ maa da si ha be babauu kaa jeha akpehi kɛ se.—1 Mose 1:31; 2:1-4; Hebri Bi 4:4, 11.