A Wo Mɛ Tsu Ngɛ A Hemi Kɛ Yemi ɔ He Je—South Korea
October 26, 2020, ji be nɛ South Korea ma a kplɛɛ nɔ kaa nihi nɛ a kua kaa a kɛ a he maa wo tabuli a ní tsumi mi ɔ ma nyɛ nɛ a tsu ní tsumi kpa nɛ a tsuɔ kɛ haa ma a eko. Se kɛ̃ ɔ, nihi nɛ a hyɛɔ he blɔhi nɛ adesa ngɛ nɛ a kɛ tsuɔ ní ɔ mi ɔ tsɔɔ kaa South Korea blɔ nya tomi kɛ ha ní tsumi nɛ a tsuɔ kɛ haa ma a he ba sane ejakaa tue gblami kɛ nɔ hɛ mi hyɛmi ngɛ mi, a waa nihi yi mi nɛ be nɛ a kɛ sɔmɔɔ ɔ hiɛ pe be nɛ e sa nɛ a kɛ sɔmɔ. Jeha 3 nɛ a kɛ tsuɔ ní tsumi kpahi kɛ haa ma a po hiɛ pe ke nɔ ko ngɛ tabuli a ní tsumi tsue, nɛ enɛ ɔ kɛ nɔ́ nɛ a kplɛɛ nɔ ngɛ je kɛ wɛ ɔ kpa we gbi. Mlaa nɛ ɔmɛ nɛ a kplɛɛ nɔ ngɛ je kɛ wɛ ɔ tsɔɔ kaa, e sɛ nɛ ní tsumi kpa nɛ a tsuɔ ngɛ tabuli a ní tsumi ɔ nane mi ɔ nɛ be jeha 2 kɛ nyɔhiɔ 3 nɔ, nɛ ke e maa be jã po ɔ, lɛɛ e biɔ nɛ yi mi tomi kpakpa ko nɛ hi he. Odasefohi komɛ nɛ a ngɛ South Korea a kua kaa a ma tsu ní tsumi kpa nɛ a ha mɛ ɔ. A ti ni komɛ ngɔ sane ɔ kɛ ya kojomi he. Ngɛ May 30, 2024 ɔ, South Korea kojoli 9 nɛ a hi si ngɛ sane ɔ nɔ ɔ a kpɛti nihi hiɛhiɛɛ kplɛɛ we odasefo ɔmɛ a ní bimi ɔ nɔ. Lɔ ɔ he ɔ, kojoli ɔmɛ de ke: “Ní tsumi kpa nɛ a ngɛ ni ɔmɛ hae ɔ ji tue gblami kpa nɛ a suɔ nɛ a kɛ ha nihi nɛ a kua kaa a kɛ a he maa wo tabuli a ní tsumi mi ɔ.”
Woo-jin Byeon, nɛ e ye jeha 29 ɔ ji kekleekle nyumu nɛ e sɛ gba si himi mi ngɛ South Korea nɛ a wo lɛ tsu akɛnɛ e kua kaa e ma tsu ní tsumi kpa nɛ a kɛ ha lɛ ɔ. Lɛ nitsɛ e je bumi mi nɛ e kua kaa e ma tsu ní tsumi kpa nɛ a kɛ ha lɛ ɔ. E ngɛ mi kaa e ha nɛ a le kaa ke a ma ha lɛ ní tsumi kpa ko nɛ e tsu, nɛ e be pee kaa nɔ́ nɛ a ngɛ e tue gblae ɔ, e ma tsu mohu lɛɛ, se kɛ̃ ɔ, ngɛ July 24, 2024 ɔ, kojomi he ɔ ha nɛ a wo lɛ tsu jeha kake kɛ fa.
Kɛ ba si amlɔ nɛ ɔ, Odasefohi 12 kua kaa a ma tsu ní tsumi kpa nɛ a kɛ ha mɛ ɔ, a ti nɔ kake ji nyɛminyumu Byeon, nɛ a kɛ nyumuhi 9 hu ngɛ kojomi he yae amlɔ nɛ ɔ. E ngɛ mi kaa a ma we sane ɔ nya si mohu lɛɛ, se mɛ hu a ngɛ mɛ yi mi wae nɛ a ngɛ mɛ tsu woe. Se ngɛ bɔ nɛ si fɔfɔɛ ɔ ngɛ ha tsuo se ɔ, nihi hiɛhiɛ nɛ a ma a juɛmi nya si kaa a ma tsu ní tsumi kpa a ngɛ ní tsumi nɛ ɔ tsue.
Be Nɛ Nɔ́ Ko Ya Nɔ
July 24, 2024
A wo Woo-jin Byeon tsu nyɔhiɔ 18 akɛnɛ e kua ní tsumi kpa nɛ a kɛ ha lɛ ɔ.
November 10, 2022
Benɛ a ha Woo-jin Byeon lemi kaa e ma nyɛ ma bi yemi kɛ bua mi ɔ, e ngma sɛ womi kɛ ya ha tabuli a ní tsumi yi ɔ kaa e kɛ e he be tabuli a ní tsumi aloo ní tsumi kpa nɛ a ma ha lɛ ɔ mi woe ngɛ e he nile he je.
October 26, 2020
South Korea amlaalo ɔ to ní tsumi kpahi a he blɔ nya kɛ ha nihi nɛ a kua kaa a ma tsu tabuli a ní tsumi ɔ.
November 1, 2018
Benɛ South Korea Kojomi He Nɛ Pe Kulaa kpe ɔ, kojoli 9 kplɛɛ nɔ kaa tabuli a ní tsumi kuami ɔ, pi nɔ́ yayami, se kojoli 4 lɛɛ a kplɛɛ we nɔ. Enɛ ɔ he ɔ, kojomi he ɔ ma nya si kaa ke nɔ ko kua tabuli a ní tsumi ɔ, e ti si kɛ wi ma a mlaa a.
June 28, 2018
South Korea Constitutional Court ɔ tsɔɔ kaa ngɛ tabuli a mlaa mi ɔ, blɔ nya tomi ko be nɛ tsɔɔ kaa ke nɔ ko kua tabuli a ní tsumi ɔ a ma nyɛ ha lɛ ní tsumi kpa, mlaa a kplɛɛ we nɔ.
October 18, 2016
Benɛ nihi etɛ nɛ a kua kaa a ma tsu tabuli a ní tsumi ɔ kɛ a sane ɔ ya kojomi he kpa a, kojomi he nɛ ɔ kplɛɛ nɔ kaa a yi fɔ. Enɛ ɔ ji kekleekle be nɛ nɔ́ kɔ kaa jã ya nɔ.
August 30, 2011
Constitutional Court ɔ kplɛɛ nɔ kaa loloolo ɔ e sa nɛ a ya nɔ nɛ a gbla nihi nɛ a kua kaa a be tabuli a ní tsumi ɔ tsue ɔ tue.
August 26, 2004
Constitutional Court ɔ kplɛɛ nɔ kaa loloolo ɔ e sa nɛ a ya nɔ nɛ a gbla nihi nɛ a kua kaa a be tabuli a ní tsumi ɔ tsue ɔ tue.
1975
Amlaalo ɔ bɔni nihi a nɔ nyɛmi kaa e sa nɛ a kɛ a nyɛmi tsuo nɛ tsu tabuli a ní tsumi ɔ.
1973
Ngɛ 1990 jeha amɛ a mi ɔ, amlaalo ɔ bɔni Odasefohi nɛ a wo mɛ tsu ɔ yi mi wami wawɛɛ.
1953
Amlaalo ɔ wo kekleekle Odasefohi nɛ a kua kaa a kɛ a he maa wo tabuli a ní tsumi ɔ mi ɔ tsu.