7 Nyɛɛ Ye Bua Nyɛ Bimɛ Nɛ A Ná Subai Kpakpa

NƆ́ NƐ E TSƆƆ

Subai kpakpa ji bɔ nɛ o baa o je mi saminya ha. Kaa nɔ hyɛmi nɔ́ ɔ, anɛ o bɔɔ mɔde kaa o maa ye anɔkuale ngɛ nɔ́ fɛɛ nɔ́ mi lo? Ke jã a, atsinyɛ jemi ko be he kaa o suɔ nɛ o bimɛ hu nɛ a ná su kpakpa nɛ ɔ.

Subai kpakpa nɛ ɔmɛ jeɔ kpo ngɛ nɔ ko ní peepeehi a mi. Kaa nɔ hyɛmi nɔ́ ɔ, ke nɔ ko ngɛ subai kpakpa a, e bɔɔ mɔde kɛ ní tsumi, e yeɔ dami sane, nɛ e susuɔ ni kpahi a he. Su nɛ ɔmɛ ji suhi nɛ e sa kaa a kɛ tsɔse nɔ ko kɛ je e jokuɛwi a si tɔɔ.

BAIBLO SISI TOMI MLAA: “Tsɔse jokuɛyo nɛ e le bɔ nɛ e maa ba e je mi ha, nɛ ke e wa a, e hɛ be nɔ jee.”​—Abɛ 22:6.

NƆ́ HE JE NƐ E HE HIA

Subai kpakpa he hia ngɛ je nɛ kɔmpiuta klamahi pɔ he ngɛ mi nɛ ɔ mi. Fɔlɔ ko nɛ a tsɛɛ lɛ ke Karyn ɔ de ke, “Nihi ma nyɛ maa na su yayahi ngɛ mobile fon loo tablɛti nɔ be fɛɛ be. Wa bimɛ ɔmɛ ma nyɛ maa hi wa kasa mi nɔuu, se eko ɔ, a maa hi ní yayahi hyɛe!”

BAIBLO SISI TOMI MLAA: “Nihi nɛ a wa a, . . . a tsɔse a juɛmi nɛ a kɛ kɔɔ nɔ́ se ɔ kɛ gu ní nɛ a kɛ tsuɔ ɔ nɔ, konɛ a le slɔɔto nɛ ngɛ nɔ́ nɛ da kɛ nɔ́ nɛ dɛ tsuo a kpɛti.”​—Hebri Bi 5:14.

Subai kpakpa he hia wawɛɛ. Ekomɛ ji ní tsɔwitsɔwi komɛ a demi (kaa “i kpa mo pɛɛ” kɛ “mo tsumi”) kɛ ni kpahi a he susumi. Su nɛ ɔmɛ pɔɛ he mwɔnɛ ɔ, ejakaa nihi a bua ba jɔ kɔmpiuta klamahi a he pe bɔ nɛ a bua jɔ nimli a he.

BAIBLO SISI TOMI MLAA: “Kaa bɔ nɛ nyɛ suɔ kaa nihi nɛ a pee ngɔ ha nyɛ ɔ, nyɛ hu nyɛɛ pee ngɔ ha mɛ jã nɔuu.”​—Luka 6:31.

NƆ́ NƐ O MA NYƐ MAA PEE

Moo tsɔɔ o bimɛ su kpakpahi. Kaa nɔ hyɛmi nɔ́ ɔ, níhi a mi hlami tsɔɔ kaa ke nihewi kɛ yihewi le nɔ́ he je nɛ e ji yayami kaa a kɛ nɔ ko ma ná bɔmi be mi nɛ a sɛ we gba si himi mi ɔ, e maa ye kaa a maa pee jã.

GA WOMI: Ke o suɔ nɛ o kɛ o bimɛ nɛ sɛɛ ní kɛ kɔ su kpakpahi nɛ a ma je kpo ɔ he ɔ, o ma nyɛ maa ngɔ nɔ́ ko nɛ ya nɔ lingmi nɛ ɔ kɛ je ní sɛɛmi ɔ sisi. Kaa nɔ hyɛmi nɔ́ ɔ, ke a bɔ ninyɛ nɛ kɛ basabasa peemi ba a he amaniɛ ngɛ adafi fiami ko mi ɔ, o ma nyɛ ma de ke: “Blɔ nɔ nɛ nihi guɔ kɛ jeɔ abofu kpo ɔ hí kulaa. Ke o hyɛ ɔ, mɛni lɛ ha nɛ nihi peeɔ a ní jã a?”

“Ke jokuɛwi li slɔɔto nɛ ngɛ nɔ́ nɛ da kɛ nɔ́ nɛ dɛ a kpɛti ɔ, e he maa wa kaa a maa pee nɔ́ nɛ da.”​—Brandon.

Tsɔɔ o bimɛ subai kpakpa. Jokuɛwi tsɔwi po ma nyɛ maa kase bɔ nɛ a deɔ ke “i kpa mo pɛɛ” kɛ “mo tsumi” ha, nɛ́ a susu ni kpahi a he. Womi nɛ a tsɛɛ ke Parenting Without Borders ɔ de ke “Ke jokuɛwi yɔse kaa a piɛɛ blɔ nya tomi ngua ko​—kaa weku, aloo sukuu​—he ɔ, lɔ ɔ haa nɛ a fo we mɛ pɛ a nɔ́ mi, mohu ɔ, a jeɔ su kpakpahi kaa mi mi jɔmi kpo nɛ ni kpahi náa he se.”

GA WOMI: Mo gba we mi ní tsumi kɛ ha o bimɛ konɛ e ye bua mɛ nɛ a kase bɔ nɛ a sɔmɔɔ ni kpahi ha.

“Ke o bimɛ le bɔ nɛ a peeɔ we mi ní ha piɔ ɔ, ke a ya je he ko loo a ngɛ mɛ nitsɛmɛ a dɛ he ɔ, e be yee ha mɛ kaa a maa pee we mi ní. We mi ní peemi ma ba pee a he nɔ.”​—Tara.