Ni Kasemi 11

Hemi Kɛ Yemi kɛ Kusumihi Nɛ A Sɛ Mawu Hɛ Mi

Mini hemi kɛ yemi kɛ kusumihi lɛ a dɛ? (1)\

Anɛ e sa nɛ Kliistofohi he ye kaa Mawu ji Triniti lo? (2)

Mini he je nɛ anɔkuale Klistofohi yi Bloonya, Ista aloo fɔmi ligbi ɔ? (3, 4)

Anɛ gbogboehi ma nyɛ maa ye nimli nɛ a hɛ ngɛ awi lo? (5)

Anɛ Yesu gbo ngɛ klɔs nɔ lo? (6)

Kɛ Mawu hɛ mi nɛ wa ma sa he hia kɛɛ? (7)

1. Tsapi hemi kɛ yemi kɛ kusumihi tsuo nɛ hii. Ke a je lakpa jami mi aloo a te si kɛ wo ɔ Baiblo tsɔɔmi ɔ Mawu kplɛ we nɔ.—Mateo 15:6.

2. Triniti: Anɛ Yehowa ji Triniti—nimli etɛ nɛ a ngɛ Mawu kake mi lo? Dabida! Yehowa, nɛ e ji Tsɛ ɔ, ji “anɔkuale Mawu kake ɔ” nɛ. (Yohane 17:3; Marko 12:29) Yesu ji E kleklee Bi, nɛ e baa e he si kɛ haa Mawu. (1 Korintobi 11:3) Tsɛ ɔ nɔ kuɔ pe Bi ɔ. (Yohane 14:28) Tsapi nɔmlɔ ji mumi krɔukrɔu; e ji Mawu he wami nɛ e kɛ tsuɔ ni.—1 Mose 1:2; Bɔfohi Asane 2:18.

3. Bloonya kɛ Ista: A fɔ we Yesu ngɛ December 25 nɔ. A fɔ lɛ ma pee kaa October 1, jeha mi be nɛ to nɔ hyɛli kɛ a to ɔmɛ je kpo gbɔkuɛ nya si. (Luka 2:8-12) Yesu de we Klistofohi ke a ye e fɔ mi ligbi. Se, e de e kaseli ɔmɛ ke a kai e gbenɔ. (Luka 22:19, 20) Bloonya kɛ e he kusumi ɔmɛ je blema lakpa jami mi. Jaa kɛ̃ Ista kusumihi nɛ a kɛ hlui kɛ alɔngɔ tsuɔ ni ɔ hu ngɛ. Kleklee Klistofo ɔmɛ yii Bloonya aloo Ista, nɛ jaa kɛ̃ anɔkuale Klistofohi hu yi muɛnɔ.

4. Fɔmi Ligbi: Nimli nɛ a ye fɔmi ligbi enyɔ nɛ Baiblo ɔ tu he munyu ji nimli nɛ a ja we Yehowa. (1 Mose 40:20-22; Marko 6:21, 22, 24-27) Kleklee Kliistofoli ɔmɛ yii fɔmi ligbi. Kusumi nɛ ji fɔmi ligbi nɛ a yeɔ je blema lakpa jami mi. Anɔkuale Kliistofohi kee ni nɛ a jeɔ a hɛ ja kutuu ngɛ jeha mi be fɛɛ ko.

5. Gbogboehi a Gbeye Yemi: Gbogboehi bi nyɛe maa pee nɔ ko aloo a nui nɔ ko he. Wa bi nyɛe maa ye kɛ bua mɛ, nɛ a bi nyɛe maa ye wɔ awi ko. (Lala 146:4; Jajelɔ 9:5, 10) Susuma gboɔ; e hii si hu ngɛ gbenɔ se. (Ezekiel 18:4) Se be ngɛ nɛ hiɔwe bɔfohi yayami nɛ a tsɛ mɛ kɛ daimonohi peeɔ a he ka gbogboehi a mumi. Kusumihi nɛ kɔ gbogboehi gbeye yemi aloo a jami he ɔ dɛ.—Yesaia 8:19.

6. Klɔs: Yesu gbo we ngɛ klɔs nɔ. E gbo ngɛ tso nɛ maa si jai nɔ. Hela gbi nɛ a tsɔɔ sisi kɛ “klɔs” ngɛ Baibloi fuu mi ɔ sisi ji plai kake ko kɛkɛ. Klɔs he okadi ɔ je blema wɔ jami mi. Kleklee Klistofo ɔmɛ kɛ klɔs tsu we ni aloo a ja we lɛ. Lɔɔ he je ɔ, o susu kaa e da kaa a kɛ klɔs maa tsu ni ngɛ jami mi lo?—5 Mose 7:26; 1 Korintobi 10:14.

7. E he maa wa kaa o maa kua hemi kɛ yemi kɛ kusumi nɔ mɛ. Ekoɔ weku bi kɛ huɛ mɛ maa bɔ mɔde kaa o ko tsake o hemi kɛ yemi ɔ. Se Mawu hɛ mi nɛ o maa sa he hia pe nimli nɛ o maa sa a hɛ mi.—Abɛi 29:25; Mateo 10:36, 37.

[Foni ngɛ ba fa 22]

Tsapi Triniti ko ji Mawu

[Foni ngɛ ba fa 23]

Bloonya kɛ Ista je blema lakpa jami mi kɛ ba

[Foni ngɛ ba fa 23]

Sisi numi ko kwraa be gbogboehi nɛ a ma ja mɛ loo a ma ye mɛ gbeye ɔ he