Laami Sane Ko Nɛ Wa Bua Jɔ Kaa Wa Le

Nɔ ko de mo laami sane ko hyɛ lo?—a Baiblo ɔ tu laami sane slɔɔto ko he munyu. A tsɛɛ lɛ “laami sane klɔuklɔu.” E ngɛ klɔuklɔu ejakaa e je Mawu ngɔ. A tsɛɛ lɛ laami sane ejakaa nihi fuu li he nɔ́ ko. Bɔfohi po ngɛ hlae nɛ a maa le. O suɔ kaa o maa le laami sane nɛ ɔ lo?—

Blema ko ɔ, Mawu bɔ kekle nyumu kɛ yo. A tsɛɛ mɛ ke Adam kɛ Hawa. Mawu ha mɛ we ko nɛ ngɛ fɛu nɛ ji Eden abɔɔ ɔ. Kaa Adam kɛ Hawa bu Mawu tue ɔ, jinɛ a kɛ a bimɛ ko pee zugba a tsuo Paradeiso kaa Eden abɔɔ ɔ. Jinɛ a ko hi Paradeiso ɔ mi daa nɛ a ko gbo we. O kai nɔ́ nɛ Adam kɛ Hawa pee lo?—

Adam kɛ Hawa bui Mawu tue, nɛ lɔɔ heje nɛ mwɔnɛ ɔ, wa be Paradeiso mi ɔ nɛ. Se Mawu de kaa e ma ha nɛ zugba a tsuo maa pee fɛu, nɛ nɔ tsuaa nɔ maa hi si daa ngɛ bua jɔmi mi. Mɛni blɔ nɔ e maa gu kɛ pee enɛ ɔ? Jehahi fuu nɛ be ɔ, nihi li he nɔ́ ko. Ejakaa e ji laami sane.

Benɛ Yesu ba zugba a nɔ ɔ, e tsɔɔ nihi laami sane nɛ ɔ he ní. E tsɔɔ mɛ kaa e kɔ Mawu Matsɛ Yemi ɔ he. E de mɛ kaa a sɔle nɛ Matsɛ Yemi ɔ nɛ ba. Ke e ba a, e maa pee zugba a tsuo Paradeiso nɛ ngɛ fɛu.

O bua jɔ kaa o ba le laami sane nɛ ɔ lo?— Mo kai kaa nihi nɛ a buɔ Yehowa tue pɛ nɛ a maa hi Paradeiso ɔ mi. Baiblo ɔ deɔ wɔ nyumuhi kɛ yihi fuu nɛ a bu Yehowa tue ɔ a he sane. O suɔ nɛ o maa kase a he ní lo?— Mo ha nɛ waa kase a kpɛti ni komɛ a he ní, konɛ waa hyɛ bɔnɛ wa maa pee kaa mɛ ha.