NÍ KASEMI 57
Ke O Pee Yayami Ko Nɛ Hɛdɔ Ngɛ He ɔ, Mɛni Yemi Kɛ Buami O Ma Nyɛ Ma Ná?
E ngɛ mi kaa o suɔ Yehowa wawɛɛ, nɛ o bɔɔ mɔde kaa o be nɔ́ ko pee nɛ maa dɔ lɛ mohu lɛɛ, se be komɛ ɔ, o ma tɔ̃. Se kɛ̃ ɔ, hɛdɔ ngɛ tɔmi komɛ a he pe ekomɛ. (1 Korinto Bi 6:9, 10) Ke o tɔ̃ tɔmi ko nɛ hɛdɔ ngɛ he ɔ, mo kai kaa loloolo ɔ Yehowa suɔ mo; e suɔ kaa e kɛ maa ke mo nɛ́ e ye kɛ bua mo.
1. Mɛni e sa nɛ waa pee konɛ Yehowa nɛ ngɔ wa tɔmi kɛ ke wɔ?
Ke nihi nɛ a suɔ Yehowa a yɔse kaa a tɔ̃ tɔmi ko nɛ hɛdɔ ngɛ he ɔ, e dɔɔ mɛ wawɛɛ. Se si nɛ Yehowa wo e we bi ɔ woɔ a bua. E wo si ke: “Ke nyɛ he yayami ɔ tsu kaa mɛni po, ma ha e ma hiɛ futaa kaa snoo.” (Yesaya 1:18) Ke wa tsake wa tsui niinɛ ɔ, Yehowa kɛ wa tɔmi ɔ maa ke wɔ kulaa. Mɛni wa maa pee kɛ tsɔɔ kaa wa tsake wa tsui? Wa ma pia wa he wawɛɛ ngɛ nɔ́ nɛ wa pee ɔ he, nɛ wa ma kpa nɔ́ nɛ dɛ peemi, nɛ wa maa sɔle ha Yehowa kaa e kɛ wa tɔmi ɔ nɛ ke wɔ. Lɔ ɔ se ɔ, wa maa bɔ mɔde kaa wa ma kua susumi loo ní peepeehi nɛ dɛ nɛ́ ha nɛ waa kɛ wa he wo jamɛ a yayami ɔ mi ɔ, nɛ wa maa bɔ mɔde kaa wa maa hi si ngɛ Yehowa mlaahi nɛ a he tsɔ ɔ nya.—Kane Yesaya 55:6, 7.
2. Mɛni blɔ nɔ nɛ Yehowa guɔ asafo mi nikɔtɔma amɛ a nɔ kɛ yeɔ bua wɔ ke wa tɔ̃?
Yehowa de wɔ kaa ke wa tɔ̃ tɔmi ko nɛ hɛdɔ ngɛ he ɔ, wa “tsɛ asafo ɔ mi nikɔtɔma amɛ.” (Kane Yakobo 5:14, 15.) Asafo mi nikɔtɔma amɛ suɔ Yehowa nɛ a suɔ nihi nɛ a ngɛ lɛ sɔmɔe ɔ. A tsɔse mɛ konɛ a nyɛ nɛ a ye bua wɔ bɔ nɛ pee nɛ huɛ bɔmi kpakpa nɛ hi waa kɛ Yehowa wa kpɛti ekohu.—Galatia Bi 6:1.
Mɛni blɔ nɔ nɛ asafo mi nikɔtɔma amɛ guɔ kɛ yeɔ bua wɔ ke wa tɔ̃ tɔmi ko nɛ hɛdɔ ngɛ he? Asafo mi nikɔtɔmahi enyɔ loo etɛ maa da Ngmami ɔ nɔ kɛ ye bua wɔ nɛ waa na nɔ́ he je nɛ nɔ́ nɛ wa pee ɔ dɛ ɔ. A maa tsɔɔ wɔ níhi nɛ wa ma nyɛ maa pee, nɛ a kɛ ga womi nɛ sa nɛ maa ye bua wɔ ɔ ma ha wɔ konɛ wa ko kpale ya pee jamɛ a yayami ɔ. Ke nɔ ko pee yayami nɛ hɛdɔ ngɛ he nɛ e tsakee we e tsui ɔ, asafo mi nikɔtɔma amɛ jeɔ jamɛ a nɔ ɔ ngɛ asafo ɔ mi, konɛ nɔ ɔ ní peepee yaya a nɛ ko ná ni kpahi a nɔ he wami.
MOO KASE BABAUU
Moo kase bɔ nɛ o ma plɛ kɛ je hɛsa kpo ngɛ bɔ nɛ Yehowa yeɔ bua wɔ ha a he ke wa tɔ̃ tɔmi ko nɛ hɛdɔ ngɛ he.
3. Ke wa jaje wa tɔmi ɔmɛ ɔ, e ma ha nɛ huɛ bɔmi kpakpa maa hi waa kɛ Yehowa wa kpɛti ekohu
Yayami fɛɛ yayami nɛ wa pee ɔ, Yehowa nɛ wa pee kɛ si. Enɛ ɔ he ɔ, e da blɔ kaa wa maa jaje wa yayami ɔ kɛ tsɔɔ lɛ. Nyɛɛ kane La 32:1-5, nɛ́ nyɛ susu sane bimi nɛ ɔ he:
Mɛni he je nɛ e hi kaa wa maa jaje wa yayami ɔmɛ kɛ tsɔɔ Yehowa pe nɛ wa maa laa nɔ ɔ?
Ke wa jaje wa yayami ɔmɛ kɛ tsɔɔ Yehowa, nɛ jehanɛ hu wa bi yemi kɛ buami kɛ je asafo mi nikɔtɔma amɛ a ngɔ ɔ, lɔ ɔ ma ha nɛ wa he maa jɔ wɔ. Mo je VIDEO ɔ, nɛ́ nyɛ susu sane bimi nɛ nyɛɛ se ɔ he.
Ngɛ video ɔ mi ɔ, mɛni blɔ nɔ nɛ nikɔtɔma amɛ gu kɛ ye bua Canon nɛ e kpale kɛ ba Yehowa ngɔ?
E sa nɛ waa je wa tsui mi nɛ waa kɛ anɔkuale yemi nɛ de nikɔtɔma amɛ nɔ́ fɛɛ nɔ́; a pee klaalo kaa a maa ye kɛ bua wɔ. Nyɛɛ kane Yakobo 5:16, nɛ́ nyɛ susu sane bimi nɛ ɔ he:
Mɛni he je nɛ ke wa tu anɔkuale, nɛ wa de nikɔtɔma amɛ nɔ́ fɛɛ nɔ́ ɔ, e be yee ha mɛ kaa a maa ye bua wɔ ɔ?
Moo jaje o tɔmi ɔ, nɛ o tu anɔkuale kɛ tsɔɔ nikɔtɔma amɛ; mo de mɛ nɔ́ fɛɛ nɔ́, nɛ́ o kplɛɛ yemi kɛ buami nɛ Yehowa kɛ ma ha mo ɔ nɔ
4. Yehowa naa yayami peeli mɔbɔ
Ke nɔ ko nɛ́ e pee yayami nɛ hɛdɔ ngɛ he ɔ kua kaa e kɛ Yehowa mlaahi ma tsu ní ɔ, a jeɔ lɛ kɛ jeɔ asafo ɔ mi. Ke e ba jã a, waa kɛ lɛ bɔɛ hu. Nyɛɛ kane 1 Korinto Bi 5:6, 11, nɛ́ nyɛ susu sane bimi nɛ ɔ he:
Kaa bɔ nɛ masa nyafii haa nɛ ma a tsuo saa a, ke waa kɛ yayami peelɔ ko nɛ e tsakee we e tsui ngɛ bɔe ɔ, kɛ lɔ ɔ ma ná asafo ɔ nɔ he wami ha kɛɛ?
Asafo mi nikɔtɔmahi kaseɔ bɔ nɛ Yehowa naa yayami peeli nɛ a yi mluku ɔ mɔbɔ ha a, nɛ a bɔɔ mɔde kaa a maa su nihi nɛ a je mɛ kɛ je asafo ɔ mi ɔ a he konɛ a ye bua mɛ. Nihi babauu nɛ a je mɛ ngɛ asafo ɔ mi ɔ kpale kɛ ba ekohu, ejakaa e ngɛ mi kaa tsɔsemi nɛ a kɛ ha mɛ ɔ ye mɛ mohu lɛɛ, se lɔ ɔ ha nɛ a yɔse kaa nɔ́ nɛ a pee ɔ dɛ.—La 141:5.
Ngɛ mɛni blɔ nɔ nɛ bɔ nɛ Yehowa kɛ yayami peeli yeɔ ha a tsɔɔ kaa e nuɔ nɔ́ sisi, e naa nɔ mɔbɔ, nɛ e ngɛ suɔmi?
5. Ke wa tsake wa tsui ɔ, Yehowa kɛ wa tɔmi keɔ wɔ
Yesu ngɔ nɔ́ he tomi nɔ́ ko kɛ tsu ní nɛ yeɔ bua wɔ nɛ wa naa bɔ nɛ Yehowa nuɔ he ha ke yayami peelɔ ko tsake e tsui. Nyɛɛ kane Luka 15:1-7, nɛ́ nyɛ susu sane bimi nɛ ɔ he:
Mɛni enɛ ɔ tsɔɔ mo ngɛ Yehowa he?
Nyɛɛ kane Ezekiel 33:11, nɛ́ nyɛ susu sane bimi nɛ ɔ he:
Mɛni nɛ e he hia nɛ waa pee kɛ tsɔɔ ka wa pia wa he nitsɛnitsɛ?
Yehowa ngɛ kaa to hyɛlɔ nɛ́ e susuɔ e to ɔmɛ a he wawɛɛ
NI KOMƐ DEƆ KE: “I ngɛ gbeye yee kaa ke i de asafo mi nikɔtɔma amɛ yayami nɛ i pee ɔ, a ma je mi ngɛ asafo ɔ mi.”
Mɛni o ma de nɔ ko nɛ e nuɔ he jã?
NYA MWƆMI
Ke wa tɔ̃ tɔmi nɛ hɛdɔ ngɛ he, se wa pia wa he ngɛ wa tsui mi, nɛ wa fia wa pɛɛ si kaa wa be jamɛ a yayami ɔ pee hu ɔ, Yehowa kɛ maa ke wɔ.
Mi Nylɔmi
Mɛni he je nɛ e hi kaa wa maa jaje wa tɔmi ɔmɛ kɛ tsɔɔ Yehowa a?
Mɛni e sa nɛ waa pee konɛ Yehowa nɛ ngɔ wa tɔmi ɔmɛ kɛ ke wɔ?
Ke wa tɔ̃ tɔmi ko nɛ hɛdɔ ngɛ he ɔ, mɛni he je nɛ e sa nɛ wa bi asafo mi nikɔtɔma amɛ yemi kɛ buami ɔ?
NÍ KPAHI NƐ MAA YE BUA MO
Moo hyɛ bɔ nɛ Yehowa je mɔbɔ nami nɛ́ a tu he munyu ngɛ Yesaya 1:18 kpo kɛ tsɔɔ nyumu ko ha.
Mɛni blɔ nɔ nɛ asafo mi nikɔtɔmahi bɔɔ mɔde kaa a maa ye bua nihi nɛ a pee yayami nɛ hɛdɔ ngɛ he ɔ?
Moo hyɛ bɔ nɛ a jeɔ suɔmi kɛ mɔbɔ nami kpo kɛ tsɔɔ yayami peeli nɛ a tsakee we a tsui ɔ ha.
Moo kane munyu nɛ ji, “E He Hia Nɛ Ma Kpale Kɛ Ba Yehowa Ngɔ” ɔ konɛ o na nɔ́ he je nɛ nyumu ko nɛ e je anɔkuale ɔ mi ɔ nu he kaa Yehowa gbla lɛ kɛ ba e ngɔ ekohu.