Bɔ Nɛ Waa Kɛ Mɛni Baiblo ɔ Ma Nyɛ Maa Tsɔɔ Wɔ? Womi ɔ Ma Tsu Ní Ha

Tsɔɔ Wɔ womi ɔ ngɛ kaa Baiblo Tsɔɔmi womi ɔ. Womi enyɔ nɛ ɔmɛ tsuo tsɔɔ nihi Baiblo ɔ mi anɔkualehi. Munyuyihi abɔ nɛ ngɛ enɛ ɔ mi ɔ kɛ̃ nɛ ngɛ enɛ ɔ hu mi. Se Tsɔɔ Wɔ womi ɔ sisi numi yi kaa Baiblo Tsɔɔmi womi ɔ. A pee kɛ ha nihi nɛ eko ɔ, Baiblo Tsɔɔmi womi ɔ mi maa wa ha mɛ ɔ. Mi tsɔɔmi munyuhi be Tsɔɔ Wɔ womi ɔ mi, mohu ɔ, nyagbe ningmahi lɛ ngɛ mi. Nyagbe ningma amɛ tsɔɔ munyu komɛ nɛ a ngɛ womi ɔ mi ɔ a sisi kpiti. Sane bimihi be munyuyi ɔmɛ a sisi, nɛ mi nylɔmi dakahi hu be mi. Mohu ɔ, a ngma munyu otihi nɛ je kpo ngɛ ní kasemi ko mi ɔ ngɛ jamɛ a ní kasemi ɔ nyagbe. Ke waa kɛ Tsɔɔ Wɔ womi ɔ tsu we ní ngɛ nyɔhiɔ ko mi po ɔ, wa ma nyɛ ma ha nihi eko be saisaa kaa bɔ nɛ wa haa nihi Baiblo Tsɔɔmi womi ɔ. Kɛ wa ma plɛ kɛ ngɔ Tsɔɔ Wɔ womi nɛ ngɛ slɔɔto ɔ kɛ pee Baiblo mi ní kasemi ha kɛɛ?

MUNYU OTIHI: Behi fuu ɔ, ke waa kɛ nihi ngɛ Baiblo Tsɔɔmi womi ɔ kasee ɔ, wa kaneɔ kuku ɔmɛ nɛ wa biɔ sanehi. Ni komɛ ngɛ nɛ lɔ ɔ maa hi ha mɛ. Se ke nɔ ɔ nui gbi ɔ saminya aloo e nyɛ we ní kanemi saminya hu nɛɛ? O kɛ lɛ ma nyɛ maa kase Tsɔɔ Wɔ womi ɔ. Nyɛ ma nyɛ maa kase munyu oti ɔmɛ nɛ ngɛ ní kasemi ɔ nyagbe ɔ. Lɔ ɔ se ɔ, o ma nyɛ maa wo ní kaselɔ ɔ he wami konɛ e kane kuku ɔmɛ tsuo ngɛ e dɛ he. Waa kɛ nihi ma nyɛ maa kase Baiblo mi anɔkuale ko ngɛ hɛngmɛfia 15 mi. Tsa pi munyuhi tsuo nɛ ngɛ ní kasemi ɔ mi nɛ ngɛ munyu oti ɔmɛ a mi. Enɛ ɔ he ɔ, e sa nɛ tsɔɔlɔ ɔ nɛ dla e he saminya, konɛ e nyɛ nɛ e kɛ ní kaselɔ ɔ nɛ susu oti kpahi nɛ ngɛ ní kasemi ɔ mi ɔ he. Ke nyɛ kase yi ɔ tsuo nyatsɔɔ ɔ, lɛɛ nyɛ ma nyɛ maa ngɔ munyu oti ɔmɛ kɛ nylɔ ní kasemi ɔ mi.

NYAGBE NINGMA: A to munyuhi nɛ ngɛ nyagbe ningma amɛ a mi ɔ a nya setsɔsetsɔ kaa bɔ nɛ a to nya ngɛ yi ɔmɛ a mi ɔ. Ke tsɔɔlɔ ɔ suɔ ɔ, e kɛ ní kaselɔ ɔ ma nyɛ ma susu nyagbe ningma amɛ nɛ a ngɛ Tsɔɔ Wɔ womi mi ɔ a he.