Mo Ná Marginal Reference Ɔmɛ A He Se

Marginal Reference ɔmɛ nɛ a ngɛ New World Translation of the Holy Scriptures ɔ mi ɔ tsɔɔ ngmami kpahi nɛ a ngɛ Baiblo ɔ mi nɛ a kɛ a sibi kpa gbi ngɛ munyu ko he ɔ. Ngmami nɛ ɔmɛ deɔ níhi fuu kɛ kɔɔ jamɛ a munyu ɔ he hulɔ. Bɔ nɛ pee nɛ o na Marginal Reference ɔmɛ ɔ, mo hla ningma okadi nyafii ko nɛ ngɛ munyungu ko nya a. Ke o ngɛ Baiblo ɔ nɔ́ nɛ a print ɔ kanee ɔ, lɛɛ mo hla jamɛ a ningma okadi ɔ nɔuu ngɛ kpɛti je ɔ konɛ o na ngmami kpahi nɛ kɔɔ he ɔ. Se ngɛ jw.org loo JW Library^® ɔ nɔ ɔ, moo nyɛ ningma okadi nyafii ɔmɛ a nɔ konɛ o na ngmami kpahi nɛ kɔɔ jamɛ a munyu ɔ he.

Marginal Reference ɔmɛ ma nyɛ ma ha nɛ o na ní nɛ ɔmɛ nɛ nyɛɛ se ɔ kɛ ní kpahi:

Ngmami kpahi nɛ tu jamɛ a sane ɔ he munyu: Marginal Reference ɔ ma nyɛ ma ha nɛ o na sane ko nɛ o ngɛ kanee ɔ nɔuu ngɛ Baiblo womi kpahi a mi. Kaa nɔ hyɛmi nɔ́ ɔ, moo hyɛ 2 Samuel 24:1 kɛ 1 Kronika 21:1 ɔ.

Munyu nɛ a tsɛ se: Marginal Reference ɔ haa nɛ wa naa he nɛ a tsɛ munyu ko loo munyuza komɛ a se kɛ je. Kaa nɔ hyɛmi nɔ́ ɔ, moo hyɛ Mateo 4:4 kɛ 5 Mose 8:3 ɔ.

Gbamihi nɛ a ba mi: Marginal Reference ɔ haa nɛ wa naa gbami komɛ kɛ bɔ nɛ a plɛ kɛ ba mi ha. Kaa nɔ hyɛmi nɔ́ ɔ, moo hyɛ Mateo 21:5 ɔ kɛ Zakaria 9:9 ɔ.