Yesu “Kase Tue Bumi”

Yesu buɔ Yehowa tue be fɛɛ be. (Yoh. 8:29) Ke jã a, lɛɛ mɛni he je nɛ Baiblo ɔ de ke: “E kase tue bumi kɛ je amanehluhi nɛ e na a mi” ɔ?—Heb. 5:8.

Benɛ Yesu ngɛ zugba a nɔ ɔ, e kɛ si fɔfɔɛ slɔɔtohi kpe. E kɛ si fɔfɔɛ nɛ ɔmɛ eko kpi benɛ e ngɛ hiɔwe ɔ. Kaa nɔ hyɛmi nɔ́ ɔ, adesahi nɛ a suɔ Yehowa nɛ a yi mluku ɔ lɛ a tsɔse lɛ. (Luka 2:51) Jami hɛ mi nyɛɛli nɛ a yi mi wa kɛ ma nɔ yeli te si kɛ wo Yesu wawɛɛ. (Mat. 26:59; Maak. 15:15) Jehanɛ hu ɔ, “e ba e he si nɛ e bu tue hluu kɛ ya su gbenɔ mi” po. E gbo gbenɔ yeyee.—Filip. 2:8.

Si fɔfɔɛ nɛ ɔmɛ nɛ Yesu kɛ kpe benɛ e ngɛ zugba a nɔ ɔ ha nɛ e kase bɔ nɛ e maa pee tue bumi ha ngɛ blɔ ehe nɔ. Enɛ ɔ he ɔ, Yesu ma nyɛ ma ba pee Matsɛ nɛ e se be, kɛ Osɔfo Nɔkɔtɔma nɛ e ma nyɛ maa nu wɔ sisi saminya. (Heb. 4:15; 5:9) Akɛnɛ Yesu kase tue bumi kɛ gu amanehlu nɛ e na a nɔ he je ɔ, Yehowa fiɛ we e he kulaa. Ke wɔ hu wa ya nɔ nɛ wa bu Yehowa tue ngɛ si fɔfɔɛhi nɛ a mi wa nɛ waa kɛ maa kpe ɔ mi ɔ, lɔ ɔ ma ha nɛ wa he jua maa wa ngɛ Yehowa hɛ mi, nɛ wa ma nyɛ ma tsu ní tsumi fɛɛ ko nɛ e kɛ maa wo wa dɛ ɔ.—Yak. 1:4.