Tu Nɛ A Fiaa Nihi Ngɛ Sukuuhi A Mi​​—Mɛni Nɛ Baiblo ɔ De?

Ngɛ May 24, 2022 ɔ nɔ ɔ, oslaa ko ba ngɛ Uvalde ma wayoo nɛ ngɛ Texas, U.S.A. The New York Times ɔ tsɔɔ kaa “nyumu ko ya fia sukuu bi 19 kɛ tsɔɔli enyɔ tu . . . ngɛ Robb Elementary School” ɔ.

Aywilɛho sane ji kaa, yi wu tso ní peepeehi kaa kikɛ ɔ pɔ he wawɛɛ. USA Today ɔ tsɔɔ kaa ngɛ United States pɛ ɔ, “tu fiaami nɛ ya nɔ ngɛ sukuuhi a mi ngɛ jeha nɛ be ɔ mi ɔ su 249​​—nɛ enɛ ɔ hiɛ pe tu fiaami nɛ ya nɔ kɛ je jeha 1970.”

Mɛni he je nɛ yi wu tso ní peepeehi kaa kikɛ ɔ yaa nɔ ɔ? Kɛ wa ma plɛ kɛ da ní yayamihi kaa kikɛ ɔ a nya ha kɛɛ? Anɛ hɛ nɔ kami ko ngɛ kaa yi wu tso ní peepeehi kaa kikɛ ɔ se maa po lo? Baiblo ɔ ha sane bimi nɛ ɔmɛ a heto.

Mɛni he je nɛ yi wu tso ní peepeehi ngɛ nɔ yae wawɛɛ ngɛ je ɔ mi ɔ?

•  Baiblo ɔ kale be nɛ wa ngɛ mi nɛ ɔ kaa “nyagbe ligbi ɔmɛ,” nɛ nihi maa pee nihi nɛ a “a nui nɔ́ he hí nɔ,” kɛ nihi nɛ “a hɛ mi jɔɛ,” nɛ a kɛ a he maa wo yi wu tso ní peepeehi kɛ basabasa peemi mi. Nihi nɛ a jeɔ su nɛ ɔmɛ kpo ɔ maa “hi a hɛ mi yae ngɛ yayami peemi mi wawɛɛ.” (2 Timoteo 3:1-5, 13) Ke o suɔ nɛ o kase enɛ ɔ he ní fuu ɔ, moo kane munyu nɛ yi ji Did the Bible Predict the Way People Think and Act Today?”

Nihi fuu biɔ ke, ‘Mɛni he je nɛ Mawu tsi we ní yayamihi kaa tu nɛ a fiaa nihi ngɛ sukuuhi a mi ɔ nya a?’ Moo kane munyu nɛ ji “Mɛni He Je Haomihi Baa Nimli Kpakpahi A Nɔ ɔ?” konɛ o na heto nɛ Baiblo ɔ kɛ ha.

Kɛ wa ma plɛ kɛ da yi wu tso ní peepeehi kaa kikɛ ɔ a nya ha kɛɛ?

•  “Níhi tsuo nɛ a ngma ngɔ to ɔ, a ngma kɛ ha wɔ ní tsɔɔmi, konɛ . . . kɛ gu bua womi nɛ jeɔ Ngmami ɔ mi ɔ nɔ ɔ, wa ná hɛ kɛ nɔ fɔmi.”​—Roma Bi 15:4.

Baiblo sisi tomi mlaahi ma nyɛ maa ye bua mo nɛ o nyɛ nɛ o da yi wu tso ní peepeehi nɛ yaa nɔ ngɛ je nɛ ɔ mi ɔ nya. Hyɛ Awake! womi tɛtlɛɛ nɛ yi ji “Will Violence Ever End?” ɔ konɛ o na enɛ ɔ he ní fuu.

Fɔli ma nyɛ maa kane munyu nɛ yi ji “Disturbing News Reports and Your Children” ɔ, konɛ a na ga womihi nɛ tsɔɔ bɔ nɛ fɔli ma plɛ kɛ ye bua a bimɛ ha konɛ a nyɛ nɛ a da amaniɛ bɔmihi nɛ woɔ nɔ he gbeye ɔ nya.

Anɛ yi wu tso ní peepeehi a se maa po ligbi ko lo?

•  “E heɔ a yi wami kɛ jeɔ yi mi wami, kɛ awi yemi mi.”​​—La 72:14.

•  “A kɛ a klaate ɔmɛ maa sɔ̃ kpakplaahi; nɛ akplɔ ɔmɛ hu, a kɛ maa sɔ̃ tso he suami hahi. Je ma amɛ be ta hwue hu gblegbleegble; a be dlae kɛ ha ta hu kɔkɔɔkɔ.”​—Mika 4:3.

Mawu maa pee níhi nɛ adesahi nyɛ we nɛ a pee ɔ. E hiɔwe Matsɛ Yemi ɔ ma kpata ta hwumi níhi tsuo a hɛ mi, nɛ e ma je yi wu tso ní peepeehi tsuo kɛ je. Moo kane munyu nɛ yi ji “Under God’s Kingdom ‘Peace Will Abound’” ɔ konɛ o kase níhi fuu kɛ kɔ nɔ́ nɛ Mawu Matsɛ Yemi ɔ ma tsu ɔ he.