Tu Nɛ A Kɛ Ngɛ Nihi Gbee Wawɛɛ Nɛ́ Ngɛ Nɔ Yae Ngɛ Je ɔ Mi Tsuo​—Mɛni Nɛ Baiblo ɔ De?

Ngɛ July 2022 ɔ, tu nɛ a fia kɛ gbe nihi ɔ ya nɔ ngɛ je kɛ wɛ, nɛ enɛ ɔ ha nɛ nihi a he mi po:

• “Japan ma hɛ mi nyɛɛlɔ ko nɛ nihi buu lɛ wawɛɛ [nɛ be ko nɛ be ɔ e ji Prime Minister nɛ a tsɛɛ lɛ Shinzo Abe] nɛ́ a gbe lɛ ɔ gbenɔ hao Japan ma a tsuo nɛ e pee je ɔ tsuo nyakpɛ, ejakaa a pɔɛ yi wu tso ní peemi ngɛ Japan ma a mi nɛ jehanɛ hu, a ngɛ mlaa pɔtɛɛhi nɛ kudɔɔ bɔ nɛ a kɛ tu ma tsu ní ha.”​—July 10, 2022, The Japan Times.

• “Denmark ma a mi bi ɔmɛ a nya kpɛ a he wawɛɛ benɛ nyumu ko kɛ tu gbe nihi etɛ ngɛ tsuapo ngua ko mi ngɛ Copenhagen ɔ.”​—July 4, 2022, Reuters.

• “South Africa: Nihi 15 gbo benɛ nyumu komɛ ya fia tu kɛ wo nihi a kpɛti ngɛ dã numi he ko ngɛ Soweto ma a mi ɔ.”​—July 10, 2022, The Guardian.

• “A kɛ tu gbe nihi nɛ a he hiɛ pe 220 ngɛ U.S. ngɛ July 4 Otsi ɔ mi, nɛ́ ji be nɛ ma a tsuo yɛ ní tsumi nɛ a kɛ jɔɔ a he ɔ nɔ.”​—July 5, 2022, CBS News.

Anɛ hɛ nɔ kami ko ngɛ kaa yi wu tso ní peepee nɛ ɔmɛ a se maa po lo? Mɛni nɛ Baiblo ɔ de?

Yi Wu Tso Ní Peepeehi A Se Maa Po

Baiblo ɔ kale wa be nɛ ɔ kaa “nyagbe ligbi ɔmɛ,” be nɛ́ nihi maa pee a he nihi nɛ a hɛ mi jɔɛ, nɛ a yi mi wa a. (2 Timoteo 3:1, 3) Yi wu tso ní peepee nɛ ɔmɛ haa nɛ nihi yeɔ gbeye ngɛ si himi ɔ mi. (Luka 21:11) Se Baiblo ɔ wo si kaa, be ko maa ba nɛ yi wu tso ní peepee se maa po nɛ ‘haomi ko haomi ko be nihi a nya gbae, nɛ tue mi jɔmi kɛ he jɔmi maa hi a we ɔmɛ a mi.’ (Yesaya 32:18) Ngɛ mɛni blɔ nɔ nɛ yi wu tso ní peepee se maa po?

Mawu ma kpata yiwutsotsɛmɛ a hɛ mi, nɛ e ma puɛ ta hwumi níhi tsuo.

• “Se yiwutsotsɛmɛ, kɛ yayami peeli lɛɛ Mawu ma kpata a hɛ mi kaa bɔ nɛ a hiaa tso ngɛ zu mi kɛ fɔɔ si ɔ.”​—Abɛ 2:22.

• “[Mawu] haa ta se poɔ ngɛ je ɔ mi tsuo; e kuɔ kɛ̃ɛ̃hi, kɛ akplɔhi a mi, nɛ e kɛ la sãã ta zugba lɛhi!”​—La 46:9.

Mawu ma je níhi tsuo nɛ ngɔɔ yi wu tso ní peepee kɛ baa a kɛ je kɛ gu ní nɛ e maa tsɔɔ adesahi konɛ a hi si ngɛ tue mi jɔmi mi ɔ nɔ.

• ‘Nɔ ko nɔ ko be e nyɛmi awi yee ngɛ ye yo klɔuklɔu ɔ nɔ, nɛ nɔ ko nɔ ko be e nyɛmi hɛ mi kpatae. Ejakaa zugba a tsuo maa le Yehowa kaa bɔ nɛ wo hyi tɔ kɛ nyu ɔ.’​—Yesaya 11:9.

• Amlɔ nɛ ɔ po ɔ, Mawu ngɛ adesahi nɛ a ngɛ je kɛ wɛ ɔ ní tsɔɔe konɛ a yu a he kɛ je yi wu tso ní peepeehi kɛ ta hwumi níhi nɛ a kɛ tsuɔ ní ɔ he, nɛ́ ‘a kɛ a klaate ɔmɛ nɛ sɔ̃ kpakplaahi; nɛ akplɔ ɔmɛ hu, a kɛ sɔ̃ tso he suami hahi.’​—Mika 4:3.

Ke o suɔ nɛ o le si nɛ Baiblo ɔ wo kɛ kɔ je ko nɛ nɔ ko be gbeye yee ngɛ mi ɔ he ɔ, moo kane munyu nɛ ji “Freedom From Fear​—Is It Possible?”

Ke o suɔ nɛ o le níhi fuu kɛ kɔ bɔ nɛ yi wu tso ní peepeehi a se maa po kulaa ha a he ɔ, moo kane munyu nɛ ji “Peace on Earth at Last!”